Edwɛne 119:1-176
-
Nyamenle edwɛkɛ ne mɔɔ sonle bolɛ la anwo anyezɔlɛ
-
‘Kɛ ɔkɛyɛ na mgbavolɛ amaa bɛ adenle nu ade ɛ?’ (9)
-
“Mekulo wɔ ngakyelɛ ne mɔ somaa” (24)
-
“Nea kɛzi mekulo wɔ mɛla ne a!” (97)
-
“Melɛ nwunu dɔɔnwo metɛla me kilehilevolɛma” (99)
-
“Wɔ edwɛkɛ ne le kɛnlaneɛ mɔɔ kile me gyakɛ adenle” (105)
-
‘Wɔ edwɛkɛ ne le nɔhalɛ’ (160)
-
Bɛdabɛ mɔɔ bɛkulo Nyamenle mɛla ne la lɛ anzodwolɛ (165)
-
א [Aleph]
119 Anyelielɛ a le bɛdabɛ mɔɔ edwɛkɛ* ɛnle bɛ ndenle nwo,Na bɛdi Gyihova mɛla zo la.+
2 Anyelielɛ a le bɛdabɛ mɔɔ bɛdi ye ngakyelɛ ne mɔ azo,+Na bɛfa bɛ ahonle muala bɛkpondɛ ye la.+
3 Bɛnyɛ ninyɛndane biala;Bɛdua ye ndenle ne mɔ anu.+
4 Wɔha kɛYɛli wɔ mɛla ne mɔ azo kpalɛ.+
5 Me kunlu a anrɛɛ mebahola meagyinla kpundii*+Amaa meahola wɔ ngyehyɛleɛ ne mɔ azo di!
6 Saa mesuzu wɔ mɛla ne mɔ amuala anwo a,Me nyunlu ɛnrɛgua aze.+
7 Saa mesukoa wɔ ndɛnebualɛ fɔɔnwo ne a,Mebava ahonle mɔɔ anu te la meaye wɔ ayɛlɛ.
8 Mebali wɔ ngyehyɛleɛ ne mɔ azo.
Mmakpo me bɔkɔɔ.
ב [Beth]
9 Kɛ ɔkɛyɛ na kpavolɛ amaa ye adenle nu ade ɛ?
Kyesɛ ɔdua wɔ edwɛkɛ ne azo ɔsinza ɔ nwo.+
10 Mefa me ahonle muala mekpondɛ wɔ.
Mmamaa metwe me nwo mefi wɔ mɛla ne mɔ anwo.+
11 Meva wɔ edwɛkɛ ne mezie me ahonle nu+Amaa meanyɛ ɛtane meantia wɔ.+
12 O Gyihova, ayɛlɛyelɛ ɛha wɔ;Kilehile me wɔ ngyehyɛleɛ ne mɔ.
13 Mefa me nloa mebɔWɔ ndɛnebualɛ mɔɔ wɔha nwolɛ edwɛkɛ la amuala nolo.
14 Me nye die wɔ ngakyelɛ ne mɔ anwo+Metɛla ninyɛne gyɛne biala mɔɔ sonle bolɛ la.+
15 Mebadwenledwenle wɔ mɛla ne mɔ anwo*+Na meava me nye meazie wɔ ndenle ne mɔ azo.+
16 Mekulo wɔ mɛla ne mɔ somaa.
Me rɛle ɛnrɛvi wɔ edwɛkɛ ne.+
ג [Gimel]
17 Ɛ nee wɔ sonvolɛ ɛli ye boɛ,Amaa meadɛnla ngoane nu na meali wɔ edwɛkɛ zo.+
18 Buke me nye amaa meanwuNwanwane ninyɛne mɔɔ wɔ wɔ mɛla ne anu la kpalɛ.
19 Mele ɛyɛvolɛ wɔ azɛlɛ ne azo.+
Mmafa wɔ mɛla ne mɔ ɛfea me.
