Gyɛlɛmaya 51:1-64

  • Ngapezo mɔɔ tia Babelɔn (1-64)

    • Medeama bazɛkye Babelɔn arɛlevilɛ nu (8-12)

    • Bɛvuandinle buluku bie bɛdole Yufileti ne anu (59-64)

51  Mɔɔ Gyihova ɛha la ɛne: “Nea melɛmaa ɛzɛkyelɛ anwoma bieAbɔ Babelɔn+ nee bɛdabɛ mɔɔ bɛde Lɛbe-keemae* la anwo zo.   Mebazoa meamaa bɛarakpogya Babelɔn kɛ mɔɔ bɛkpogya ma la,Na bɛbakpogya ye bɛamaa ye azɛlɛ ne adɔ mgbane;Bɛbavi ɛleka biala bɛara ɔ nwo zo wɔ munzule kenle ne.+   Bɛmmamaa ɛdatovo to* ye ɛda ne. Yɛɛ bɛmmamaa awie biala dwazo wula ye konle tɛladeɛ. Bɛmmase ye mgbavolɛ ne mɔ anwunvɔne fee.+ Bɛzɛkye ye ɛlɔnema ne mɔ amuala.   Bɛbadɔ amolɛ nu wɔ Kaledeama azɛlɛ ne azo,Bɛbabodɛboda bɛ wɔ ye gua ne mɔ azo.+   Ɔluakɛ ɛlɔne Gyihova ɛtɛkpole Yizilayɛ nee Dwuda, bɛtɛyɛle ahunlanvolɛ.+ Noko fɔlɛlilɛ ɛyi bɛ azɛlɛ ne* wɔ Yizilayɛ Nwuanzanwuanza Ko ne anye zo.   Bɛnriandi bɛvi Babelɔn,Bɛnriandi bɛlie bɛ ngoane.*+ Bɛmmawu ɔlua ye nvonleɛ ne ati. Ɔluakɛ Gyihova nzenralɛlilɛ mekɛ ne ɛdwu. Ɔlɛtua ye kakɛ wɔ mɔɔ yeyɛ la ati.+   Babelɔn ɛyɛ kɛ nvutuke kanrɛlɛ la wɔ Gyihova asa nu;Yemaa azɛlɛ ne amuala ɛbo. Ye nwanye ne ɛmaa maanle maanle ne mɔ ɛbobo;+Ɛhye ati a maanle maanle ne mɔ ɛzɛ la.+   Babelɔn ɛdɔ aze arɛlevilɛ nu na yebubu.+ Bɛye ɔ nwo awolɛ!+ Ye nyanelilɛ ne ati, bɛkpondɛ balesam bɛmaa ye; bie a ɔbade kpɔkɛ.”   “Yɛbɔle mɔdenle kɛ yɛyɛ Babelɔn ayile, noko yeande kpɔkɛ. Bɛgyakyi ye ɛkɛ bɛmaa yɛhɔ, awie biala ɛhɔ ye azɛlɛ ne azo.+ Ɔluakɛ ye ndɛnebualɛ ɛdwu anwuma nehane;Yehɔ anwuma kɛ amungu ne la.+ 10  Gyihova ɛbua ndɛne tenlene ɛmaa yɛ.+ Bɛrɛla, bɛmaa yɛha Gyihova yɛ Nyamenle ne gyima ne anwo edwɛkɛ wɔ Zayɔn.”+ 11  “Bɛzi ɛda mbaka ne mɔ;+ bɛva enyinlike ne mɔ.* Gyihova ɛzi Medea arelemgbunli ahonle,+Ɔluakɛ yeyɛ ye adwenle kɛ ɔsɛkye Babelɔn. Ɛhye le Gyihova nzenralɛlilɛ, ye ɛzonlenlɛsua ne anwo nzenralɛlilɛ. 12  Bɛmaa sɛkɛlɛneɛ baka zo*+ wɔ Babelɔn bane ne mɔ azo. Bɛva sinzavolɛma bɛziezie ɛkɛ, bɛmaa bɛzinza kpalɛ. Bɛmaa bɛdabɛ mɔɔ bɛhɔ nzia la ɛziezie bɛ nwo. Ɔluakɛ Gyihova a ɛyɛ ngyehyɛleɛ ne a,Na ɔbayɛ mɔɔ yebɔ ɛwɔkɛ kɛ ɔbayɛ yeatia Babelɔnoma la.”