Gyɛlɛmaya 36:1-32

  • Bɛhɛlɛle Gyɛlɛmaya edwɛkɛ wɔ nwomamobɔleɛ zo (1-7)

  • Bɛlɛke gengale nwomamobɔleɛ ne kpole (8-19)

  • Gyɛhɔyakem yelale nwomamobɔleɛ ne (20-26)

  • Bɛhɛlɛle edwɛkɛ ne bieko wɔ nwomamobɔleɛ fofolɛ zo (27-32)

36  Wɔ Dwuda Belemgbunli Gyɛhɔyakem,+ Dwosaya ara ne ɛvolɛ nna ne azo, edwɛkɛ ɛhye vi Gyihova ɛkɛ rale Gyɛlɛmaya ɛkɛ ne kɛ:  “Fa nwomamobɔleɛ na kɛlɛ edwɛkɛ mɔɔ menganle mentiale Yizilayɛ, Dwuda+ nee maanle maanle kɔsɔɔti,+ ɔvi kenle mɔɔ limoa mɔɔ me nee wɔ dendɛle wɔ Dwosaya mekɛ zo too badwu ɛnɛ la amuala wɔ nu.+  Bie a saa Dwudama te munzule ne mɔɔ mezuzu nwo kɛ mefa meara bɛ nwo zo la amuala a, bɛbazia bɛavi bɛ ndenle ɛtane ne mɔ anwo, na meava bɛ nvonleɛ nee bɛ ɛtane meahyɛ bɛ.”+  Ɔti Gyɛlɛmaya vɛlɛle Nelaya ara Bɛlɛke,+ na Gyɛlɛmaya hanle edwɛkɛ ne mɔɔ Gyihova ɛha ɛhile ye la amuala ɔhilele ye, na Bɛlɛke hɛlɛle ye wɔ nwomamobɔleɛ ne anu.+  Akee Gyɛlɛmaya zele Bɛlɛke kɛ: “Bɛdua me kɛ memmakɔ Gyihova sua nu ɛkɛ.  Ɔti ɛdawɔ a ɔwɔ kɛ ɛkɔ na ɛkɔkenga Gyihova edwɛkɛ ne kpole ɛfi nwomamobɔleɛ ne mɔɔ menganle memaanle ɛhɛlɛle la anu a. Kenga ye wɔ Gyihova sua nu ɛkɛ maa menli ne ɛde wɔ kenle mɔɔ bɛlɛkye ɛhɔne la; yemɔti kenga kile Dwudama mɔɔ vi bɛ azuamgbole ne mɔ azo kɛra la amuala.  Bie a bɛbazɛlɛ Gyihova anyunlu ɛlolɛ, na bɛ nuhua ko biala azia ɔ nzi avi ye adenle ɛtane ne azo, ɔluakɛ ɛya nee ɛya kpole mɔɔ Gyihova ɛva ye wɔ menli ɛhye mɔ anwo la le kpole kpalɛ.”  Ɔti Nelaya ara Bɛlɛke yɛle mɔɔ ngapezonli Gyɛlɛmaya hanle hilele ye la amuala; ɔgengale Gyihova edwɛkɛ ne mɔɔ wɔ nwomamobɔleɛ* ne anu la kpole wɔ Gyihova sua nu ɛkɛ.+  Wɔ Dwuda Belemgbunli Gyɛhɔyakem,+ Dwosaya ara ne ɛvolɛ nnu ne azo, wɔ siane ngɔnla ne anu, menli mɔɔ wɔ Gyɛlusalɛm la amuala nee menli mɔɔ vi Dwuda azuamgbole ne mɔ azo rale Gyɛlusalɛm la amuala bɔle ɛhɔnehyelɛ bo wɔ Gyihova anyunlu.+ 10  Akee Bɛlɛke gengale Gyɛlɛmaya edwɛkɛ ne mɔɔ wɔ nwomamobɔleɛ ne anu la kpole ɔmaanle menli ne amuala dele, wɔ Gyihova sua nu ɛkɛ, wɔ Hyeefan+ ara kɛlɛhɛlɛvolɛ Gɛmalaya+ ekpumgbunli* ɛdeɛ ne anu, wɔ anwuma alienwo ɛkɛ, wɔ Gyihova sua ne anlenkɛ kpole fofolɛ ne anloa.