Samoɛle Mɔɔ Tɔ Zo Nwiɔ 5:1-25

  • Bɛyɛ Devidi belemgbunli wɔ Yizilayɛ amuala (1-5)

  • Bɛho bɛva Gyɛlusalɛm (6-16)

    • Zayɔn, Devidi Suakpole (7)

  • Devidi ɛli Filisitiama anwo zo konim (17-25)

5  Akee Yizilayɛ mbusua ne mɔ kɔsɔɔti rale Devidi anwo ɛkɛ wɔ Hibulɔn+ na bɛrazele ye kɛ: “Nea! Yɛle wɔ bowule nee wɔ nwonane.*+  Mekɛ bie mɔɔ ɛze ɛhɔ mɔɔ ɛnee Sɔɔlo le yɛ belemgbunli la, ɛnee ɛdawɔ a ɛdi Yizilayɛma anyunlu ɛmaa bɛkɔ konle a.*+ Na Gyihova zele wɔ kɛ: ‘Ɛdawɔ a ɛbanlea me menli Yizilayɛma a, na ɛdawɔ a ɛbayɛ Yizilayɛma adekilevolɛ a.’”+  Ɔti Yizilayɛ mgbanyima kɔsɔɔti rale belemgbunli ne ɛkɛ wɔ Hibulɔn, na Belemgbunli Devidi nee bɛ yɛle ngyekyeleɛ+ wɔ Gyihova anyunlu wɔ Hibulɔn. Akee bɛkpokpale Devidi kɛ Yizilayɛ belemgbunli.+  Devidi lile ɛvolɛ 30 la yɛɛ ɔrayɛle belemgbunli a, na ɔlile ebia ɛvolɛ 40.+  Ɔdɛnlanle Hibulɔn ɔlile belemgbunli ɛvolɛ 7 siane 6, yɛɛ ɔdɛnlanle Gyɛlusalɛm+ ɔlile Yizilayɛ nee Dwuda belemgbunli ɛvolɛ 33.  Na belemgbunli ne nee ye ɛlɔne ne hɔle Gyɛlusalɛm kɛ bɛ nee Gyibɛsema+ mɔɔ ɛnee de azɛlɛ ne azo la kaho. Bɛgolole Devidi anwo kɛ: “Ɛnrɛra ɛke ɛlɛ! Anyenzinliravolɛma nee abuburama bɔbɔ bavoa wɔ.” Bɛdwenlenle kɛ, ‘Devidi ɛnrɛra ɛke ɛlɛ.’+  Noko Devidi honle vale Zayɔn aranemgbole ne mɔɔ ɛnɛ le Devidi Suakpole+ la.  Ɔti kenle zɔhane Devidi hanle kɛ: “Ɔwɔ kɛ bɛdabɛ mɔɔ bɛbahɔ Gyibɛsema anwo zo la dua azɛlɛ bo adenle ne* anu kɔku ‘abuburama nee anyenzinliravolɛma’ mɔɔ Devidi kyi bɛ la!”* Ɛhye ati a bɛka kɛ: “Anyenzinliravolɛma nee abuburama ɛnrɛhɔ sua nu ɛkɛ ne ɛlɛ la.”  Akee Devidi dɛnlanle aranemgbole ne anu na bɛvɛlɛle* ye Devidi Suakpole; na Devidi sisile azua wɔ nwolɛ amuala ɔvi Boka*+ ne azo mɔɔ kɔ la.+ 10  Ɔti Devidi hɔle zo yɛle kpole,+ na Gyihova, ɛlɔne Nyamenle ne nee ye luale.+ 11  Taya Belemgbunli Haelam+ zoanle menli wɔ Devidi anwo ɛkɛ, eza ɔvale sida mbaka,+ kapentama yɛɛ menli mɔɔ fa awolɛ yɛ bane la ɔbokale nwo ɔhɔle, na bɛbɔle ɔ bo bɛzile sua* bɛmaanle Devidi.