+ 13  “O raalɛ mɔɔ ɛde nzule dɔɔnwo azo,+Na ɛlɛ anwonyia dɔɔnwo la,+Wɔ awieleɛ ɛra, wɔ nvasoɛ ɛnyianlɛ ne noko ɛra ye awieleɛ.+ 14  Ɛlɔne Gyihova ɛha ɔ nwo ndane,‘Mebamaa menli ayi wɔ ɛkɛ ne, bɛ nwo zonle kɛ abɛbɛ la,Na bɛbadea nu kɛ bɛli ɛ nwo zo konim.’+ 15  Yemɔ a ɔvale ye tumi ɔyɛle azɛlɛ ne a,Mɔɔ ɔluale ye nrɛlɛbɛ zo ɔvale azɛlɛ ne ɔziele ɛkɛ ne la+Yɛɛ ɔdaye a ɔvale ye ndelebɛbo ɔdɛlɛle anwuma ne anu a.+ 16  Saa ɔmaa bɛte ɔ ne a,Nzule mɔɔ wɔ anwuma la yɛ begyebegye,Na ɔmaa kpukpuke* fi azɛlɛ ne ɛleka biala fo kɔ anwuma. Ɔyɛle ɛsɛlɛmanye* ɔmaanle ezule,Yɛɛ ɔmaa anwoma fi ye ninyɛnezielɛ ɛleka ne mɔ tu.+ 17  Awie biala ɛnva adwenle nee ndelebɛbo ɛnli gyima. Bulalɛ dwinvolɛ biala anyunlu bagua aze ɔlua ananze ne ati;+Ɔluakɛ ye bulalɛ ananze ne* le adalɛ,Yɛɛ sunsum* biala ɛnle bɛ nu.+ 18  Bɛle mgbane,+ agolobɛnwo gyima. Saa bɛ ndɛnebualɛ kenle ne dwu a, bɛbaminli. 19  Gyekɔbo Kyɛfoa ne ɛnle kɛ ninyɛne ɛhye mɔ la,Ɔluakɛ Yemɔ a ɔyɛle ninyɛne kɔsɔɔti a,Ye agyapadeɛ kpɔma ne bɔbɔ.+ Ye duma a le ɛlɔne Gyihova.”+ 20  “Ɛle me konle nu kokolobaka nee me akodeɛ,Na mebava wɔ meabubu maanle maanle ne mɔ. Mebava wɔ meazɛkye arelemgbunlililɛ. 21  Mebava wɔ meabubu ɛkpɔnwɔ nee ye kavolɛ. Mebava wɔ meabubu konle ehwili nee ye kavolɛ. 22  Mebava wɔ meabubu nrenyia nee raalɛ. Mebava wɔ meabubu kpanyinli nee kakula. Mebava wɔ meabubu kpavolɛ nee bɛlɛra. 23  Mebava wɔ meabubu mboaneneavolɛ nee ye mboane ekpunli. Mebava wɔ meabubu ɛyazonlɛnli nee ye nane ekpunli ekpunli. Mebava wɔ meabubu amɛnladoma nee mgbanyima ne mɔ. 24  Na mebadua Babelɔn nee Kaledeama kɔsɔɔti kakɛƆlua ɛtane kɔsɔɔti mɔɔ bɛyɛ ye wɔ bɛ nye zo wɔ Zayɔn la ati,”+ Gyihova a se a. 25  “O boka sɛkyevo, nea, me nee wɔ ɛnyia ye,”+ Gyihova a se a,“Wɔmɔ azɛlɛ ye kɔsɔɔti sɛkyevolɛ.+ Mebadenrɛ me sa wɔ ɛ nwo zo na meahundo wɔ meavi bodane ne mɔ azo meado azeNa meayɛ wɔ boka mɔɔ ɛyela.” 26  “Menli ɛnrɛva mgbɛnezo bolɛ anzɛɛ adiabo bolɛ ɛnrɛvi wɔ ɛkɛ,Ɔluakɛ ɛbadɔ mgbane dahuu,”+ Gyihova a se a. 27  “Bɛmaa sɛkɛlɛneɛ baka zo* wɔ azɛlɛ ne azo.