Gyɛnɛsese 30:1-43

  • Belehaa wole Dan nee Nafetalae (1-8)

  • Zelepa wole Gaade nee Ahya (9-13)

  • Liya wole Yesakaa nee Zɛbulɛn (14-21)

  • Relahyɛle wole Dwosefi (22-24)

  • Gyekɔbo mboane ne mɔ yɛle dɔɔnwo (25-43)

30  Mɔɔ Relahyɛle nwunle kɛ ɔ nee Gyekɔbo ɛtɛwole ralɛ biala la, ɔ nye bolole ɔ diema raalɛ ne na ɔzele Gyekɔbo kɛ: “Maa menwo mralɛ anrɛɛ mebawu.”  Ɛhye ati Gyekɔbo vale Relahyɛle anwo ɛya na ɔhanle kɛ: “Medame a mele Nyamenle mɔɔ ɛzi wɔ adenle kɛ ɛmmawo mralɛ la ɔ?”*  Ɔti Relahyɛle zele ye kɛ: “Me sonvolɛ raalɛ Belehaa ɛne.+ Ɛ nee ye ɛla amaa yeawo mralɛ yeamaa me,* na medame noko mealua ɔ nwo zo meanyia mralɛ.”  Ɔti ɔvale ye sonvolɛ Belehaa ɔmaanle Gyekɔbo kɛ ɔ ye, na ɔ nee ye lale.+  Belehaa nrenzɛle na ɔwole ralɛ nrenyia ɔmaanle Gyekɔbo.  Na Relahyɛle hanle kɛ: “Nyamenle ɛyɛ me ndɛnebuavolɛ na eza yedie me ne, ɔti yemaa me ralɛ nrenyia.” Yemɔti ɔdonle ye Dan.*+  Relahyɛle sonvolɛ Belehaa nrenzɛle bieko na ɔwole ralɛ nrenyia mɔɔ tɔ zo nwiɔ ɔmaanle Gyekɔbo.  Akee Relahyɛle hanle kɛ: “Me nee me diema raalɛ ne ɛpele kpole kpalɛ. Na meli konim!” Ɔti ɔdonle ye Nafetalae.*+  Mɔɔ Liya nwunle kɛ ye awolɛ ne ɛde ɛhɔ la, ɔvale ye sonvolɛ raalɛ Zelepa ɔmaanle Gyekɔbo kɛ ɔ ye.+ 10  Na Liya sonvolɛ Zelepa wole ralɛ nrenyia maanle Gyekɔbo. 11  Akee Liya hanle kɛ: “Me ti ɛyɛ boɛ!” Ɔti ɔdonle ye Gaade.*+ 12  Ɛhye anzi, Liya sonvolɛ Zelepa wole ralɛ nrenyia mɔɔ tɔ zo nwiɔ maanle Gyekɔbo. 13  Akee Liya hanle kɛ: “Me nye ɛlie! Ɔluakɛ mraalɛ ne mɔ bavɛlɛ me anyelielɛ.”+ Ɔti ɔdonle ye Ahya.*+ 14  Mɔɔ hwiiti ɛdelɛ mekɛ ne dwule la, ɛnee Wulubɛn+ luolua na ɔhɔnwunle mandileki ma wɔ ɛya ne anu. Ɔvale ɔrɛlɛle ye mame Liya. Na Relahyɛle zele Liya kɛ: “Mesɛlɛ wɔ, maa me ɛ ra ne mandileki ne bie.” 15  Ɔti Liya zele ye kɛ: “Ɛsuzu kɛ ɔle debie ekyi kɛ wɔlie me hu la ɔ?+ Eza ɛdie me ra ne mandileki noko ɔ?” Na Relahyɛle hanle kɛ: “Ɔle kpalɛ. Ɛ ra ne mandileki ne ati, ɛnɛ nɔe, ɔ nee wɔ bala.” 16  Nɔsolɛ nu mɔɔ Gyekɔbo vi ɛbɔ nu ɛlɛba la, Liya hɔyiale ye na ɔhanle kɛ: “Medame a ɛ nee me bala a, ɔluakɛ meva me ra ne mandileki ne mebɔ wɔ ɛkpa mewie.” Ɔti ɔ nee ye lale zɔhane nɔe ne. 17  Na Nyamenle diele Liya asɔneyɛlɛ na ɔnrenzɛle na ɔwole ralɛ nrenyia mɔɔ tɔ zo nnu ɔmaanle Gyekɔbo. 