Samoɛle Mɔɔ Tɔ Zo Nwiɔ 22:1-51
22 Devidi hanle edwɛne ɛhye anu edwɛkɛ ne hilele Gyihova+ wɔ kenle mɔɔ Gyihova liele ye vile ye kpɔvolɛma kɔsɔɔti+ nee Sɔɔlo asa anu la.+
2 Ɔhanle kɛ:
“Gyihova le me bodane nee me aranemgbole+ nee me dievolɛ.+
3 Me Nyamenle ne le me bodane,+ ye nuhua a menriandi mekɔfea a,Me enyinlike+ nee me ngoanelielɛ mɛne,* me ɛvealeka kpalɛ*+Nee ɛleka mɔɔ menriandi mekɔ,+ me dievolɛ;+ wɔmɔ mɔɔ ɛdie me ɛfi amumuyɛyɛlɛ nu.
4 Mesu mefɛlɛ Gyihova mɔɔ fɛta ayɛlɛyelɛ la,Na ɔbalie me yeavi me kpɔvolɛma asa anu.
5 Ewule azɛlɛkye bɛngale me yiale;+Sonlamgbanema azuyilɛ hanle me ɛzulolɛ.+
6 Nla* nyɛmanyɛma bɛkɛbɛkale me;+Ewule zuale ɛhane wɔ me nyunlu.+
7 Wɔ me anwongyelelɛ nu, menzunle menvɛlɛle Gyihova,+Mengɔle zo menvɛlɛle me Nyamenle ne.
Akee ɔdele me ne wɔ ye ɛzonlenlɛsua ne anu,Na me ɛzunlɛ dwule ɔ nzo nu.+
8 Azɛlɛ ne kpusule na ɔwosole ɔhɔle ɔ nyunlu nee ɔ nzi;+Anwuma adiabo wosole+Na ɔkpusule ɔhɔle ɔ nyunlu nee ɔ nzi ɔluakɛ bɛha ye ɛya.+
9 Esike vi ɔ bonyi nu vindele,Na sendɔlɔra vi ɔ nloa anu rale;+Samɛnlakɛ woonwu vi ye nu zɔle guale.
10 Mɔɔ ɔlɛdwu la, ɔmaanle anwuma belele,+Na ɛnee awozinli kabii wɔ ɔ gyakɛ abo.+
11 Ɔdɛnlanle kyɛlɔbe+ zo ɔdule ɔrale.
Bɛnwunle ye kɛ ɔde anwumabɔvolɛ* ndɛba zo.+
12 Akee ɔvale awozinli ɔkyekyele ɔ nwo kɛ ɛdanlɛsua,+Wɔ nzulemungu nee amungu kisii nu.
13 Samɛnlakɛ vi wienyi ne mɔɔ wɔ ɔ nyunlu ɛkɛ ne la anu zɔle guale.
14 Akee Gyihova hulule wɔ anwuma lɔ;+Anwuma Anwumanli ne maanle bɛdele ɔ ne.+
15 Ɔtotole ye ɛda mbaka+ ne mɔ na ɔmaanle bɛbɔle asande;Ɔkpakyele ɛsɛlɛmanye na ɔmaanle bɛ nye zo danle bɛ.+
16 Bɛnwunle nyevile bo azɛlɛ ne;+Gyihova ndeanlɛ maanle azɛlɛ ne adiabo ne mɔ vindele zo,Ɔlua ɔ bonyi nu anwoma kpole ne ati.+
17 Ɔvi anwuma ɔdwule aze;Ɔzɔle me nu na ɔhwenle me ɔvile azule kuma nu.+
18 Ɔliele me ɔvile me kpɔvolɛ mɔɔ anwo yɛ se,+Bɛdabɛ mɔɔ bɛkpɔ me mɔɔ bɛ nwo yɛ se tɛla me la asa anu.
19 Bɛrale me nwo zo wɔ me amaneɛnwunlɛ kenle ne,+Noko Gyihova boale me.
20 Ɔvale me ɔhɔle ɛleka mɔɔ banebɔlɛ wɔ la;*+Ɔliele me ɔluakɛ ɔ nye liele me nwo.+
21 Gyihova tua me kakɛ wɔ me tenleneyɛlɛ nwo;+Me sa anwo le bɔkɔbɔkɔ* la ati, ɔmaa me nwolɛ ahatualɛ.+
22 Ɔluakɛ melua Gyihova ndenle ne mɔ anu,Yɛɛ metɛkpole me Nyamenle metɛyɛle ɛtane.
