Gyɛlɛmaya 15:1-21

  • Gyihova ɛnrɛhakyi ye ndɛnebualɛ (1-9)

  • Gyɛlɛmaya dendɛle ɔ nzo abo (10)

  • Gyihova mualɛ (11-14)

  • Gyɛlɛmaya asɔneyɛlɛ (15-18)

    • Ɔlile fɛlɛko kɛ ɔlile Nyamenle edwɛkɛ ne la (16)

  • Gyihova maanle Gyɛlɛmaya anwosesebɛ (19-21)

15  Akee Gyihova zele me kɛ: “Saa Mosisi nee Samoɛle bɔbɔ bagyinla me nyunlu a,+ menrɛze menli ɛhye mɔ anwunvɔne.* Foa bɛ fi me nye zo. Maa bɛhɔ.  Na saa bɛbiza wɔ kɛ, ‘yɛhɔ nienwu?’ a, bua bɛ kɛ, ‘Mɔɔ Gyihova ɛha la ɛne: “Mɔɔ fɛta anwonyane la, bawu anwonyane nu! Mɔɔ fɛta konle dadeɛ la, bawu konle dadeɛ nloa!+ Mɔɔ fɛta ɛhɔne la, bawu ɛhɔne nu! Yɛɛ mɔɔ fɛta akɛlɛzonlenlɛ la, bahɔ akɛlɛzonlenlɛ nu!”’+  “‘Na mebamaa munzule nna* ara bɛ nwo zo,’+ Gyihova a se a, ‘konle dadeɛ mɔɔ bahu bɛ, ahwea mɔɔ bɛahwenle bɛ aze ahɔ, yɛɛ anwomanyunlu nloma nee azɛlɛ ye azo nane mɔɔ bɛali bɛ nwonane na bɛazɛkye bɛ la.+  Na mebamaa bɛahakyi debie ɛzulolɛ bie bɛamaa azɛlɛ ye azo arelemgbunlililɛ kɔsɔɔti+ ɔlua mɔɔ Hɛzikaya ara Manasɛ, Dwuda belemgbunli ne yɛle ye wɔ Gyɛlusalɛm la ati.+   O Gyɛlusalɛm, nwane a banwu wɔ anwunvɔne a,Nwane a bazu wɔ a,Yɛɛ nwane a bagyinla abiza kɛzi ɛ nwo de a?’   ‘Bɛkpo me,’ Gyihova a se a.+ Dahuu bɛkakyi bɛ nzi bɛsi me.*+ Ɔti mebadende me sa bɛ nwo zo na meazɛkye bɛ.+ Meze bɛ anwunvɔne* mevɛ.   Na mebava faka meakpogya bɛ kɛ ma la wɔ nlenkɛ mgbole ne mɔ anloa wɔ azɛlɛ ne azo. Mebamaa bɛ mra avi bɛ sa.+ Kɛmɔ me menli ne anvi bɛ ndenle ne mɔ azo la ati,Mebazɛkye bɛ.+   Bɛ ahunlanvolɛ mraalɛ anwo bazo me nye zo adɛla ɛnweazo ɛnwea. Mebamaa sɛkyevolɛ ara bɛ nwo zo ewiazo henlema, ɔbara mrɛladane nee mgbavolɛ nwo zo. Mebamaa adwenleadwenle nee ɛzulolɛ aha bɛ arɛlevilɛ nu.   Raalɛ mɔɔ ɛwo mralɛ nsuu la anye zo ɛbulu ye;Ɔngola ɛnwomenle die kpalɛ. Ye sɛnzɛne ne ɛdɔ wɔ mekɛ mɔɔ aleɛ ɛtɛdwole la,Yemaa ɔ nyunlu ɛgua aze na yebɔ anyiemgba.’ ‘Na mebamaa bɛ nuhua ekyi ne mɔɔ ɛha la,Awu bɛ kpɔvolɛma konle dadeɛ nloa,’ Gyihova a se a.”