+ 11  Mɔɔ Hyeefan ara Gɛmalaya ara Maekaya dele Gyihova edwɛkɛ ne amuala vile nwomamobɔleɛ ne anu la, 12  ɔzanle ye zo ɔhɔle belemgbunli ne sua nu* ɛkɛ wɔ kɛlɛhɛlɛvolɛ ne ekpumgbunli ɛdeɛ ne anu. Ɛnee mgbanyima* ne mɔ amuala dede ɛkɛ: Kɛlɛhɛlɛvolɛ Ɛlehyama,+ Hyɛmaya ara Dɛlaya, Akebɔ+ ara Ɛleneetan,+ Hyeefan ara Gɛmalaya, Hananaya ara Zɛdikaya nee mgbanyima mɔɔ ɛha la amuala. 13  Maekaya hanle edwɛkɛ mɔɔ ɔdele wɔ mekɛ mɔɔ ɛnee Bɛlɛke ɛlɛkenga nwomamobɔleɛ ne ahile menli ne la amuala hilele bɛ. 14  Akee mgbanyima ne mɔ amuala zoanle Kuhyae ara Hyɛlimaya ara Nɛtanaya ara Gyɛhudae wɔ Bɛlɛke anwo ɛkɛ ne kɛ: “Fa nwomamobɔleɛ ne mɔɔ ɛgengale ɛhilele menli ne la bɛla.” Nelaya ara Bɛlɛke vale nwomamobɔleɛ ne lɛle ye ɔ sa nu na ɔhɔle bɛ nwo ɛkɛ. 15  Bɛzele ye kɛ: “Yɛsɛlɛ wɔ, tɛnla aze, na kenga ye kpole kile yɛ.” Ɔti Bɛlɛke gengale hilele bɛ. 16  Mɔɔ bɛdele edwɛkɛ ne ala la, ɛzulolɛ maanle bɛnleɛnleanle bɛ nyunlu ngoko, na bɛzele Bɛlɛke kɛ: “Nɔhalɛ nu, ɔwɔ kɛ yɛka edwɛkɛ ɛhye mɔ amuala yɛkile belemgbunli ne.” 17  Na bɛbizale Bɛlɛke kɛ: “Yɛsɛlɛ wɔ, ka kɛzi ɛhɛlɛle edwɛkɛ ɛhye mɔ amuala la kile yɛ. Asoo ɔdaye a ɔhanle ɔmaanle ɛhɛlɛle a?” 18  Bɛlɛke buale bɛ kɛ: “Ɔhanle edwɛkɛ ɛhye mɔ amuala ɔhilele me, yɛɛ menvale ɛnke mengɛlɛle ɔ muala wɔ nwomamobɔleɛ ɛhye anu a.” 19  Mgbanyima ne mɔ zele Bɛlɛke kɛ: “Kɔ na ɛ nee Gyɛlɛmaya bɛhɔvea, bɛmmamaa awie nwu ɛleka mɔɔ bɛwɔ la.”+ 20  Na bɛhɔle belemgbunli ne anwo ɛkɛ wɔ alie ne anwo, na bɛvale nwomamobɔleɛ ne bɛdole kɛlɛhɛlɛvolɛ Ɛlehyama ekpumgbunli ɛdeɛ ne anu, na bɛhanle debie biala mɔɔ bɛdele la bɛhilele belemgbunli ne. 21  Ɔti, belemgbunli ne zoanle Gyɛhudae+ kɛ ɔhɔva nwomamobɔleɛ ne ɔrɛla, na ɔhɔvale ye wɔ kɛlɛhɛlɛvolɛ Ɛlehyama ekpumgbunli ne anu ɔrale. Gyɛhudae bɔle ɔ bo gengale hilele belemgbunli ne nee mgbanyima mɔɔ gyigyi belemgbunli ne anwo ɛkɛ ne la amuala. 