Gyɛnɛsese 6:1-22

  • Nyamenle amra ragyale mraalɛ wɔ azɛlɛ ye azo (1-3)

  • Bɛwo Nɛfelɛm ne mɔ (4)

  • Alesama amumuyɛyɛlɛ ne maanle Gyihova lile nyane (5-8)

  • Bɛse Nowa ɛbobɔ ɛlɛne (9-16)

  • Nyamenle hanle kɛ Azuyilɛ bara (17-22)

6  Mekɛ mɔɔ akee menli bɔle ɔ bo kɛ bɛso wɔ azɛlɛ ne azo na bɛwole mralɛ mraalɛ la,  nɔhalɛ Nyamenle ne amra ne mɔ*+ nwunle kɛ menli amra mraalɛ ne mɔ anwo yɛ fɛ. Yemɔti bɛvale mraalɛ dodo biala mɔɔ bɛkulo la bɛyɛle bɛ ye mɔ.  Na Gyihova hanle kɛ: “Me sunsum ɛnrɛnyia sonla nwo abotane dahuu,+ ɔluakɛ ɔle nwonane ala.* Ɔti ye ngoane mekɛ bayɛ ɛvolɛ 120.”+  Zɔhane mekɛ ne yɛɛ ɔ nzi, ɛnee Nɛfelem* ne mɔ wɔ azɛlɛ ne azo. Mekɛ zɔhane, nɔhalɛ Nyamenle ne amra ne mɔ nee menli amra mraalɛ lale, na bɛwole mralɛ mrenyia. Bɛmɛ a bɛle kakanyinlima ne mɔɔ dɛnlanle aze tete ne na bɛliele duma la.  Yemɔti Gyihova nwunle kɛ sonla amumuyɛyɛlɛ ne ɛyɛ kpole wɔ azɛlɛ ne azo, yɛɛ ye ahonle nu nzuzulɛ biala le ɛtane mekɛ kɔsɔɔti.+  Gyihova nlunle ɔ nwo* kɛ ɔbɔle menli wɔ azɛlɛ ne azo la, na ɔlile nyane wɔ ye ahonle nu.*+  Ɔti Gyihova hanle kɛ: “Mesɛkye menli mɔɔ mebɔ bɛ la meavi azɛlɛ ne azo, sonla nee sua zo nyɛmoa, nane mɔɔ twenle bɛ nwo aze* yɛɛ abɔdeɛ mɔɔ tu dua anwomanyunlu, ɔluakɛ menlu me nwo kɛ membɔle bɛ la.”  Noko Nowa nyianle Gyihova anyunlu ɛlolɛ.  Nowa anwo tetedwɛkɛ ɛne. Ɛnee Nowa le tenlenenli.+ Ɔ nwo annyia ngehanleɛ* wɔ ye mekɛ zo amra* avinli. Nowa nee nɔhalɛ Nyamenle ne luale.+ 10  Nzinlii Nowa wole mralɛ mrenyia nsa, Hyɛm, Ham yɛɛ Gyeefɛte.+ 11  Noko ɛnee azɛlɛ ne ɛzɛkye wɔ nɔhalɛ Nyamenle ne anye zo, na ɛnee basabasayɛlɛ ɛyi azɛlɛ ne azo. 12  Nyamenle nleanle azɛlɛ ne na ɛnee amgba yezɛkye;+ ɛnee nwonane* kɔsɔɔti ɛzɛkye bɛ ndenle wɔ azɛlɛ ne azo.+ 13  Ɛhye anzi Nyamenle hanle hilele Nowa kɛ: “Mebɔ kpɔkɛ kɛ mesɛkye nwonane kɔsɔɔti, ɔluakɛ bɛdabɛ ti, basabasayɛlɛ ɛyi azɛlɛ ne azo. Ɔti mesɛkye bɛ nee azɛlɛ ne.