Samoɛle Mɔɔ Tɔ Zo Nwiɔ 23:1-39

  • Devidi edwɛkɛ mɔɔ li awieleɛ (1-7)

  • Devidi konle nu katakyiema konimlilɛ ne mɔ (8-39)

23  Ɛhye a le Devidi edwɛkɛ mɔɔ li awieleɛ:+ “Gyɛsi ara Devidi edwɛkɛ,+Sonla ne mɔɔ bɛkpogyale ye zo,+Ahenle mɔɔ Gyekɔbo Nyamenle ne kpokpale ye,+Ahenle mɔɔ dole edwɛne fɛlɛko*+ wɔ Yizilayɛ la edwɛkɛ ɛne.   Gyihova sunsum ne luale me nwo zo dendɛle;+Ɛnee ye edwɛkɛ ne wɔ me tafinlima azo.+   Yizilayɛ Nyamenle ne dendɛle;Yizilayɛ Bodane+ ne zele me kɛ: ‘Saa ahenle mɔɔ ɛlɛdi alesama anwo zo tumi la le tenlenenli,+Na ɔdi tumi wɔ Nyamenle ɛzulolɛ nu a,+   Ɔle kɛ nwonlomɔ wienyi wɔ mekɛ mɔɔ sɛnzɛne ne kɛvinde la,+Nwonlomɔ mɔɔ maanle nu ɛtɛmunlanle la. Ɔle kɛ ezule ɛdɔ na maanle nu ɛde wienyi,Na ɔmaa ndile fifi azɛlɛ ye azo la.’+   Asoo tɛ kɛ me sua nu de wɔ Nyamenle anyunlu la ɛne? Ɔluakɛ ɔ nee me ɛyɛ dahuu ngyekyeleɛ,+Mɔɔ bɛhyehyɛ ye pɛpɛɛpɛ na bɛbɔ nwolɛ bane la. Ɔluakɛ ɔle me ngoanelielɛ nee me anyelielɛ kɔsɔɔti,Asoo tɛ ɛhye ati a ɔmaa ɔnyi a?+   Noko bɛfuandi sonlamgbanema bɛgua bɛ lɔ+ kɛ mbowule la,Ɔluakɛ bɛngola bɛnva bɛ sa bɛnzɔ bɛ nu.   Saa awie fa ɔ sa aha bɛ a,Ɔwɔ kɛ ɔfa bulalɛ nee atwɛ baka ɔdɛ ɔ sa nu,Ɔwɔ kɛ bɛfa senle bɛyela bɛ bɔkɔɔ wɔ ɛleka mɔɔ bɛgua la.”  Devidi konle nu katakyiema aluma ɛne:+ Takemonaenli Dwohyɛbe-bahyibɛte, mɔɔ gyi nsa ne ati la.+ Ɔvale ye atwɛ ne ɔhunle menli 800 wɔ mekɛ ko anu.  Mɔɔ doa ye la a le Ahohae ara Dodo+ ara Ɛlieza,+ ɛnee ɔboka konle nu katakyiema nsa ne mɔɔ nee Devidi lua wɔ mekɛ mɔɔ bɛgolole Filisitiama anwo la anwo. Bɛboɔboale bɛ nloa wɔ ɛkɛ ne kɛ bɛkaho, na mɔɔ Yizilayɛma nriandile la, 10  ɔgyinlanle ɔ gyakɛ anu na ɔhunle Filisitiama too ɔ sa nyianle mɔɔ ɔgyakyi konle dadeɛ ne anu a ɔnyɛ boɛ a.+ Ɔti Gyihova maanle bɛlile konim* kpole wɔ kenle zɔhane;+ na menli ne ziale hɔle ɔ nwo ɛkɛ na bɛhɔyeyele avunli ne mɔ anwo ninyɛne. 11  Mɔɔ doa ye la a le Hɛlanli Egi ara Hyamaa. Filisitiama boɔboale bɛ nloa wɔ Lihae, wɔ azɛlɛ bie mɔɔ aluba dɔɔnwo wɔ zo la azo; na Filisitiama ati, menli ne nriandile. 12  Noko ɔgyinlanle ɛya ne avinli na ɔhonle ɔbɔle nwolɛ bane na ɔhɔle zo ɔhunle Filisitiama, yemɔti Gyihova maanle bɛlile konim kpole.*+ 13  Mgbanyima 30 ne anu nsa hɔle Devidi anwo ɛkɛ wɔ Adulam+ bolɛ bɔne ne anu wɔ ma ɛdelɛ mekɛ nu, ɛnee Filisitiama ɛyɛ bɛ azokoɛleɛ* wɔ Relɛfeeyem Bɔnza+ ne anu. 14  Ɛnee Devidi wɔ ɛvealeka ne,+ yɛɛ Filisitiama sogyama bie wɔ Bɛtelɛhɛm. 15  Akee Devidi ati akunlu rale debie zo na ɔhanle kɛ: “Anrɛɛ meanyia bula ne mɔɔ wɔ Bɛtelɛhɛm anlenkɛ kpole ne anloa la anu nzule ne bie meanlo!” 