Gyɛlɛmaya 23:1-40

  • Mboaneneavolɛ kpalɛma nee ɛtanema (1-4)

  • Banebɔlɛ wɔ “koliagya tenlenenli” ne abo (5-8)

  • Bɛbuale adalɛ ngapezoma fɔlɛ (9-32)

  • Gyihova “adesoa ne” (33-40)

23  “Munzule ɛha mboaneneavolɛma mɔɔ sɛkye mboane mɔɔ wɔ me adidileka ne na bɛbɔ bɛ asande la!” Gyihova a se a.+  Ɛhye ati mɔɔ Gyihova, Yizilayɛ Nyamenle ne ɛha ɛtia mboaneneavolɛma mɔɔ ɛlɛnea ye menli ne la ɛne: “Bɛbɔ me mboane ne mɔ asande; bɛbɔ bɛ bɛkponde, na bɛannea bɛ.”+ “Bɛ ninyɛndane ne mɔ ati mebadea bɛ,” Gyihova a se a.  Akee mebaboɔboa me mboane ne mɔ mɔɔ ɛha la anloa meavi azɛlɛ mɔɔ membɔle bɛ asande memaanle bɛhɔle zolɛ la amuala azo,+ na meava bɛ meara bɛ adidileka ne,+ bɛbawo na bɛ nwo azo.+  Na mebamaa bɛ mboaneneavolɛma mɔɔ banlea bɛ kpalɛ la.+ Bɛnrɛzulo bieko anzɛɛ bɛ ahonle ɛnrɛdu, yɛɛ bɛ nuhua biala ɛnrɛminli,” Gyihova a se a.  “Nea! Mekɛ ɛlɛba,” Gyihova a se a, “mɔɔ mebamaa koliagya* tenlenenli bie zo wɔ Devidi abusua nu a.+ Belemgbunli bie bali tumi+ na ɔbala nwunu ali na yeamaa pɛlepɛlelilɛ nee tenleneyɛlɛ ahɔ zo wɔ azɛlɛ ne azo.+  Wɔ ye mekɛ zo, bɛbalie Dwuda+ na Yizilayɛ adɛnla aze ɔ nwo adɔ ye.+ Na duma ɛhye a bɛbava bɛavɛlɛ ye a: Gyihova Le Yɛ Tenleneyɛlɛ.”+  “Noko, mekɛ ɛlɛba,” Gyihova a se a, “mɔɔ bɛnrɛha ye bieko kɛ: ‘Mekɛ ala mɔɔ Gyihova mɔɔ yele Yizilayɛma vile Yigyibiti azɛlɛ zo rale la de aze la!’+  emomu bɛbaha kɛ: ‘Mekɛ ala mɔɔ Gyihova mɔɔ yele Yizilayɛ abozoamra vile sɔlɔ azɛlɛ ne nee azɛlɛ mɔɔ ɔbɔle bɛ ɔkpondenle zo kɔsɔɔti azo rale la de aze la,’ na bɛbadɛnla bɛdabɛ bɛ azɛlɛ zo.”+  Wɔ ngapezoma ne mɔ anwo: Me ahonle ɛbubu wɔ me nu. Me mbowule kɔsɔɔti ɛlɛwoso. Ɔlua Gyihova nee ye edwɛkɛ nwuanzanwuanza ne mɔ ati,Meyɛ kɛ sonla mɔɔ ɛbo nzaNee sonla mɔɔ nza ɛgya ye la. 10  Agyalɛzɛkyelɛma ɛyi azɛlɛ ne azo;+Amowa ne ati azɛlɛ ne ɛlɛdi nyane+Yɛɛ fienemgbole nu adidileka ne mɔ ɛwe.+ Bɛ ndenle nu ɛnle kpalɛ yɛɛ bɛfa bɛ tumi bɛsisi awie mɔ. 11  “Ngapezoma nee ɛsɔfoma amuala anwo ɛgua evinli.*+ Menwu bɛ amumuyɛ ne wɔ me sua nu bɔbɔ,”+ Gyihova a se a. 12  “Ɔti bɛ adenle nu bayɛ teteletetele nee awozinli;+Bɛbazuhu bɛ na bɛagua aze. Ɔluakɛ mebava munzule meara bɛ nwo zoWɔ ɛvolɛ ne mɔɔ mebahwe bɛ nzo wɔ nu la anu,” Gyihova a se a. 13  “Menwu kyibadeɛ bie wɔ Samɛlea+ ngapezoma ne mɔ anu. Bɛka ngapezo wɔ Beeyale duma nu,Na bɛmaa me menli Yizilayɛma ɛminli. 14  Na menwu ninyɛne mɔɔ yɛ azibɛnwo la wɔ Gyɛlusalɛm ngapezoma ne mɔ anu. Bɛsɛkye agyalɛ+ na bɛbɔ adalɛ;+Bɛsi amumuyɛma adua,*Yɛɛ bɛndwe bɛ nwo bɛnvi bɛ amumuyɛyɛlɛ nwo. Wɔ me nye zo bɛ muala bɛyɛ kɛ Sodɔm,+Na bɛdabɛ mɔɔ bɛde ɛkɛ ne la ɛyɛ kɛ Gomɔla.”+ 15  Ɛhye ati mɔɔ ɛlɔne Gyihova ɛha ɛtia ngapezoma ne mɔ la ɛne: “Nea, mebamaa bɛali ɛnwonleNa meamaa bɛanlo nzule mɔɔ pɔezen wɔ nu la.+ Ɔluakɛ Gyɛlusalɛm ngapezoma ɛmaa ɛkpɔkyelɛ ɛbu azɛlɛ ne kɔsɔɔti azo.” 16  Mɔɔ ɛlɔne Gyihova ɛha la ɛne: “Bɛmmatie ngapezoma mɔɔ bɛlɛka ngapezo bɛahile bɛ la edwɛkɛ.+ Bɛlɛbɛlɛbɛla bɛ.* Ɛnyelɛzodeɛnwunlɛ ne mɔɔ bɛka nwolɛ edwɛkɛ la vi bɛdabɛ mumua ne bɛ ahonle nu,+Ɔnvi Gyihova anloa anu.+ 17  Bɛka ye dahuu bɛkile bɛdabɛ mɔɔ bɛmbu me la kɛ,‘Gyihova ɛha kɛ: “Bɛbanyia anzodwolɛ.”’+ Yɛɛ bɛka bɛkile awie biala mɔɔ di ye ahonle mɔɔ ɛde atua la anzi la kɛ,‘Munzule biala ɛnrɛdo wɔ.’