+ Bɛwu aweɛne nu wɔ maanle maanle ne mɔ anu. Bɛye* maanle maanle bɛmaa bɛhɔ ɔ nwo zo. Bɛvɛlɛ Arelalate,+ Menae nee Ahyekinaze arelemgbunlililɛ ne mɔ bɛmaa bɛhɔ ɔ nwo zo.+ Bɛmaa sogya kpanyinli ɛnlea ɔ nwo zo. Bɛmaa mgbɔnwɔ ɛrɛla kɛ abɛbɛ ngyikyi kpolane la. 28  Bɛye* maanle maanle bɛmaa bɛhɔ ɔ nwo zo,Medea arelemgbunli,+ ye amɛnladoma nee ye mgbanyima kɔsɔɔtiYɛɛ azɛlɛ mɔɔ bɛnea zo la amuala. 29  Na azɛlɛ ne bakpusu na yeawoso,Ɔluakɛ Gyihova bayɛ mɔɔ yedwenle nwo wɔ Babelɔn anwo la,Kɛ ɔmaa Babelɔn azɛlɛ ne ahakyi debie ɛzulolɛ bie mɔɔ awie ɛnrɛdɛnla ɛkɛ a.+ 30  Babelɔn ɛlɔnema ɛgyakyi konle. Bɛdede bɛ aranemgbole ne mɔ anu. Bɛ anwosesebɛ ɛwie.+ Bɛyɛ kɛ mraalɛ la.+ Bɛdo senle wɔ ye awuke ne mɔ anu. Bɛbubu ye nlenkɛ mgbole nzi mbulalɛ ne mɔ anu.+ 31  Soanvolɛ nriandi kɔyia soanvolɛ,Ɛbɔfoɔ kɔyia ɛbɔfoɔ,Kɛ bɛkabɔ Babelɔn belemgbunli ne amaneɛ kɛ bɛva ye suakpole ne bɔkɔɔ,+ 32  Kɛ bɛva azupɛlɛ ɛleka ne mɔ,+Kɛ bɛdo senle wɔ ndɔ ɛlɛne ne mɔ anu bɛyela bɛ,Na ɛlɔnema ne ahonle ɛdu.” 33  Ɔluakɛ mɔɔ ɛlɔne Gyihova, Yizilayɛ Nyamenle ne ɛha la ɛne: “Babelɔnoma le kɛ ma ɛwosolɛ ɛleka la. Mekɛ ɛdwu kɛ bɛtietia bɛ nwo zo kpalɛ. Ɔnrɛhyɛ fee, ma ɛdelɛ mekɛ ne badwu ɔ nwo zo.” 34  “Babelɔn Belemgbunli Nɛbukadenɛza ɛhye me ɛli;+Yemaa me adwenle ɛdu ɛfonyia. Yeva me yezie ɛkɛ ne kɛ buakɛ mɔɔ ɛhwee ɛnle nu. Yeme me kɛ ɛwɔlɛ kpole bie;+Yeva me ninyɛne mgbalɛ ne mɔ yeyi ɔ ko. Yenrinzi me yegua me lɔ. 35  Mɔɔ de Zayɔn la se, ‘Maa basabasa mɔɔ bɛyɛle me nee me sonlabaka ne la ɛrɛla Babelɔn anwo zo!’+ Gyɛlusalɛm noko se, ‘Maa me mogya ɛgua Kaledeama ati zo.’” 36  Ɛhye ati mɔɔ Gyihova ɛha la ɛne: “Nea, melɛdi wɔ edwɛkɛ meamaa wɔ,+Na mebali nzenralɛ meamaa wɔ.+ Mebamaa ye nyevile asesa na meamaa ye bula ne mɔ noko asesa.+ 37  Na Babelɔn bahakyi awolɛ edukue edukue,+Ɛzonlɛ dabelɛ,+Debie ɛzulolɛ bie nee debie mɔɔ bɛbɔ nwolɛ nvonloma la,Awie ɛnrɛdɛnla ɛkɛ.+ 38  Bɛ muala bɛbabɔ nu bɛakpo kɛ awenade ngyikyi.* Bɛbazu kɛ awenade mralɛ.” 39  “Saa bɛ nye die a, mebado bɛ ɛkponle meamaa bɛabo,Amaa bɛali fɛlɛko;+Akee bɛbaha nafelɛ nu dahuu,Mɔɔ bɛnrɛdunwue ɛlɛ a,”+ Gyihova a se a. 40  “Mebava bɛ meara kɛ mboane mɔɔ bɛkahu bɛ,Kɛ mboane nyinli nee mbɔnkye nyinli la.” 41  “O nea kɛ bɛhye Hyihyake* a,+Nea kɛ bɛhye azɛlɛ ye kɔsɔɔti Ayɛlɛyelɛ ne a!