Dwɔn Edwɛkpa 20:1-31

  • Nla mɔɔ ɛhwee ɛnle nu (1-10)

  • Gyisɛse ye ɔ nwo ahile Mɛle Magedalene (11-18)

  • Gyisɛse ye ɔ nwo ahile ye ɛdoavolɛma (19-23)

  • Tɔmase su kpolera na nzinlii ɔdie ɔdi (24-29)

  • Buluku ɛhye bodane (30, 31)

20  Dapɛne ne kenle mɔɔ limoa la anu, Mɛle Magedalene hɔle nla* ne azo ndɛ,+ mekɛ mɔɔ maanle nu ɛtɛtetele la, na ɔnwunle kɛ bɛye bolɛ ne bɛvi nla* ne anloa dɛbadɛba.+  Yemɔti ɔvale ɛnriandilɛ ɔrale Saemɔn Pita nee ɛdoavolɛ ko ne mɔɔ Gyisɛse kulo ye edwɛkɛ la anwo ɛkɛ,+ na ɔzele bɛ kɛ: “Bɛye Awulae bɛvi nla ne anu,+ na yɛnze ɛleka mɔɔ bɛva ye bɛhɔdo a.”  Akee Pita nee ɛdoavolɛ ko ne yɛle kɛ bɛkɔ nla ne azo.  Mɔɔ bɛkɔ la ɛnee bɛ mu nwiɔ bɛlɛ ɛnriandilɛ, noko ɛdoavolɛ ko ne nriandile ndɛndɛ dɛlale Pita na ɔlimoale ɔdwule nla ne azo.  Ɔhanle ɔ nwo aze ɔnleanle nu, na ɔnwunle kɛ lenen ndanlɛ ne gua ɛkɛ+ noko yeanwolo nu.  Saemɔn Pita noko doale ye rale, na ɔwolole nla ne anu. Na ɔnwunle kɛ lenen ndanlɛ ne gua nu.  Ɛnee ɛdanlɛ ne mɔɔ bɛvale bɛkyekyele ɔ ti la ɛmboka ɛdanlɛ ɛhendeɛ ne mɔ anwo, ɛnee bɛbubu bɛgua ɛleka gyɛne.  Akee ɛdoavolɛ ko ne mɔɔ limoale dwule nla ne anwo la noko wolole nu, na ɔnwunle ɛhye na ɔliele ɔlile.  Ɔluakɛ ɛnee bɛtɛtele ngɛlɛlera ne abo kɛ ɔwɔ kɛ ɔdwazo ɔfi mowuamra anu.+ 10  Yemɔti ɛdoavolɛma ne ziale hɔle bɛ azua nu. 11  Noko Mɛle hɔle zo gyinlanle nla ne anwo zunle. Mekɛ mɔɔ ɔlɛsu la, ɔhanle ɔ nwo aze ɔnleanle nla ne anu, 12  na ɔnwunle anwumabɔvolɛma nwiɔ+ mɔɔ wula adɛladeɛ fufule la kɛ bɛde ɛleka mɔɔ ɛnee Gyisɛse la la, ko de ɔ ti sɔlɔ yɛɛ ko de ɔ gyakɛ anu. 13  Na bɛzele ye kɛ: “Raalɛ ye, duzu ati a ɛlɛsu a?” Ɔzele bɛ kɛ: “Bɛye me Awulae bɛvi ɛke, na menze ɛleka mɔɔ bɛva ye bɛhɔdo a.” 14  Mɔɔ ɔhanle ɛhye la, ɔhakyile ɔ nwo na ɔnwunle kɛ Gyisɛse gyi ɛkɛ, noko ɛnee ɔnze kɛ Gyisɛse ɔ.+ 15  Gyisɛse zele ye kɛ: “Raalɛ ye, duzu ati a ɛlɛsu a? Nwane a ɛkpondɛ ye a?” Yemɔ ɛnee ɔsuzu kɛ ahenle mɔɔ nea tola ne azo la ɔ, yemɔti ɔzele ye kɛ: “Yɛmenle, saa wɔye ye wɔvi ɛke a, kile me ɛleka mɔɔ wɔva ye wɔdo la na mengɔnva ye mengɔ.” 16  Gyisɛse zele ye kɛ: “Mɛle!” Mɔɔ ɔhakyile ɔ nwo la, ɔzele ye wɔ Hibulu nu kɛ: “Relabonae!” (ɔ bo kile “Kilehilevolɛ!”) 