+ 18  Nwane a ɛdwazo ɛgyinla bɛdabɛ mɔɔ bɛbikye Gyihova la avinliNa yenwu ye edwɛkɛ ne na yede a? Nwane a egyele ɔ nzo na yede a? 19  Nea! Gyihova ahumu ne badu, ye ɛya kpole ne badu kɛ ahumuakyima la;Ɔbadu yeahɔgua amumuyɛnli ne ati zo.+ 20  Gyihova ɛya ne ɛnrɛziaKɔkpula kɛ ɔbayɛ mɔɔ yezuzu nwo wɔ ye ahonle nu la yeawie. Awieleɛ mekɛ ne anu a, bɛbade ɛhye abo kpalɛ a. 21  Meanzoa ngapezoma ne, noko bɛhɔle. Meandendɛ meangile bɛ, noko bɛhanle ngapezo.+ 22  Noko saa bɛgyinlanle menli mɔɔ bikye me la avinli a,Anrɛɛ bɛmaanle me menli ne dele me edwɛkɛ neNa bɛmaanle bɛhwenle bɛ nwo bɛvile bɛ adenle ɛtane ne nee bɛ nyɛleɛ ɛtane ne mɔ anwo.”+ 23  “Asoo mele Nyamenle mɔɔ bikye ala,” Gyihova a se a, “na menle Nyamenle mɔɔ wɔ moamoa noko ɔ?” 24  “Asoo awie bahola ahɔvea ɛleka mɔɔ menrɛhola menrɛnwu ye a?”+ Gyihova a se a. “Metɛyile anwuma nee aze* tɛkɛɛ ɔ?+ Gyihova a se a. 25  “Mede kɛ ngapezoma mɔɔ ɛlɛka adalɛ ngapezo wɔ me duma nu la se, ‘Meha ɛlalɛ! Meha ɛlalɛ!’+ 26  Ɛhye bahɔ zo wɔ ngapezoma mɔɔ ka adalɛ ngapezo la ahonle nu ahɔdwu kenlenzu? Bɛle ngapezoma mɔɔ bɛka adalɛ edwɛkɛ mɔɔ wɔ bɛ ahonle nu a.+ 27  Bɛyɛ bɛ adwenle kɛ bɛdua bɛ ɛlalɛ ne mɔɔ bɛka bɛkile bɛ nwo ngoko la azo bɛamaa me menli ne arɛle avi me duma ne, kɛ mɔɔ bɛ papa mɔ arɛle vile me duma ne ɔlua Beeyale ati la.+ 28  Maa ngapezonli mɔɔ ɛha ɛlalɛ la ɛha ye ɛlalɛ ne, noko maa mɔɔ lɛ me edwɛkɛ ne la ɛha me edwɛkɛ ne nɔhalɛ nu.” “Duzu a abonle nee ma lɛ ye yɛ a? Gyihova a se a. 29  “Me edwɛkɛ ne ɛnle kɛ senle ɔ,”+ Gyihova a se a, “asoo ɔnle kɛ hamenle mɔɔ bɛfa bɛkpukekpuke bodane la?”+ 30  “Ɔti mebahwe ngapezoma mɔɔ wua me edwɛkɛ ne fi bɛ gɔnwo mɔ ɛkɛ ne la anzo,” Gyihova a se a.+ 31  “Mebahwe ngapezoma ne mɔ anzo,” Gyihova a se a, “bɛdabɛ mɔɔ bɛfa bɛ tafinlima bɛka kɛ, ‘Ɔse!’ la.”+ 32  “Nea, mebahwe ngapezoma mɔɔ ka adalɛ ɛlalɛ la anzo,” Gyihova a se a, “bɛdabɛ mɔɔ bɛka bɛ ɛlalɛ bɛfa bɛminli me menli ne ɔlua bɛ adalɛ nee bɛ nloa anu ɛdulɛ zo la.”+ “Noko metɛsoanle bɛ yɛɛ metɛkanle ɛhwee metɛkilele bɛ. Ɔti menli ɛhye mɔ ɛnrɛnyia bɛ nwo zo nvasoɛ biala,”+ Gyihova a se a. 33  “Na saa menli ɛhye mɔ anzɛɛ ngapezonli bie anzɛɛ ɛsɔfo bie biza wɔ kɛ, ‘Gyihova adesoa* ne a le duzu?’ a, bua bɛ kɛ, ‘“Bɛmɛ menli ɛhye mɔ a le adesoa ne a! Na mebavuandi bɛ meagua,”+ Gyihova a se a.’ 34  Na ngapezonli anzɛɛ ɛsɔfo anzɛɛ awie biala mɔɔ ka kɛ, ‘Ɛhye a le Gyihova adesoa* ne la!’ Mebadu me nye meazie ahenle zɔhane nee ye sua nu amra anwo. 35  Mɔɔ awie biala ɛlɛka ahile ɔ gɔnwo nee ɔ diema la ɛne, ‘Duzu mualɛ a Gyihova ɛva ɛmaa a? Na duzu edwɛkɛ a Gyihova ɛha a?’ 36  Noko bɛmmabɔ Gyihova adesoa* ne azo bieko, ɔluakɛ adesoa* ne a le awie ko biala ɔdaye ye edwɛkɛ, na bɛhakyi tease Nyamenle ne, ɛlɔne Gyihova, yɛ Nyamenle ne edwɛkɛ ne. 37  “Mɔɔ ɔwɔ kɛ ɛka ɛkile ngapezonli ne la ɛne, ‘Duzu mualɛ a Gyihova ɛva ɛmaa wɔ a? Na duzu edwɛkɛ a Gyihova ɛha a? 38  Na saa bɛkɔ zo bɛka kɛ, “Gyihova adesoa* ne!” a, ɛnee ɛhye a Gyihova ɛha a: “Kɛ mɔɔ bɛha kɛ, ‘Ɛhye a le Gyihova adesoa* ne,’ wɔ mekɛ mɔɔ meha mehile bɛ kɛ, ‘Bɛmmaka kɛ: “Gyihova adesoa* ne! la,”’ 39  nea! mebamaa bɛ zo na meavuandi bɛ meavi me nye zo meagua bɛ lɔ, bɛ nee suakpole ne mɔɔ menvale memaanle bɛ nee bɛ nenyia mɔ la amuala. 40  Mebamaa bɛ nyunlu agua aze dahuu na bɛabɔ anyiemgba dahuu mɔɔ bɛ rɛle ɛnrɛvi ye ɛlɛ a.”’”+

