Daneɛle 1:1-21

  • Babeloniama bɛngale Gyɛlusalɛm yiale (1, 2)

  • Akɛlɛzonlenlɛ nu alehelɛ ngakula nyianle ndetelɛ titili bie (3-5)

  • Bɛzɔle Hibuluma nna bie nɔhalɛlilɛ bɛnleanle (6-21)

1  Wɔ Dwuda Belemgbunli Gyɛhɔyakem+ belemgbunlililɛ ɛvolɛ mɔɔ tɔ zo nsa la azo, Babelɔn Belemgbunli Nɛbukadenɛza rale Gyɛlusalɛm na ɔbɛngale ye ɔyiale.+  Nzinlii Gyihova vale Dwuda Belemgbunli Gyɛhɔyakem yɛɛ nɔhalɛ Nyamenle ne sua nu* ɛkɛ ahyɛnze ne mɔ bie wulale ɔ sa nu,+ na ɔvale bɛ ɔhɔle Hyaenaa* azɛlɛ ne azo+ wɔ ye nyamenle ne sua nu.* Ɔvale ahyɛnze ne mɔ ɔhɔguale ye nyamenle ne ninyɛnezielɛ ɛleka ne.+  Akee belemgbunli ne zele ye suakunlu kpanyinli Ahyepinaze kɛ ɔva Yizilayɛma* ne mɔ bie ɔrɛla, ɔva bɛdabɛ mɔɔ bɛle alehelɛ nee menli titili la bie mɔ ɔboka nwo.+  Ɔwɔ kɛ bɛyɛ mgbavolɛ* mɔɔ bɛ nwo ɛnlɛ dɛne, bɛ nwo yɛ fɛ, bɛze nrɛlɛbɛ, bɛlɛ ndelebɛbo nee adwenlenunwunlɛ,+ na bɛkola bɛsonle wɔ belemgbunli sua nu ɛkɛ ne la. Ɔwɔ kɛ ɔkilehile bɛ Kaledeama ɛhɛlɛlɛ nee bɛ aneɛ ne.  Bieko, belemgbunli ne maanle bɛmaanle bɛ belemgbunli aleɛ sosɔɔ ne nee nwanye mɔɔ ɔno la bie alehyenlɛ biala. Ɛnee ɔwɔ kɛ bɛtete bɛ* ɛvolɛ nsa, na saa mekɛ zɔhane dwu a bɛara bɛarazonle wɔ belemgbunli sua nu ɛkɛ.  Menli mɔɔ boka bɛ nwo la anu bie mɔ vi Dwuda abusua ne* anu: Daneɛle,*+ Hananaya,* Mehyeeyɛle* nee Azalaya.*+  Na suakunlu kpanyinli ne totonle bɛ aluma;* ɔdonle Daneɛle Bɛletihyazaa,+ ɔdonle Hananaya Hyeedelake, ɔdonle Mehyeeyɛle Mihyake yɛɛ ɔdonle Azalaya Abɛdenɛgo.+  Noko Daneɛle zile pi wɔ ye ahonle nu kɛ ɔnrɛva belemgbunli ne aleɛ sosɔɔ ne anzɛɛ ye nwanye ne mɔɔ ɔno la ɔnrɛgua ɔ nwo evinli. Ɔti ɔzɛlɛle suakunlu kpanyinli ne adenle amaa yeangua ɔ nwo evinli wɔ adenle ɛhye azo.  Na nɔhalɛ Nyamenle ne maanle Daneɛle nyianle suakunlu kpanyinli ne anyunlu ɛlolɛ* na ɔzele ye anwunvɔne.+ 10  Noko suakunlu kpanyinli ne zele Daneɛle kɛ: “Mesulo me menle belemgbunli ne mɔɔ yehile aleɛ nee nwanye mɔɔ bɛva bɛmaa bɛ la. Na saa ɔnwu kɛ bɛnwa na bɛnle kɛ mgbavolɛ* mɔɔ bɛ nee bɛ sɛ atipɛne la ɛ? Bɛbamaa meali fɔlɛ* wɔ belemgbunli ne anyunlu.” 11  Noko Daneɛle zele neavolɛ ne mɔɔ suakunlu kpanyinli ne yele ye kɛ ɔnlea Daneɛle, Hananaya, Mehyeeyɛle nee Azalaya anwo zo la kɛ: 12  “Yɛsɛlɛ wɔ, sɔ wɔ azonvolɛ nea kenle bulu, na maa bɛmaa yɛ nya nya yɛli nee nzule yɛnlo; 13  na akee fa yɛ toto mgbavolɛ mɔɔ di belemgbunli aleɛ sosɔɔ ne la anwo, na mɔɔ ɛkɛnwu ye la, wɔanlea nwo ɛ nee wɔ azonvolɛ ali.” 14  Ɔti ɔliele bɛ nzuzulɛ ne ɔdole nu na ɔzɔle bɛ ɔnleanle kenle bulu. 15  Kenle bulu ne dwule la, bɛnwunle kɛ bɛ nwo ɛyɛ fɛ yɛɛ bɛte kpɔkɛ* bɛtɛla mgbavolɛ* mɔɔ ɛnee di belemgbunli ne aleɛ sosɔɔ ne la. 16  Ɔti ɛnee neavolɛ ne ye bɛ aleɛ sosɔɔ ne nee bɛ nwanye ne fi ɛkɛ na ɔmaa bɛ nya nya. 17  Na nɔhalɛ Nyamenle ne maanle mgbavolɛ* nna ɛhye mɔ ɛhɛlɛlɛ nee nrɛlɛbɛ ngakyile biala anu ndelebɛbo yɛɛ nwunu; na ɔmaanle Daneɛle ɛnyelɛzodeɛnwunlɛ nee ɛlalɛ ngakyile kɔsɔɔti anu ndelebɛbo.+ 18  Mekɛ mɔɔ belemgbunli ne hilele kɛ bɛva bɛ bɛrɛla la dwule la,+ suakunlu kpanyinli ne vale bɛ rale Nɛbukadenɛza anyunlu. 19  Mɔɔ belemgbunli ne nee bɛ dendɛle la, bɛannwu awie biala wɔ ekpunli ne anu mɔɔ ɔle kɛ Daneɛle, Hananaya, Mehyeeyɛle nee Azalaya a;+ na bɛhɔle zo bɛzonlenle wɔ belemgbunli ne anyunlu. 20  Wɔ edwɛkɛ biala mɔɔ hyia nrɛlɛbɛ nee ndelebɛbo mɔɔ belemgbunli ne bizale bɛ la anu, ɔnwunle kɛ bɛle kpalɛ fane bulu bɛtɛla ɛsɔfoma mɔɔ ye ngonyia nee menli mɔɔ ka mɔɔ bazi kenle bie mɔɔ wɔ ye maanle ne anu amuala la.+ 21  Na Daneɛle dɛnlanle ɛkɛ ne hɔkpulale Belemgbunli Saelɛse ɛvolɛ mɔɔ limoa la anu.+