20 Me nwo* dɔWɔ ndɛnebualɛ mekɛ biala.
21 Ɛtea anwomemaazoma,*Munzuvoma mɔɔ bɛtwe bɛ nwo bɛfi wɔ mɛla ne mɔ anwo la.+
22 Ye aholoba ɛbɔlɛ nee anyiemgba ɛbɔlɛ fi me nwo zo,Ɔluakɛ meli wɔ ngakyelɛ ne mɔ azo.
23 Saa mgbanyima tɛnla tendɛ tia me bɔbɔ a,Wɔ sonvolɛ dwenledwenle wɔ ngyehyɛleɛ ne mɔ anwo.
24 Mekulo wɔ ngakyelɛ ne mɔ somaa;+Bɛle me folɛtuvoma.+
ד [Daleth]
25 Mela aze* wɔ ndɛtɛlɛ nu.+
Bɔ me ngoane nwo bane kɛ mɔɔ wɔ edwɛkɛ ne de la.+
26 Menganle me ndenle mengilele wɔ, na ɛbuale me;Kilehile me wɔ ngyehyɛleɛ ne mɔ.+
27 Maa mende wɔ mɛla ne mɔ abo,Amaa meadwenledwenle wɔ nwanwane gyima ne mɔ anwo.*+
28 Nyane ngome ɛmmaa mengola* da.
Dua wɔ edwɛkɛ ne azo maa me anwosesebɛ.
29 Ye adalɛ ndenle biala fi me nu,+Na ɛlolɛ nu ala, fa wɔ mɛla ne maa me.
30 Mekpa nɔhalɛ adenle ne.+
Meze kɛ wɔ ndɛnebualɛ tenrɛ.
31 Mebeta wɔ ngakyelɛ ne mɔ anwo ɛsesebɛ.+
O Gyihova, mmaye me rɛle ɛto me sa nu.*+
32 Mebakpondɛ* wɔ mɛla ne mɔ ɛsesebɛƆluakɛ ɛbuke me ahonle nu ɛmaa bɛ.*
ה [He]
33 O Gyihova, kilehile me+ wɔ ngyehyɛleɛ ne mɔ adenle,Na mebalua nu meahɔ awieleɛ.+
34 Maa me ndelebɛbo,Amaa meali wɔ mɛla ne azoNa meava me ahonle muala meali zo.
35 Fa me dua* wɔ mɛla adenle ne anu,+Ɔluakɛ me nye die nwolɛ.
36 Maa me ahonle ɛhulo wɔ ngakyelɛ ne mɔ,Tɛ angomedi nvasoɛ ɔ.+
37 Ye me nye fi ninyɛne mgbane mgbane ɛnleanlɛ nwo;+Bɔ me ngoane nwo bane wɔ wɔ adenle ne anu.
38 Di ɛwɔkɛ mɔɔ wɔbɔ* wɔ sonvolɛ la azo,Amaa bɛazulo wɔ.*
39 Ye anyiemgba ne mɔɔ mesulo ye la fi me nwo zo,Ɔluakɛ wɔ ndɛnebualɛ ne mɔ le kpalɛ.+
40 Nea kɛzi me nwo dɔ wɔ mɛla ne mɔ a!
Bɔ me ngoane nwo bane ɔlua wɔ tenleneyɛlɛ ne ati.
ו [Waw]
41 O Gyihova, maa menyia wɔ ɛlɔlɛ kpundii ne,+Nee wɔ ngoanelielɛ ne kɛ mɔɔ wɔ ɛwɔkɛ* ne de la;+
42 Akee mebabua mɔɔ tendɛ tia me la,Ɔluakɛ mefa me nwo meto wɔ edwɛkɛ zo.
43 Mmaye nɔhalɛ edwɛkɛ ne ɛfi me nloa anu bɔkɔɔ,Ɔluakɛ melɛ wɔ ndɛnebualɛ ne anu anyelazo.
44 Mebali wɔ mɛla ne azo mekɛ biala,Mebali zo dahuu.+
45 Na mebalua ɛleka mɔɔ banebɔlɛ wɔ* la,+Ɔluakɛ mekpondɛ wɔ mɛla ne mɔ.
46 Mebaha wɔ ngakyelɛ ne mɔ anwo edwɛkɛ wɔ arelemgbunli nyunlu,Na menrɛze nwolɛ nyiane.+
47 Me nye die wɔ mɛla ne mɔ anwo somaa,Ɛhɛe, mekulo wɔ mɛla ne mɔ.+
48 Mebamaa me sa zo wɔ asɔneyɛlɛ nu ɔluakɛ mekulo wɔ mɛla ne mɔ,+Na meadwenledwenle wɔ ngyehyɛleɛ ne mɔ anwo.*+
ז [Zayin]
49 Kakye wɔ edwɛkɛ ne mɔɔ wɔha wɔhile* wɔ sonvolɛ,Mɔɔ ɔlua zo wɔmaa menyia anyelazo* la.
50 Ɛhye a le me arɛlekyekyelɛ mɔɔ menyia ye wɔ me amaneɛnwunlɛ nu a,+Ɔluakɛ wɔ edwɛkɛ ne ɛbɔ me ngoane nwo bane.