+ 10  O me mame, me gyakɔ, kɛ ɛwole me a,+Mele sonla mɔɔ azɛlɛ ne kɔsɔɔti fa butule nee konle toa ye a. Metɛbɔle awie bosea yɛɛ awie noko ɛtɛbizale me bosea;Noko awie biala ɛlɛwa me amonle. 11  Gyihova ɛha kɛ: “Nɔhalɛ nu, mebayɛ wɔ moalɛ;Nɔhalɛ nu, mebakpa ɛ ti kyɛlɛ wɔ kpɔvolɛ ne anyunlu,Wɔ munzule mekɛ nu nee anwongyelelɛ mekɛ nu. 12  Asoo awie bahola abubu bulalɛ nu azinli azinli,Bulalɛ mɔɔ bɛ nee ye vi sɔlɔ la nee kɔbele nu ɔ? 13  Mebamaa bɛave bɛ ninyɛne nee bɛ agyapadeɛ,+Mebava meamaa mgbane, ɔlua ɛtane mɔɔ bɛyɛ ye wɔ bɛ azɛlɛ ne kɔsɔɔti azo la ati. 14  Mebava meamaa bɛ kpɔvolɛmaKɛ bɛva bɛhɔ azɛlɛ mɔɔ bɛnze zo la azo.+ Ɔluakɛ me ɛya ne ɛzɔ senle,Na ɔlɛsɔ yeatia bɛ.”+ 15  O Gyihova, ɛze me tɛnlabelɛ ne,Kakye me na kakyi ɛ nye wɔ me nwo. Di menli mɔɔ yɛ me kpɔdekpɔde la nzenralɛ maa me.+ Mmanyia bɛ nwo abotane too ɛmaa bɛye me bɛfi ɛkɛ. Nwu ye kɛ ɛdawɔ ti a bɛgua me nyunlu aze a.+ 16  Wɔ edwɛkɛ ne rale me ɛkɛ, na menlile;+Na wɔ edwɛkɛ ne yɛle anyelielɛ nee fɛlɛkolilɛ wɔ me ahonle nu,Ɔluakɛ bɛfa wɔ duma bɛfɛlɛ me, O Gyihova, ɛlɔne Nyamenle. 17  Mendɛnla anyelielɛma* avinli menli fɛlɛko.+ Ɔluakɛ ɛ sa wɔ me nwo zo, me ngomekye a metɛnla a,Ɔluakɛ wɔmaa ɛya* ɛwolo me.+ 18  Duzu ati a me nyane ne ɛngyakyi na bɛngola me ɛbodalɛ ne ayile yɛ ɛ? Bɛyɛ ye ayile a ɔngɔ. Asoo ɛbayɛ kɛ bulaMɔɔ nzule ɛnle nu ɔ? 19  Ɛhye ati mɔɔ Gyihova ɛha la ɛne: “Saa ɛsia ɛba a, mebalie wɔ,Na ɛbagyinla me nyunlu. Saa ɛye mɔɔ sonle bolɛ la ɛfi mɔɔ nvasoɛ ɛnle zo la anu a,Ɛbayɛ me kpɔmavolɛ.* Ɔwɔ kɛ bɛsia bɛba wɔ ɛkɛ,Noko wɔmɔ ɛnrɛzia ɛnrɛhɔ bɛ ɛkɛ.” 20  “Mebamaa wɔayɛ kɛ kɔbele bane la wɔamaa menli ɛhye.+ Bɛ nee wɔ baho ɛdeɛ,Noko bɛnrɛhola wɔ,*+Ɔluakɛ me nee wɔ lua kɛ medie wɔ na meaye wɔ,” Gyihova a se a. 21  Na mebalie wɔ meavi amumuyɛma asa anuNa mealie wɔ meavi atisesebɛma noko asa anu.”

Ɔbodwɛkɛ

Anzɛɛ “me ɛkɛla anye ɛnrɛlie bɛ nwo.”
Anzɛɛ ɔkola ɔkile, “ndɛnebualɛ ngakyile nna.” Hibulu aneɛ nu, “mbusua nna.”
Anzɛɛ ɔkola ɔkile, “Dahuu bɛtia bɛkɔ bɛ nzi.”
Anzɛɛ “Menlu me nwo.”
Anzɛɛ “ɛvoyialilɛma.”
Anzɛɛ “ndɛnebualɛ nrɛlaleɛ.”
Hibulu aneɛ nu, “Ɛbayɛ me nloa.”
Anzɛɛ “bɛnrɛli ɛ nwo zo konim.”