Edwɛne 22:1-31
Kɔmaa edwɛndolɛma kpanyinli ne; “Aleɛbahye Weɛlɛ Belɛ”* zo. Devidi ayɛlɛyelɛ edwɛne.
22 Me Nyamenle, me Nyamenle, duzu ati a wɔkpo me a?+
Duzu ati a ɛmbanlie me ɛ?Duzu ati a ɛndie me nyane ɛzunlɛ ne ɛ?+
2 Me Nyamenle, mefɛlɛ wɔ alehyenlɛ nu, noko ɛnlie me zo;+Yɛɛ nɔsolɛ nu noko memmua me nloa.
3 Noko ɛle nwuanzanwuanza,+Yizilayɛ ayɛlɛyelɛ ɛbɔ wɔ ɛyia.
4 Ɛ nwo zo a yɛ papa mɔ vale bɛ nwo dole a;+Bɛvale bɛ nwo bɛdole ɛ nwo zo, na ɛhɔle zo ɛliele bɛ.+
5 Wɔmɔ a bɛzunle bɛvɛlɛle wɔ a, yɛɛ ɛliele bɛ;Bɛvale bɛ nwo bɛdole ɛ nwo zo, na bɛ rɛle ambɔ.*+
6 Na mame, mele sonlɛ, menle sonla;Menli ɛmbu me* yɛɛ bɛkpo me.+
7 Bɛdabɛ mɔɔ bɛkɛnwu me la amuala golo me nwo;+Bɛkpobi bɛ nloa na bɛkpusu bɛ ti bɛka kɛ:+
8 “Yeva ɔ nwo yedo Gyihova anwo zo. Maa Ɔlie ye!
Maa Ɔlie ye, ɔluakɛ Ɔ nye die ɔ nwo!”+
9 Wɔmɔ a Ɛyele me ɛvile ɛkolɛ nu a,+Wɔmɔ a Ɛbɔle me nwo bane wɔ mekɛ mɔɔ me mame maa me nyɛfonlɛ la a.
10 Ɔvi me awolɛ nu yɛɛ bɛvale me bɛwulale ɛ sa nu a;*Ɔvi me mame akunlu, ɛle me Nyamenle.
11 Mmafi me nwo ɛkɔ moa, ɔluakɛ ngyegyelɛ ɛbikye me+Yɛɛ menlɛ boavolɛ biala.+
12 Nlankɛ ngyikyi dɔɔnwo ɛbɔ me ɛyia;+Beehyan nlankɛ anwosesebɛ ɛbɛnga me ɛyia.+
13 Bɛbukebuke bɛ nloa anu wanaanwo bɛkile me,+Kɛ awenade mɔɔ ɛlɛkpo atete nane azinli azinli la.+
14 Bɛwola me bɛgua kɛ nzule la;Me mbowule kɔsɔɔti ɛhoatihoati.
Me ahonle ɛyɛ kɛ wolɛ ndɛlamoa,+Yeholo me kunlu.+
15 Me anwosesebɛ ɛwie kɛ buakɛ ebule la;+Me tafinlima ɛbeta me enangunli;+Wɔdo me aze wɔ ewule ndɛtɛlɛ nu.+
16 Ahwea ɛbɔ me ɛyia;+Bɛholo me nwo zo kɛ amumuyɛma kpolane la,+Bɛdedɛ me sa nee me gyakɛ kɛ awenade la.+
17 Mekola metia me mbowule muala.+
Bɛnea me, bɛnea me kpoonwu.
18 Bɛhyɛle me tɛladeɛ aguzo ne,Na me tɛladeɛ ne mɔɔ vea ɔ bo la, bɛguale nwolɛ ma.*+
19 Noko wɔmɔ, O Gyihova, mmagyinla moamoa.+
Wɔmɔ a ɛle me anwosesebɛ a; ka ɛ nwo baboa me.+
20 Die me* fi konle dadeɛ nloa,Die me ngoane ne mɔɔ sonle bolɛ la fi ahwea sa nu;+
21 Die me fi awenade ne anloa anu+ nee ɛbɔ nu nlankɛ nyinli mɛne nu;Tie me na die me.
22 Mebabɔ wɔ duma meahile me mediema ne mɔ;+Mebaye wɔ ayɛlɛ wɔ asafo ne anu.+
23 Bɛmɛ mɔɔ bɛsulo Gyihova la, bɛye ye ayɛlɛ!
Gyekɔbo abozoamra kɔsɔɔti, bɛwula ye anyunlunyia!+
Bɛmɛ Yizilayɛ abozoamra kɔsɔɔti, bɛzulo ye.
24 Ɔluakɛ ɔtɛbule ɔ nye ɔtɛguale ehyianli amaneɛnwunlɛ zo yɛɛ ɔngyi ye;+Ɔtɛfale ɔ nye ɔtɛfeale ye.+
Saa ɔsu ɔkpondɛ ye moalɛ a, ɔtie.+
25 Mebaye wɔ ayɛlɛ wɔ asafo kpole ne anu;+Mebadua me ɛwɔkɛ ne wɔ menli mɔɔ sulo wɔ la anyunlu.
26 Sonla bɛlɛvo bali na ɔ ko ayi;+Bɛdabɛ mɔɔ bɛkpondɛ Gyihova la baye ye ayɛlɛ.+
Bɛnyia ngoane* dahuu.
27 Menli mɔɔ wɔ azɛlɛ ne ɛleka biala la bahakye na bɛazia bɛara Gyihova ɛkɛ.
Mbusua kɔsɔɔti mɔɔ wɔ maanle maanle ne mɔ anu la babɔ bɛ ti aze wɔ ɛ nyunlu.+
28 Ɔluakɛ belemgbunlililɛ ne le Gyihova ɛdeɛ;+Ɔbanlea maanle maanle ne mɔ anwo zo.
29 Menli mbelane mɔɔ wɔ azɛlɛ ne azo la kɔsɔɔti bali na bɛabɔ bɛ ti aze;Bɛdabɛ mɔɔ bɛlɛkɔ ndɛtɛlɛ ne anu la kɔsɔɔti bahoto ɔ nyunlu;Bɛ nuhua biala ɛngola ɛnlie ɔ nwo ngoane.*
30 Bɛ bo zo amra bazonle ye;Bɛbaha Gyihova anwo edwɛkɛ bɛahile awolɛndoazo mɔɔ bara la.
31 Bɛbara na bɛaha ye tenleneyɛlɛ ne anwo edwɛkɛ.
Bɛbaha mɔɔ yeyɛ la bɛahile menli mɔɔ bɔ zo mɔɔ bɛbawo bɛ la.
Ɔbodwɛkɛ
^ Ɔkola ɔkile ɛnelɛ anzɛɛ adenle bie mɔɔ bɛdua zo bɛto edwɛne la.
^ Anzɛɛ “bɛ nyunlu angua aze.”
^ Anzɛɛ “bɔ me aholoba.”
^ Hibulu aneɛ nu, “bɛvuandinle me bɛdole ɛ nwo zo a.”
^ Nea Edwɛkɛbohilelɛ.
^ Anzɛɛ “me ɛkɛla.”
^ Hibulu aneɛ nu, “Wɔ ahonle ɛnyia ngoane.”
^ Anzɛɛ “ye ɛkɛla.”
