Gyɛlɛmaya 35:1-19

  • Rilikabema yɛle tieyɛ nwo neazo (1-19)

35  Edwɛkɛ mɔɔ vi Gyihova ɛkɛ rale Gyɛlɛmaya ɛkɛ ne wɔ Dwosaya ara Gyɛhɔyakem,+ Dwuda belemgbunli ne mekɛ zo la ɛne:  “Kɔ Rilikabema sua nu+ na ɛ nee bɛ ɛhɔdendɛ na fa bɛ bɛla Gyihova sua nu ɛkɛ, wɔ aleɛlilɛ azua* ne mɔ ko anu; na maa bɛ nwanye maa bɛnlo.”  Ɔti menvale Habazenaya ara Gyɛlɛmaya ara Gyeeyazanaya, ɔ mediema ne mɔ, ɔ mra kɔsɔɔti nee Rilikabe sua nu amra amuala  membale Gyihova sua nu ɛkɛ. Menvale bɛ membale Yegedalaya ara Heenan, nɔhalɛ Nyamenle sonla ne aleɛlilɛ sua ne mɔɔ bikye mgbanyima ne mɔ aleɛlilɛ sua ne mɔɔ wɔ Hyalɛm ara Meeyasaya, anlenkɛ sinzavolɛ ne aleɛlilɛ sua ne anwuma la anu.  Akee menvale kanrɛlɛ nee tɔmɛlɛ mɔɔ nwanye ɛyiyi bɛ tetɛkɛɛ la menziele mrenyia mɔɔ wɔ Rilikabema sua nu la anyunlu na menzele bɛ kɛ: “Bɛnlo nwanye.”  Na bɛhanle kɛ: “Yɛnrɛnlo nwanye, ɔluakɛ yɛ nenyia Rilikabe ara Gyɛhɔnadabe,+ maanle yɛ mɛla ɛhye kɛ, ‘Ɔnle kɛ bɛdabɛ anzɛɛ bɛ mra anu biala no nwanye ɛlɛ.  Yɛɛ bɛmmasi sua, bɛmmadua ma, anzɛɛ bɛmmayɛ vanye egyinli anzɛɛ bɛmmakpondɛ bie. Emomu, bɛdɛnla ɛdanlɛ azua nu dahuu, amaa bɛadɛnla ngoane nu wɔ azɛlɛ ne mɔɔ bɛde zolɛ kɛ nyɛvolɛ la azo bɛahyɛ.’  Ɔti yɛhɔ zo yɛdie yɛ nenyia Rilikabe ara Gyɛhɔnadabe ane wɔ mɔɔ ɔhanle ɔhilele yɛ la kɔsɔɔti anwo, na yɛtɛnonle nwanye biala ɛlɛ—yɛdayɛ, yɛ ye mɔ, yɛ mra mrenyia nee yɛ mra mraalɛ.  Na yɛnzi azua yɛndɛnla nu, yɛɛ yɛnlɛ vanye egyinli anzɛɛ azɛlɛ anzɛɛ ma. 10  Yɛde ɛdanlɛ azua nu yɛɛ yɛli edwɛkɛ biala mɔɔ yɛ nenyia Gyɛhɔnadabe* hanle hilele yɛ la azo. 11  Noko mekɛ mɔɔ Babelɔn Belemgbunli Nɛbukadenɛza rale azɛlɛ ne azo la,+ yɛhanle kɛ, ‘Bɛrɛla, bɛmaa yɛnriandi yɛhɔ Gyɛlusalɛm amaa Kaledea nee Selea ɛlɔnema asa anga yɛ,’ yɛɛ kɛkala yɛde Gyɛlusalɛm a.” 12  Na Gyihova edwɛkɛ rale Gyɛlɛmaya ɛkɛ ne kɛ: 13  “Mɔɔ ɛlɔne Gyihova, Yizilayɛ Nyamenle ne ɛha la ɛne, ‘Kɔ na kɔha kile Dwuda mrenyia nee Gyɛlusalɛmma kɛ: “Asoo mendu bɛ folɛ dahuu kɛ bɛdie me edwɛkɛ ɔ?”+ Gyihova a se a. 14  “Rilikabe ara Gyɛhɔnadabe hanle hilele ɔ bo zo amra kɛ bɛmmano nwanye, na bɛli ye edwɛkɛ zo, bɛanno nwanye too badwu ɛnɛ, na ɔlua zo bɛdie bɛ nenyia.+ Medendɛ mehile bɛ fane dɔɔnwo,* noko bɛandie me.+ 15  Na mengɔle zo menzoanle me azonvolɛ ngapezoma ne mɔ kɔsɔɔti wɔ bɛ nwo ɛkɛ, menzoanle bɛ fane dɔɔnwo*+ na bɛhanle kɛ, ‘Mesɛlɛ bɛ, awie biala ɛzia ɔ nzi ɛvi ye ndenle ɛtane ne mɔ azo+ na ɔyɛ mɔɔ tenrɛ la! Bɛmmadi nyamenle gyɛne nzi na bɛsonle bɛ. Na bɛadɛnla azɛlɛ ne mɔɔ menvale memaanle bɛ nee bɛ nenyia mɔ la azo.’+ Noko bɛanyɛ ɛnzolɛ bɛandie me. 16  Rilikabe ara Gyɛhɔnadabe abozoamra ɛli edwɛkɛ mɔɔ bɛ nenyia hanle hilele bɛ la azo,+ noko menli ɛhye mɔ andie me.”’” 17  “Ɛhye ati, mɔɔ Gyihova, ɛlɔne Nyamenle, Yizilayɛ Nyamenle ne ɛha la ɛne: ‘Nea melɛmaa munzule kɔsɔɔti mɔɔ menvale membɔle Dwuda nee Gyɛlusalɛmma kɔkɔ la amuala ado bɛ,+ ɔluakɛ mendendɛle mengilele bɛ, noko bɛandie, yɛɛ mengɔle zo menvɛlɛle bɛ, noko bɛandɛne me zo.’”+ 18  Na Gyɛlɛmaya hanle hilele Rilikabe sua nu amra kɛ: “Mɔɔ ɛlɔne Gyihova, Yizilayɛ Nyamenle ne ɛha la ɛne, ‘Ɔluakɛ bɛdie bɛ nenyia Gyɛhɔnadabe edwɛkɛ na bɛkɔ zo bɛdi ye mɛla kɔsɔɔti azo, bɛyɛ mɔɔ yeha la pɛpɛɛpɛ la ati, 19  mɔɔ ɛlɔne Gyihova, Yizilayɛ Nyamenle ne ɛha la ɛne: “Bɛbanyia Rilikabe ara Gyɛhɔnadabe abo zo sonla mɔɔ ɔbazonle wɔ me nyunlu dahuu a.”’”

Ɔbodwɛkɛ

Anzɛɛ “ekpumgbunli.”
Hibulu aneɛ nu, “Dwɔnadabe, ɔle Gyɛhɔnadabe mɔɔ bɛpɛ ye sinli.”
Hibulu aneɛ nu, “medwazo ndɛ metendɛ.”
Hibulu aneɛ nu, “medwazo ndɛ na mesoa bɛ.”