Ditilɔnomi 14:1-29

  • Awie mɔɔ ɛwu la anwo nyanelilɛ mɔɔ ɛnfɛta (1, 2)

  • Aleɛ mɔɔ anwo te nee mɔɔ anwo ɛnde (3-21)

  • Bɛva ngyɛnu bulu anu ko bɛmaa Gyihova (22-29)

14  “Bɛle Gyihova bɛ Nyamenle ne amra. Bɛmmapepɛ bɛ nwo+ yɛɛ bɛmmakpa bɛ nyunlu enrinli* wɔ awie mɔɔ ɛwu la ati.+  Ɔluakɛ bɛle menli nwuanzanwuanza+ bɛmaa Gyihova bɛ Nyamenle ne, yɛɛ Gyihova ɛkpa bɛ ɛvi menli kɔsɔɔti mɔɔ wɔ azɛlɛ ye azo la anu kɛ bɛrayɛ ye menli, ye agyapadeɛ titili.*+  “Bɛmmadi debie biala mɔɔ le kyibadeɛ la.+  Nane mɔɔ bɛbahola bɛali la ɛne:+ ɛnlankɛ, boane, abɔnkye,  weɛlɛ, adoa, dabɔ, kɛtɛboɛ, kutu, ɛbɔ nu boane yɛɛ awoka zo boane.  Bɛbahola bɛali nane biala mɔɔ bɛkpakye ɔ gyakɛ taboa ne anu nwiɔ na ɔkpu ɔkposa la.  Noko bɛmmadi nane ɛhye mɔ mɔɔ kpu kposa anzɛɛ bɛkpakye bɛ gyakɛ taboa ne anu la: afunlumu, asoasoa yɛɛ awolɛzopema, ɔluakɛ bɛkpu bɛkposa noko bɛamkpakye bɛ gyakɛ taboa ne anu. Bɛ nwo ɛnde ɛmmaa bɛ.+  Eza bɛmmadi kpolike ɔluakɛ bɛkpakye ɔ gyakɛ taboa ne anu noko ɔmkpu ɔmkposa. Bɛmmadi ye nane yɛɛ bɛmmafa bɛ sa bɛka ye funli.  “Nzule nu abɔdeɛ mɔɔ bɛbahola bɛali la ɛne: Debie biala mɔɔ lɛ ɔ nwo ngyɛnengyɛne* na abonle wɔ nwo la, bɛbahola bɛali.+ 10  Noko ɔnle kɛ bɛdi debie biala mɔɔ ɛnlɛ ɔ nwo ngyɛnengyɛne na abonle ɛnle nwolɛ la. Ɔ nwo ɛnde ɛmmaa bɛ. 11  “Bɛbahola bɛali aloma biala mɔɔ anwo te la. 12  Noko ɔnle kɛ bɛdi ɛhye mɔ: kɔleɛ, nyevile nloa kyɛnyema, ɛkpɔtɛ bile,+ 13  sianza kɔkɔlɛ, sianza bile, sianza gyɛne biala, 14  kɔkɔsɛlɛ biala, 15  soholo, kpadule, gaale,* kyɛnyema biala, 16  kpadule ekyi nee kpadule anzo ndendenle, ɛbɔ nu dabodabo, 17  azule nloa bɔngɔbɔngɔ, ɛkpɔtɛ, kɔmɔlante,* 18  akoso, bɔngɔbɔngɔ biala, kpokpole yɛɛ akpanlɛ. 19  Kɛkɛba biala mɔɔ lɛ ndɛbalɛ la anwo ɛnde ɛmmaa bɛ. Ɔnle kɛ bɛdi. 20  Bɛbahola bɛali abɔdeɛ biala mɔɔ tu na ɔ nwo te la. 21  “Bɛmmadi nane funli biala.