Gyɛlɛmaya 7:1-34

  • Bɛvale bɛ nwo bɛdole Gyihova ɛzonlenlɛ sua ne azo (1-11)

  • Ɛzonlenlɛ sua ne bayɛ kɛ Hyaelo (12-15)

  • Bɛdendɛle bɛtiale adalɛ ɛzonlenlɛ (16-34)

    • Bɛzonlenle “Anwuma Ɔbahyema” ne (18)

    • Bɛfa ngakula bɛbɔ afɔle wɔ Henɛm (31)

7  Ɛhye a le edwɛkɛ mɔɔ vi Gyihova ɛkɛ rale Gyɛlɛmaya ɛkɛ ne la:  “Kɔgyinla Gyihova sua ne anlenkɛ kpole ne anloa na bɔ nrɛlaleɛ ɛhye nolo wɔ ɛkɛ ne kɛ, ‘Bɛmɛ Dwudama amuala mɔɔ bɛdua anlenkɛ kpole ɛhye anu bɛbakoto Gyihova la, bɛdie Gyihova edwɛkɛ ne.  Mɔɔ ɛlɔne Gyihova, Yizilayɛ Nyamenle ne ɛha la ɛne: “Bɛhakyi bɛ ndenle nee bɛ nyɛleɛ na mebamaa bɛahɔ zo bɛadɛnla ɛke.+  Bɛmmadie mɛlɛbɛla edwɛkɛ bɛdi na bɛka kɛ, ‘Ɛhye le Gyihova ɛzonlenlɛsua,* Gyihova ɛzonlenlɛsua, Gyihova ɛzonlenlɛsua!’+  Ɔluakɛ saa nɔhalɛ nu bɛkakyi bɛ ndenle nee bɛ nyɛleɛ; saa nɔhalɛ nu bɛdi pɛlepɛle bɛmaa awie nee ɔ gɔnwo;+  saa bɛansisi nyɛvolɛ, nrisa* nee ahunlanvolɛ mraalɛ;+ saa bɛanga menli mɔɔ ɛnze nwolɛ bie la mogya bɛangua ɛke; yɛɛ saa bɛanli nyamenle gyɛne nzi bɛandwe ngyegyelɛ bɛammaa bɛ nwo a;+  mebamaa bɛahɔ zo bɛadɛnla ɛke, azɛlɛ ne mɔɔ menvale memaanle bɛ nenyia mɔ kɛ bɛdɛnla zo dahuu* la azo.”’”  Noko bɛfa bɛ nwo bɛto mɛlɛbɛla edwɛkɛ zo+—ɔnrɛmaa bɛnrɛnyia nvasoɛ biala.  Asoo bɛbahola bɛawua,+ bɛayɛ ahodiawu, bɛazɛkye agyalɛ, bɛaha adalɛ ndane,+ bɛabɔ afɔle bɛamaa Beeyale,*+ na bɛadoa nyamenle gyɛne mɔɔ bɛnze bɛ la, 10  na akee bɛaragyinla me nyunlu wɔ sua ɛhye mɔɔ me duma la zo la anu na bɛaha kɛ, ‘Bɛbalie yɛ ngoane,’ wɔ mekɛ mɔɔ bɛlɛyɛ bɛkyi ninyɛne ɛhye mɔ amuala la ɔ? 11  Sua ɛhye mɔɔ me duma la zo la ɛyɛ nwule feabelɛ wɔ bɛ nye zo ɔ?+ Nea, medame mumua ne menwu ɛhye,” Gyihova a se a. 12  “‘Noko bɛhɔ me ɛleka ne mɔɔ wɔ Hyaelo la,+ ɛleka mɔɔ menlimoale menyɛle kɛ me duma ɛdɛnla la,+ na bɛnlea mɔɔ menvale menyɛle ye ɔlua me menli Yizilayɛma ɛtane ne ati la.+ 13  Noko bɛhɔle zo bɛyɛle ninyɛne ɛhye mɔ amuala,’ Gyihova a se a, ‘mendendɛle mengilele bɛ fane dɔɔnwo* bɔbɔ ɛdeɛ, noko bɛandie.+ Mengɔle zo menvɛlɛle bɛ noko bɛandɛne me zo.+ 14  Kɛ mɔɔ menyɛle Hyaelo la, zɔhane ala a mebayɛ sua ɛhye mɔɔ me duma la zo mɔɔ bɛva bɛ ti bɛzɔ ye+ nee ɛke mɔɔ menvale memaanle bɛ nee bɛ nenyia mɔ la a. 15  Mebaye bɛ meavi me nye zo kɛ mɔɔ menyele bɛ mediema ne mɔ amuala, Yifelaem abozoamra ne kɔsɔɔti menvile me nye zo la.’+ 16  “Noko wɔmɔ, mmayɛ asɔne ɛmaa menli ɛhye mɔ. Mmasu anzɛɛ mmayɛ nzɛlɛlɛ anzɛɛ mmakpa kyɛlɛ ɛmaa bɛ,+ ɔluakɛ menrɛdie wɔ.+ 17  Ɛnnwu mɔɔ bɛlɛyɛ ye wɔ Dwuda azuamgbole nee Gyɛlusalɛm awɔdenle ne mɔ azo la ɔ? 18  Ngakula ne mɔ sesa ɛyɛne, papa mɔ sɔ senle ne, na yelɛma fɔtɔ ɛdɔkɛ amaa bɛado keeki bɛabɔ afɔle bɛamaa Anwuma Ɔbahyema* ne,+ eza bɛfa nza bɛbɔ afɔle bɛmaa nyamenle gyɛne bɛfa bɛka me ɛya.