Edwɛne 45:1-17
Kɔmaa edwɛndolɛma kpanyinli ne; “Aloa” zo. Kɔla amra ne mɔ+ edwɛne. Masekele.* Ɛlɔlɛ nwo edwɛne.
45 Debie kpalɛ ɛyi me ahonle nu tɛkɛɛ.
Mese: “Me edwɛne* ne fale belemgbunli bie anwo.”+
Maa me tafinlima ɛyɛ kɛ kɛlɛhɛlɛvolɛ mɔɔ yɛ deɛ kpalɛ+ la pɛne.+
2 Ɛ nwo yɛ fɛ tɛla alesama kɔsɔɔti.
Ɛ nloa ɛdendɛlɛ le kɛnlɛma.+
Ɛhye ati a Nyamenle ɛyila wɔ dahuu la.+
3 O katakyie,+ fa wɔ konle dadeɛ ne sia wɔ foa ko,+Wɔ wɔ enililɛ nee wɔ anyunlunyia nu.+
4 Na fi wɔ anyunlunyia nu kɔli konim;+Ka wɔ ɛkpɔnwɔ ne wɔ nɔhalɛlilɛ nee mɛlɛbɛnwoaze yɛɛ tenleneyɛlɛ nu,+Na ɛ sa fema ne bayɛ* nwanwane ninyɛne.
5 Wɔ ɛda mbaka ne mɔ yɛ nla, bɛwowɔ belemgbunli ne kpɔvolɛma ahonle nu;+Bɛmaa menli gua aze wɔ ɛ nyunlu.+
6 Nyamenle le wɔ belemgbunli ebia dahuu;+Wɔ belemgbunlililɛ kpɔma ne le tenleneyɛlɛ kpɔma.+
7 Ɛhulole tenleneyɛlɛ,+ na ɛhyile amumuyɛyɛlɛ.+
Ɛhye ati a Nyamenle, wɔ Nyamenle ne vale fɛlɛkolilɛ nwole+ kpokpale wɔ+ dɛlale ɛ gɔnwo mɔ la.
8 Alufuanlɛ, alo nee kasea bɔnle wɔ adɛladeɛ ne mɔ kɔsɔɔti anu;Getaa* maa ɛ nye die wɔ suakunlu kpole ne mɔɔ bɛvale ɛzɛlɛ* a bɛyɛle la anu.
9 Arelemgbunli amra mraalɛ boka mraalɛ mɔɔ ɛdi bɛ eni la anwo.
Ɔbahyema* ne ɛragyinla ɛ sa fema zo, yeva Ofɛ nvutuke+ yeziezie ɔ nwo.
10 Tie, O ralɛ raalɛ, gyele ɛ nzo tie na dwenle nwo;Maa ɛ rɛle ɛvi wɔ menli ne nee wɔ papa sua nu.
11 Na belemgbunli ne anwo balɔ wɔ anwofɛlɛko ne,Ɔluakɛ ɔle ɛ menle,Ɔti, bɔ ɛ ti aze maa ye.
12 Tayama bava ahyɛlɛdeɛ ara;Sukoavolɛma barakpondɛ ɛ nyunlu ɛlolɛ.
13 Belemgbunli ara raalɛ ne wɔ ye anyunlunyia kpole nu wɔ belemgbunli sua nu ɛkɛ;*Nvutuke wɔ ye adɛladeɛ ne mɔ anu.
14 Ɔwula adɛladeɛ mɔɔ bɛnwo bɛ ngɛnlɛma la na bɛlɛfa ye bɛarɛlɛ belemgbunli ne.
Bɛva ɔ gɔnwo mɔ mbɛlɛra mɔɔ doa ye la bɛra ɔ nyunlu ɛkɛ.
15 Bɛbava bɛ wɔ fɛlɛkolilɛ nee anyelielɛ nu bɛara;Bɛbawolo belemgbunli ne suakunlu ɛkɛ ne.
16 Ɛ mra mrenyia bagyinla wɔ nenyia mɔ agyakɛ anu.
Ɛbayɛ bɛ mgbanyima wɔ azɛlɛ ye kɔsɔɔti azo.+
17 Mebamaa awolɛndoazo kɔsɔɔti mɔɔ bara la anwu wɔ duma ne.+
Ɛhye ati a menli baye wɔ ayɛlɛ dahuu la.
Ɔbodwɛkɛ
^ Nea Edwɛkɛbohilelɛ.
^ Hibulu aneɛ nu, “Me gyima.”
^ Hibulu aneɛ nu, “kilehile wɔ.”
^ Tete ɛdeɛ ne le ngakyile fi ɛnɛ mekɛ ye getaa nwo.
^ Anzɛɛ “ɛzonle mɛne.”
^ Anzɛɛ “Belemgbunli raalɛ.”
^ Hibulu aneɛ nu, “ɔ kunlu lɔ.”