18  Akee Liya hanle kɛ: “Nyamenle ɛva me ahatualɛ* ɛmaa me, ɔluakɛ menvale me sonvolɛ ne memaanle me hu.” Ɔti ɔdonle ye Yesakaa.*+ 19  Liya nrenzɛle bieko na ɔwole ralɛ nrenyia mɔɔ tɔ zo nsia la ɔmaanle Gyekɔbo.+ 20  Akee Liya hanle kɛ: “Nyamenle ɛhyɛ me debie kpalɛ. Akee me hu balie me ado nu,+ ɔluakɛ mewo mralɛ mrenyia nsia memaa ye.”+ Ɔti ɔdonle ye Zɛbulɛn.*+ 21  Ɛhye anzi, ɔwole ralɛ raalɛ na ɔdonle ye Daena.+ 22  Akee Nyamenle hakyele Relahyɛle, na ɔdiele ye asɔneyɛlɛ na ɔmaanle ɔnrenzɛle.*+ 23  Ɔnrenzɛle na ɔwole ralɛ nrenyia. Akee ɔhanle kɛ: “Nyamenle ɛye me anyiemgba ne ɛvi me nwo zo!”+ 24  Ɔti ɔdonle ye Dwosefi,*+ na ɔhanle kɛ: “Gyihova ɛmaa me ralɛ nrenyia bieko.” 25  Mɔɔ Relahyɛle wole Dwosefi la, ɛkɛ ne ala Gyekɔbo zele Leeban kɛ: “Maa me adenle maa mengɔ me sua zo nee me azɛlɛ zo.+ 26  Fa me ye mɔ nee me mra ne mɔ mɔɔ bɛdabɛ ti mezonle wɔ la maa me maa mengɔ, ɔluakɛ ɛze kɛzi mezonle wɔ la.”+ 27  Akee Leeban zele ye kɛ: “Saa menyia ɛ nyunlu ɛlolɛ a,—menwu daselɛ mɔɔ kile kɛ ɛdawɔ ti Gyihova ɛlɛyila me la.” 28  Na ɔdoale zo kɛ: “Ka wɔ ahatualɛ mɔɔ ɛbalie la kile me na mebava meamaa wɔ.”+ 29  Ɔti Gyekɔbo zele ye kɛ: “Ɛze kɛzi mezonle wɔ nee kɛzi wɔ nyɛmoa ɛyɛ kpalɛ wɔ me sa nu la;+ 30  ɛnee ɛlɛ nyɛmoa ekyi bie kolaa na meara, noko membale la Gyihova ɛyila wɔ ɛmaa wɔ nyɛmoa ne mɔ ɛyɛ dɔɔnwo. Yemɔti mekɛ boni a mebayɛ debie meamaa me sua nu amra a?”+ 31  Akee ɔbizale ye kɛ: “Duzu a menva memaa wɔ a?” Na Gyekɔbo hanle kɛ: “Mmamaa me debie biala! Saa ɛbayɛ deɛ ko ɛhye wɔamaa me a, yemɔ mebanlea wɔ nyɛmoa ne mɔ bieko na meabɔ bɛ nwo bane.+ 32  Mebava wɔ nyɛmoa ne mɔ amuala anu ɛnɛ. Ɛbaye boane biala mɔɔ ɔ nwo le ndetɛndeta yɛɛ boaneralɛ biala mɔɔ ɔ nwo du yɛɛ abɔnkye belɛ biala mɔɔ ɔ nwo le ndetɛndeta la wɔazie ahane. Ɔvi ɛnɛ mɔɔ kɔ la, ɛhye mɔ a bayɛ me ahatualɛ a.+ 33  Na saa kenle bie ɛbanea me ahatualɛ ne a, me tenleneyɛlɛ* ne adendɛ amaa me; saa ɛnwu abɔnkye belɛ biala mɔɔ ɔ nwo ɛnle ndetɛndeta yɛɛ boaneralɛ biala mɔɔ ɔ nwo ɛnlu la wɔ me ɛkɛ a, ɔkile kɛ menwuale.” 