+ 14  Fa gɔfa baka bobɔ ɛlɛne.*+ Ɛbahyehyɛ ɛlɛne ne anu ekpumgbunli ekpumgbunli na wɔava bilewu+ wɔaha ɔ kunlu nee ɔ nzi. 15  Kɛ ɛbayɛ ye la ɛne: Ɔwɔ kɛ ɛlɛne ne tendenle yɛ kubit* 300, ye tɛtɛlɛ yɛ kubit 50, yɛɛ ye anwumahɔlɛ yɛ kubit 30. 16  Ɛbayɛ nvɛnzɛlɛ mɔɔ bamaa bɛanyia wienyi* wɔ ɛlɛne ne anu la, ɔwɔ kɛ adenle mɔɔ la ɛlɛne ne anwuma nee nvɛnzɛlɛ ne avinli la yɛ kubit ko. Yɛ ɛlɛne ne anlenkɛ ne wɔ ye foa ko+ na yɛ ye nzɛzo nsa; mɔɔ limoa, mɔɔ tɔ zo nwiɔ yɛɛ mɔɔ tɔ zo nsa. 17  “Na mame, mebamaa azule ayi+ azɛlɛ ne azo na yeazɛkye nwonane biala mɔɔ ngoane ɛnwomenle* wɔ ye nu wɔ azɛlɛ ne azo la. Debie biala mɔɔ wɔ azɛlɛ ne azo la bazɛkye.+ 18  Me nee wɔ ɛlɛyɛ ngyekyeleɛ, na ɛbahɔ ɛlɛne ne anu, ɛdawɔ, ɛ mra mrenyia ne mɔ, ɛ ye yɛɛ ɛ mra mrenyia ne mɔ aye mɔ.+ 19  Na fa anyewɔzo abɔdeɛ biala nwiɔ nwiɔ,+ nyinli nee belɛ,+ kɔ ɛlɛne ne anu amaa bɛ nee wɔ anyia ngoane; 20  abɔdeɛ mɔɔ tu kɛ mɔɔ bɛ ɛsaso de la, sua zo nyɛmoa kɛ mɔɔ bɛ ɛsaso de la, yɛɛ nane mɔɔ twenle bɛ nwo aze wɔ azɛlɛ ne azo la amuala kɛ mɔɔ bɛ ɛsaso de la. Ɛbava biala nwiɔ nwiɔ wɔaboka ɛ nwo amaa bɛanyia ngoane.+ 21  Na wɔmɔ, ɛbaboɔboa aleɛ biala mɔɔ bɛbali la anloa wɔazie+ amaa bɛ nee nane ne mɔ ali.” 22  Na Nowa yɛle mɔɔ Nyamenle hanle hilele ye la kɔsɔɔti. Ɔyɛle ye zɔ pɛpɛɛpɛ.+

Ɔbodwɛkɛ

Anzɛɛ “anwumabɔvolɛ ne mɔ.”
Anzɛɛ ɔkola ɔkile, “ɔluakɛ ɔyɛ ye ninyɛne nwonane nu.”
Ɔbayɛ kɛ ɔ bo kile “Azedolɛma,” ɛhye kile, menli mɔɔ maa awie mɔ tɔ aze. Nea Edwɛkɛbohilelɛ.
Anzɛɛ “lile nyane.”
Hibulu aneɛ nu, “na ye ahonle lile nyane.”
Nea Gyn 1:24 ɔbdw.
Anzɛɛ “Ɛnee edwɛkɛ ɛnle ɔ nwo.”
Hibulu aneɛ nu, “ye awolɛndoazo ne.”
Anzɛɛ “menli.”
Hibulu aneɛ nu, “ɛlɛka”; ɔle kpole kɛ meli la.
Kubit ko le M 22. Nea Mok. B14.
Hibulu, tso′har. Bie mɔ bu ye kɛ tso′har le tokule mɔɔ le kubit ko wɔ sua ti zo la, na ɔnle tokule mɔɔ wienyi fa nu anzɛɛ nvɛnzɛlɛ.
Anzɛɛ “ngoane sunsum.”