Gyɛlɛmaya 39:1-18

  • Gyɛlusalɛm ɛzɛkyelɛ (1-10)

    • Zɛdikaya nriandile na bɛhyele ye (4-7)

  • Bɛbɔle Gyɛlɛmaya anwo bane (11-14)

  • Yibɛde-mɛlɛke nyianle ngoane (15-18)

39  Dwuda Belemgbunli Zɛdikaya ɛvolɛ mɔɔ tɔ zolɛ ngɔnla, wɔ siane bulu ne anu, Babelɔn Belemgbunli Nɛbukadenɛza nee ye ɛlɔnema ne amuala rale Gyɛlusalɛm na bɛbɛngale ye bɛyiale.+  Zɛdikaya ɛvolɛ 11 ne azo, wɔ siane nna ne anu, siane ne kenle ngɔnla ne azo, bɛbule suakpole ne bane ne.+  Na Babelɔn belemgbunli ne mgbanyima kɔsɔɔti wolole ɛkɛ ne hɔdɛnlanle Avinli Anlenkɛ Kpole ne anloa.+ Bɛmɛ a le Nɛgale-hyalizɛ mɔɔ le Samegaa, Nibo-saasɛkem mɔɔ le Relabesalese,* Nɛgale-hyalizɛ mɔɔ le Relabemage* nee Babelɔn belemgbunli ne mgbanyima mɔɔ ɛha la amuala.  Mɔɔ Dwuda Belemgbunli Zɛdikaya nee sogyama ne mɔ amuala nwunle bɛ la, bɛnriandinle.+ Bɛvile suakpole ne azo nɔe ne, bɛluale belemgbunli tola ne anu bɛhɔvale anlenkɛ kpole ne mɔɔ wɔ bane nwiɔ ne avinli la anu, na bɛdoale zo wɔ Alaba adenle ne azo.+  Noko Kaledea ɛlɔnema ne voanle bɛ, na bɛhɔhyele Zɛdikaya wɔ Gyɛleko azɛlɛ sɛsɛ ne azo.+ Na bɛvale ye bɛhɔmaanle Babelɔn Belemgbunli Nɛbukadenɛza wɔ Relebela+ mɔɔ wɔ Heemate azɛlɛ zo la,+ na ɔbuale ye ndɛne wɔ ɛkɛ.  Babelɔn belemgbunli ne maanle bɛhunle Zɛdikaya amra mrenyia ne mɔ wɔ ɔ nye zo ɛkɛ ne ala wɔ Relebela, eza Babelɔn belemgbunli ne maanle bɛhunle Dwuda menli titili ne mɔ amuala.+  Akee ɔzinle Zɛdikaya anye, na ɔvale kɔbele kyeenyi ɔkyekyele ye ɔvale ye ɔhɔle Babelɔn.+  Akee Kaledeama yelale belemgbunli ne sua ne nee menli ne azua,+ na bɛbubule Gyɛlusalɛm bane ne mɔ bɛguale aze.+  Sinzavolɛma kpanyinli Nɛbuzaladan+ vale menli mɔɔ hale mɔɔ bɛgyakyile bɛ wɔ suakpole ne azo, menli mɔɔ ɛva bɛ nwo ɛhɔmaa ye nee awie biala mɔɔ hale la, hɔle akɛlɛzonlenlɛ nu wɔ Babelɔn. 10  Noko sinzavolɛma kpanyinli Nɛbuzaladan gyakyile Dwudama mɔɔ le ehyiavolɛma kpalɛ kpalɛ, bɛdabɛ mɔɔ bɛnlɛ ɛhwee la wɔ azɛlɛ ne azo. Kenle zɔhane, eza ɔvale vanye egyinli nee azɛlɛ mɔɔ bɛbayɛ zolɛ gyima* la ɔmaanle bɛ.+ 11  Eza Babelɔn Belemgbunli Nɛbukadenɛza vale adehilelɛ ɛhye mɔɔ fale Gyɛlɛmaya anwo la maanle sinzavolɛma kpanyinli Nɛbuzaladan kɛ: 12  “Fa ye na nea ye; mmayɛ ye ɛtane biala, na debie biala mɔɔ ɔkɛbiza wɔ la yɛ maa ye.”+ 13  Ɔti sinzavolɛma kpanyinli Nɛbuzaladan, Nɛbuhyazeban mɔɔ le Relabesalese,* Nɛgale-hyalizɛ mɔɔ le Relabemage* yɛɛ Babelɔn belemgbunli ne mrenyia titili kɔsɔɔti zoanle 14  maanle bɛhɔvale Gyɛlɛmaya bɛvile Sinzavolɛma Sua nu ɛkɛ+ na bɛvale ye bɛhɔmaanle Hyeefan+ ara Ahaekam+ ara Gɛdalaya+ kɛ ɔva ye ɔhɔ sua nu. Ɔti ɔ nee menli ne hɔdɛnlanle. 15  Mekɛ mɔɔ ɛnee Gyɛlɛmaya la efiade wɔ Sinzavolɛma Sua nu ɛkɛ ne la,+ Gyihova edwɛkɛ rale ye ɛkɛ ne kɛ: 16  “Kɔ na kɔha kile Yiteyopeanli Yibɛde-mɛlɛke+ kɛ, ‘Mɔɔ ɛlɔne Gyihova, Yizilayɛ Nyamenle ne ɛha la ɛne: “Nea, melɛmaa me edwɛkɛ ara nu wɔ suakpole ɛhye anwo, munzule bado ye na ɔnrɛwie ye boɛ, ɔsi kenle zɔhane a ɛbanwu ye.”’ 17  “‘Noko kenle zɔhane mebalie wɔ,’ Gyihova a se a, ‘na bɛnrɛye wɔ bɛnrɛmaa menli mɔɔ ɛsulo bɛ la.’ 18  “‘Ɔluakɛ nɔhalɛ nu, mebalie wɔ na ɛnrɛwu wɔ konle dadeɛ nloa. Ɛbanyia ngoane,*+ ɔluakɛ ɛvale ɛ nwo ɛdole me nwo zo,’+ Gyihova a se a.”

Ɔbodwɛkɛ

Anzɛɛ kɛ mɔɔ bɛhyehyɛ nu wɔ Hibulu nu wɔ adenle fofolɛ zo la ɛne, “Nɛgale-hyalizɛ, Samegaa-nibo, Saasɛkem, Relabesalese.”
Anzɛɛ “ngoanyianli kpanyinli (nwɔlɔra neɛnleanuvolɛ).”
Anzɛɛ ɔkola ɔkile, “mialera nu gyima.”
Anzɛɛ “suakunlu mgbanyiama ne mɔ kpanyinli.”
Anzɛɛ “ngonyianli kpanyinli (nwɔlɔra neɛnleanuvolɛ).”
Anzɛɛ “Ɛ sa baha wɔ ngoane kɛ afedeɛ.”