17  Gyisɛse zele ye kɛ: “Gyakyi me, ɔluakɛ metɛkɔle Selɛ ne anwo lɔ. Emomu kɔ me mediema ne mɔ ɛkɛ+ na ka kile bɛ kɛ, ‘Melɛkɔ me Ze+ nee bɛ Ze, me Nyamenle+ nee bɛ Nyamenle ne anwo lɔ.’” 18  Mɛle Magedalene rabɔle ɛdoavolɛma ne amaneɛ kɛ: “Menwu Awulae!” Akee ɔhanle mɔɔ ɔhanle ɔhilele ye la ɔhilele bɛ.+ 19  Kenle zɔhane nɔsolɛ nu, mɔɔ le dapɛne ne kenle mɔɔ limoa la, ɛnee ɛdoavolɛma ne wɔ sua nu na Dwuuma ne anwo ɛzulolɛ ti bɛtoto nlenkɛ ne mɔ anu, Gyisɛse ragyinlanle bɛ avinli na ɔzele bɛ kɛ: “Anzodwolɛ ɛha bɛ.”+ 20  Mɔɔ ɔhanle ɛhye la, ɔvale ɔ sa nee ɔ nvenle ɔhilele bɛ.+ Akee ɛdoavolɛma ne lile fɛlɛko kpole kɛ bɛnwu Awulae la.+ 21  Gyisɛse zele bɛ bieko kɛ: “Anzodwolɛ ɛha bɛ.+ Kɛ mɔɔ Selɛ ne zoanle me la,+ medame noko melɛsoa bɛ.”+ 22  Mɔɔ ɔhanle ɛhye la, ɔwule anwoma ɔguale bɛ nwo zo na ɔhanle kɛ: “Bɛlie sunsum nwuanzanwuanza.+ 23  Saa bɛfa awie ɛtane bɛkyɛ ye a, ɛnee bɛva bɛhyɛ ye; saa bɛanva awie ɛtane bɛangyɛ ye a, bɛnrɛva bɛnrɛhyɛ ye.” 24  Noko mekɛ mɔɔ Gyisɛse rale la, ɛnee Tɔmase,+ Bulu Nee Nwiɔ ne anu ko mɔɔ bɛfɛlɛ ye Nda la, ɛnle bɛ nwo ɛkɛ. 25  Yemɔti ɛdoavolɛma ne hanle hilele ye kɛ: “Yɛnwu Awulae!” Noko ɔzele bɛ kɛ: “Saa meannwu pɛlɛko ne abo zo* wɔ ɔ sa nu na meanva me sa ɛrɛlɛsɛka meanga pɛlɛko ne abo zo ne na meanva me sa meanga ɔ nvenle a,+ menrɛlie menrɛli ɛlɛ.” 26  Ye kenle mɔtwɛ anzi, ye ɛdoavolɛma ne yiale nu bieko wɔ sua bie anu, na ɛnee Tɔmase boka bɛ nwo. Ɛnee bɛtoto nlenkɛ ne mɔ anu ɛdeɛ, noko Gyisɛse ragyinlanle bɛ avinli na ɔhanle kɛ: “Anzodwolɛ ɛha bɛ.”+ 27  Akee ɔzele Tɔmase kɛ: “Fa ɛ sa ɛrɛlɛsɛka ka ɛke, na nea me sa nu, na fa ɛ sa ka me nvenle, gyakyi kpolerazulɛ* na die di.” 28  Tɔmase buale ye kɛ: “Me Awulae nee me Nyamenle!” 29  Gyisɛse zele ye kɛ: “Kɛmɔ wɔnwu me la ati a wɔlie wɔli ɔ? Anyelielɛ a le bɛdabɛ mɔɔ bɛtɛnwunle ye noko bɛlie bɛli la.” 30  Nɔhalɛ nu, Gyisɛse eza yɛle nwanwane ninyɛne dɔɔnwo hilele ɛdoavolɛma ne mɔɔ bɛangɛlɛ ye wɔ buluku ɛhye anu a.+ 31  Noko bɛhɛlɛ ɛhye bɛdo ɛkɛ amaa bɛalie bɛali kɛ Gyisɛse a le Kelaese, Nyamenle Ara ne a, na kɛmɔ bɛdie bɛdi la ati, bɛalua ye duma ne azo bɛanyia ngoane.+

Ɔbodwɛkɛ

Anzɛɛ “ngakyelɛ nla.”
Anzɛɛ “ngakyelɛ nla.”
Anzɛɛ “kapenle ne.”
Giliki aneɛ nu, “mmayɛ ɛ nwo kɛ ɛnlie ɛnli.”