Gyɛlɛmaya 3:1-25

  • Yizilayɛ ɛkpɔkyelɛ ne bo zo (1-5)

  • Yizilayɛ nee Dwuda agyalɛzɛkyelɛ (6-11)

  • Bɛhanle kɛ bɛnlu bɛ nwo (12-25)

3  Menli biza kɛ: “Saa nrenyia bɔ ɔ ye ewole na raalɛ ne kɔgya nrenyia fofolɛ a, asoo nrenyia ne bahola azia ahɔ ye ɛkɛ ne bieko?” Azɛlɛ zɔhane anwo ɛtɛguale evinli bɔkɔɔ ɔ?+ “Ɛ nee kulovolɛma dɔɔnwo ɛbɔ tuutuu ɛbɛla,+Asoo ɛbahola wɔazia wɔara me ɛkɛ ne bieko?” Gyihova a se a.   “To ɛ nye wɔ awoka ne mɔ azo lɔ na nea. Nienwu a bɛtɛkyele wɔ mialera nu bɛ nee wɔ ɛtɛdale a? Ɛdɛnlanle ndenle ne mɔ anloa ɛhendɛle bɛ,Kɛ Areleebeanli wɔ fienemgbole ne anu. Ɛluale tuutuubɔlɛ nee wɔ amumuyɛyɛlɛ zo+Ɛguale azɛlɛ ne anwo evinli.   Ɔti ezule ne ɛgyakyi ɛdɔlɛ,+Yɛɛ ezule ɛndɔ wɔ nyenyensuo mekɛ nu. Ɛyɛ wɔ debie kɛ agyalɛ raalɛ mɔɔ bɔ tuutuu ɛbɛla la;Ɛnze nyiane.+   Noko kɛkala ɛfɛlɛ me kɛ,‘Me Papa, ɛle me gɔnwo ɔvi me mbɛlɛra nu!+   Asoo ɔwɔ kɛ awie fa ɛya dahuu,Anzɛɛ ɔfa edwɛkɛ ɔsie ye nu dahuu ɔ?’ Ɛhye a ɛka a,Noko ɛkɔ zo ɛyɛ ɛtane kɔsɔɔti mɔɔ ɛbahola wɔayɛ la.”+  Wɔ Belemgbunli Dwosaya mekɛ zo,+ Gyihova zele me kɛ: “‘Asoo wɔnwu debie mɔɔ Yizilayɛ mɔɔ ɛnli nɔhalɛ la ɛyɛ la? Yehɔ boka tendenle biala azo nee baka buzuu biala abo yehɔbɔ tuutuu ɛbɛla.+  Mɔɔ ɔyɛle ɛhye mɔ kɔsɔɔti bɔbɔ la, mengɔle zo menzele ye kɛ ɔzia ɔrɛla me nwo ɛkɛ,+ noko yeanzia yeamba; na Dwuda hɔle zo nleanle ɔ diema raalɛ ne mɔɔ le mɛlɛbɛla la.+  Mɔɔ menwunle ɛhye la, menvoanle Yizilayɛ mɔɔ ɛnli nɔhalɛ la, memaanle ye ewolebɔlɛ kɛlata+ ɔluakɛ yezɛkye agyalɛ.+ Noko ɔ diema raalɛ Dwuda mɔɔ le mɛlɛbɛla la anzulo; ɔdaye noko ɔhɔbɔle tuutuu ɛbɛla.+  Ɔbule ye tuutuu ɛbɛla ne debie ekyii bie, na ɔhɔle zo ɔguale azɛlɛ ne anwo evinli na ɔ nee awolɛ nee mbaka zɛkyele agyalɛ.+ 10  Ɛhye mɔ amuala anzi, ɔ diema raalɛ Dwuda mɔɔ le mɛlɛbɛla la anva ye ahonle kɔsɔɔti anzia amba me ɛkɛ, ɔbɛlɛbɛlale me ala,’ Gyihova a se a.” 11  Akee Gyihova zele me kɛ: “Yizilayɛ mɔɔ ɛnli nɔhalɛ la ɛhile kɛ ɔle tenlene ɔtɛla Dwuda mɔɔ le mɛlɛbɛla la.+ 12  Kɔ na kɔha edwɛkɛ ɛhye wɔ sɔlɔ nehane kɛ:+ “‘“O Yizilayɛ mɔɔ ɛde atua, sia bɛla,” Gyihova a se a.’+ ‘“Menrɛva ɛya menrɛnlea wɔ,+ ɔluakɛ mele nɔhavo,” Gyihova a se a.’ ‘“Menrɛva ɛ nwo ɛya dahuu. 