Gyɛlɛmaya 34:1-22

  • Bɛbuale Zɛdikaya ndɛne (1-7)

  • Bɛzɛkyele ngɛkɛlɛ fanwodi ngyekyeleɛ ne (8-22)

34  Edwɛkɛ mɔɔ vi Gyihova ɛkɛ rale Gyɛlɛmaya ɛkɛ ne wɔ mekɛ mɔɔ Babelɔn Belemgbunli Nɛbukadenɛza nee ye ɛlɔnema kɔsɔɔti nee azɛlɛ ye azo arelemgbunlililɛ mɔɔ wɔ ɔ bo la amuala nee maanle kɔsɔɔti ɛlɛko atia Gyɛlusalɛm nee azuamgbole kɔsɔɔti mɔɔ zuozua ye la ɛne:+  “Mɔɔ Gyihova, Yizilayɛ Nyamenle ne ɛha la ɛne, ‘Kɔ na kɔdendɛ kile Dwuda Belemgbunli Zɛdikaya+ na ka kile ye kɛ: “Mɔɔ Gyihova ɛha la ɛne, ‘Nea melɛfa suakpole ɛhye meawula Babelɔn belemgbunli ne asa anu, na ɔbado senle wɔ zolɛ yeayela ye.+  Na ɛnrɛvi ɔ sa, ɔluakɛ ɔnva nwo mɔɔ bazi biala la, bɛbahye wɔ bɛava wɔ bɛawula ɔ sa nu.+ Ɛ nee Babelɔn belemgbunli ne bɛ nye bayɛ nna, na ɔ nee wɔ badendɛ, na ɛbahɔ Babelɔn.’+  Noko, O Dwuda Belemgbunli Zɛdikaya, tie Gyihova edwɛkɛ, ‘Mɔɔ Gyihova ɛha ye wɔ ɛ nwo la ɛne: “Ɛnrɛwu konle dadeɛ nloa.  Ɛbawu anzodwolɛ nu,+ na bɛbayela ayile evuanlɛ bɛamaa wɔ kɛ mɔɔ bɛyɛle bɛmaanle wɔ papa mɔ, arelemgbunli mɔɔ limoa ɛ nyunlu la, na bɛazu wɔ kɛ, ‘O, yɛ menle!’ ɔluakɛ ‘medame a meha a,’ Gyihova a se a.”’”’”  Ngapezonli Gyɛlɛmaya hanle edwɛkɛ ɛhye mɔ amuala hilele Dwuda Belemgbunli Zɛdikaya wɔ Gyɛlusalɛm,  wɔ mekɛ mɔɔ ɛnee Babelɔn belemgbunli ne ɛlɔnema nee Gyɛlusalɛm nee Dwuda azuamgbole mɔɔ ɛha kɔsɔɔti,+ Leekehye+ nee Azika ɛlɛko la;+ ɔluakɛ bɛmɛ a ɛnee bɛle Dwuda azuamgbole mɔɔ ɛha mɔɔ bɛlie nwolɛ bane a.  Edwɛkɛ ɛhye vi Gyihova ɛkɛ rale Gyɛlɛmaya ɛkɛ ne wɔ mekɛ mɔɔ Belemgbunli Zɛdikaya nee menli mɔɔ wɔ Gyɛlusalɛm amuala yɛle ngyekyeleɛ kɛ bɛbɔ fanwodi nwo nolo bɛhile bɛ,+  kɛ ɔwɔ kɛ awie biala gyakyi ye Hibulu ngɛkɛlɛ, mrenyia nee mraalɛ, amaa awie biala anva ɔ diema Dwuunli anyɛ ye akɛlɛ la. 10  Ɔti mgbanyima ne mɔ kɔsɔɔti nee menli ne kɔsɔɔti diele. Bɛyɛle ngyekyeleɛ kɛ ɔwɔ kɛ awie biala gyakyi ye ngɛkɛlɛ mrenyia nee mraalɛ na ɔnle kɛ ɔfa bɛ ɔyɛ ngɛkɛlɛ bieko. Bɛdiele na bɛmaanle bɛhɔle. 11  Noko, nzinlii bɛhɔvale ngɛkɛlɛ mrenyia nee mraalɛ mɔɔ bɛgyakyile bɛ la bɛziale bɛrale, na bɛvale bɛ bɛyɛle ngɛkɛlɛ bieko. 