Kɔmaa Faelimɔn 1:1-25
1 Medame Pɔɔlo mɔɔ Kelaese Gyisɛse ati mela efiade la+ nee yɛ diema Timote+ ɛlɛkɛlɛ ahɔmaa Faelimɔn, yɛ kulovolɛ nee yɛ gɔnwo gyimayɛvolɛ,
2 nee yɛ diema raalɛ Afea nee yɛ gɔnwo sogyanli Aakepɛse,+ yɛɛ asafo ne mɔɔ wɔ wɔ sua nu ɛkɛ ne la:+
3 Yɛ Ze Nyamenle nee Awulae Gyisɛse Kelaese ɛlo bɛ kpole na bɛmaa bɛ anzodwolɛ.
4 Mekɛ biala mɔɔ mekɛbɔ wɔ duma wɔ me asɔneyɛlɛ nu la, meda me Nyamenle ne ase,+
5 ɔluakɛ dahuu mete wɔ diedi mɔɔ ɛlɛ wɔ Awulae Gyisɛse anu nee ɛlɔlɛ mɔɔ ɛlɛ ɛmaa ye nee nwuanzanwuanzama ne mɔ amuala la anwo edwɛkɛ.
6 Mesɛlɛ kɛ diedi ne mɔɔ ɛ nee ɛ gɔnwo mɔ diedima lɛ la bamaa wɔanwu debie kpalɛ biala mɔɔ yɛlua Kelaese anwo zo yɛnyia la amuala.
7 Ɔluakɛ mɔɔ mendele wɔ ɛlɔlɛ ne anwo edwɛkɛ la, menlile fɛlɛko kpole na me rɛle kyekyele, ɔboalekɛ wɔmaa nwuanzanwuanzama ne ahonle ɛdɔ bɛ azule nu,* adiema.
8 Ɛhye ati, anrɛɛ mekola metendɛ mɔɔ menzulo wɔ Kelaese anu memaa ɛyɛ mɔɔ fɛta la ɛdeɛ,
9 noko mekulo kɛ megyinla ɛlɔlɛ zo mesɛlɛ wɔ, ɔboalekɛ medame Pɔɔlo, meyɛ kpanyinli yɛɛ kɛkala noko Kelaese Gyisɛse ati, mela efiade.
10 Melɛsɛlɛ wɔ meamaa me ra Onɛsemɛse,+ mɔɔ membanyɛle ye papa+ wɔ mekɛ mɔɔ mela efiade* ye la.
11 Mekɛ bie mɔɔ ɛraze ɛhɔ la, ɛnee ɔ nwo ɛnlɛ nvasoɛ ɛmmaa wɔ, noko kɛkala ɔ nwo lɛ nvasoɛ maa wɔ nee medame.
12 Melɛmaa yeazia yeara ɛ nwo lɔ, ɛhɛe, ahenle mɔɔ la me ahonle nwo la.*
13 Anrɛɛ mekulo kɛ ɔtɛnla me nwo ɛke na yeagyinla ɛ gyakɛ anu yeazonle me wɔ mekɛ mɔɔ mela efiade la ɔlua edwɛkpa ne ati.+
14 Noko mengulo kɛ meyɛ debie mɔɔ ɛnze nu la, amaa wɔ kpalɛyɛlɛ ne anyɛ mialeranu debie, emomu yeayɛ mɔɔ vi ɛdawɔ mumua ne wɔ ɛhulolɛ nu la.+
15 Bie a ɛhye ati a ɔvile ɛ nwo ɛkɛ ne mekɛ ekyi* a, amaa saa ɔsia ɔba a yeaha ɛ nwo ɛkɛ ne bɔkɔɔ,
16 tɛ kɛ ɔle akɛlɛ bieko,+ emomu awie mɔɔ tɛla akɛlɛ, kɛ adiema kulovolɛ,+ ɔle zɔ titili ɔmaa me, noko ɔle mɔɔ tɛla zɔ la ɔmaa wɔ, wɔ nwonane nu nee Awulae anu.
17 Yemɔti saa ɛbu me kɛ mele ɛ gɔnwo a, ɛnee die ye kɛnlɛma kɛ mɔɔ anrɛɛ ɛbalie me la.
18 Bieko, saa yeyɛ wɔ ɛtane bie anzɛɛ ɔtua wɔ kakɛ a, fa nwolɛ ɛzonle soa me.
19 Medame Pɔɔlo, medame mumua ne me sa a melɛfa meahɛlɛ a: Mebadua meamaa wɔ—ɔngyia kɛ meka mekile wɔ kɛ ɛdawɔ noko ɛtua me kakɛ kpole.*
20 Ɛhɛe, adiema, maa menyia moalɛ ɛhye menvi wɔ ɛkɛ wɔ Awulae anu; maa me ahonle ɛdɔ me azule nu* wɔ Kelaese anu.
21 Melɛkɛlɛ wɔ ɛhye, na melɛ anwodozo kɛ ɛbayɛ mɔɔ mebiza la, yɛɛ meze kɛ ɛbayɛ wɔamaa yeabo zolɛ bɔbɔ.
22 Eza siezie ɛleka mɔɔ mebadɛnla la maa me, ɔluakɛ me nye la kɛ ɔlua bɛ asɔneyɛlɛ zo bɛbaye me na meara bɛ nwo lɔ.*+
23 Ɛpafelase,+ mɔɔ me nee ye la efiade wɔ Kelaese Gyisɛse anu la biza wɔ,
24 yɛɛ Maake, Alesetaakɛse,+ Dimase+ yɛɛ Luku,+ mɔɔ bɛle me gɔnwo mɔ gyimayɛvoma la biza wɔ.
25 Awulae Gyisɛse Kelaese ɛlolɛ kpole ne nee sunsum ne mɔɔ bɛda ye ali la ɛdɛnla.
Ɔbodwɛkɛ
^ Anzɛɛ “akunlu ɛdwo.”
^ Giliki aneɛ nu, “mɔɔ bɛgua me kyeenyi.”
^ Anzɛɛ “me nye die ɔ nwo la.”
^ Giliki aneɛ nu, “dɔnehwele ko.”
^ Anzɛɛ “ɛtua me wɔ ngoane nwo kakɛ.”
^ Anzɛɛ “maa me nye ɛlie.”
^ Anzɛɛ “bɛbagyakyi me bɛamaa bɛ.”