13  Wɔmɔ die wɔ fɔlɛlilɛ ne to nu, ɔluakɛ wɔde Gyihova wɔ Nyamenle ne anwo atua. Ɛ nee nyɛvolɛ* da wɔ baka buzuu biala abo, na ɛndie me ne,” Gyihova a se a.’” 14  “Bɛmɛ mralɛ mɔɔ bɛde atua, bɛzia bɛrɛla,” Gyihova a se a. “Ɔluakɛ mele bɛ menle* nɔhavo; na mebava suakpole biala azo sonla ko nee abusua biala anu menli nwiɔ, na me nee bɛ ahɔ Zayɔn.+ 15  Na mebamaa bɛ mboaneneavolɛma mɔɔ me ahonle kulo la,+ na bɛbava ndelebɛbo nee nwunu bɛanlea bɛ. 16  Mekɛ zɔhane, bɛ nwo bazo na bɛazo ma dɔɔnwo wɔ azɛlɛ ne azo,” Gyihova a se a.+ “Bɛnrɛha ye bieko kɛ, ‘Gyihova ngyekyeleɛ ɛlɛka ne!’ Ɔnrɛra bɛ ahonle nu, yɛɛ bɛnrɛhakye ye anzɛɛ bɛ nwo ɛnrɛlɔ ye, yɛɛ bɛnrɛyɛ ye bieko. 17  Mekɛ zɔhane, bɛbavɛlɛ Gyɛlusalɛm Gyihova belemgbunli ebia;+ na bɛbaboɔboa maanle maanle ne mɔ kɔsɔɔti anloa bɛamaa Gyihova duma ne wɔ Gyɛlusalɛm,+ na bɛnrɛyɛ anzosesebɛ bɛnrɛli bɛdabɛ mumua ne bɛ ahonle ɛtane ne anzi bieko.” 18  “Mekɛ zɔhane, Dwudama nee Yizilayɛma balua nwo,+ na bɛbabɔ nu bɛavi sɔlɔ azɛlɛ ne azo bɛara azɛlɛ ne mɔɔ menvale memaanle bɛ nenyia mɔ kɛ bɛ agyapadeɛ la azo.+ 19  Na mendwenlenle kɛ, ‘Nea kɛzi menvale bɛ membokale mralɛ ne mɔ anwo na menvale azɛlɛ kpalɛ ne memaanle bɛ, agyapadeɛ kɛnlɛma kpalɛ mɔɔ wɔ maanle maanle ne avinli a!’*+ Eza mendwenlenle kɛ bɛbavɛlɛ me, ‘Me Papa!’ na bɛnrɛhwe bɛ nwo bɛnrɛvi me nwo. 20  ‘Nɔhalɛ nu, kɛ mɔɔ yelɛ mɔɔ ɛnli nɔhalɛ gyakyi ɔ hu* la, zɔhane ala a, bɛmɛ Yizilayɛma noko, bɛanli nɔhalɛ bɛammaa me a,’+ Gyihova a se a.” 21  Bɛte dede bie wɔ awoka ne mɔ azo lɔ,Yizilayɛma ɛzunlɛ nee bɛ ɛbodolɛ ɔ,Ɔluakɛ bɛvo adenle ne;Bɛ rɛle ɛvi Gyihova bɛ Nyamenle ne.+ 22  “Bɛzia bɛrɛla, bɛmɛ mralɛ mɔɔ bɛde atua. Mebayɛ bɛ atuadelɛ ne ayile.”+ “Yɛmɛ ɛne! Yɛra wɔ ɛkɛ,Ɔluakɛ, O Gyihova, wɔmɔ a ɛle yɛ Nyamenle a.+ 23  Nɔhalɛ nu, awoka ngyikyi ne mɔ nee awoka mgbole ne mɔ azo dede ne le mgbane.+ Nɔhalɛ nu, Gyihova yɛ Nyamenle ne anu a Yizilayɛ ngoanelielɛ ne wɔ a.+ 24  Noko anyiemgba deɛ ne* ɛli* mɔɔ yɛ nenyia mɔ ɛyɛ gyima ɛsesebɛ ɛkpondɛ ɔvi yɛ ngakula nu la,+Bɛ mboane nee bɛ nlankɛ,Bɛ mra mrenyia nee bɛ mra mraalɛ. 25  Bɛmaa yɛva yɛ nyiane yɛla,Na yɛ anyiemgba ɛheda yɛ nwo zo,Ɔluakɛ yɛyɛ ɛtane yɛtia Gyihova yɛ Nyamenle ne,+Yɛdayɛ nee yɛ nenyia mɔ ɔvi yɛ ngakula nu too yeradwu ɛnɛ,+Na yɛandie Gyihova yɛ Nyamenle ne ane.”

Ɔbodwɛkɛ

Anzɛɛ “adalɛ nyamenle.”
Anzɛɛ ɔkola ɔkile, “bɛ hu.”
Hibulu aneɛ nu, “maanle maanle ne ɛlɔnema ɛdeɛ.”
Hibulu aneɛ nu, “ɔ gɔnwo.”
Anzɛɛ “anyiemgba nyamenle ne.”
Anzɛɛ “ɛzɛkye.”