51 Anwomemaazoma* golo me nwo kpalɛ,Noko metɛfile wɔ mɛla ne anwo.+
52 O Gyihova, mekakye wɔ ndɛnebualɛ ne mɔ mɔɔ ɔvi tete la,+Na bɛkyekye me rɛle.+
53 Meva amumuyɛma anwo ɛya kpole,Ɔluakɛ bɛkpo wɔ mɛla ne.+
54 Wɔ ngyehyɛleɛ ne mɔ le edwɛne maa meWɔ ɛleka biala mɔɔ mewɔ la.*
55 O Gyihova, ɔdwu nɔɔzo a mekakye wɔ duma ne,+Amaa meali wɔ mɛla ne azo.
56 Ɛhye ɛyɛ me subaneƆluakɛ meli wɔ mɛla ne mɔ azo.
ח [Heth]
57 Gyihova le me kyɛfoa;+Mebɔ ɛwɔkɛ kɛ mebali wɔ edwɛkɛ zo.+
58 Mefa me ahonle muala mesɛlɛ wɔ;+Maa menyia ɛ nyunlu ɛlolɛ+ kɛ mɔɔ wɔ ɛwɔkɛ* ne de la.
59 Menleɛnlea me ndenle nu,Amaa meazia me nzi na meali wɔ ngakyelɛ ne mɔ azo.+
60 Meka me nwo yɛɛ mengyɛ nwolɛKɛ mebali wɔ mɛla ne mɔ azo.+
61 Amumuyɛma nyɛma ɛbɔ me ɛyia,Noko me rɛle ɛnvi wɔ mɛla ne.+
62 Medwazo nɔɔzo* meyɛ wɔ mo+Ɔlua wɔ ndɛnebualɛ fɔɔnwo ne ati.
63 Me gɔnwo mɔ a le menli mɔɔ sulo wɔNee bɛdabɛ mɔɔ bɛdi wɔ mɛla ne mɔ azo la amuala.+
64 O Gyihova, wɔ ɛlɔlɛ kpundii ne ɛyi azɛlɛ ye;+Kilehile me wɔ ngyehyɛleɛ ne mɔ.
ט [Teth]
65 O Gyihova, ɛ nee wɔ sonvolɛ ɛli ye boɛ,Kɛ mɔɔ wɔ edwɛkɛ ne kile la.
66 Kilehile me maa menwu nrɛlɛbɛ na menyia ndelebɛbo,+Ɔluakɛ meva me rɛle mewula wɔ mɛla ne mɔ anu.
67 Kolaa na meahɔ anwongyelelɛ nu la, ɛnee meta mefo adenle ne*Noko kɛkala medi wɔ edwɛkɛ zo.+
68 Ɛle kpalɛ+ yɛɛ wɔ gyima le kpalɛ.
Kilehile me wɔ ngyehyɛleɛ ne mɔ.+
69 Anwomemaazoma* bɔ adalɛ dɔɔnwo gua me nwo zo,Noko mefa me ahonle muala medi wɔ mɛla ne mɔ azo.
70 Bɛ ahonle ɛsolo,*+Noko mame, mekulo wɔ mɛla ne kpalɛ.+
71 Ɔle kpalɛ kɛ mengɔle anwongyelelɛ nu la,+Amaa meazukoa wɔ ngyehyɛleɛ ne mɔ.
72 Mɛla ne mɔɔ wɔbɔ ye nolo la le kpalɛ maa me,+Ɔtɛla nvutuke nee dwɛtɛ fufule apenle apenle.+
י [Yod]
73 Ɛ sa a bɔle me na ɔzieziele me a.