+ 19  ‘Noko asoo medame a bɛlɛka me ɛya a?’ Gyihova a se a. ‘Asoo tɛ bɛdabɛ bɛ ngome a bɛlɛyɛ bɛ nwo a, kɛ bɛfa bɛagua bɛ nyunlu aze a?’+ 20  Ɛhye ati, mɔɔ Tumivolɛ Awulae Gyihova ɛha la ɛne, ‘Nea! Mebawola me ɛya ne nee me ɛya kpole ne meagua ɛke,+ menli nee nane nwo zo, ɛbɔ nu mbaka nee azɛlɛ ye azo ma zo; ɔbazɔ na bɛnrɛnlua ye.’+ 21  “Mɔɔ ɛlɔne Gyihova, Yizilayɛ Nyamenle ne ɛha la ɛne, ‘Bɛhɔ zo, bɛva bɛ ɛyelalɛ afɔlebɔlɛ ne mɔ bɛboka bɛ afɔlebɔlɛ ne mɔ anwo, na bɛli nane ne.+ 22  Ɔluakɛ ɔvi kenle mɔɔ menyele bɛ nenyia mɔ menvile Yigyibiti azɛlɛ ne azo la, meanga ɛyelalɛ afɔlebɔlɛ nee afɔlebɔlɛ biala anwo edwɛkɛ meangile bɛ anzɛɛ meammaa bɛ nwolɛ mɛla.+ 23  Emomu mɛla ɛhye a menvale memaanle bɛ a: “Bɛdie me ne na mebayɛ bɛ Nyamenle na bɛdabɛ noko bɛayɛ me menli.+ Bɛlua ndenle mɔɔ mehile bɛ la kɔsɔɔti anu, amaa yeawie bɛ boɛ.”’+ 24  Noko bɛandie anzɛɛ bɛanyɛ ɛnzolɛ;+ emomu bɛlile bɛdabɛ mumua ne bɛ nzuzulɛ* nzi, bɛyɛle anzosesebɛ bɛlile bɛ ahonle ɛtane ne anzi,+ na bɛziale bɛ nzi, bɛangɔ bɛ nyunlu, 25  ɔvi kenle mɔɔ bɛ nenyia mɔ vile Yigyibiti azɛlɛ ne azo too badwu ɛnɛ la.+ Ɔti mengɔle zo menzoanle me azonvolɛ ngapezoma ne mɔ kɔsɔɔti wɔ bɛ nwo ɛkɛ, menzoanle bɛ alehyenlɛ biala, fane dɔɔnwo kpalɛ.*+ 26  Noko bɛandie me yɛɛ bɛanyɛ ɛnzolɛ.+ Emomu bɛyɛle anzosesebɛ,* bɛyɛle ɛtane bɛdɛlale bɛ nenyia mɔ bɔbɔ! 27  “Ɛbaha edwɛkɛ ɛhye mɔ amuala wɔahile bɛ,+ noko bɛnrɛdie wɔ; ɛbavɛlɛ bɛ, noko bɛnrɛdɛne wɔ zo. 28  Na ɛbaha wɔahile bɛ kɛ, ‘Ɛhye a le maanle ne mɔɔ bɛandie Gyihova bɛ Nyamenle ne ane na bɛanlie anzohwenlɛ bɛando nu la. Nɔhalɛlilɛ ɛwie na bɛnga nwolɛ edwɛkɛ bɔbɔ wɔ bɛ avinli.’*+ 29  “Bɛkpa bɛ ti zo enrinli mɔɔ bɛzie* la na bɛvuandi bɛgua ye lɔ, na bɛdo awolɛyelɛ* edwɛne wɔ awoka ne mɔ azo, ɔluakɛ Gyihova ɛkpo bɛ na ɔbakpo awolɛndoazo ɛhye mɔɔ ɛha ye ɛya la. 30  ‘Ɔluakɛ Dwudama ɛyɛ mɔɔ le ɛtane wɔ me nye zo la,’ Gyihova a se a. ‘Bɛva bɛ kyibadeɛ ananze ne mɔ bɛziezie sua ne mɔɔ me duma la zo la anu, amaa bɛagua nwolɛ evinli.+ 31  Bɛsisi Tofɛte ɛzonlenlɛ ɛleka wɔ Henɛm Ara Ne Bɔnza* ne anu,+ amaa bɛayela bɛ mra mrenyia nee bɛ mra mraalɛ wɔ senle nu,+ debie mɔɔ meanga kɛ bɛyɛ na ɔtɛbale me ahonle* nu ɛlɛ bɔbɔ la.’+ 32  “‘Ɛhye ati bɛnlea! mekɛ ɛlɛba,’ Gyihova a se a, ‘mɔɔ bɛnrɛvɛlɛ ye Tofɛte anzɛɛ Henɛm Ara Ne Bɔnza* bieko a, emomu bɛbavɛlɛ ye Ahunleɛ Bɔnza. Bɛbazie avunli wɔ Tofɛte too mɔɔ akee bɛnrɛnyia ɛleka bieko a.+ 33  Na menli ɛhye mɔ avunli bayɛ anwomanyunlu nloma nee azɛlɛ ye azo nane aleɛ, mɔɔ awie biala ɛnrɛvoa bɛ a.+ 34  Mebamaa anyelielɛ ɛnelɛ nee fɛlɛkolilɛ ɛnelɛ, atɔfolɛ nrenyia ane nee atɔfolɛ raalɛ ane+ azo apɛ wɔ Dwuda azuamgbole nee Gyɛlusalɛm awɔdenle ne mɔ azo, ɔluakɛ azɛlɛ ne badɔ mgbane.’”+

