Gyɛlɛmaya 22:1-30

  • Ndɛnebualɛ mɔɔ tia arelemgbunli mɔɔ yɛle ɛtane la (1-30)

    • Mɔɔ fale Hyalɛm anwo (10-12)

    • Mɔɔ fale Gyɛhɔyakem anwo (13-23)

    • Mɔɔ fale Kɔnaya anwo (24-30)

22  Mɔɔ Gyihova ɛha la ɛne: “Dwazo kɔ Dwuda belemgbunli ne awuke ne anu kɔha edwɛkɛ ɛhye.  Ka kɛ, ‘O Dwuda belemgbunli mɔɔ ɛde Devidi belemgbunli ebia zo la, ɛ nee wɔ sonvolɛma nee wɔ menli ne, bɛdabɛ mɔɔ bɛdua nlenkɛ mgbole ɛhye mɔ anu bɛwolo la, bɛdie Gyihova edwɛkɛ ne.  Mɔɔ Gyihova ɛha la ɛne: “Bɛli pɛlepɛle na bɛyɛ mɔɔ le tenlene. Bɛlie bɛdabɛ mɔɔ bɛlɛsisi bɛ la bɛvi nzisima asa anu. Bɛmmayɛ ɛyɛvolɛ biala basabasa, yɛɛ bɛmmakile arisa anzɛɛ kunlavolɛ biala nyane.+ Bɛmmaka menli mɔɔ ɛnze nwolɛ bie la mogya bɛgua ɛke.+  Na saa bɛnea bɛ nwo boɛ na bɛdi edwɛkɛ ɛhye azo a, yemɔ arelemgbunli mɔɔ bɛde Devidi belemgbunli ebia ne azo+ la noko badɛnla ehwili nu nee mgbɔnwɔ zo awolo sua ɛhye nlenkɛ mgbole ne mɔ anu, bɛ nee bɛ sonvolɛma nee bɛ menli ne.”+  “‘Na saa bɛanli edwɛkɛ ɛhye mɔ azo a, meka medame me ngome me nwo kɛ sua ɛhye babɔ,’ Gyihova a se a.+  “Ɔluakɛ mɔɔ Gyihova ɛha ye wɔ Dwuda belemgbunli ne sua nu amra anwo la ɛne,‘Ɛle kɛ Geleade la,Ɛle kɛ Lɛbanɔn boka ti zo ɛmaa me. Noko mebamaa wɔahakyi fienemgbole;Awie ɛnrɛdɛnla wɔ suakpole biala azo.+   Na mebaye sɛkyevolɛma meamaa bɛara ɛ nwo zo,Ko biala lɛ ye akodeɛ.+ Bɛbapepɛ wɔ sida mbaka ngɛnlɛma neNa bɛava bɛagua senle nu.+  “‘Na menli dɔɔnwo barapɛ nu wɔ suakpole ɛhye azo na bɛbabiza bɛ nwo ngoko kɛ: “Duzu ati a Gyihova ɛyɛ suakpole ɛhye mɔɔ ɛlie duma la zɛhae ɛ?”+  Na bɛbabua kɛ: “Ɔluakɛ bɛkpole Gyihova bɛ Nyamenle ne ngyekyeleɛ ne yɛɛ bɛbɔle bɛ ti aze bɛmaanle nyamenle gyɛne na bɛzonlenle bɛ.”’+ 10  Bɛmmasu mɔɔ ɛwu la,Yɛɛ bɛmmadi ɔ nwo nyane. Emomu, bɛzu mɔɔ bɛ nee ye ɛlɛkɔ la kpalɛ,Ɔluakɛ ɔnrɛzia ɔnrɛra bieko, ɔnrɛnwu azɛlɛ ne mɔɔ bɛwole ye wɔ zo la bieko. 11  “Na mɔɔ Gyihova ɛha ye wɔ Dwosaya ara Hyalɛm,*+ Dwuda belemgbunli ne mɔɔ lile ye papa Dwosaya+ agya, na yevi ɛke yehɔ la anwo la ɛne: ‘Ɔnrɛzia ɔnrɛra ɛke bieko. 12  Ɔluakɛ ɔbawu wɔ ɛleka mɔɔ bɛva ye bɛhɔ akɛlɛzonlenlɛ nu la, na ɔnrɛnwu azɛlɛ ɛhye bieko.’+ 13  Munzule ɛha mɔɔ ɔnlua tenleneyɛlɛ zo ɔnzi ye suaNa ɔnlua pɛlepɛlelilɛ zo ɔnzi ye ɛbɔlɔnsam,Mɔɔ maa ɔ gɔnwo sonle ye mgbane,Na ɔndua ye kakɛ la;+ 14  Mɔɔ ka kɛ, ‘Mebazi sua mɔɔ anu le kpoleMɔɔ ye anwuma ekpumgbunli ne mɔ le mgbole la. Mebaduodua ye nvɛnzɛlɛNa mebava sida mbaka meabobɔ na meava ayile kɔkɔlɛ meaha nwolɛ.’ 