+ Nea kɛ Babelɔn ɛhakyi debie ɛzulolɛ bie wɔ maanle maanle ne mɔ anu a! 42  Nyevile ne ɛva Babelɔn. Ye azɛlɛkye dɔɔnwo ne ɛbu ɛva ɔ nwo zo. 43  Ye azuamgbole ne mɔ ɛhakyi debie ɛzulolɛ bie, azɛlɛ mɔɔ nzule ɛnle zo nee ɛsɛlɛ. Azɛlɛ mɔɔ awie biala ɛnrɛdɛnla zolɛ nee ɛleka mɔɔ awie biala ɛnrɛze ɛkɛ.+ 44  Mebahakyi me nye wɔ Bɛle anwo zo+ wɔ Babelɔn,Na mebamaa yeakpu mɔɔ yeme la.+ Maanle maanle ne mɔ ɛnrɛpia bɛ nwo ɛnrɛhɔ ye ɛkɛ ne bieko,Na Babelɔn bane ne babu agua.+ 45  Me menli, bɛvi ye nu bɛhɔ!+ Bɛnriandi bɛlie bɛ ngoane*+ bɛvi Gyihova ɛya wuluwulu ne anu!+ 46  Bɛmmamaa bɛ ahonle tu anzɛɛ bɛmmasulo amaneɛbɔlɛ ne mɔɔ bɛbade ye wɔ azɛlɛ ne azo la. Amaneɛ bara wɔ ɛvolɛ ko anu,Na ye ɛvolɛ bieko anu, amaneɛ fofolɛ bara,Wɔ basabasayɛlɛ mɔɔ bara azɛlɛ ne azo nee tumivolɛ mɔɔ badwazo atia tumivolɛ la anwo. 47  Ɔti nea! mekɛ ɛlɛbaMɔɔ mebahakyi me nye wɔ Babelɔn ananze ne mɔ anwo a. Bɛbagua ye azɛlɛ ne kɔsɔɔti anyunlu aze,Na ye menli mɔɔ bɛhu bɛ la amuala bɛagua ye avinli.+ 48  Anwuma nee aze* nee ninyɛne mɔɔ wɔ nu la amualaBava anyelielɛ adeɛdea nu agua Babelɔn ati zo,+Ɔluakɛ sɛkyevolɛma vi sɔlɔ bara ɔ nwo zo,”+ Gyihova a se a. 49  “Tɛ Yizilayɛ angome a Babelɔn hunle menli a+Emomu ɔhunle azɛlɛ ye kɔsɔɔti azo menli noko wɔ Babelɔn. 50  Bɛdabɛ mɔɔ bɛanwu konle dadeɛ nloa la, bɛhɔ, bɛmmagyinla!+ Bɛhakye Gyihova wɔ moamoa,Na bɛdwenle Gyɛlusalɛm anwo.”+ 51  “Bɛgua yɛ nyunlu aze, ɔluakɛ yɛde aholoba ɛbɔlɛ. Nyiane ɛdɔ yɛ nye zo,Ɔluakɛ maanle gyɛne zo menli* ɛrateta Gyihova sua ne ɛleka nwuanzanwuanza ne mɔ.”+ 52  “Ɔti nea! mekɛ ɛlɛba,” Gyihova a se a,“Mɔɔ mebahakyi me nye wɔ ye ananze ne mɔ anwo a,Na menli mɔɔ bɛbodɛboda bɛ la bɛakponle wɔ ye azɛlɛ ne kɔsɔɔti azo.”+ 53  “Saa Babelɔn fo kɔ anwuma bɔbɔ a,+Saa ɔmiemia ye aranemgbole ne mɔ anu bɔbɔ a,Ye sɛkyevolɛma vi me ɛkɛ ne bɛara,”+ Gyihova a se a. 54  “Tie! Bɛte ɛdeanlɛ bie wɔ Babelɔn,+Ɛzɛkyelɛ kpole bie ane wɔ Kaledeama azɛlɛ ne azo,+ 55  Ɔluakɛ Gyihova ɛlɛsɛkye Babelɔn,Ɔbamaa yeagyakyi ye dede kpole ne,Na bɛ azɛlɛkye ne mɔ bahulu kɛ azule dɔɔnwo la. Bɛbade bɛ ne. 56  Ɔluakɛ sɛkyevolɛ ne bara Babelɔn anwo zo;+Bɛbahye ye ɛlɔnema,+Bɛbabubu bɛ ɛda ne mɔ anu,Ɔluakɛ Gyihova le Nyamenle mɔɔ ɔtua ɛtane nwo kakɛ.