Maa menyia ndelebɛbo,Amaa meazukoa wɔ mɛla ne mɔ.+
74 Bɛdabɛ mɔɔ bɛsulo wɔ la nwu me na bɛ nye die,Ɔluakɛ wɔ edwɛkɛ ne a le me anyelazo a.*+
75 O Gyihova, meze kɛ wɔ ndɛnebualɛ ne mɔ tenrɛ+Na wɔhile me nyane wɔ wɔ nɔhalɛlilɛ ne anu.+
76 Mesɛlɛ wɔ, maa wɔ ɛlɔlɛ kpundii ne+ ɛkyekye me rɛle,Kɛ mɔɔ ɛwɔkɛ ne mɔɔ wɔbɔ* wɔ sonvolɛ la de la.
77 Nwu me anwunvɔne, amaa meadɛnla ngoane nu,+Ɔluakɛ mekulo wɔ mɛla ne mɔ somaa.+
78 Maa anwomemaazoma* ɛbɔ anyiemgba,Ɔluakɛ bɛgyegye me mgbane gyɛne nu ala.*
Noko mebadwenledwenle wɔ mɛla ne mɔ anwo.*+
79 Maa menli mɔɔ sulo wɔ la ɛzia ɛrɛla me nwo ɛkɛ,Menli mɔɔ ze wɔ ngakyelɛ ne mɔ la.
80 Maa me ahonle muala ɛli wɔ ngyehyɛleɛ ne mɔ azo,+Amaa meambɔ anyiemgba.+
כ [Kaph]
81 Me nwo* dɔ wɔ ngoanelielɛ,+Ɔluakɛ wɔ edwɛkɛ ne a le me anyelazo a.*
82 Mehendɛ wɔ ɛwɔkɛ ne too me nye ɛlɛbu+Meka kɛ: “Kenlenzu a ɛbakyekye me rɛle a?”+
83 Meyɛ kɛ nwoma kodoku mɔɔ henda esike nu,Noko me rɛle ɛnvi wɔ ngyehyɛleɛ ne mɔ.+
84 Wɔ sonvolɛ ɛhendɛ ɛhɔdwu kenlenzu?
Kenlenzu a ɛbabua menli mɔɔ yɛ me kpɔdekpɔde la ndɛne a?+
85 Anwomemaazoma* ɛdu me nwo kuma,Menli mɔɔ ɛnli wɔ mɛla zo la.
86 Wɔ mɛla ne kɔsɔɔti le nɔhalɛ.
Menli yɛ me kpɔdekpɔde mgbane gyɛne nu ala; boa me!+
87 Asɛɛ bɛbɔle me bo zo wɔ azɛlɛ ye azo,Noko meamkpo wɔ mɛla ne mɔ.
88 Bɔ me ngoane nwo bane ɔlua wɔ ɛlɔlɛ kpundii ne ati,Amaa meali wɔ ngakyelɛ ne mɔ mɔɔ wɔva wɔdo gua la azo.
ל [Lamed]
89 O Gyihova, wɔ edwɛkɛ ne wɔ ɛkɛ dahuu,Ɔgyi ye kpundii wɔ anwuma.+
90 Wɔ nɔhalɛlilɛ kɔdwu awolɛndoazo kɔsɔɔti azo.+
Wɔva azɛlɛ ne wɔzie ɛkɛ ne kpundii, amaa yeagyinla ɛkɛ ne dahuu.+
91 Wɔ ndɛnebualɛ ne mɔ ati, bɛwɔ* ɛkɛ ne too a yeradwu ɛnɛ a,Ɔluakɛ bɛ muala bɛle wɔ sonvolɛma.
92 Saa tɛ wɔ mɛla ne mɔɔ mekulo ye somaa la a,Anrɛɛ amaneɛnwunlɛ ɛminli me bo zo.+
93 Me rɛle ɛnrɛvi wɔ mɛla ne mɔ ɛlɛ,Ɔluakɛ wɔlua zo wɔbɔ me ngoane nwo bane.+
94 Mele wɔ ɛdeɛ; die me,+Ɔluakɛ mekpondɛ wɔ mɛla ne mɔ.+
95 Amumuyɛma ɛlɛkendɛ me azɛkye me,Noko mefa me adwenle mesie wɔ ngakyelɛ ne mɔ azo.
96 Menwu kɛ debie biala mɔɔ di munli la lɛ ye ɛweɛne,Noko wɔ mɛla ɛnlɛ ye ɛweɛne.*
מ [Mem]
