Ditilɔnomi 27:1-26

  • Bɛhɛlɛ Mɛla ne wɔ awolɛ zo (1-10)

  • Yibale Boka nee Gɛlaezem Boka ne anwo (11-14)

  • Bɛha munzule ne anwo edwɛkɛ (15-26)

27  Akee Mosisi nee Yizilayɛ mgbanyima zele menli ne kɛ: “Bɛli mɛla biala mɔɔ melɛfa meamaa bɛ ɛnɛ la azo.  Kenle mɔɔ bɛbapɛ Dwɔdan ne bɛahɔ azɛlɛ ne mɔɔ Gyihova bɛ Nyamenle ne ɛlɛfa amaa bɛ la azo la, bɛkpɔnlɔkpɔnla awolɛ mgbole na bɛpelɛseta nwolɛ.*+  Akee bɛhɛlɛ edwɛkɛ mɔɔ wɔ Mɛla ɛhye anu la kɔsɔɔti bɛgua zolɛ wɔ mekɛ mɔɔ bɛkɛpɛ Dwɔdan ne la, amaa bɛahɔva azɛlɛ ne mɔɔ Gyihova bɛ Nyamenle ne bava amaa bɛ, azɛlɛ mɔɔ meleke nee wolɛ se zolɛ la, kɛ mɔɔ Gyihova bɛ nenyia mɔ Nyamenle ne ɛva ɛbɔ bɛ ɛwɔkɛ la.+  Saa bɛpɛ Dwɔdan ne a, ɔwɔ kɛ bɛkpɔnlɔkpɔnla awolɛ ɛhye mɔ wɔ Yibale Boka ne+ azo na bɛpelɛseta nwolɛ,* kɛ mɔɔ melɛka meahile bɛ ɛnɛ la.  Eza ɔwɔ kɛ bɛsi afɔlemokyea wɔ ɛkɛ bɛmaa Gyihova bɛ Nyamenle ne, afɔlemokyea mɔɔ bɛva awolɛ bɛzi la. Ɔnle kɛ bɛfa bulalɛ bɛyɛ nwolɛ gyima.+  Ɔwɔ kɛ bɛfa awolɛ mɔɔ bɛtɛtwɔlɔhwɔlɔle nwolɛ la bɛsi Gyihova bɛ Nyamenle ne afɔlemokyea ne na bɛbɔ ɛyelalɛ afɔle wɔ zolɛ bɛmaa Gyihova bɛ Nyamenle ne.  Ɔwɔ kɛ bɛbɔ anzodwolɛ afɔle+ na bɛdi ye wɔ ɛkɛ,+ na bɛli fɛlɛko wɔ Gyihova bɛ Nyamenle ne anyunlu.+  Na bɛhɛlɛ edwɛkɛ mɔɔ wɔ Mɛla ɛhye anu la amuala wienyi bɛgua awolɛ ne mɔ azo.”+  Akee Mosisi nee Livae ɛsɔfo ne mɔ dendɛle hilele Yizilayɛma kɔsɔɔti kɛ: “O Yizilayɛma, bɛyɛ koonwu na bɛdie. Ɛnɛ kenle ye, bɛrayɛ Gyihova bɛ Nyamenle ne menli.+ 10  Ɔwɔ kɛ bɛtie Gyihova bɛ Nyamenle ne ane na bɛdi ye mɛla+ nee ye ngyehyɛleɛ ne mɔ mɔɔ melɛka meahile bɛ ɛnɛ la kɔsɔɔti azo.” 11  Kenle zɔhane Mosisi zele menli ne kɛ: 12  “Mbusua ɛhye mɔ bagyinla Gɛlaezem Boka ne+ azo ayila menli ne wɔ mekɛ mɔɔ bɛpɛ Dwɔdan ne la: Semɛyɔn, Livae, Dwuda, Yesakaa, Dwosefi yɛɛ Bɛngyaman. 13  Na ɛhye mɔ noko bagyinla Yibale Boka ne+ azo aha amowa ne: Wulubɛn, Gaade, Ahya, Zɛbulɛn, Dan yɛɛ Nafetalae. 14  Na Livaema bava ɛnelɛ kpole aha ahile awie biala mɔɔ wɔ Yizilayɛ la kɛ:+ 15  “‘Munzule ɛha awie mɔɔ kɛze ananze+ anzɛɛ kɛyɛ bulalɛ ananze,*+ debie mɔɔ le Gyihova kyibadeɛ+ nee dwinvolɛ* asa anloa gyima na ɔkɛva ɔkɛvea la.’ (Na menli ne amuala balie zolɛ kɛ, ‘Amen!’*) 16  “‘Munzule ɛha awie mɔɔ ɛmbu ye papa anzɛɛ ye mame la.’+ (Na menli ne amuala baha kɛ, ‘Amen!’) 17  “‘Munzule ɛha awie mɔɔ kɛdu ɔ gɔnwo ɛweɛne la.’+ (Na menli ne amuala baha kɛ, ‘Amen!’) 18  “‘Munzule ɛha awie mɔɔ kɛmaa anyenzinliravolɛ kɛvo adenle la.’+ (Na menli ne amuala baha kɛ, ‘Amen!’) 19  “‘Munzule ɛha awie mɔɔ kɛbua ɛyɛvolɛ, arisa anzɛɛ kunlavolɛ mgbɔvodɛne la.’+ (Na menli ne amuala baha kɛ, ‘Amen!’) 20  “‘Munzule ɛha awie mɔɔ nee ye papa aye kɛla la, ɔluakɛ yegua ye papa anyunlu aze.’*+ (Na menli ne amuala baha kɛ, ‘Amen!’) 21  “‘Munzule ɛha awie mɔɔ nee nane biala kɛla la.’+ (Na menli ne amuala baha kɛ, ‘Amen!’) 22  “‘Munzule ɛha awie mɔɔ nee ɔ diema raalɛ, mɔɔ le ye papa anzɛɛ ye mame ara raalɛ kɛla la.’+ (Na menli ne amuala baha kɛ, ‘Amen!’) 23  “‘Munzule ɛha awie mɔɔ nee ye ase* kɛla la.’+ (Na menli ne amuala baha kɛ, ‘Amen!’) 24  “‘Munzule ɛha awie mɔɔ kɛzia ɔ gɔnwo kɛhu ye la.’+ (Na menli ne amuala baha kɛ, ‘Amen!’) 25  “‘Munzule ɛha awie mɔɔ kɛlie belaebo kɛhu awie mɔɔ ɛnze nwolɛ bie la.’*+ (Na menli ne amuala baha kɛ, ‘Amen!’) 26  “‘Munzule ɛha awie mɔɔ ɛnrɛli Mɛla ɛhye anu edwɛkɛ ne azo la.’+ (Na menli ne amuala baha kɛ, ‘Amen!’)

Ɔbodwɛkɛ

Anzɛɛ “bɛva ewole bɛha nwolɛ fufule.”
Anzɛɛ “bɛfa ewole bɛka nwolɛ fufule.”
Anzɛɛ “ananze mɔɔ bɛgua.”
Anzɛɛ “awie mɔɔ fa baka anzɛɛ bulalɛ se debie la.”
Anzɛɛ “Ɔyɛ ɛkɛ!”
Hibulu aneɛ nu, “yeye ye papa tɛladeɛ.”
Ɔ ye mame.
Anzɛɛ “kɛha tenlenenli mogya kɛgua la.”