Ɔbodwɛkɛ

Hibulu aneɛ nu, “ɛfifilɛ.”
Anzɛɛ “ɛkpɔkye.”
Hibulu aneɛ nu, “Bɛmaa amumuyɛma asa anu yɛ se.”
Anzɛɛ “Bɛlɛmaa bɛanyia anyelazo mgbane.”
Anzɛɛ “azɛlɛ ye.”
Anzɛɛ “nrɛlaleɛ mɔɔ yɛ ɛlomboɛ.” Hibulu edwɛkɛkpɔkɛ ne lɛ ndelebɛbo nwiɔ: “Nyamenle nrɛlaleɛ mɔɔ yɛ ɛlomboɛ” anzɛɛ “debie mɔɔ yɛ ɛlomboɛ.”
Anzɛɛ “nrɛlaleɛ mɔɔ yɛ ɛlomboɛ.”
Anzɛɛ “nrɛlaleɛ mɔɔ yɛ ɛlomboɛ.”
Anzɛɛ “nrɛlaleɛ mɔɔ yɛ ɛlomboɛ.”
Anzɛɛ “nrɛlaleɛ mɔɔ yɛ ɛlomboɛ.”
Anzɛɛ “nrɛlaleɛ mɔɔ yɛ ɛlomboɛ.”
Anzɛɛ “nrɛlaleɛ mɔɔ yɛ ɛlomboɛ.”