Gyɛlɛmaya 38:1-28

  • Bɛdole Gyɛlɛmaya bula nu (1-6)

  • Yibɛde-mɛlɛke yele Gyɛlɛmaya (7-13)

  • Gyɛlɛmaya zele Zɛdikaya kɛ ɔmaa ɔ sa zo (14-28)

38  Mateyan ara Hyɛfataya, Pahyɛ ara Gɛdalaya, Hyɛlimaya ara Dwukale+ yɛɛ Malekaegya ara Pahyɛ+ dele edwɛkɛ mɔɔ ɛnee Gyɛlɛmaya ɛlɛka ahile menli ne kɔsɔɔti la kɛ:  “Mɔɔ Gyihova ɛha la ɛne, ‘Awie biala mɔɔ badɛnla suakpole ɛhye azo la konle dadeɛ, ɛhɔne nee ewulenzane* bahu ye.+ Noko awie biala mɔɔ ɔbava ɔ nwo yeahɔmaa Kaledeama* la bɛnrɛhu ye,* ɔbanyia ye ngoane kɛ afedeɛ na yeadɛnla ngoane nu.’+  Mɔɔ Gyihova ɛha la ɛne, ‘Nɔhalɛ nu, mebava suakpole ɛhye meawula Babelɔn belemgbunli ne ɛlɔnema ne asa anu, na ɔbaho yeava.’”+  Mgbanyima ne mɔ zele belemgbunli ne kɛ: “Yɛsɛlɛ wɔ maa bɛhu nrenyia ɛhye,+ ɔluakɛ ɔlɛka edwɛkɛ yeamaa ɛlɔnema mɔɔ ɛha suakpole ɛhye azo nee menli ne amuala asa anu ado. Nrenyia ɛhye ɛmkpondɛ menli ɛhye nee anzodwolɛ, emomu, ɔkpondɛ bɛ nee munzule.”  Belemgbunli Zɛdikaya buale bɛ kɛ: “Bɛnlea! Ɔwɔ bɛ sa nu, ɔluakɛ belemgbunli ɛnrɛhola ɛnrɛyɛ debie biala ɛnrɛzi bɛ adenle.”  Ɔti bɛvale Gyɛlɛmaya na bɛvuandinle ye bɛdole belemgbunli ara Malekaegya bula ne mɔɔ wɔ Sinzavolɛma Sua nu ɛkɛ ne la anu.+ Bɛsosɔle Gyɛlɛmaya nyɛma na bɛdwulale ye nu. Ɛnee nzule ɛnle bula ne anu, ndɛtɛlɛ ala a wɔ nu a, na Gyɛlɛmaya bɔle ɔ bo kɛ ɔmi yeahɔ ndɛtɛlɛ ne anu.  Yiteyopeanli Yibɛde-mɛlɛke,+ kpanyinli* bie mɔɔ wɔ belemgbunli sua nu* ɛkɛ ne la dele kɛ bɛva Gyɛlɛmaya bɛdo bula nu. Mekɛ zɔhane ɛnee belemgbunli ne de Bɛngyaman Anlenkɛ Kpole ne anloa,+  ɔti Yibɛde-mɛlɛke vi belemgbunli sua nu ɛkɛ ne vindele na ɔ nee belemgbunli ne hɔdendɛle kɛ:  “O me menle belemgbunli, mɔɔ menli ɛhye mɔ ɛva ɛyɛ ngapezonli Gyɛlɛmaya la le ɛtane! Bɛvuandi ye bɛdo bula ne anu, na ɛhɔne ne ati, ɔbawu wɔ ɛkɛ, ɔluakɛ aleɛ biala ɛnle suakpole ye azo.”+ 10  Na belemgbunli ne zele Yiteyopeanli Yibɛde-mɛlɛke kɛ: “Fa mrenyia 30 wɔ ɛke boka ɛ nwo na bɛhɔye ngapezonli Gyɛlɛmaya bɛvi bula ne anu kolaa na yeawu.” 11  Ɔti Yibɛde-mɛlɛke vale menli ne bokale ɔ nwo na bɛhɔle sua ne mɔɔ bɛsie ninyɛne wɔ nu wɔ belemgbunli sua nu ɛkɛ ne la abo,+ bɛhɔsesale avuazinli nee ndanlɛ ndeteleka wɔ ɛkɛ na bɛvale nyɛma bɛsosɔle nu bɛdwulale ye bula ne anu bɛmaanle Gyɛlɛmaya. 12  Na Yiteyopeanli Yibɛde-mɛlɛke hanle hilele Gyɛlɛmaya kɛ: “Mesɛlɛ wɔ fa avuazinli ne nee ndanlɛ ndeteleka ne yɛɛ nyɛma ne wula ɛ nvonloma anu.” Gyɛlɛmaya yɛle ye zɔ, 13  na bɛvale nyɛma ne bɛhwenle Gyɛlɛmaya bɛyele ye bɛvile bula ne anu. Na Gyɛlɛmaya dɛnlanle Sinzavolɛma Sua nu ɛkɛ.