Edwɛne 143:1-12
Devidi ayɛlɛyelɛ edwɛne.
143 O Gyihova, tie me asɔneyɛlɛ;+Tie me modolɛ nzɛlɛlɛ.
Bua me kɛ mɔɔ wɔ nɔhalɛlilɛ nee wɔ tenleneyɛlɛ ne de la.
2 Ɛ nee wɔ akɛlɛ mmadi edwɛkɛ,Ɔluakɛ awie biala ɛnrɛhola ɛnrɛli benle wɔ ɛ nyunlu.+
3 Kpɔvolɛ ne ɛlɛfoa me ɛsesebɛ;Yetietia me nwo zo wɔ azɛlɛ ne anwo.
Yemaa medɛnla awozinli nu kɛ menli mɔɔ ɛwu dɛbadɛba la.
4 Me anwosesebɛ* ɛlɛwie;+Me ahonle ɛyɛ titilii.+
5 Mekakye dɛba ne;Medwenledwenle wɔ gyima ne mɔ amuala anwo;+Mesuzu ɛ sa anloa gyima ne mɔ anwo kpalɛ.*
6 Metɛlɛ me sa nu mekile wɔ;Mele* kɛ azɛlɛ resee mɔɔ ɛ nwo nzuhɔne ɛlɛku ye la.+ (Sila)
7 O Gyihova, bua me ndɛndɛ;+Me anwosesebɛ* ɛlɛba awieleɛ.+
Mmafa ɛ nye ɛfea me,+Anrɛɛ mebayɛ kɛ menli mɔɔ ɛlɛkɔ ewule kuma* nu la.+
8 Maa mende wɔ ɛlɔlɛ kpundii ne nganeɛ nwonlomɔ nu,Ɔluakɛ meva me nwo medo ɛ nwo zo.
Kile me adenle mɔɔ ɔwɔ kɛ medua nu la,+Ɔluakɛ wɔmɔ a meba wɔ ɛkɛ a.*
9 O Gyihova, die me fi me kpɔvolɛma asa anu.
Wɔ ɛkɛ ne a mekpondɛ banebɔlɛ a.+
10 Kilehile me maa menyɛ mɔɔ ɛkulo la,+Ɔluakɛ wɔmɔ a ɛle me Nyamenle a.
Wɔ sunsum ne le kpalɛ;Maa ɔhile me adenle wɔ azɛlɛ sɛsɛ* zo.
11 O Gyihova, wɔ duma ne ati, bɔ me ngoane nwo bane.
Wɔ tenleneyɛlɛ ne ati, die me* fi ngyegyelɛ nu.+
12 Wɔ ɛlɔlɛ kpundii ne ati, ye me kpɔvolɛma fi ɛkɛ;*+Sɛkye menli mɔɔ gyegye me* la amuala,+Ɔluakɛ mele wɔ sonvolɛ.+
Ɔbodwɛkɛ
^ Hibulu aneɛ nu, “sunsum.”
^ Anzɛɛ “Mesukoa ɛ sa anloa gyima ne mɔ kpalɛ.”
^ Anzɛɛ “Me ɛkɛla le.”
^ Anzɛɛ “nla.”
^ Hibulu aneɛ nu, “sunsum.”
^ Anzɛɛ “Ɔluakɛ memaa me ɛkɛla zo wɔ ɛ nyunlu.”
^ Anzɛɛ “tenleneyɛlɛ azɛlɛ.”
^ Anzɛɛ “me ɛkɛla.”
^ Hibulu aneɛ nu, “maa bɛyɛ koonwu.”
^ Anzɛɛ “me ɛkɛla.”
