Ditilɔnomi 34:1-12
34 Akee Mosisi vi Mowabe ɛsɛlɛ ne azo hɔle Nibo Boka+ ne mɔɔ wɔ Pesega+ mɔɔ nee Gyɛleko+ anye bɔ zolɛ la azo. Na Gyihova hilele ye azɛlɛ ne kɔsɔɔti ɔvi Geleade kɔdwu Dan,+
2 nee Nafetalae nee Yifelaem yɛɛ Manasɛ nee Dwuda azɛlɛ ne kɔsɔɔti too mɔɔ kɔdwu adɔleɛ nyevile ne anloa,*+
3 yɛɛ Nɛgɛbe+ nee Maangyeba ne,+ Gyɛleko bɔnza ne, mrɛlɛ suakpole ne, too kɔdwu Zowaa.+
4 Akee Gyihova zele ye kɛ: “Ɛhye a le azɛlɛ ne mɔɔ menganle nwolɛ ndane mengilele Ebileham, Ayezeke nee Gyekɔbo kɛ: ‘Mebava meamaa ɛ bo zo amra’ la.+ Memaa wɔva ɛ nye wɔnwu ye, noko ɛnrɛpɛ ɛnrɛhɔ ɛkɛ.”+
5 Ɛhye anzi Gyihova sonvolɛ Mosisi wule ɛkɛ ne wɔ Mowabe azɛlɛ zo kɛ mɔɔ Gyihova hanle la.+
6 Ɔziele ye wɔ Mowabe bɔnza ne mɔɔ nee Bɛte-piyɔ anye bɔ zolɛ la anu, na awie biala ɛnze ɛleka mɔɔ ye nla ne wɔ la too badwu ɛnɛ.+
7 Mosisi wule la ɛnee yeli ɛvolɛ 120.+ Ɔ nye anyɛ monzomonzo yɛɛ ye anwosesebɛ anwie.
8 Yizilayɛma zunle Mosisi wɔ Mowabe ɛsɛlɛ ne azo too kenle 30.+ Akee mekɛ mɔɔ bɛvale bɛzunle Mosisi na bɛlile nyane la rale awieleɛ.
9 Ɛnee nrɛlɛbɛ sunsum ɛyi Nɛn ara Dwɔhyua, ɔluakɛ ɛnee Mosisi ɛva ɔ sa ɛgua ɔ nwo zo;+ na Yizilayɛma bɔle ɔ bo kɛ bɛtie ye, na bɛyɛle mɔɔ Gyihova zele Mosisi la pɛpɛɛpɛ.+
10 Noko ngapezonli biala ɛtɛfindele Yizilayɛ mɔɔ le kɛ Mosisi+ mɔɔ Gyihova ze ye kpalɛ la.*+
11 Ɔyɛle sɛkɛlɛneɛ nee nwanwane ninyɛne kɔsɔɔti mɔɔ Gyihova zoanle ye kɛ ɔhɔyɛ wɔ Yigyibiti azɛlɛ zo ɔhile Falo nee ye sonvolɛma nee ye azɛlɛ ne amuala,+
12 nee ɛsalɛ mɔɔ tumi wɔ nu yɛɛ ninyɛne ɛzulolɛ mgbole mɔɔ Mosisi yɛle ye wɔ Yizilayɛma kɔsɔɔti anye zo la.+
Ɔbodwɛkɛ
^ Ɛhye kile, Nyevile Kpole ne, Mɛdetɛlenia ne.
^ Hibulu aneɛ nu, “nwu ɔ nyunlu na ɔdaye noko ɔnwu ɔ nyunlu la.”