15  Kɛmɔ ɛfa sida mbaka ɛyɛ ninyɛne ɛtɛla ɛ gɔnwo mɔ la ati, ɛbahɔ zo wɔali belemgbunli ɔ? Wɔ papa noko lile na ɔnlonle,Noko ɔlile pɛlepɛle na ɔyɛle tenlene,+Na ɔwiele ye boɛ. 16  Ɔlile bɛdabɛ mɔɔ bɛnwunle amaneɛ la nee ehyiavolɛma edwɛkɛ ɔmaanle bɛ,Ɛhye ati ɔwiele ye boɛ. ‘Asoo tɛ ɛhye a awie yɛ a ɔkile kɛ ɔze me a?’ Gyihova a se a. 17  Noko wɔva wɔzie ɛ nye zo nee wɔ ahonle nu kɛ ɛkpondɛ nvasoɛ ɛtane,Ɛka menli mɔɔ ɛnze nwolɛ bie la mogya wɔagua,Na wɔabɔ menli apo na wɔasisi bɛ.’ 18  “Ɛhye ati mɔɔ Gyihova ɛha ye wɔ Dwosaya ara Gyɛhɔyakem,+ Dwuda belemgbunli ne anwo la ɛne,‘Bɛnrɛzu ye kɛ: “O, me diema nrenyia! O, me diema raalɛ!” Bɛnrɛzu ye kɛ: “O, me menle! O me belemgbunli!” 19  Bɛbazie ye kɛ mɔɔ bɛsie asoaso la,+Bɛbahwenle ye aze bɛahɔvuandi ye bɛado ye lɔ,Wɔ Gyɛlusalɛm nlenkɛ mgbole ne mɔ anzi lɔ.’+ 20  Dwazo kɔ Lɛbanɔn kɔzu,Maa ɛ ne zo wɔ Beehyan,Na su wɔ Abalem,+Ɔluakɛ bɛzɛkye wɔ kulovolɛma amuala.+ 21  Mekɛ mɔɔ ɛlɛ banebɔlɛ la, me nee wɔ dendɛle. Noko ɛhanle kɛ, ‘Menrɛdie.’+ Ɔvi wɔ ngakula nu ɛhye a wɔyɛ too a,Ɔluakɛ ɛndie me ne.+ 22  Anwoma banlea wɔ mboaneneavolɛma anwo zo,+Na wɔ kulovolɛma ahɔ akɛlɛzonlenlɛ nu. Ɛ nyunlu bagua aze na nyiane ahu wɔ ɔlua munzule ne mɔɔ bado wɔ la ati. 23  O wɔmɔ mɔɔ ɛde Lɛbanɔn,+Sida mbaka azua nu la,+Saa ɛlɛte nyane, ɛhɛe, nyane kpole kɛ raalɛ mɔɔ ɛlɛwo la a,Nea kɛzi ɛbakponle a!”+ 24  “‘Mekɛ ala mɔɔ mede aze la,’ Gyihova a se a, ‘saa Gyɛhɔyakem+ ara Kɔnaya,*+ Dwuda belemgbunli ne le kɛ me sa fema ne azo nzonlɛyɛlɛ kpɔdelera bɔbɔ a, mebaye ye meavi ɛkɛ! 25  Mebava wɔ meawula bɛdabɛ mɔɔ bɛlɛkpondɛ wɔ bɛahu wɔ la asa anu, bɛdabɛ mɔɔ ɛsulo bɛ la asa anu, Babelɔn Belemgbunli Nɛbukadenɛza asa anu yɛɛ Kaledeama asa anu.+ 26  Na mebavoa wɔ nee wɔ mame mɔɔ wole wɔ la meahɔ maanle fofolɛ zo, ɛleka mɔɔ tɛ ɛkɛ ne a bɛwole wɔ la, na nehane a ɛbawu a. 27  Bɛnrɛzia bɛnrɛra azɛlɛ ne mɔɔ bɛ nwo balɔ ye la azo bieko.+ 28  Asoo nrenyia ɛhye, Kɔnaya le buakɛ mɔɔ yebɔ la ati bɛkpo ye,Buakɛ mɔɔ awie biala ɛngulo ɔ? Duzu ati a bɛvoa ye nee ɔ bo zo amraNa bɛhɔ maanle mɔɔ bɛnze zo la azo ɛ?’+ 29  O azɛlɛ, azɛlɛ, azɛlɛ, tie Gyihova edwɛkɛ. 30  Mɔɔ Gyihova ɛha la ɛne: ‘Kɛlɛ kɛ nrenyia ɛhye ɛnlɛ ɔ ra,Kɛ sonla mɔɔ ɔnrɛwie ye boɛ wɔ ye ngoane mekɛ nu,Ɔluakɛ ɔ bo zo amra biala ɛnrɛli agyaƐnrɛdɛnla Devidi belemgbunli ebia ne azo ɛnrɛli belemgbunli wɔ Dwuda bieko.’”+

Ɔbodwɛkɛ

Eza bɛfɛlɛ ye Dwowahaze.
Eza bɛfɛlɛ ye Gyɛhɔyakɛn yɛɛ Gyɛkonaya.