Ditilɔnomi 26:1-19

  • Bɛva ma mɔɔ limoa la bɛbɔ afɔle (1-11)

  • Taete mɔɔ tɔ zo nwiɔ (12-15)

  • Yizilayɛ, Gyihova agyapadeɛ titili (16-19)

26  “Saa ɛnyia ɛkɔdwu azɛlɛ ne mɔɔ Gyihova wɔ Nyamenle ne ɛlɛfa amaa wɔ kɛ agyapadeɛ la azo na ɛtɛnla zo a,  fa azɛlɛ ne mɔɔ Gyihova wɔ Nyamenle ne bava amaa wɔ la azo ma* mɔɔ limoa mɔɔ ɛbanyia la bie gua kɛndɛne nu kɔ ɛleka mɔɔ Gyihova wɔ Nyamenle ne bakpa ava ye duma ado zolɛ la.+  Kɔ ɛsɔfo ne mɔɔ ɛlɛsonle wɔ zɔhane mekɛ ne anu la ɛkɛ na ka kile ye kɛ, ‘Ɛnɛ, meka meahile Gyihova wɔ Nyamenle ne kɛ mera azɛlɛ ne mɔɔ Gyihova bɔle yɛ nenyia mɔ ɛwɔkɛ kɛ ɔbava yɛamaa yɛ la azo.’+  “Ɛsɔfo ne balie kɛndɛne ne avi ɛ sa nu na yeava yeazie Gyihova wɔ Nyamenle ne afɔlemokyea ne anyunlu.  Akee ɛbaha ye wɔ Gyihova wɔ Nyamenle ne anyunlu kɛ, ‘Ɛnee me papa le Elamenli+ adendulɛnli* na ɔ nee ye sua nu amra ekyi bie+ hɔdɛnlanle Yigyibiti+ kɛ nyɛvolɛ. Noko ɔyɛle maanle kpole mɔɔ anwo zonle na ɔ nwo yɛle se wɔ ɛkɛ.+  Na Yigyibitima hilele yɛ nyane na bɛsisile yɛ na bɛmaanle yɛyɛle akɛlɛ gyima.+  Yemɔti yɛzunle yɛvɛlɛle Gyihova, yɛ nenyia mɔ Nyamenle ne, na Gyihova dele yɛ ne na ɔnwunle yɛ amaneɛnwunlɛ nee yɛ ngyegyelɛ nee kɛzi bɛlɛsisi yɛ la.+  Akee Gyihova luale ɛsalɛ mɔɔ tumi wɔ nu nee ɛsalɛ mɔɔ bɛdende la+ nee ninyɛne mgbole nee sɛkɛlɛneɛ yɛɛ nwanwane ninyɛne+ zo yele yɛ vile Yigyibiti.  Akee ɔvale yɛ ɔrale ɛke na ɔvale azɛlɛ ɛhye mɔɔ meleke nee wolɛ se zolɛ la ɔmaanle yɛ.+ 10  Ɔti meva azɛlɛ ne mɔɔ Gyihova ɛva ɛmaa me la azo ma mɔɔ limoa la mera.’+ “Fa sie Gyihova wɔ Nyamenle ne anyunlu na bɔ ɛ ti aze wɔ Gyihova wɔ Nyamenle ne anyunlu. 11  Akee ɛdawɔ nee Livaenli yɛɛ ɛyɛvolɛ mɔɔ ɔ nee bɛ de la bali fɛlɛko wɔ ninyɛne mgbalɛ mɔɔ Gyihova wɔ Nyamenle ne ɛva ɛmaa ɛdawɔ nee wɔ sua nu amra la anwo.+ 12  “Saa ɛvolɛ ne mɔɔ tɔ zo nsa, mɔɔ le ngyɛnu bulu anu ko ɛvolɛ ne la dwu na ɛfa wɔ ngyɛnu bulu anu ko ne amuala ɛba a,+ ɛbava wɔamaa Livaenli, ɛyɛvolɛ, arisa* yɛɛ kunlavolɛ, na bɛbali bɛ ko ayi wɔ bɛ azuamgbole ne mɔ azo.*+ 13  Akee ɛbaha ye wɔ Gyihova wɔ Nyamenle ne anyunlu kɛ, ‘Meye ndoboa nwuanzanwuanza ne mevi me sua nu na meva memaa Livaenli, ɛyɛvolɛ, arisa yɛɛ kunlavolɛ,+ kɛ mɔɔ ɛhanle ɛhilele me la. Meando wɔ mɛla ne yɛɛ meambu me nye meangua zo. 14  Meanli bie wɔ mekɛ mɔɔ melɛdi nyane la yɛɛ meanye bie wɔ mekɛ mɔɔ me nwo ɛnde la yɛɛ meanva bie meammaa mowuamra. Medie Gyihova me Nyamenle ne ane na meyɛ debie biala mɔɔ ɛhanle ɛhilele me la. 15  Akee ɛvi anwuma lɔ, ɛleka mɔɔ ɛde la, to ɛ nye nea na yila wɔ menli Yizilayɛma nee azɛlɛ ne mɔɔ wɔva wɔmaa yɛ,+ azɛlɛ mɔɔ meleke nee wolɛ se zolɛ+ kɛ mɔɔ ɛvale ɛbɔle yɛ nenyia mɔ ɛwɔkɛ la.’+ 16  “Ɛnɛ kenle ye, Gyihova wɔ Nyamenle ne ɛlɛka ahile wɔ kɛ ɛli mɛla nee adehilelɛ ɛhye mɔ azo. Fa wɔ ahonle muala+ nee wɔ ɛkɛla* muala di zo na fa bɔ wɔ ɛbɛla. 17  Ɛnɛ Gyihova ɛmaa bɛde kɛ saa bɛdua ye ndenle ne mɔ anu na bɛdi ye ngyehyɛleɛ,+ ye mɛla+ nee ye adehilelɛ+ ne mɔ azo na bɛtie ɔ ne a, ɔbayɛ bɛ Nyamenle. 18  Gyihova noko ɛde edwɛkɛ mɔɔ bɛha ye ɛnɛ kɛ bɛbayɛ ye menli, ye agyapadeɛ titili,*+ kɛ mɔɔ ɔbɔle bɛ ɛwɔkɛ la na bɛbali ye mɛla ne mɔ kɔsɔɔti azo 19  na ɔbakpogya bɛ zo yeadɛla maanle maanle mɔɔ yebɔ la amuala,+ bɛbaye bɛ ayɛlɛ na bɛalie duma na bɛawula bɛ anyunlunyia wɔ mekɛ mɔɔ bɛbayɛ menli nwuanzanwuanza bɛamaa Gyihova bɛ Nyamenle ne+ kɛ mɔɔ yebɔ nwolɛ ɛwɔkɛ la.”

Ɔbodwɛkɛ

Hibulu aneɛ nu, “bakama.”
Anzɛɛ ɔkola ɔkile, “mɔɔ ɛlɛwu.”
Hibulu aneɛ nu, “kakula mɔɔ ɛnlɛ ye papa.”
Hibulu aneɛ nu, “bɛ nlenkɛ mgbole ne mɔ anloa.”
Anzɛɛ “agyapadeɛ mɔɔ sonle bolɛ.”