+ 12  Na Devidi nwunle kɛ Gyihova ɛzie ye belemgbunli bɔkɔɔ wɔ Yizilayɛ+ na Ye menli Yizilayɛma+ ati yekpogya ye belemgbunlililɛ+ ne zo. 13  Mɔɔ Devidi vi Hibulɔn rale Gyɛlusalɛm la, ɔvale nwewe*+ dɔɔnwo na ɔgyale mraalɛ dɔɔnwo, na Devidi wole mralɛ mrenyia nee mralɛ mraalɛ dɔɔnwo.+ 14  Mralɛ mɔɔ ɔwole bɛ wɔ Gyɛlusalɛm la aluma ɛne: Hyamua, Hyobabe, Neetan,+ Sɔlɔmɔn,+ 15  Yebehaa, Yelaehyua, Nifɛge, Gyafaya, 16  Ɛlehyama, Yilayada yɛɛ Ɛlefɛlɛte. 17  Mɔɔ Filisitiama dele kɛ bɛkpokpa Devidi kɛ Yizilayɛ belemgbunli la,+ Filisitiama kɔsɔɔti rale kɛ bɛbakpondɛ Devidi.+ Mɔɔ Devidi dele nwolɛ bie la, ɔhɔveale aranemgbole ne anu.+ 18  Akee Filisitiama rale na bɛdele bɛkpondenle Relɛfeeyem Bɔnza+ ne anu. 19  Devidi bizale Gyihova+ kɛ: “Me nee Filisitiama ɛhɔho ɔ? Ɛbava bɛ wɔawula me sa nu ɔ?” Na Gyihova zele Devidi kɛ: “Kɔ, ɔluakɛ mebava Filisitiama meawula ɛ sa nu.”+ 20  Yemɔti Devidi hɔle Beeyale-pɛleezem, na ɔhɔhunle bɛ wɔ ɛkɛ. Akee ɔhanle kɛ: “Gyihova ɛbubu me kpɔvolɛma+ wɔ me nyunlu kɛ azule mɔɔ yi sɛkye debie la.” Ɛhye ati a bɛvɛlɛle ɛkɛ ne Beeyale-pɛleezem+ la.* 21  Filisitiama gyakyile bɛ ananze ne mɔ guale ɛkɛ, na Devidi nee ye menli ne sesale hɔle. 22  Nzinlii, Filisitiama rale bieko na bɛdele bɛkpondenle Relɛfeeyem Bɔnza+ ne anu. 23  Devidi bizale Gyihova, noko ɔzele ye kɛ: “Mmakɔ ɛ nyunlu fɔɔnwo. Emomu, bu bɛ nzi na kɔ bɛ nwo zo wɔ beeka mbaka ne mɔ anyunlu. 24  Na saa ɛte bɛ gyakɛ abo dede ne kɛ asɛɛ menli lua beeka mbaka ne mɔ azo a, ɛnee yɛ ye ndɛndɛ, ɔluakɛ ɛnee Gyihova ɛlimoa ɛ nyunlu kɛ ɔkahu Filisitiama ɛlɔne ne.” 25  Yemɔti Devidi yɛle mɔɔ Gyihova zele ye la, na ɔhunle Filisitiama+ ɔvi Giba+ too ɔhɔdwule Gizɛ.+

Ɔbodwɛkɛ

Hibulu aneɛ nu, “Yɛle mogya ko.”
Hibulu aneɛ nu, “ɛdawɔ a ɛfa Yizilayɛma ɛkɔ na ɛ nee bɛ ba a.”
Anzɛɛ “adenle ne mɔɔ nzule se nu la.”
Anzɛɛ “Devidi ɛkɛla kyi bɛ la.”
Anzɛɛ ɔkola ɔkile, “ɔvɛlɛle.”
Anzɛɛ “Millo.” Hibulu edwɛkɛkpɔkɛ mɔɔ kile “kuma ɛdualɛ.”
Anzɛɛ “belemgbunli sua.”
Nea Gyn 22:24 ɔbdw.
Ɔbo kile “Awie Mɔɔ Ɛbe Ninyɛne Ɛbubulɛ Nu La.”