Edwɛne 39:1-13
Kɔmaa edwɛndolɛma kpanyinli ne; Gyɛdutɛn*+ zo. Devidi ayɛlɛyelɛ edwɛne.
39 Menganle kɛ: “Mebanlea me ndenle nu boɛ,Na meanva me tafinlima meanyɛ ɛtane.+
Mebava debie meakyekye me nloa+Wɔ mekɛ mɔɔ amumuyɛnli gyi me nyunlu la.”
2 Mendɔle mumule na menyɛle koonwu;+Meandɛ me nloa anu wɔ debie mɔɔ le kpalɛ bɔbɔ la anwo,Noko me nyanelilɛ yɛle kpole.
3 Me ahonle lɔle katukatu wɔ me nu.
Mɔɔ ɛnee melɛdwenledwenle* la, senle ne hɔle zo zɔle.
Akee me tafinlima hanle kɛ:
4 “O Gyihova, boa me maa menwu kɛzi me awieleɛ bayɛ,Nee mekɛ mɔɔ bɛzuzu bɛmaa me la,+Amaa meanwu kɛzi me ngoane le ezinra* la.
5 Nɔhalɛ nu, wɔyɛ me mekɛ ne ezinra bie;+Na me ngoane mekɛ ɛnle ɛhwee wɔ ɛ nye zo.+
Amgba, ɔle kɛ asɛɛ sonla biala gyi kpundii la, noko ɔle anwoma ala.+ (Sila)
6 Nɔhalɛ nu, sonla biala luolua nu kɛ ɛlawolɛ la.
Ɔyɛ dede mgbane.
Ɔkuohua anwonyia nloa, noko ɔnze awie mɔɔ bava la.+
7 O Gyihova, ɛnee duzu a mebahola meava me nye meado zo a?
Wɔmɔ a ɛle me anyelazo a.
8 Die me fi me mɛladonlɛ kɔsɔɔti anu.+
Mmamaa koasea golo me nwo.
9 Mendɔle mumule;Meangola meambuke me nloa,+Ɔluakɛ ɛdawɔ a ɛyɛle a.+
10 Ye wɔ ngyegyelɛ ne fi me nwo zo.
Meyɛ bɛtɛɛ ɔluakɛ wɔva ɛ sa wɔbɔ me.
11 Ɛdua sonla nvonleɛ+ zo ɛtea ye na ɛfa ɛtenrɛ ye;Ɛsɛkye ninyɛne mɔɔ sonle bolɛ maa ye la, kɛ mɔɔ ɛlɛtɛba yɛ ye ala la.
Nɔhalɛ nu, sonla biala le anwoma ala.+ (Sila)
12 O Gyihova, tie me asɔneyɛlɛ,Tie me ɛzunlɛ.+
Mmabu ɛ nye ɛgua me monle zo.
Ɔluakɛ mele wɔ ɛyɛvolɛ,+Adendulɛnli mɔɔ ɛlɛpɛ nu aze, kɛ me nenyia mɔ kɔsɔɔti ala la.+
13 Mmanea me kpoonwu, amaa me nye alie bieko,Kolaa na meawu mɔɔ bɛnrɛnwu me bieko a.”
