Gyɛnɛsese 16:1-16
-
Heega nee Yehyemɛle (1-16)
16 Ebilam aye Sɛlae anwo ralɛ,+ noko ɛnee ɔlɛ Yigyibitinli sonvolɛ bie mɔɔ bɛfɛlɛ ye Heega.+
2 Ɔti Sɛlae zele Ebilam kɛ: “Mesɛlɛ wɔ tie! Gyihova ammaa meanwo ralɛ. Mesɛlɛ wɔ, ɛ nee me sonvolɛ ye ɛla. Bie a ɔbawo mralɛ yeamaa me.”+ Yemɔti Ebilam diele mɔɔ Sɛlae hanle la.
3 Mɔɔ Ebilam lile ɛvolɛ bulu wɔ Keena azɛlɛ zo la, Ebilam aye Sɛlae vale ye sonvolɛ Yigyibitinli Heega maanle ɔ hu Ebilam kɛ ɔ ye.
4 Yemɔti ɔ nee Heega lale, na ɔnrenzɛle. Mɔɔ ɔnwunle kɛ yenrenzɛ la, ɛnee akee ɔmbu ɔ menle raalɛ ne.
5 Ɛhye ati Sɛlae hanle hilele Ebilam kɛ: “Ngyegyelɛ mɔɔ ɛra me nwo zo la vi wɔ. Medame a menvale me sonvolɛ ne memaanle wɔ a,* noko mɔɔ ɔnwunle kɛ yenrenzɛ la, akee ɔmbu me. Gyihova ɛbua me nee wɔ avinli ndɛne.”
6 Ɔti Ebilam zele Sɛlae kɛ: “Nea! Wɔ sonvolɛ ne wɔ ɛ sa nu. Debie biala mɔɔ ɛnea a ɔle kpalɛ la fa yɛ ye.” Akee Sɛlae hilele ye nyane, na ɔnriandile ɔvile ɔ nwo ɛkɛ.
7 Nzinlii Gyihova anwumabɔvolɛ nwunle ye wɔ nzubula bie mɔɔ wɔ Hyɔɔ adenle zo wɔ fienemgbole ne anu la anwo.+
8 Na ɔhanle kɛ: “Heega, Sɛlae sonvolɛ, ɛvi nienwu a wɔra ɛke a yɛɛ ɛlɛkɔ ni?” Na ɔhanle kɛ: “Melɛnriandi meavi me menle raalɛ Sɛlae anwo ɛkɛ.”
9 Gyihova anwumabɔvolɛ ne zele ye kɛ: “Sia kɔ ɛ menle raalɛ ne ɛkɛ na kɔbɛlɛ ɛ nwo aze maa ye.”
10 Akee Gyihova anwumabɔvolɛ ne zele ye kɛ: “Mebamaa ɛ bo zo amra azo kpalɛ mɔɔ bɛnrɛhola bɛ tia a.”+
11 Gyihova anwumabɔvolɛ ne doale zo kɛ: “Kɛkala ɛlɛnrenzɛ, na ɛbawo ralɛ nrenyia na wɔado ye duma Yehyemɛle,* ɔluakɛ Gyihova ɛde wɔ nyane ɛzunlɛ ne.
12 Ɔbayɛ kɛ ɛbɔ nu asoaso.* Ɔbamaa ɔ sa zo yeatia awie biala, yɛɛ awie biala bamaa ɔ sa zo atia ye, na ɔbadɛnla yeabikye ɔ mediema ne mɔ kɔsɔɔti.”*
13 Akee ɔbɔle Gyihova mɔɔ nee ye dendɛle la duma kɛ: “Ɛle Nyamenle mɔɔ ɛnwu debie,”+ ɔluakɛ ɔhanle kɛ: “Asoo amgba menwu ahenle mɔɔ nwu me la wɔ ɛke ɔ?”
14 Ɛhye ati a bɛvɛlɛle bula ne Biyɛ-leehae-lɔe* la. (Ɔwɔ Keedɛhye nee Bilɛde avinli.)
15 Yemɔti Heega wole ralɛ nrenyia maanle Ebilam, na Ebilam donle ɔ ra nrenyia ne mɔɔ Heega wole ye la Yehyemɛle.+
16 Ebilam lile ɛvolɛ 86 la, yɛɛ Heega wole Yehyemɛle a.
Ɔbodwɛkɛ
^ Hibulu aneɛ nu, “mendole ɛ kɛnra anu a.”
^ Ɔ bo kile “Nyamenle Ɛde.”
^ Ɛhye kile, asoaso mɔɔ bɛtɛtetele ye. Bie a ɔkile kɛ ɔdi ɔ ti anwo.
^ Anzɛɛ ɔkola ɔkile, “na ɔbadwazo yeatia ɔ mediema ne mɔ amuala.”
^ Ɔ bo kile “Teasenli Ne Mɔɔ Nwu Me La Bula.”
