Dwɔhyua 23:1-16

  • Dwɔhyua nee Yizilayɛ adekilevoma lile nrɛlaleɛ (1-16)

    • Gyihova edwɛkɛkpɔkɛ ko bɔbɔ anga nu (14)

23  Gyihova maanle Yizilayɛma liele bɛ menle+ vile bɛ agbɔvolɛ mɔɔ ɛbɛnga bɛ nwo ɛyia la kɔsɔɔti anwo na mekɛ dɔɔnwo guale nu, mɔɔ ɛnee Dwɔhyua ɛyɛ kpanyinli na ye ɛvolɛ ɛhɔ ɔ nyunlu la,+  Dwɔhyua vɛlɛle Yizilayɛma amuala,+ bɛ mgbanyima, bɛ mbusua mgbanyinli, bɛ ndɛnebuavolɛma yɛɛ bɛ menli titili+ na ɔzele bɛ kɛ: “Meyɛ kpanyinli yɛɛ me ɛvolɛ ɛhɔ ɔ nyunlu.  Na bɛdabɛ bɛnwu ninyɛne kɔsɔɔti mɔɔ bɛdabɛ ti Gyihova bɛ Nyamenle ne vale yɛle maanle maanle ɛhye mɔ amuala la, ɔluakɛ ɛnee Gyihova bɛ Nyamenle ne a ɛlɛko amaa bɛ a.+  Bɛnlea, menguale ma* na mengyɛle*+ maanle maanle mɔɔ ɛha la nee maanle maanle mɔɔ mezɛkye bɛ+ la azɛlɛ ne memaanle bɛ mbusua ne mɔ kɛ bɛ agyapadeɛ,+ ɔvi Dwɔdan ne kɔdwu Nyevile Kpole ne* mɔɔ wɔ adɔleɛ la anloa.  Na Gyihova bɛ Nyamenle ne a dule bɛ wɔ bɛ nyunlu+ na ɔvoanle bɛ ɔmaanle bɛ a, na bɛvale bɛ azɛlɛ ne bɛdɛnlanle zolɛ kɛ mɔɔ Gyihova bɛ Nyamenle ne bɔle bɛ ɛwɔkɛ la.+  “Yemɔti bɛnyia akɛnrasesebɛ na bɛnlea bɛli debie biala mɔɔ bɛhɛlɛ ye wɔ Mosisi Mɛla buluku ne anu+ la azo, bɛmmatwe bɛ nwo bɛfi nwo bɛkɔ fema zo anzɛɛ bɛne zo ɛlɛ,+  bɛ nee maanle maanle mɔɔ ɛha bɛ nwo ɛke la mmatu.+ Bɛmmabɔ bɛ nyamenle ne mɔ aluma bɔbɔ+ yɛɛ bɛmmafa bɛ aluma bɛka ndane, bɛmmasonle bɛ yɛɛ bɛmmabɔ bɛ ti aze bɛmaa bɛ ɛlɛ.+  Ɔwɔ kɛ bɛbeta Gyihova bɛ Nyamenle ne anwo+ kɛ mɔɔ bɛyɛ too yeradwu ɛnɛ la.  Gyihova bavoa maanle mgbole mɔɔ bɛ nwo yɛ se la avi bɛ nyunlu,+ ɔluakɛ sonla biala ɛtɛkolale ɛtɛgyinlanle bɛ nyunlu badwu ɛnɛ kenle ye.+ 10  Bɛ nuhua kokye bavoa menli apenle+ ɔluakɛ Gyihova bɛ Nyamenle ne a ɛlɛko amaa bɛ a,+ kɛ mɔɔ ɔbɔle bɛ ɛwɔkɛ la.+ 11  Ɔti bɛnlea bɛ nwo boɛ dahuu*+ na bɛhulo Gyihova bɛ Nyamenle ne.+ 12  “Noko saa bɛkpo ye na bɛfa bɛ nwo bɛkɔbeta maanle maanle mɔɔ ɛha bɛ nwo ɛke la anwo+ na bɛ nee bɛ yɛ agyalɛ ngyehyɛleɛ*+ na bɛ nee bɛ tu a, 13  ɛnee bɛnwu ye wienyi kɛ Gyihova bɛ Nyamenle ne ɛnrɛhɔ zo ɛnrɛvoa maanle maanle ɛhye mɔ ɛnrɛmaa bɛ.+ Bɛbayɛ ɛhane bɛamaa bɛ na bɛayɛ kɛ empele bɛabilebila bɛ nzi+ yɛɛ bɛbayɛ kɛ mbowule bawowɔ bɛ nye kɔkpula kɛ bɛ bo kɛdu kɛvi azɛlɛ kpalɛ ɛhye mɔɔ Gyihova bɛ Nyamenle ne ɛva ɛmaa bɛ la azo. 14  “Bɛnlea! Ɔka ekyii mewu,* na bɛze ye wienyi wɔ bɛ ahonle muala nee bɛ ɛkɛla muala anu kɛ ɛwɔkɛ mgbalɛ kɔsɔɔti mɔɔ Gyihova bɛ Nyamenle ne bɔle bɛ la anu edwɛkɛkpɔkɛ ko bɔbɔ anga nu. Ɔ muala ɛra nu ɛmaa bɛ. Edwɛkɛkpɔkɛ ko bɔbɔ anga nu.+ 15  Na kɛ mɔɔ ɛwɔkɛ mgbalɛ mɔɔ Gyihova bɛ Nyamenle ne bɔle bɛ la ɛra nu la,+ zɔhane ala a Gyihova bamaa munzule kɔsɔɔti mɔɔ ɔbɔle nwolɛ ɛwɔkɛ la* ara bɛ nwo zo na yeazɛkye bɛ yeavi azɛlɛ kpalɛ ɛhye mɔɔ Gyihova bɛ Nyamenle ne ɛva ɛmaa bɛ la azo a.+ 16  Saa bɛanli ngyekyeleɛ mɔɔ Gyihova bɛ Nyamenle ne vale maanle bɛ la azo na bɛkɔsonle nyamenle gyɛne na bɛbɔ bɛ ti aze bɛmaa bɛ a, Gyihova ɛya kpole ne bara bɛ nwo zo+ na bɛ bo zo abɔ ndɛndɛ avi azɛlɛ kpalɛ ne mɔɔ yeva yemaa bɛ la azo.”+

Ɔbodwɛkɛ

Anzɛɛ “Bɛnlea, menvale.”
Ɛhye kile, Mɛdetɛlenia ne.
Anzɛɛ “Ɔti bɛnlea bɛ ɛkɛla zo boɛ.”
Anzɛɛ “na bɛgyigya bɛ nwo.”
Hibulu aneɛ nu, “Ɛnɛ, melɛkɔ ye kɛ mɔɔ azɛlɛ ye azo amra kɔsɔɔti kɔ ye la.”
Anzɛɛ “bamaa edwɛkɛ ɛtane biala mɔɔ yeha la.”