16  Na konle nu katakyiema nsa ne bɔle mɔdenle hɔle Filisitiama azokoɛleɛ ne na bɛhɔzale bula ne mɔɔ wɔ Bɛtelɛhɛm anlenkɛ kpole ne anloa la anu nzule ne bie na bɛvale bɛrɛlɛle Devidi; noko yeanno, na ɔwolale ɔguale aze ɔmaanle Gyihova.+ 17  Ɔhanle kɛ: “O Gyihova, ɔnrɛra ye zɔ ɛlɛ kɛ mekɛyɛ ɛhye! Ɔwɔ kɛ meno menli mɔɔ vale bɛ ngoane* dole esiane nu la mogya ɔ?”+ Yemɔti yeanno. Ninyɛne ɛhye mɔ a ye konle nu katakyiema nsa ne yɛle a. 18  Ɛnee Zɛluaya+ ara Dwowabe adiema Abehyae+ gyi menli nsa bieko ati; ɔvale ye atwɛ ne ɔhunle menli 300, na ɔliele duma kɛ menli nsa ne la.+ 19  Ɛnee ɔle sonla titili wɔ katakyiema nsa ɛhendeɛ ne anu yɛɛ ɔdaye a ɔle bɛ kpanyinli a, noko yeandwu nsa ne mɔɔ limoa la gyinlabelɛ ne. 20  Gyɛhɔyada ara Bɛnaya+ le sonla mɔɔ lɛ akɛnrasesebɛ* na ɔyɛle ninyɛne mgbole dɔɔnwo wɔ Kabezeɛle.+ Ɔhunle Aleɛle mɔɔ vi Mowabe la amra mrenyia nwiɔ ne, yɛɛ ɔdwule kuma bie mɔɔ nzule wɔ nu la anu wɔ kenle ko bie mɔɔ ezukɔtweaba ɛlɛtɔ la na ɔhunle awenade.+ 21  Eza ɔhunle Yigyibitinli kakanyinli bie. Ɛnee Yigyibitinli ne lɛ atwɛ, noko ɔvale baka ɔhɔle ɔ nwo zo na ɔliele atwɛ ne ɔvile Yigyibitinli ne asa anu na ɔvale ye atwɛ ne ɔhunle ye. 22  Ninyɛne ɛhye mɔ a Gyɛhɔyada ara Bɛnaya yɛle a, yɛɛ ɔliele duma kɛ konle nu katakyiema nsa ne la. 23  Ɛnee ɔle sonla titili ɔtɛla katakyiema abulasa ne bɔbɔ ɛdeɛ, noko yeandwu menli nsa ne gyinlabelɛ ne. Noko Devidi maanle ɔnleanle ye sinzavolɛma ne anwo zo. 24  Dwowabe adiema Asahɛle+ boka katakyiema abulasa ne anwo; yɛɛ Dodo mɔɔ vi Bɛtelɛhɛm la ara Ɛleheenan,+ 25  Heelɔdonli Hyamaa, Heelɔdonli Yilaeka, 26  Pilɛtenli Hilɛze,+ Tɛkowanli Yekɛhye ara Ayela,+ 27  Anatɔtonli+ Abi-yizɛ,+ Huhyatenli Mɛbonae, 28  Ahohaenli Zalemɔn, Nɛtofanli Meehalae,+ 29  Nɛtofanli Beeyanaa ara Hilɛbe, Relaebae mɔɔ vi Bɛngyamanema sua Gebeya azo la ara Yetaye, 30  Pilatɔnonli Bɛnaya,+ Hedae mɔɔ vi Geeyahye+ azudenle* ne afoa nu, 31  Alebatenli Eba-yalebɔn, Bahulemenli Azemeevɛte, 32  Hyeeyalebemenli Yilayaaba, Gyehyɛn amra ne mɔ, Dwɔnatan, 33  Hɛlanli Hyamaa, Hɛlanli Hyeela ara Ahayam, 34  Meeyakatenli ara Ahahyebae ara Ɛlefɛlɛte, Gaelonli Ahetɔfɛle+ ara Yilaeyam, 35  Kamɛlenli Hɛzelo, Arelabenli Peeyalae, 36  Neetan mɔɔ vi Zoba la ara Ayegale, Gaadenli Beenae, 37  Amɔnonli Zilɛke, Biyɛlɔtonli Neehalae mɔɔ soa Zɛluaya ara Dwowabe konle ninyɛne ne la, 38  Yetelanli Ayela, Yetelanli+ Geelɛbe, 39  yɛɛ Hɛtenli Yulaya+—bɛ muala bɛle 37.

Ɔbodwɛkɛ

Anzɛɛ “Ahenle mɔɔ ane yɛ fɛ.”
Anzɛɛ “bɛnyianle ngoanelielɛ.”
Anzɛɛ “bɛnyianle ngoanelielɛ kpole.”
Anzɛɛ “ɛyɛ bɛ ɛdanlɛsua namule.”
Anzɛɛ “ɛkɛla.”
Hibulu aneɛ nu, “le nrenyia katakyie bie ara.”
Anzɛɛ “mbɔnza.” Nea Edwɛkɛbohilelɛ.