Dwɔhyua 2:1-24

  • Dwɔhyua zoanle busiama nwiɔ wɔ Gyɛleko (1-3)

  • Releehabe vale busiama ne veale (4-7)

  • Bɛbɔ Releehabe ɛwɔkɛ (8-21a)

    • Nyɛma kɔkɔlɛ sɛkɛlɛneɛ ne (18)

  • Busiama ne ziale rale Dwɔhyua ɛkɛ (21b-24)

2  Akee Nɛn ara Dwɔhyua zoanle menli nwiɔ fealeranu maanle bɛvile Hyetim+ bɛhɔlile busia. Ɔzele bɛ kɛ: “Bɛhɔnleɛnlea azɛlɛ ne, titili Gyɛleko azo.” Ɔti bɛzile nu na bɛhɔle tuutuunli Releehabe+ sua nu na bɛdɛnlanle ɛkɛ.  Bɛhanle bɛhilele Gyɛleko belemgbunli ne kɛ: “Nea! Yizilayɛ mrenyia bie ɛra ɛke nɔsolɛ ye kɛ bɛbanleɛnlea azɛlɛ ye azo.”  Yemɔti Gyɛleko belemgbunli ne zoanle maanle bɛhɔzele Releehabe kɛ: “Ye mrenyia ne mɔ mɔɔ rale ɛke na bɛwɔ wɔ sua nu ɛkɛ la finde, ɔluakɛ bɛra kɛ bɛbanleɛnlea azɛlɛ ye amuala azo.”  Noko raalɛ ne vale mrenyia nwiɔ ne veale. Akee ɔzele bɛ kɛ: “Ɔle nɔhalɛ kɛ mrenyia ne mɔ rale me nwo ɛke, noko menze ɛleka mɔɔ bɛvi a.  Mɔɔ aleɛ dwole na ɔka ekyii bɛto suakpole ne anlenkɛ ne anu la, mrenyia ne mɔ vindele hɔle. Menze ɛleka mɔɔ mrenyia ne mɔ hɔle a, noko saa bɛmaa bɛ nwo yɛ ndɛ na bɛtoa bɛ a, bɛbahɔdo bɛ.”  (Noko ɔvale bɛ ɔhɔle sua ne ati zo na ɔmaanle bɛveale bolɔfodɔ* ne mɔɔ bɛhuohua ye wɔ sua ne ati zo la anu.)  Ɔti mrenyia ne mɔ vale bɛ nye hilele Dwɔdan ne ɛleka mɔɔ bɛwudwu bɛpɛ+ la na bɛdoale bɛ, na mekɛ mɔɔ menli mɔɔ doale bɛ la vindele ala la yɛɛ bɛdole suakpole ne anlenkɛ ne anu a.  Kolaa na mrenyia ne mɔ ala la, ɔhɔle bɛ nwo ɛkɛ ne wɔ sua ne ati zo.  Ɔzele mrenyia ne mɔ kɛ: “Meze kɛ Gyihova bava azɛlɛ ne amaa bɛ+ yɛɛ bɛ nwo ɛzulolɛ ɛdɔ yɛ nwo zo.+ Bɛdabɛ ti menli mɔɔ de azɛlɛ ne azo la kɔsɔɔti ahonle ɛdu,+ 10  ɔluakɛ yɛdele kɛzi Gyihova maanle Nyevile Kɔkɔlɛ ne sesanle wɔ mekɛ mɔɔ bɛvi Yigyibiti+ bɛlɛba la nee mɔɔ bɛvale bɛyɛle Amɔlema arelemgbunli nwiɔ ne, Saehɔn+ nee Ɔɔgo,+ mɔɔ bɛhunle bɛ wɔ Dwɔdan ne anzi* lɔ la. 11  Mɔɔ yɛdele nwolɛ edwɛkɛ la, yɛ ahonle dule* na bɛdabɛ ti awie biala annyia akɛnrasesebɛ,* ɔluakɛ Gyihova bɛ Nyamenle ne le Nyamenle wɔ anwuma lɔ nee azɛlɛ ye azo.+ 12  Akee mesɛlɛ bɛ, bɛva Gyihova bɛha ndane kɛ, kɛ mɔɔ mela ɛlɔlɛ kpundii ali mehile bɛ la, bɛdabɛ noko bɛbala ɛlɔlɛ kpundii ali bɛahile me papa sua nu amra; na bɛmaa me sɛkɛlɛneɛ mɔɔ kile kɛ bɛbali bɛ edwɛkɛ zo la.