Ɔbodwɛkɛ

Hibulu aneɛ nu, “Ɛhye mɔ” kile azua mɔɔ boka ɛzonlenlɛsua ne anwo la kɔsɔɔti.
Anzɛɛ “ngakula mɔɔ bɛ papa mɔ ɛwu.”
Anzɛɛ “mekɛ mɔɔ ɛnlɛ awieleɛ.”
Anzɛɛ “bɛabɔ afɔle bɛamaa esike ne ahɔ Beeyale ɛkɛ.”
Hibulu aneɛ nu, “mendwazole ndɛ mendendɛle.”
Anzɛɛ “Belemgbunli raalɛ.” Ɔle nyamenle raalɛ bie mɔɔ Yizilayɛma mɔɔ ɛnee ɛkpɔkye la sonle ye la amodinli; ɔkola ɔkile awolɛ nyamenle raalɛ.
Anzɛɛ “folɛdulɛ.”
Hibulu aneɛ nu, “dahuu medwazo ndɛ na mesoa bɛ.”
Hibulu aneɛ nu, “bɛyɛle bɛ kɔme ketee.”
Hibulu aneɛ nu, “bɛye bɛvi bɛ nloa anu.”
Anzɛɛ “bɛyila zo.”
Anzɛɛ “nyanelilɛ.”
Nea Edwɛkɛbohilelɛ, Gehenna.
Anzɛɛ “adwenle.”
Nea Edwɛkɛbohilelɛ, Gehenna.