+ Ɔti ɔbadua bɛ kakɛ.+ 57  Mebamaa ye mgbanyima nee ye nrɛlɛbɛvolɛma abobo,+Ye amɛnladoma nee ye menli titili nee ye ɛlɔnema,Na bɛbaha nafelɛ nu dahuu,Mɔɔ bɛnrɛdunwue ɛlɛ a,”+ Belemgbunli ne mɔɔ ye duma a le ɛlɔne Gyihova la a se a. 58  Mɔɔ ɛlɔne Gyihova ɛha la ɛne: “Babelɔn bane ne tɛlɛ ɛdeɛ, noko bɛbabubu ye bɔkɔɔ,+Na ye nlenkɛ mgbole ne mɔ wowale ɛdeɛ, noko bɛbado senle nu. Menli ne bɛavɛ mgbane;Maanle maanle ne mɔ bɛahu bɛ nwo ɛvɛlɛ amaa senle.”+ 59  Adehilelɛ ɛhye a ngapezonli Gyɛlɛmaya vale maanle Masaya ara Nelaya+ ara Sɛlaya wɔ mekɛ mɔɔ ɔ nee Dwuda Belemgbunli Zɛdikaya hɔle Babelɔn wɔ ye tumililɛ ɛvolɛ nna ne anu la a; ɛnee Sɛlaya nea belemgbunli ne ninyɛne zo. 60  Gyɛlɛmaya hɛlɛle munzule mɔɔ bara Babelɔn anwo zo la wɔ buluku ko anu, ɔhɛlɛle edwɛkɛ ɛhye mɔ amuala ɔtiale Babelɔn. 61  Eza Gyɛlɛmaya hanle hilele Sɛlaya kɛ: “Saa ɛdwu Babelɔn na ɛ nye bobɔ suakpole ne ala a, kenga edwɛkɛ ɛhye mɔ amuala kpole. 62  Na ka kɛ, ‘O Gyihova, wɔha ɛke anwo edwɛkɛ kɛ bɛbazɛkye ye na awie biala ɛnrɛdɛnla zolɛ, sonla anzɛɛ nane, na ɔbadɔ mgbane dahuu.’+ 63  Na saa ɛkenga buluku ɛhye ɛwie a, fa kyekye bolɛ nwo na fuandi ye to Yufileti ne anu. 64  Akee ka kɛ, ‘Kɛ Babelɔn bazi anloma la ɛne na ɔnrɛdwazo bieko ɛlɛ,+ ɔlua munzule ne mɔɔ melɛfa meara ɔ nwo zo la ati; na bɛbavɛ mgbane.’”+ Gyɛlɛmaya edwɛkɛ ne awieleɛ ɛne.

Ɔbodwɛkɛ

Ɔbayɛ kɛ ɛhye le Kaledea duma.
Anzɛɛ “sua.”
Ɛhye kile, Kaledeama azɛlɛ ne.
Anzɛɛ “ɛkɛla.”
Anzɛɛ ɔkola ɔkile, “bɛwula ɛda mbaka ne mɔ kodoku nu.”
Anzɛɛ “Bɛyɛ sɛkɛlɛneɛ.”
Hibulu aneɛ nu, “amungu.”
Anzɛɛ ɔkola ɔkile, “nlenkɛ.”
Anzɛɛ “ananze mɔɔ bɛgua.”
Anzɛɛ “ɛnwomenle.”
Anzɛɛ “Bɛyɛ sɛkɛlɛneɛ.”
Hibulu aneɛ nu, “Bɛyila.”
Hibulu aneɛ nu, “Bɛyila.”
Anzɛɛ “awenade ngakula mɔɔ anwo yɛ se la.”
Ɔbayɛ kɛ ɛhye le Babɛle (Babelɔn) duma bieko.
Anzɛɛ “ɛkɛla.”
Anzɛɛ “azɛlɛ.”
Anzɛɛ “nyɛvolɛ.”