Edwɛne 96:1-13

  • “Bɛdo edwɛne fofolɛ bɛmaa Gyihova”

    • Gyihova, ɔfɛta kɛ bɛye ye ayɛlɛ (4)

    • Nvasoɛ ɛnle maanle maanle ne mɔ nyamenle ne mɔ anwo zo (5)

    • Bɛva anwoziezielɛ nwuanzanwuanza bɛzonle (9)

96  Bɛdo edwɛne fofolɛ bɛmaa Gyihova.+ Azɛlɛ ye kɔsɔɔti, bɛdo edwɛne bɛmaa Gyihova!+   Bɛdo edwɛne bɛmaa Gyihova; bɛye ye duma ne ayɛlɛ. Bɛbɔ ye ngoanelielɛ nwo edwɛkpa ne nolo alehyenlɛ biala.+   Bɛha ye anyunlunyia ne anwo edwɛkɛ wɔ maanle maanle ne mɔ anu,Bɛha ye nwanwane gyima ne mɔ anwo edwɛkɛ wɔ menli kɔsɔɔti avinli.+   Gyihova le bedevinli yɛɛ ɔfɛta bɔkɔɔ kɛ bɛye ye ayɛlɛ. Ɔ nwo yɛ ɛzulolɛ kpalɛ tɛla nyamenle mɔɔ ɛha la amuala.   Maanle maanle ne mɔ nyamenle ne mɔ amuala le nyamenle mɔɔ nvasoɛ ɛnle bɛ nwo zo,+Noko ahenle mɔɔ bɔle anwuma la a le Gyihova.+   Kpoleyɛlɛ* nee anyunlunyia ɛbɔ ye ɛyia;+Anwosesebɛ nee kɛnlɛma wɔ ye ɛzonlenlɛsua ne anu.+   Bɛmɛ maanle maanle kɔsɔɔti anu mbusua, bɛva mɔɔ fɛta Gyihova la bɛmaa ye,Bɛva anyunlunyia nee anwosesebɛ mɔɔ fɛta Gyihova la bɛmaa ye.+   Bɛva anyunlunyia mɔɔ fɛta Gyihova duma ne la bɛmaa ye;+Bɛva ahyɛlɛdeɛ bɛrɛla ye sua nu alienwo ɛkɛ.   Bɛva anwoziezielɛ nwuanzanwuanza* bɛbutu bɛ nyunlu aze bɛmaa Gyihova;*Azɛlɛ ye kɔsɔɔti, bɛmaa bɛ nwo ɛwoso bɛ wɔ ɔ nyunlu! 10  Bɛha ye wɔ maanle maanle ne mɔ anu kɛ: “Gyihova ɛrayɛ Belemgbunli!+ Bɛva azɛlɛ* ne bɛzie ɛkɛ ne kpundii, bɛnrɛhola ɔ bo tu* ɛlɛ. Ɔbabua menli ne ndɛne fɔɔnwo.”*+ 11  Bɛmaa anwuma ɛli fɛlɛko, na bɛmaa azɛlɛ ne anye ɛlie;Bɛmaa nyevile ne nee debie biala mɔɔ wɔ nu la ɛhulu;+ 12  Bɛmaa kpɔkɛ nee debie biala mɔɔ wɔ nu la ɛli fɛlɛko.+ Eza bɛmaa ɛhoayelɛ nu mbaka kɔsɔɔti ɛva anyelielɛ ɛdeɛdea nu+ 13  Wɔ Gyihova anyunlu, ɔluakɛ ɔlɛba,*Ɔlɛba yearabua azɛlɛ ye ndɛne. Ɔbava tenleneyɛlɛ yeabua azɛlɛ* ne ndɛne+Na yeava nɔhalɛlilɛ yeabua menli ne ndɛne.+

Ɔbodwɛkɛ

Anzɛɛ “Enililɛ.”
Anzɛɛ ɔkola ɔkile, “Ɔlua ye nwuanzanwuanzayɛlɛ anyunlunyia ne ati.”
Anzɛɛ “bɛzonle ye.”
Anzɛɛ “ewiade.”
Anzɛɛ “ye woso.”
Anzɛɛ “Ɔbali menli ne edwɛkɛ yeamaa bɛ.”
Anzɛɛ “yera.”
Anzɛɛ “ewiade.”