Ɔbodwɛkɛ

Anzɛɛ “ɛzonlenlɛsua ne anu.”
Ɛhye kile, Babelonia.
Anzɛɛ “ɛzonlenlɛsua ne anu.”
Hibulu aneɛ nu, “Yizilayɛ amra mrenyia.”
Hibulu aneɛ nu, “ngakula.”
Anzɛɛ ɔkola ɔkile, “Ɔwɔ kɛ bɛmaa bɛ aleɛ.”
Hibulu aneɛ nu, “amra mrenyia ne mɔ.”
Ɔ bo kile “Nyamenle Le Me Ndɛnebuavolɛ.”
Ɔ bo kile “Gyihova Ɛla Ɛlolɛ Ali.”
Bie a ɔkile “Nwane A Le Kɛ Nyamenle A?”
Ɔ bo kile “Gyihova Ɛboa.”
Ɛhye kile, Babelɔn aluma.
Anzɛɛ “lale atiakunlukɛnlɛma ali hilele ye.”
Hibulu aneɛ nu, “ngakula.”
Hibulu aneɛ nu, “me ti ali fɔlɛ.”
Hibulu aneɛ nu, “bɛle mbelane.”
Hibulu aneɛ nu, “ngakula.”
Hibulu aneɛ nu, “ngakula.”