97 Nea kɛzi mekulo wɔ mɛla ne a!+
Medwenledwenle nwo* alehyenlɛ biala.+
98 Wɔ mɛla ne maa menwu nrɛlɛbɛ metɛla me kpɔvolɛma,+Ɔluakɛ ɔwɔ me nwo ɛkɛ ne dahuu.
99 Melɛ nwunu dɔɔnwo metɛla me kilehilevolɛma amuala,+Ɔluakɛ medwenledwenle wɔ ngakyelɛ ne mɔ anwo.*
100 Mefa ndelebɛbo mɔɔ tɛla mgbanyima ɛdeɛ la a meyɛ me ninyɛne a,Ɔluakɛ medi wɔ mɛla ne mɔ azo.
101 Menlua amumuyɛ adenle biala anu,+Amaa meahola meali wɔ edwɛkɛ zo.
102 Menvi wɔ ndɛnebualɛ ne mɔ anwo,Ɔluakɛ wɔhilehile me.
103 Nea kɛzi wɔ edwɛkɛ ne le menlemenle wɔ me tafinlima azo a,Ɔtɛla wolɛ wɔ me nloa anu!+
104 Wɔ ngyehyɛleɛ ne mɔ maa mefa ndelebɛbo meyɛ gyima.+
Yemɔti mekyi adalɛ adenle biala.+
נ [Nun]
105 Wɔ edwɛkɛ ne le kɛnlaneɛ mɔɔ kile me gyakɛ adenle,Yɛɛ ɔle wienyi mɔɔ ɔta me adenle nu.+
106 Meha ndane, na mebali zo,Kɛ mebali wɔ ndɛnebualɛ fɔɔnwo ne mɔ azo.
107 Menwu amaneɛ dɔɔnwo.+
O Gyihova, bɔ me ngoane nwo bane kɛ mɔɔ wɔ edwɛkɛ ne de la.+
108 O Gyihova, mesɛlɛ wɔ, maa ɛ nye ɛlie me ayɛlɛyelɛ afɔle ne mɔɔ mevi me ɛhulolɛ nu mebɔ la* anwo,+Na kilehile me wɔ ndɛnebualɛ ne mɔ.+
109 Dahuu me ngoane la esiane nu,*Noko me rɛle ɛtɛfile wɔ mɛla ne.+
110 Amumuyɛma ɛzua me ɛhane,Noko metɛfile wɔ mɛla ne mɔ anwo.+
111 Mefa wɔ ngakyelɛ ne mɔ kɛ me agyapadeɛ dahuu,Ɔluakɛ bɛmaa me ahonle di fɛlɛko.+
112 Mebɔ kpɔkɛ kɛ mebali wɔ ngyehyɛleɛ ne mɔ azoMekɛ biala meahɔdwu awieleɛ.
ס [Samekh]
113 Mekyi menli mɔɔ bɛ ahonle nu ɛhyɛ nwiɔ la,+Noko mekulo wɔ mɛla ne.+
114 Ɛle me ɛvealeka nee me enyinlike,+Ɔluakɛ wɔ edwɛkɛ ne a le me anyelazo a.*+
115 Bɛmɛ amumuyɛma, bɛhwe bɛ nwo bɛvi me nwo,+Amaa meahola meali me Nyamenle ne mɛla ne mɔ azo.
116 Boa me kɛ mɔɔ wɔ ɛwɔkɛ* ne kile la,+Amaa meadɛnla ngoane nu;Mmamaa me nyunlu gua aze wɔ me anyelazo ne anwo.+
117 Boa me maa menyia ngoane;+Na mebava me adwenle meazie wɔ ngyehyɛleɛ ne mɔ azo dahuu.+
118 Ɛkpo bɛdabɛ mɔɔ bɛtwe bɛ nwo bɛfi wɔ ngyehyɛleɛ ne mɔ anwo la amuala,+Ɔluakɛ bɛnli nɔhalɛ yɛɛ bɛle mɛlɛbɛla.
119 Ɛfuandi amumuyɛma mɔɔ bɛwɔ azɛlɛ ne azo la amuala ɛgua bɛ lɔ kɛ ewula la.+
Ɛhye ati a mekulo wɔ ngakyelɛ ne mɔ la.
120 Ɛ nwo ɛzulolɛ maa me nwo* woso me;Mesulo wɔ ndɛnebualɛ ne mɔ.
ע [Ayin]
121 Meyɛ mɔɔ le pɛlepɛle na ɔtenrɛ la.
Mmagyakyi me ɛmaa menli mɔɔ sisi me la!
122 Bɔ ɛwɔkɛ kɛ ɛbaboa wɔ sonvolɛ;Mmamaa anwomemaazoma* sisi me.
123 Mehendɛ wɔ ngoanelielɛ+Nee wɔ tenlene ɛwɔkɛ* ne too me nye ɛlɛbu.+
124 Da wɔ ɛlɔlɛ kpundii ne ali kile wɔ sonvolɛ,+Na kilehile me wɔ ngyehyɛleɛ ne mɔ.+
125 Mele wɔ sonvolɛ; maa me ndelebɛbo,+Amaa meanwu wɔ ngakyelɛ ne mɔ.
126 Mekɛ ɛdwu kɛ Gyihova yɛ debie,+Ɔluakɛ bɛbulu wɔ mɛla zo.
127 Ɛhye ati a mekulo wɔ mɛla ne mɔMetɛla nvutuke, nvutuke kpalɛ* bɔbɔ la.+
128 Ɔti, mebu wɔ adehilelɛ* biala kɛ ɔtenrɛ;+Mekyi adalɛ adenle biala.+
פ [Pe]
129 Wɔ ngakyelɛ ne mɔ yɛ nwanwane.
Ɛhye ati a medi* zo la.