12  Ɔti Gyihova edwɛkɛ ne vi Gyihova ɛkɛ rale Gyɛlɛmaya ɛkɛ ne kɛ: 13  “Mɔɔ Gyihova, Yizilayɛ Nyamenle ne ɛha la ɛne, ‘Me nee bɛ nenyia mɔ yɛle ngyekyeleɛ+ wɔ kenle mɔɔ menyele bɛ menvile Yigyibiti azɛlɛ zo, wɔ akɛlɛzonlenlɛ sua nu+ la, kɛ: 14  “Wɔ ɛvolɛ nsuu awieleɛ, awie biala ɛgyakyi ɔ diema Hibulunli mɔɔ bɛdɔnenle ye bɛmaanle ye na yezonle ye ɛvolɛ nsia la; ɔwɔ kɛ ɔgyakyi ye ɔmaa ɔnyia fanwodi.”+ Noko bɛ nenyia mɔ andie me anzɛɛ bɛanyɛ ɛnzolɛ bɛammaa me. 15  Na kenlensa ye* bɛhakyile bɛ ndenle na bɛyɛle mɔɔ sɔ me nye la bɛbɔle fanwodi nwo nolo bɛhilele bɛ mediema, na bɛyɛle ngyekyeleɛ wɔ me nye zo wɔ sua ne mɔɔ me duma la zo la anu. 16  Noko bɛhakyi bɛ ndenle na bɛgua me duma ne anwo evinli+ ɔluakɛ bɛhɔva bɛ ngɛkɛlɛ mrenyia nee mraalɛ bɛra, wɔ mekɛ mɔɔ ɛnee bɛnyia fanwodi kɛ mɔɔ bɛkpondɛ la, na bɛva bɛ bɛyɛ ngɛkɛlɛ bieko.’ 17  “Ɛhye ati, mɔɔ Gyihova ɛha la ɛne: ‘Bɛandie me bɛambɔ fanwodi nwo nolo kɛ awie biala ɛgyakyi ɔ diema nee ɔ gɔnwo.+ Ɔti kɛkala, mebabɔ fanwodi nwo nolo meahile bɛ,’ Gyihova a se a, ‘meamaa konle dadeɛ, ɛhɔne nee ewulenzane ahuhu bɛ,+ na meamaa bɛahakyi debie ɛzulolɛ bie bɛamaa azɛlɛ ye azo arelemgbunlililɛ kɔsɔɔti.+ 18  Na mɔɔ bado mrenyia mɔɔ zɛkyele me ngyekyeleɛ ne, mɔɔ bɛanli edwɛkɛ mɔɔ wɔ ngyekyeleɛ ne mɔɔ bɛyɛle ye me nye zo anu la azo, wɔ mekɛ mɔɔ bɛkpakyele ɛnlankɛ ralɛ nu nwiɔ na bɛluale avinli la,+ 19  bɛmɛ a le Dwuda mgbanyima, Gyɛlusalɛm mgbanyima, belemgbunli sua nu mgbanyima, ɛsɔfoma nee menli kɔsɔɔti mɔɔ wɔ azɛlɛ ne azo mɔɔ bɛluale ɛnlankɛ ralɛ mɔɔ bɛkpakyele nu avinli la: 20  Mebava bɛ meawula bɛ kpɔvolɛma nee menli mɔɔ kpondɛ bɛ ahu bɛ la asa anu, na bɛ avunli bayɛ anwomanyunlu nloma nee azɛlɛ ye azo nane aleɛ.+ 21  Na mebava Dwuda Belemgbunli Zɛdikaya nee ye mgbanyima meawula bɛ kpɔvolɛma asa anu nee menli mɔɔ kpondɛ bɛ ahu bɛ la asa anu nee Babelɔn belemgbunli ɛlɔnema+ mɔɔ ɛlɛtwe bɛ nwo avi ɛ nwo la asa anu.’+ 22  “‘Nea, mebamaa adenle,’ Gyihova a se a, ‘na mebava bɛ meazia meara suakpole ɛhye azo, bɛ nee bɛ baho na bɛava suakpole ne na bɛado senle zolɛ bɛayela ye;+ mebamaa Dwuda azuamgbole ne mɔ adɔ mgbane, awie ɛnrɛdɛnla zolɛ.’”+

Ɔbodwɛkɛ

Anzɛɛ “ɛnɛ.”