+ 14  Belemgbunli Zɛdikaya zoanle maanle bɛhɔvɛlɛle ngapezonli Gyɛlɛmaya bɛrale ɔ nwo ɛkɛ wɔ anlenkɛ ne mɔɔ tɔ zo nsa la anloa, wɔ Gyihova sua nu ɛkɛ, na belemgbunli ne zele Gyɛlɛmaya kɛ: “Mebiza wɔ edwɛkɛ bie. Mmafa debie biala ɛfea me.” 15  Na Gyɛlɛmaya hanle hilele Zɛdikaya kɛ: “Saa meka mekile wɔ a, ɛbahu me. Yɛɛ saa metu wɔ folɛ noko a, ɛnrɛdie me.” 16  Ɔti Belemgbunli Zɛdikaya hanle ndane fealeranu hilele Gyɛlɛmaya kɛ: “Mekɛ ala mɔɔ Gyihova mɔɔ ɛmaa yɛ ngoane ɛhye de aze la, menrɛhu wɔ, yɛɛ menrɛva wɔ menrɛwula mrenyia ɛhye mɔ mɔɔ ɛlɛkpondɛ wɔ ahu wɔ la asa anu.” 17  Akee Gyɛlɛmaya hanle hilele Zɛdikaya kɛ: “Mɔɔ Gyihova, ɛlɔne Nyamenle, Yizilayɛ Nyamenle ne ɛha la ɛne, ‘Saa ɛfa ɛ nwo ɛkɔmaa Babelɔn belemgbunli ne mgbanyima ne mɔ a, bɛnrɛhu wɔ, yɛɛ bɛnrɛdo senle wɔ suakpole ɛhye azo bɛnrɛyela ye, na ɛ nee wɔ sua nu amra noko bɛanyia ngoane.+ 18  Na saa wɔanva ɛ nwo wɔangɔmaa Babelɔn belemgbunli ne mgbanyima ne mɔ a, bɛbava suakpole ɛhye bɛawula Kaledeama asa anu, na bɛado senle zolɛ bɛayela ye,+ na ɛnrɛhola ɛnrɛnriandi ɛnrɛvi bɛ sa nu.’”+ 19  Akee Belemgbunli Zɛdikaya hanle hilele Gyɛlɛmaya kɛ: “Mesulo Dwuuma mɔɔ ɛva bɛ nwo ɛhɔmaa Kaledeama la, ɔluakɛ saa bɛye me bɛwula bɛ sa nu a, bɛ nee me bɛali ye atisesebɛ nu.” 20  Noko Gyɛlɛmaya hanle kɛ: “Bɛnrɛye wɔ bɛnrɛmaa bɛ. Mesɛlɛ wɔ, tie Gyihova ane wɔ mɔɔ melɛka meahile wɔ la anu, na ɔbawie wɔ boɛ na wɔahɔ zo wɔadɛnla ngoane nu. 21  Na saa wɔanva ɛ nwo wɔangɔmaa bɛ a, mɔɔ Gyihova ɛye ɛhile me la ɛne: 22  Nea! Bɛva mraalɛ mɔɔ bɛha Dwuda belemgbunli ne sua nu ɛkɛ la amuala bɛhɔmaa Babelɔn belemgbunli ne mgbanyima na bɛlɛka kɛ,+‘Mrenyia mɔɔ ɛvale ɛ nwo ɛdole bɛ nwo zo* la ɛbɛlɛbɛla wɔ na bɛli ɛ nwo zo konim.+ Bɛmaa ɛ gyakɛ ɛmi ndɛtɛlɛ nu. Akee bɛhakyi bɛ nzi bɛzi wɔ na bɛhwe bɛ nwo.’ 23  Na bɛlɛfa ɛ ye mɔ nee ɛ mra kɔsɔɔti bɛahɔmaa Kaledeama, na ɛnrɛhola ɛnrɛnriandi ɛnrɛvi bɛ sa nu, emomu Babelɔn belemgbunli ne bahye wɔ,+ na ɛdawɔ ti, bɛbado senle wɔ suakpole ɛhye azo bɛayela ye.”+ 24  Akee Zɛdikaya zele Gyɛlɛmaya kɛ: “Mmabɔ edwɛkɛ ɛhye azo ɛkile awie biala, amaa wɔanwu. 25  Na saa mgbanyima ne mɔ te kɛ me nee wɔ ɛdendɛ na bɛbaka bɛkile wɔ kɛ, ‘Yɛsɛlɛ wɔ, ka mɔɔ ɛhanle ɛhilele belemgbunli ne la kile yɛ. Mmafa debie biala ɛfea yɛ na yɛnrɛhu wɔ.+ Duzu a belemgbunli ne hanle hilele wɔ a?’ 26  bua bɛ kɛ, ‘Ɛnee melɛsɛlɛ belemgbunli ne kɛ ɔmmafa me ɔkɔ Gyɛhɔnatan sua nu ɛkɛ ne bieko anrɛɛ mebawu wɔ ɛkɛ.’”+ 27  Nzinlii, mgbanyima ne mɔ amuala rale Gyɛlɛmaya anwo ɛkɛ na bɛbizebizale ye edwɛkɛ. Ɔhanle debie biala mɔɔ belemgbunli ne hanle kɛ ɔha la ɔhilele bɛ. Ɔti bɛanga edwɛkɛ bieko bɛangile ye ɔluakɛ awie biala ande adwelie ne. 28  Gyɛlɛmaya dɛnlanle Sinzavolɛma Sua nu ɛkɛ hɔkpulale kenle mɔɔ bɛhonle bɛvale Gyɛlusalɛm la;+ mekɛ mɔɔ bɛhonle bɛvale Gyɛlusalɛm la, ɛnee ɔtɛbɔ ɛkɛ.+

Ɔbodwɛkɛ

Anzɛɛ “ewule.”
Hibulu aneɛ nu, “kɛvinde kɛhɔ Kaledeama ɛkɛ.”
Hibulu aneɛ nu, “banyia ngoane.”
Anzɛɛ “suakunlu kpanyinli.”
Anzɛɛ “suakunlu.”
Hibulu aneɛ nu, “Mrenyia mɔɔ bɛ nee bɛ de anzodwolɛ nu.”