130 Wɔ edwɛkɛ ne mɔɔ ɛda ye ali la maa wienyi,+Ɔmaa mɔɔ ɛnlɛ anwubielɛ la nyia ndelebɛbo.+
131 Mebuke me nloa wanaanwo na megu ɛnwomenle,*Ɔluakɛ me nwo dɔ wɔ mɛla ne mɔ.+
132 Kakyi ɛ nye wɔ me nwo na maa menyia ɛ nyunlu ɛlolɛ,+Kɛ mɔɔ wɔ ndɛnebualɛ ne de wɔ bɛdabɛ mɔɔ bɛkulo wɔ duma ne la anwo la.+
133 Fa wɔ edwɛkɛ ne kile me adenle wɔ me gyakɛ ɛdudulɛ nu;*Mmamaa debie ɛtane biala di me nwo zo konim.+
134 Die* me fi nzisima asa anu,Na mebali wɔ mɛla ne mɔ azo.
135 Maa ɛ nyunlu ɛda* wɔ sonvolɛ anwo zo,+Na kilehile me wɔ ngyehyɛleɛ ne mɔ.
136 Monle sonyi me nye anwo kɛ nzuleƆluakɛ menli ɛnli wɔ mɛla ne azo.+
צ [Tsade]
137 Ɛle tenlenenli, O Gyihova,+Yɛɛ wɔ ndɛnebualɛ le fɔɔnwo.+
138 Wɔ ngakyelɛ ne mɔ tenrɛYɛɛ bɛkola bɛfa bɛ nwo bɛto zo bɔkɔɔ.
139 Ɛ nwo mɔdenlebɔlɛ le kɛ senle mɔɔ ɛlɛsɔ la wɔ me nu,+Ɔluakɛ me kpɔvolɛma arɛle ɛvi wɔ edwɛkɛ ne.
140 Bɛdu wɔ edwɛkɛ ne anu bɔkɔɔ,+Na wɔ sonvolɛ kulo.+
141 Menle sonla titili yɛɛ menli ɛmbu me bie;+Noko me rɛle ɛtɛfile wɔ mɛla ne mɔ.
142 Wɔ tenleneyɛlɛ ne wɔ ɛkɛ ne dahuu,+Yɛɛ wɔ mɛla le nɔhalɛ.+
143 Amaneɛnwunlɛ nee ngyegyelɛ to me ɛdeɛ,Noko metɛkulo wɔ mɛla ne mɔ somaa.
144 Wɔ ngakyelɛ ne mɔ le tenlene dahuu.
Maa menyia ndelebɛbo+ amaa meahɔ zo meadɛnla ngoane nu.
ק [Qoph]
145 Meva me ahonle muala mevɛlɛ wɔ. O Gyihova, bua me.
Mebali wɔ ngyehyɛleɛ ne mɔ azo.
146 Mezu mevɛlɛ wɔ; die me!
Mebali wɔ ngakyelɛ ne mɔ azo.
147 Medwazo aleɛbahye* mesu mekpondɛ moalɛ,+Ɔluakɛ wɔ edwɛkɛ ne mɔ maa me anyelazo.*
148 Me nye te kolaa na mekɛ mɔɔ bɛsinza nɔɔzo la adwu,Amaa meadwenledwenle wɔ edwɛkɛ ne anwo.*+
149 Wɔ ɛlɔlɛ kpundii ne ati, tie me ne.+
O Gyihova, bɔ me ngoane nwo bane kɛ mɔɔ wɔ pɛlepɛlelilɛ ne de la.
