Edwɛne 90:1-17
Mosisi asɔneyɛlɛ, nɔhalɛ Nyamenle ne sonvolɛ.+
90 O Gyihova, wɔmɔ a wɔyɛ yɛ tɛnlabelɛ*+ wɔ awolɛndoazo kɔsɔɔti anu a.
2 Kolaa na bawo awoka ne mɔAnzɛɛ wɔamaa azɛlɛ ye nee ewiade ara la,*+Wɔmɔ a ɛle Nyamenle, ɔvi dahuu kɔdwu dahuu* a.+
3 Ɛmaa sonla dasanli sia kɔ ndɛtɛlɛ nu;Ɛka kɛ: “Alesama bɛzia.”+
4 Ɔluakɛ ɛvolɛ apenle ko le ɛ nye zo kɛ anoma ala mɔɔ ɛze ɛhɔ la,+Ɔle kɛ nɔɔzo dɔnehwele ekyi* bie ala.
5 Ɛkpoa bɛ ɛkɔ;+ bɛle kɛ nafelɛ ala la;Nwonlomɔ nu bɛle kɛ ndile mɔɔ ɛfifi.+
6 Nwonlomɔ nu, ɔbɔ ndotolo na ɔyɛ fofolɛ,Noko ɔkadwu nɔsolɛ nu la, ɛnee yenwoso na yewu.+
7 Ɔluakɛ wɔ ɛya ne sɛkye yɛ+Yɛɛ wɔ ɛya kpole ne maa yɛ ahonle tu.
8 Ɛfa yɛ nvonleɛ ne mɔ ɛsie ɛ nyunlu;+Ɛ nyunlu wienyi ne da mɔɔ yɛyɛ ye fealeranu la ali.+
9 Yɛ ngoane mekɛ zo pɛ ɔlua wɔ ɛya kpole ne ati;Yɛɛ yɛ ɛvolɛ ba awieleɛ kɛ ɛnwomenle* la.
10 Yɛ ngoane mekɛ le ɛvolɛ 70Anzɛɛ saa awie lɛ anwosesebɛ kpalɛ a, ɛvolɛ 80.+
Noko nuhua le ngyegyelɛ nee alɔbɔlɛ ngome;Bɛpɛ nu ndɛndɛ, na yɛminli.+
11 Nwane a kɛhola kɛzuzu wɔ ɛya tumi ne a?
Wɔ ɛya ne le kpole kɛ ɛzulolɛ mɔɔ yɛlɛ yɛmaa wɔ la.+
12 Kilehile yɛ kɛzi yɛdia yɛ mekɛ la+Amaa yɛanyia nrɛlɛbɛ ahonle.
13 O Gyihova, sia bɛla!+ Ɔbadoa zo yeahɔdwu kenlenzu?+
Nwu wɔ sonvolɛma anwunvɔne.+
14 Maa wɔ ɛlɔlɛ kpundii ne ɛyi yɛ ko+ nwonlomɔ nu,Amaa yɛava anyelielɛ yɛadeɛdea nu na yɛali fɛlɛko+ wɔ yɛ mekɛ kɔsɔɔti anu.
15 Maa yɛ fɛlɛkolilɛ mekɛ nee mekɛ mɔɔ wɔmaa yɛli nyane la ɛzɛ,+Kɛ ɛvolɛ dɔɔnwo ne mɔɔ yɛnwu amaneɛ la.+
16 Maa wɔ sonvolɛma ɛnwu wɔ gyima,Na bɛ mra ɛnwu wɔ anyunlunyia ne.+
17 Maa Gyihova yɛ Nyamenle ne ɛlolɛ ne ɛrɛla yɛ nwo zo;Maa yɛ sa anloa gyima ɛyɛ kpalɛ.*
Ɛhɛe, maa yɛ sa anloa gyima ɛyɛ kpalɛ.*+
Ɔbodwɛkɛ
^ Anzɛɛ ɔkola ɔkile, “yɛ ɛvealeka.”
^ Anzɛɛ “wɔawo azɛlɛ ye nee ewiade la.”
^ Anzɛɛ “ɔvi mekɛ mɔɔ ɛnlɛ awieleɛ kɔdwu mekɛ mɔɔ ɛnlɛ awieleɛ.”
^ Anzɛɛ “ɛzinzalɛ mekɛ.”
^ Anzɛɛ “ɛnwomenle ɛgulɛ.”
^ Anzɛɛ “ɛgyinla kpundii.”
^ Anzɛɛ “ɛgyinla kpundii.”
