Edwɛne 59:1-17
Kɔmaa edwɛndolɛma kpanyinli ne; “Mmasɛkye Me” zo. Devidi edwɛne. Meketam.* Mekɛ mɔɔ Sɔɔlo zoanle menli kɛ bɛhɔzia Devidi sua nu ɛkɛ ne na bɛhu ye la.+
59 O me Nyamenle, die me fi me kpɔvolɛma asa anu;+Bɔ me nwo bane fi bɛdabɛ mɔɔ bɛdwazo bɛtia me la anwo.+
2 Die me fi amumuyɛma asa anu,Na die me fi kodiawuma* asa anu.
3 Nea! Bɛkɔ me nwo nzia;+Anwosesebɛma teta meNoko metɛtele atua anzɛɛ metɛyɛle ɛtane biala,+ O Gyihova.
4 Metɛfonle, noko bɛsiezie bɛ nwo ndɛndɛ kɛ bɛteta me.
Saa mefɛlɛ wɔ a, dwazo na nea.
5 Ɔluakɛ wɔmɔ, O ɛlɔne Gyihova Nyamenle a ɛle Yizilayɛ Nyamenle a.+
Dwazo na nea maanle maanle kɔsɔɔti.
Mmase amumuyɛnli biala mɔɔ ɔye awie mɔ ɔmaa la anwunvɔne.+ (Sila)
6 Bɛsia bɛba nɔsolɛ biala;+Bɛkpo kɛ ahwea+ na bɛbɔ suakpole ne anwo bɛyia.+
7 Nea edwɛkɛ mɔɔ fi bɛ nloa anu finde la;Bɛ nloa le kɛ konle dadeɛ,+Ɔluakɛ bɛka kɛ: “Nwane a ɛlɛtie a?”+
8 Na wɔmɔ, O Gyihova, ɛbazele bɛ;+Ɛbagolo maanle maanle kɔsɔɔti anwo.+
9 O me Nyamenle, ɛle me Anwosesebɛ; Mebahɔ zo meahendɛ wɔ+Ɔluakɛ ɛle me ɛvealeka kpalɛ.*+
10 Nyamenle ne mɔɔ da ɛlɔlɛ kpundii ali kile me la baraboa me;+Nyamenle bamaa meanlea me kpɔvolɛma mɔɔ bɛli bɛ nwo zo konim la.+
11 Mmaku bɛ, amaa me menli ne arɛle anvi.
Dua wɔ tumi ne azo maa bɛluolua nu;Ka bɛ gua aze, O Gyihova, yɛ enyinlike.+
12 Bɛfo wɔ bɛ ɛdendɛlɛ nu, yɛɛ bɛ nloa anu edwɛkɛ ti,Maa bɛ anwomemaazo ɛhye bɛ kɛ ɛhane,+Ɔluakɛ bɛwa amonle yɛɛ bɛle mɛlɛbɛla.
13 Sɛkye bɛ wɔ wɔ ɛyavalɛ nu;+Sɛkye bɛ amaa bɛannwu bɛ bieko;Maa bɛnwu ye kɛ Nyamenle ɛlɛdi tumi wɔ Gyekɔbo anwo zo nee azɛlɛ ye ɛleka biala.+ (Sila)
14 Maa bɛzia bɛrɛla nɔsolɛ nu;Maa bɛkpo kɛ ahwea na bɛbɔ suakpole ne anwo bɛyia.+
15 Maa bɛluolua nu bɛkpondɛ aleɛ mɔɔ bɛbali la;+Mmamaa bɛ ko yi anzɛɛ bɛnyia ɛleka bɛda.
16 Na mame, mebado wɔ anwosesebɛ ne anwo edwɛne;+Mebava anyelielɛ meaha wɔ ɛlɔlɛ kpundii ne anwo edwɛkɛ wɔ nwonlomɔ nu.
Ɔluakɛ wɔmɔ a ɛle me ɛvealeka kpalɛ+Nee ɛleka mɔɔ menriandi mekɔfea wɔ me anwongyelelɛ mekɛ nu a.+
17 O me Anwosesebɛ, mebado ayɛlɛyelɛ edwɛne meamaa wɔ,+Ɔluakɛ Nyamenle le me ɛvealeka kpalɛ, Nyamenle ne mɔɔ da ɛlɔlɛ kpundii ali kile me la.+