150 Menli mɔɔ bɔ anyiemgba* ɛbɛla la ɛbikye me;Bɛhwe bɛ nwo bɛvi wɔ mɛla nwo bɔkɔɔ.
151 O Gyihova, ɛbikye me,+Na wɔ mɛla ne mɔ amuala le nɔhalɛ.+
152 Mezukoa wɔ ngakyelɛ ne mɔ anwo debie dɛbadɛba,Kɛ wɔva wɔzie ɛkɛ ne dahuu.+
ר [Resh]
153 Nea me amaneɛnwunlɛ na die me,+Ɔluakɛ me rɛle ɛtɛfile wɔ mɛla.
154 Di me edwɛkɛ maa me na die me;+Bɔ me ngoane nwo bane kɛ mɔɔ wɔ ɛwɔkɛ* ne de la.
155 Ngoanelielɛ ɛmbikye amumuyɛma fee,Ɔluakɛ bɛmkpondɛ wɔ ngyehyɛleɛ ne mɔ.+
156 Wɔ anwunvɔnezelɛ le kpole, O Gyihova.+
Bɔ me ngoane nwo bane kɛ mɔɔ wɔ pɛlepɛlelilɛ ne de la.
157 Menli mɔɔ yɛ me kpɔdekpɔde nee me kpɔvolɛma anwo zonle;+Noko metɛfile wɔ ngakyelɛ ne mɔ anwo.
158 Menwu menli mɔɔ ɛnli nɔhalɛ la a, mekyi bɛ,Ɔluakɛ bɛnli wɔ edwɛkɛ zo.+
159 Nea kɛzi mekulo wɔ mɛla ne mɔ a!
O Gyihova, bɔ me ngoane nwo bane ɔlua wɔ ɛlɔlɛ kpundii ne ati.+
160 Wɔ edwɛkɛ ne amuala le nɔhalɛ,+Yɛɛ wɔ ndɛnebualɛ fɔɔnwo ne amuala wɔ ɛkɛ ne dahuu.
ש [Sin] anzɛɛ [Shin]
161 Tumivolɛma yɛ me kpɔdekpɔde+ mgbane gyɛne nu ala,Noko me ahonle tu ɔlua wɔ edwɛkɛ ne mɔ ati.+
162 Wɔ edwɛkɛ ne maa me nye die+Kɛ awie mɔɔ ɛnyia afedeɛ dɔɔnwo la.
163 Me nye ɛnlie adalɛbɔlɛ nwo—mekyi—+Mekulo wɔ mɛla.+
164 Meye wɔ ayɛlɛ fane nsuu alehyenlɛ bialaƆlua wɔ ndɛnebualɛ fɔɔnwo ne ati.
165 Bɛdabɛ mɔɔ bɛkulo wɔ mɛla ne la lɛ anzodwolɛ kpole;+Debie biala ɛngola ɛmmaa bɛmkpo aze.*
166 O Gyihova, me nye la wɔ ngoanelielɛ gyima ne mɔ ade,Na medi wɔ mɛla ne mɔ azo.
167 Medi* wɔ ngakyelɛ ne mɔ azo,Na mekulo bɛ somaa.+
168 Medi wɔ mɛla nee wɔ ngakyelɛ ne mɔ azo,Ɔluakɛ ɛze debie biala mɔɔ meyɛ la.+
ת [Taw]
169 O Gyihova, tie me ɛzunlɛ na boa me.+
Maa me ndelebɛbo kɛ mɔɔ wɔ edwɛkɛ ne de la.+
170 Maa me modolɛ ɛdwu ɛ nyunlu.
Die me, kɛ mɔɔ wɔ ɛwɔkɛ* ne de la.
171 Maa ayɛlɛyelɛ ɛyi me nloa anu tɛkɛɛ,+Ɔluakɛ ɛkilehile me wɔ ngyehyɛleɛ ne mɔ.
172 Maa me tafinlima ɛdo wɔ edwɛkɛ ne anwo edwɛne,+Ɔluakɛ wɔ mɛla ne amuala tenrɛ.
173 Tende ɛ sa boa me,+Ɔluakɛ mekpa kɛ mebali wɔ mɛla ne mɔ azo.+
174 Me nwo dɔ wɔ ngoanelielɛ ne, O Gyihova,Yɛɛ mekulo wɔ mɛla ne mɔ somaa.+
175 Maa mendɛnla ngoane nu amaa meahola meaye wɔ ayɛlɛ;+Maa wɔ ndɛnebualɛ ne mɔ ɛboa me.
176 Mevo adenle kɛ boane mɔɔ ɛminli la.+ Kpondɛ wɔ sonvolɛ,Ɔluakɛ me rɛle ɛtɛfile wɔ mɛla ne mɔ.+
Ɔbodwɛkɛ
^ Anzɛɛ “bɛdi nɔhalɛ, bɛdua bɛ munlililɛ nu.”
^ Hibulu aneɛ nu, “O anrɛɛ me ndenle agyinla kpundii.”
