Gyɛlɛmaya 37:1-21

  • Kaledeama hwenle bɛ nzi ekyi (1-10)

  • Bɛdole Gyɛlɛmaya efiade (11-16)

  • Zɛdikaya nee Gyɛlɛmaya dendɛle (17-21)

    • Bɛmaanle Gyɛlɛmaya paano (21)

37  Na Dwosaya ara Belemgbunli Zɛdikaya+ lile Gyɛhɔyakem ara Kɔnaya* agyakɛ anu lile tumi,+ ɔluakɛ Babelɔn Belemgbunli Nɛbukadenɛza vale ye ziele belemgbunli wɔ Dwuda azɛlɛ ne azo.+  Noko ɔdaye nee ye sonvolɛma nee menli mɔɔ de azɛlɛ ne azo la andie Gyihova edwɛkɛ mɔɔ ɔluale ngapezonli Gyɛlɛmaya anwo zo ɔhanle la.  Na Belemgbunli Zɛdikaya zoanle Hyɛlimaya ara Gyɛhukale+ nee ɛsɔfo Meeyasaya ara Zɛfanaya+ wɔ ngapezonli Gyɛlɛmaya anwo ɛkɛ ne kɛ: “Yɛsɛlɛ wɔ, sɛlɛ Gyihova yɛ Nyamenle ne maa yɛ.”  Mekɛ zɔhane ɛnee Gyɛlɛmaya kola kɔ maanle ne anu ɛleka biala, ɔluakɛ ɛnee bɛtɛtole ye efiade.+  Ɛnee Falo ɛlɔnema ne ɛdu bɛ bo ɛvi Yigyibiti,+ na Kaledeama mɔɔ ɛbɛnga Gyɛlusalɛm ɛyia la dele bɛ nwo edwɛkɛ. Yemɔti bɛgyakyile Gyɛlusalɛm ɛtetalɛ ne.+  Akee Gyihova edwɛkɛ rale ngapezonli Gyɛlɛmaya ɛkɛ ne kɛ:  “Mɔɔ Gyihova, Yizilayɛ Nyamenle ne ɛha la ɛne, ‘Bɛhɔha bɛhile Dwuda belemgbunli ne mɔɔ zoanle bɛ kɛ bɛrabiza me edwɛkɛ la kɛ: “Nea! Falo ɛlɔnema ne mɔɔ bɛlɛba bɛaraboa bɛ la bɛazia bɛ nzi ahɔ bɛ maanle nu wɔ Yigyibiti.+  Na Kaledeama bazia ara na bɛ nee suakpole ɛhye araho, bɛbava na bɛado senle wɔ zolɛ bɛayela ye.”+  Mɔɔ Gyihova ɛha la ɛne, “Bɛmmabɛlɛbɛla bɛ nwo bɛka kɛ, ‘Kaledeama ne ɛnrɛzia ɛnrɛra,’ ɔluakɛ bɛbazia bɛara. 10  Saa bɛdi Kaledea ɛlɔnema ne mɔɔ bɛ nee bɛ ɛlɛko la kɔsɔɔti anwo zo konim na ɔka menli mɔɔ ɛbodɛboda la angome bɔbɔ a, bɛvi bɛ ɛdanlɛ azua ne mɔ anu bɛbadwazo na bɛado senle wɔ suakpole ɛhye azo bɛayela ye.”’”+ 11  Mekɛ mɔɔ Falo ɛlɔnema ne ati Kaledea ɛlɔnema ne yele bɛ nwo vile Gyɛlusalɛm la,+ 12  Gyɛlɛmaya zile nu kɛ ɔfi Gyɛlusalɛm yeahɔ Bɛngyaman azɛlɛ zo+ yeahɔlie ye afoa nu ɛdeɛ wɔ ye menli ne anu. 13  Noko mɔɔ ɔdwule Bɛngyaman Anlenkɛ Kpole ne anloa la, sinzavolɛma kpanyinli mɔɔ nea ɛkɛ mɔɔ ye duma a le Ayelaegya, Hananaya ara Hyɛlimaya ara la, zɔle ngapezonli Gyɛlɛmaya na ɔhanle kɛ: “Ɛlɛnriandi wɔahɔ Kaledeama afoa!” 14  Noko Gyɛlɛmaya hanle kɛ: “Ɔnle nɔhalɛ! Mennriandi mengɔ Kaledeama afoa.” Noko yeandie ye. Ɔti Ayelaegya hyele Gyɛlɛmaya na ɔvale ye ɔhɔmaanle mgbanyima ne mɔ. 15  Mgbanyima ne mɔ vale Gyɛlɛmaya anwo ɛya kpole,+ yemɔti bɛbole ye na bɛvale ye bɛdole efiade+ wɔ kɛlɛhɛlɛvolɛ Gyɛhɔnatan sua nu ɛkɛ, ɔluakɛ ɛnee bɛva ɛkɛ ne bɛyɛ efiade. 16  Bɛvale Gyɛlɛmaya bɛhɔdole efiade, wɔ azɛlɛ bo efiade* bie anu, na ɔlale ɛkɛ ne kenle dɔɔnwo. 17  Na Belemgbunli Zɛdikaya zoanle maanle bɛhɔvɛlɛle ye, na belemgbunli ne bizebizale ye edwɛkɛ wɔ fealeranu wɔ ye sua nu* ɛkɛ.+ Ɔbizale ye kɛ, “Asoo edwɛkɛ mɔɔ vi Gyihova la bie wɔ ɛkɛ ɔ?” Gyɛlɛmaya buale ye kɛ, “Ɛhɛe, bie wɔ ɛkɛ!” na ɔdoale zo kɛ, “Bɛbava wɔ bɛawula Babelɔn belemgbunli ne asa anu!”+ 18  Eza Gyɛlɛmaya zele Belemgbunli Zɛdikaya kɛ: “Duzu ɛtane a meyɛ metia ɛdawɔ, wɔ sonvolɛma nee menli ɛhye, mɔɔ ɔdaye ti bɛhye me bɛdo efiade a? 19  Nienwu a wɔ ngapezoma ne mɔ mɔɔ bɛhanle ngapezo bɛhilele wɔ kɛ, ‘Babelɔn belemgbunli ne ɛnrɛra ɛ nwo zo nee azɛlɛ ɛhye azo’ la wɔ a?+ 20  O me menle belemgbunli, mesɛlɛ wɔ tie. Maa menva me nzɛlɛlɛ ɛhye mendo ɛ nyunlu. Mmafa me ɛkɔ kɛlɛhɛlɛvolɛ Gyɛhɔnatan sua nu ɛkɛ ne bieko,+ anrɛɛ mebawu wɔ ɛkɛ.”+ 21  Ɔti Belemgbunli Zɛdikaya maanle bɛvale Gyɛlɛmaya bɛhɔdole efiade wɔ Sinzavolɛma Sua nu ɛkɛ,+ na bɛvale paano kunguma ko bɛvile menli mɔɔ to paano la awɔdenle ne azo bɛrɛlɛle ye alehyenlɛ biala+ hɔkpulale kɛ suakpole ne azo paano kɔsɔɔti wiele la.+ Na Gyɛlɛmaya hale Sinzavolɛma Sua nu ɛkɛ.

Ɔbodwɛkɛ

Eza bɛfɛlɛ ye Gyɛhɔyakɛn yɛɛ Gyɛkonaya.
Hibulu aneɛ nu, “bula sua.”
Anzɛɛ “belemgbunli sua nu.”