34  Ɔti Leeban hanle kɛ: “Ɔle kpalɛ! Yɛ ye kɛ mɔɔ wɔha la.”+ 35  Yemɔti kenle ko ne, ɔyele mbɔnkye nyinli mɔɔ anwo le meɛbea nee ndetɛndeta nee mbɔnkye mbelɛ anwo ndetɛndeta ne mɔ kɔsɔɔti, boaneralɛ biala mɔɔ ye ɛleka bie le fufule nee mɔɔ ɔ nwo du la ɔmaanle ɔ mra mrenyia ne mɔ kɛ bɛnlea bɛ. 36  Ɛhye anzi, Leeban hɔle ɛleka mɔɔ ɔ nee Gyekɔbo avinli le kenle nsa adenle la, na Gyekɔbo nleanle Leeban mboane ne mɔ mɔɔ hale la. 37  Akee Gyekɔbo pɛle setɔlɛse, alemɔndo yɛɛ pilen mbaka amolɛ, ɔyeyele nwolɛ abonle ne bie ɔmaanle bɛ kunlu fufule ne vindele. 38  Akee ɔvale mbaka ne mɔ mɔɔ ɔyeyele nwolɛ la ɔguale nyɛmoa ne mɔ anyunlu, ahuma ne mɔ anu, ninyɛne mɔɔ bɛno nzule wɔ nu la anu, wɔ ɛleka mɔɔ nyɛmoa ne mɔ bano nzule la, amaa saa bɛba kɛ bɛbanlo nzule a bɛavola bɛ nwo wɔ ɛkɛ. 39  Ɔti nyɛmoa ne mɔ fola bɛ nwo wɔ mbaka ne mɔ anwo ɛkɛ, na nyɛmoa ne mɔ wo mralɛ mɔɔ bɛ nwo le meɛbea nee ndetɛndeta la. 40  Akee Gyekɔbo yele mboane mralɛ ne mɔ ziele ahane na ɔmaanle nyɛmoa ne mɔ nee nyɛmoa mɔɔ bɛ nwo le meɛbea nee mɔɔ bɛ nwo du la kɔsɔɔti mɔɔ bɛwɔ Leeban ɛdeɛ ne anu la anye bɔle zolɛ. Akee ɔyele ye nyɛmoa ɛdeɛ ne ɔziele ahane na yeanva bɛ yeambɔ Leeban ɛdeɛ ne anu. 41  Na saa nane ne mɔ mɔɔ anwo yɛ se la ɛlɛfola bɛ nwo a, Gyekɔbo fa mbaka ne gua ahuma mɔɔ nane ne mɔ no nzule wɔ nu la anu wɔ bɛ nyunlu ɛkɛ na ɔmaa bɛfola bɛ nwo wɔ mbaka ne mɔ anwo. 42  Noko saa nane ne mɔ anwo ɛnyɛ se a, yemɔ ɔnva mbaka ne ɔngua ɛkɛ. Ɔti nane ne mɔ mɔɔ bɛ nwo ɛnyɛ se la yɛle Leeban ɛdeɛ dahuu yɛɛ mɔɔ bɛ nwo yɛ se la yɛle Gyekɔbo ɛdeɛ.+ 43  Na nrenyia ne nyianle ɔ nwo kpole kpalɛ, na ɔnyianle nyɛmoa, azonvolɛ mrenyia nee mraalɛ, yɛɛ afunlumu nee asoaso dɔɔnwo.+

Ɔbodwɛkɛ

Anzɛɛ “ɛzɔ wɔ awodeɛ ne anloa la ɔ?”
Hibulu aneɛ nu, “amaa yeawo ralɛ yeado me gyakɛ azo.”
Ɔ bo kile “Ndɛnebuavolɛ.”
Ɔ bo kile “Me Ɛpelelɛ.”
Ɔ bo kile “Me Ti Ɛyɛ Boɛ.”
Ɔ bo kile “Anyelielɛ.”
Anzɛɛ “ɛkpabɔdeɛ.”
Ɔ bo kile “Ɔle Ahatualɛ.”
Ɔ bo kile “Ɛlie Ɛdo Nu.”
Hibulu aneɛ nu, “Nyamenle diele ye na ɔdukuele ye awodeɛ ne.”
Duma Dwosefaya mɔɔ bɛpɛ ye sinli la. Ɔ bo kile “Gyaa Ɛva Bie Ɛboka Nwo (Ɛmaa Ɔzo).”
Anzɛɛ “nɔhalɛlilɛ.”