^ Anzɛɛ “Mebazukoa wɔ mɛla ne mɔ.”
^ Anzɛɛ “Me ɛkɛla anwo.”
^ Hibulu edwɛkɛkpɔkɛ ne eza kile akɛnrasesebɛ mɔɔ ɛnle kpalɛ mɔɔ bɛfa bɛyɛ debie anzɛɛ awie mɔɔ yɛ debie mɔɔ ɔnlɛ adenle ɔnyɛ la.
^ Anzɛɛ “Me ɛkɛla la aze.”
^ Anzɛɛ “meazukoa wɔ nwanwane gyima ne mɔ.”
^ Anzɛɛ “me ɛkɛla ɛngola.”
^ Anzɛɛ “mmamaa me nyunlu gua aze.”
^ Hibulu aneɛ nu, “Mebanriandi meadoa.”
^ Anzɛɛ ɔkola ɔkile, “Ɛmaa me ahonle nyia anwodozo.”
^ Anzɛɛ “Maa menlua.”
^ Anzɛɛ “edwɛkɛ mɔɔ wɔha wɔhile.”
^ Anzɛɛ ɔkola ɔkile, “Mɔɔ wɔbɔ bɛdabɛ mɔɔ bɛsulo wɔ la.”
^ Anzɛɛ “edwɛkɛ.”
^ Anzɛɛ “tɛlɛ.”
^ Anzɛɛ “meazukoa wɔ ngyehyɛleɛ ne mɔ.”
^ Anzɛɛ “Kakye wɔ ɛwɔkɛ ne mɔɔ wɔbɔ.”
^ Anzɛɛ “Mɔɔ wɔmaa mehendɛ ye.”
^ Anzɛɛ “Wɔ sua mɔɔ mede nu kɛ ɛyɛvolɛ la anu.”
^ Anzɛɛ “edwɛkɛ.”
^ Anzɛɛ “alevinli mu nwiɔ avinli.”
^ Anzɛɛ “Tɛ me nye fuu a ɛnee meyɛ ɛtane a.”
^ Hibulu aneɛ nu, “ɛnde nganeɛ, le kɛ ɛnlome.”
^ Anzɛɛ “Mekendɛ wɔ edwɛkɛ ne.”
^ Anzɛɛ “edwɛkɛ mɔɔ wɔha wɔhile.”
^ Anzɛɛ ɔkola ɔkile, “adalɛ nu ala.”
^ Anzɛɛ “mebazukoa wɔ mɛla ne mɔ.”
^ Anzɛɛ “Me ɛkɛla anwo.”
^ Anzɛɛ “Mekendɛ wɔ edwɛkɛ ne.”
^ Ɛhye kile, ye abɔdeɛ muala wɔ.
^ Hibulu aneɛ nu, “tɛlɛ kpalɛ.”
^ Anzɛɛ “Mesukoa ye.”
^ Anzɛɛ “Ɔluakɛ mesukoa wɔ ngakyelɛ ne mɔ.”
^ Hibulu aneɛ nu, “me nloa mɔɔ mefi me ɛhulolɛ nu mefa mebɔ afɔle la.”
^ Anzɛɛ “Me ɛkɛla la me sa nu dahuu.”
^ Anzɛɛ “mekendɛ wɔ edwɛkɛ ne.”
^ Anzɛɛ “edwɛkɛ.”
^ Hibulu aneɛ nu, “nwonane.”
^ Anzɛɛ “edwɛkɛ.”
^ Anzɛɛ “mɔɔ bɛdu nu.”
^ Anzɛɛ “mɛla.”
^ Anzɛɛ “me ɛkɛla di.”
^ Anzɛɛ “medie ɛnwomenle ndɛndɛ.”
^ Anzɛɛ “maa me gyakɛ ɛgyinla boɛ.”
^ Hibulu aneɛ nu, “Kpɔne.”
^ Anzɛɛ “Sele.”
^ Anzɛɛ “nwonlomɔ mangyee.”
^ Anzɛɛ “mekendɛ wɔ edwɛkɛ ne mɔ.”
^ Anzɛɛ “meazukoa wɔ edwɛkɛ ne.”
^ Anzɛɛ “bɛkyi.”
^ Anzɛɛ “edwɛkɛ.”
^ Anzɛɛ “Azedolɛ bolɛ biala ɛnle ɛkɛ ne ɛmmaa bɛ.”
^ Anzɛɛ “Me ɛkɛla di.”
^ Anzɛɛ “edwɛkɛ.”