+ Bɛbahola bɛava bɛamaa ɛyɛvolɛ mɔɔ wɔ bɛ azua ne mɔ azo* la bɛamaa yeali, anzɛɛ bɛbahola bɛadɔne ye bɛamaa ɛyɛvolɛ. Ɔluakɛ bɛle menli nwuanzanwuanza bɛmaa Gyihova bɛ Nyamenle ne. “Mmato abɔnkye ralɛ wɔ ɔ nli nyɛfonzule nu.+ 22  “Ɛvolɛ biala, fa ma mɔɔ ɛbanyia wɔ wɔ ɛya nu la ngyɛnu bulu anu ko* bɛla.+ 23  Ɛbali wɔ ma, wɔ nwanye fofolɛ, wɔ nwole yɛɛ wɔ nlankɛ nee wɔ mboane belamunli mralɛ ne ngyɛnu bulu anu ko ne wɔ Gyihova wɔ Nyamenle ne anyunlu wɔ ɛleka mɔɔ ɔbakpa yeava ye duma yeado zolɛ la,+ amaa wɔazukoa kɛ ɛbazulo Gyihova wɔ Nyamenle ne dahuu.+ 24  “Noko saa adenle ne wale somaa maa wɔ na ɛnrɛhola ɛnrɛzoa ɛnrɛhɔ ɛleka mɔɔ Gyihova wɔ Nyamenle ne kɛkpa kɛva ye duma kɛdo zolɛ+ kɛmɔ ɔwɔ moa la ati a, (ɔluakɛ Gyihova wɔ Nyamenle ne bayila wɔ), 25  ɛnee ɛbahola wɔadɔne ye wɔalie ezukoa na wɔalɛ ezukoa ne ɛ sa nu wɔahɔ ɛleka mɔɔ Gyihova wɔ Nyamenle ne bahile la. 26  Akee ɛbahola wɔava ezukoa ne wɔadɔ debie biala mɔɔ ɛ ti akunlu wɔ zolɛ la*—nlankɛ, mboane, mbɔnkye, nwanye nee nza gyɛne, yɛɛ debie biala mɔɔ ɛ nye die nwolɛ la;* na wɔali ye wɔ Gyihova wɔ Nyamenle ne anyunlu na ɛdawɔ nee wɔ sua nu amra alie bɛ nye.+ 27  Na mmabu ɛ nye ɛgua Livaenli mɔɔ wɔ bɛ azuamgbole ne mɔ azo la anwo zo,+ ɔluakɛ ɔnlɛ kyɛfoa anzɛɛ agyapadeɛ biala wɔ bɛ avinli.+ 28  “Ɛvolɛ nsa biala awieleɛ, ɔwɔ kɛ ɛfa wɔ ninyɛne mɔɔ ɛbanyia ye wɔ zɔhane ɛvolɛ ne anu la ngyɛnu bulu anu ko ne amuala ɛba sua zo.+ 29  Na Livaenli mɔɔ ɛnlɛ kyɛfoa anzɛɛ agyapadeɛ biala wɔ bɛ avinli, ɛyɛvolɛ, arisa* yɛɛ kunlavolɛ mɔɔ wɔ bɛ azua ne mɔ azo la arali bie ɔ ko ayi,+ amaa Gyihova wɔ Nyamenle ne ayila wɔ wɔ debie biala mɔɔ ɛkɛyɛ la anu.+

Ɔbodwɛkɛ

Hibulu aneɛ nu, “bɛ nye avinli enrinli.”
Anzɛɛ “ye agyapadeɛ mɔɔ sonle bolɛ.”
Nea Lɛ 11:9 ɔbdw.
Ɔle nyevile nloa aloma.
Aloma bie mɔɔ le kɛ dabodabo mɔɔ ɔkye fɛlɛ la.
Hibulu aneɛ nu, “bɛ nlenkɛ mgbole ne mɔ anu.”
Anzɛɛ “anwo taete.”
Anzɛɛ “wɔ ɛkɛla ati akunlu wɔ zolɛ la.”
Anzɛɛ “debie biala mɔɔ wɔ ɛkɛla kpondɛ la.”
Hibulu aneɛ nu, “kakula mɔɔ ɛnlɛ ye papa.”