* 13  Ɔwɔ kɛ bɛdie me papa nee me mame, me mediema mrenyia nee mraalɛ, yɛɛ bɛ nwo amra kɔsɔɔti ngoane, na bɛdie yɛ* bɛfi ewule nu.”+ 14  Na mrenyia ne mɔ zele ye kɛ: “Yɛbava yɛ ngoane yɛamaa yɛalie bɛ ngoane!* Saa bɛambɔ deɛmɔti yɛrale la azo, na Gyihova fa azɛlɛ ne maa yɛ a, yɛbala ɛlɔlɛ kpundii ali yɛahile bɛ na yɛali nɔhalɛ yɛamaa bɛ.” 15  Akee ɔvale nyɛma ɔdwulale bɛ aze wɔ nvɛnzɛlɛ ne anu, ɔluakɛ ɛnee ye sua ne wɔ suakpole ne bane ne anwo. Nɔhalɛ nu, ɛnee ɔde bane ne azo.+ 16  Akee ɔzele bɛ kɛ: “Bɛhɔ awoka ne mɔ azo lɔ na bɛvea ɛkɛ ne kenle nsa, amaa menli mɔɔ ɛlɛkpondɛ bɛ la annwu bɛ. Saa menli mɔɔ ɛlɛkpondɛ bɛ la sia ba a, bɛbahola bɛahɔ bɛ ɛleka bie.” 17  Mrenyia ne mɔ zele ye kɛ: “Yɛnrɛli fɔlɛ wɔ ndane ɛhye mɔɔ wɔmaa yɛha la anwo+ 18  saa wɔanva nyɛma kɔkɔlɛ ɛhye wɔangenda nvɛnzɛlɛ ne mɔɔ ɛmaanle yɛluale nu yɛdwule aze la a. Ɔwɔ kɛ ɛmaa wɔ papa, wɔ mame, ɛ mediema mrenyia nee wɔ papa sua nu amra kɔsɔɔti baboka ɛ nwo wɔ wɔ sua nu ɛke.+ 19  Saa awie fi wɔ sua nu ɛke finde alienwo a, ye mogya bagua ɔdaye mumua ne ɔ ti zo, na yɛnrɛli nwolɛ fɔlɛ. Noko saa esiane to* awie biala mɔɔ nee wɔ wɔ sua nu ɛke la a, ye mogya bagua yɛ ti zo. 20  Noko saa ɛbɔ deɛmɔti yɛrale la azo ɛkile awie a,+ yɛnrɛli fɔlɛ wɔ ndane ne mɔɔ ɛmaanle yɛhanle la anwo.” 21  Ɔbuale kɛ: “Mɔɔ bɛha la ɛyɛ zɔ.” Akee ɔgyakyile bɛ na bɛhɔle bɛ ɛleka bie. Na ɔvale nyɛma kɔkɔlɛ ne ɔhendanle nvɛnzɛlɛ ne. 22  Ɔti bɛvile ɛkɛ ne bɛhɔle awoka ne mɔ azo lɔ na bɛdɛnlanle ɛkɛ ne kenle nsa hɔkpulale kɛ menli mɔɔ ɛlɛkpondɛ bɛ la ziale bɛ nzi la. Menli mɔɔ doale bɛ la kpondɛle bɛ wɔ ɛleka biala noko bɛannwu bɛ. 23  Akee mrenyia nwiɔ ne vi awoka ne mɔ azo dwule aze na bɛpɛle azule ne bɛrale Nɛn ara Dwɔhyua anwo ɛkɛ. Bɛhanle mɔɔ dole bɛ la amuala bɛhilele ye. 24  Na bɛzele Dwɔhyua kɛ: “Gyihova ɛva azɛlɛ ne amuala ɛwula yɛ sa nu.+ Nɔhalɛ nu, yɛdayɛ ti, menli mɔɔ de azɛlɛ ne azo la amuala ahonle ɛdu.”+

Ɔbodwɛkɛ

Ɔle kɛ fiene la.
Ɛhye kile, aduduleɛ afoa nu.
Hibulu aneɛ nu, “yɛ ahonle holole.”
Hibulu aneɛ nu, “na bɛdabɛ ti sunsum andwazo wɔ nrenyia biala anu.”
Anzɛɛ “sɛkɛlɛneɛ mɔɔ le nɔhalɛ la.”
Anzɛɛ “yɛ ɛkɛla.”
Anzɛɛ “Kɛ anrɛɛ bɛ ɛkɛla kɛwu la, yɛ ɛkɛla bawu.”
Anzɛɛ, “saa awie fa ɔ sa ka.”