22  Ɛnee belemgbunli ne de fɔsɛlɛ mekɛ nu sua ne anu wɔ siane ngɔnla ne anu, na buakɛ mɔɔ senle ɛlɛsɔ nu la gyi ɔ nyunlu ɛkɛ. 23  Saa Gyɛhudae kenga foa nsa anzɛɛ nna wie a, ɛnee belemgbunli ne ɛva kɛlɛhɛlɛvolɛ dadeɛ ɛpɛ ɛdo senle ne mɔɔ ɛlɛsɔ buakɛ ne anu la anu, kɔkpula kɛ nwomamobɔleɛ ne amuala pɛle lile senle ne mɔɔ wɔ buakɛ ne anu la anu. 24  Na bɛanzulo; belemgbunli ne nee ye sonvolɛma kɔsɔɔti mɔɔ dele edwɛkɛ ɛhye mɔ amuala la anu biala antete ye tɛladeɛ nu. 25  Ɛleneetan,+ Dɛlaya+ nee Gɛmalaya+ bodole belemgbunli ne kɛ ɔmmayela nwomamobɔleɛ ne, noko yeandie bɛ. 26  Akee belemgbunli ne zele belemgbunli ara Gyilameyɛle, Azeleɛle ara Sɛlaya nee Abedili ara Hyɛlimaya kɛ bɛhɔhye kɛlɛhɛlɛvolɛ Bɛlɛke nee ngapezonli Gyɛlɛmaya, noko Gyihova vale bɛ veale.+ 27  Mɔɔ belemgbunli ne yelale nwomamobɔleɛ ne mɔɔ edwɛkɛ mɔɔ Gyɛlɛmaya hanle maanle Bɛlɛke hɛlɛle wɔ nu la anzi, Gyihova edwɛkɛ ne rale Gyɛlɛmaya ɛkɛ ne bieko+ kɛ: 28  “Fa nwomamobɔleɛ fofolɛ na kɛlɛ edwɛkɛ mɔɔ ɛnee wɔ alimoa nwomamobɔleɛ ne mɔɔ Dwuda Belemgbunli Gyɛhɔyakem yelale ye azo la kɔsɔɔti bieko wɔ zo.+ 29  Na se Dwuda Belemgbunli Gyɛhɔyakem kɛ, ‘Mɔɔ Gyihova ɛha la ɛne: “Wɔyela nwomamobɔleɛ ɛhye na wɔha kɛ, ‘Duzu ati a wɔhɛlɛ ye wɔ nu kɛ: “Babelɔn belemgbunli ne barazɛkye azɛlɛ ye na yeahu menli nee nyɛmoa mɔɔ wɔ zolɛ la amuala ɛ”?’+ 30  Ɛhye ati, mɔɔ Gyihova ɛha ɛtia Dwuda Belemgbunli Gyɛhɔyakem la ɛne, ‘Ɔnrɛnyia awie ɛnrɛdɛnla Devidi belemgbunli ebia ne azo,+ na ewia babɔ ye funli alehyenlɛ nu na ɛbɔlɛ adɔ agua zo nɔɔzo.+ 31  Mebadua ɔdaye nee ɔ bo zo amra nee ye sonvolɛma kakɛ wɔ bɛ nvonleɛ nwo, na mebamaa munzule mɔɔ menganle mentiale bɛ nee Gyɛlusalɛmma nee Dwuda mrenyia la kɔsɔɔti ara bɛ nwo zo+ ɔluakɛ bɛandie me.’”’”+ 32  Akee Gyɛlɛmaya vale nwomamobɔleɛ fofolɛ na ɔvale ɔmaanle Nelaya ara Bɛlɛke, kɛlɛhɛlɛvolɛ ne,+ na Gyɛlɛmaya hanle maanle ɔhɛlɛle edwɛkɛ mɔɔ ɛnee wɔ nwomamobɔleɛ ne azo mɔɔ Dwuda Belemgbunli Gyɛhɔyakem yelale ye wɔ senle ne anu la amuala bieko wɔ zo.+ Na ɔhanle edwɛkɛ dɔɔnwo mɔɔ le kɛ ɛhendeɛ ne la ɔbokale nwo.

Ɔbodwɛkɛ

Anzɛɛ “buluku.”
Anzɛɛ “aleɛlilɛleka.”
Anzɛɛ “suakunlu.”
Anzɛɛ “suakunlu mgbanyima.”