23 Ye ndɛnebualɛ kɔsɔɔti+ gua me nyunlu;Menrɛhwe me nwo menrɛvi ye mɛla ne mɔ anwo.+
24 Menrɛmaa edwɛkɛ ɛnrɛra me nwo+ wɔ ɔ nyunlu,Yɛɛ mebahwe me nwo meavi nvonleɛ nwo.+
25 Gyihova ɛdua me kakɛ wɔ me tenleneyɛlɛ nwo;+Kɛmɔ menze nwolɛ bie wɔ ɔ nyunlu la ati,+ ɔdua me nwolɛ kakɛ.
26 Mɔɔ le nɔhavo la, ɛdi nɔhalɛ ɛmaa ye;+Mɔɔ edwɛkɛ ɛnle ɔ nwo, mɔɔ le katakyie la, ɛmaa ɔnwu kɛ edwɛkɛ ɛnle ɔ nwo;+
27 Mɔɔ anwo te la, ɛmaa ɛ nwo te maa ye,+Noko mɔɔ le mɛlɛbɛla la ɛngola ɛmbɛlɛbɛla wɔ.*+
28 Ɔluakɛ ɛdie bɛlɛvoma,+Noko ɛ nye sa anwomemaazoma na ɛbɛlɛ bɛ aze.+
29 O Gyihova, wɔmɔ a ɛle me kɛnlaneɛ a;+Gyihova a maa me awozinli kakyi wienyi a.+
30 Wɔ moalɛ zo, mekola mefoa sogyama nwule ekpunli;Ɔlua Nyamenle tumi zo, mekola mewulu bane.+
31 Nɔhalɛ Nyamenle ne adenle di munli;+Bɛdu Gyihova edwɛkɛ ne anu.+
Ɔle enyinlike ɔmaa bɛdabɛ mɔɔ bɛnriandi bɛfea ye nu la amuala.+
32 Nwane a le Nyamenle kɛ Gyihova a?+
Yɛɛ nwane a le bodane kɛ yɛ Nyamenle ne a?+
33 Nɔhalɛ Nyamenle ne le me ɛvealeka ɛsesebɛ,+Na ɔbamaa me adenle ali munli.+
34 Ɔmaa me gyakɛ yɛ kɛ weɛlɛ gyakɛ la;Ɔmaa megyinla ɛleka mɔɔ wɔ anwuma la.+
35 Ɔtete me sa ɔmaa konle;Me sa kola bele kɔbele ɛda.
36 Ɛfa wɔ ngoanelielɛ enyinlike ne ɛmaa me,Na wɔ mɛlɛbɛnwoaze ne maa meyɛ sonlakpole.+
37 Ɛbuke me gyakɛ abo zo adenle nu;Me gyakɛ ɛnrɛtele.+
38 Mebavoa me kpɔvolɛma na meazɛkye bɛ;Menrɛzia kɔkpula kɛ mekɛbɔ bɛ bo zo.
39 Mebabɔ bɛ bo zo na meabubu bɛ, amaa bɛandwazo bieko;+Bɛbadu bɛagua me gyakɛ abo.
40 Ɛbamaa meanyia anwosesebɛ meava meaho konle ne;+Ɛbamaa me kpɔvolɛma agolo agua me gyakɛ abo.+
41 Ɛbamaa me kpɔvolɛma anriandi avi me nyunlu;*+Mebazɛkye bɛdabɛ mɔɔ bɛkpɔ me la.*+
42 Bɛsu bɛkpondɛ moalɛ, noko bɛnnyia awie ɛnlie bɛ;Bɛsu bɛfɛlɛ Gyihova bɔbɔ, noko ɔndie bɛ.+
43 Mebadi bɛ motoo kɛ azɛlɛ nwo munlutu;Mebabubu bɛ na meatietia bɛ nwo zo kɛ gua zo ndɛtɛlɛ la.
44 Ɛbalie me wɔavi me menli ne tendɛtia nwo.+
Ɛbabɔ me nwo bane wɔamaa meanlea maanle maanle nwo zo;+Menli mɔɔ menze bɛ la bazonle me.+
45 Nyɛvolɛ barabɔ bɛ ti aze amaa me;+Me nwo edwɛkɛ mɔɔ bɛbade la bamaa bɛadie me.*
46 Nyɛvolɛ ɛnrɛnyia akɛnrasesebɛ;Bɛbava anwowosolɛ bɛavi bɛ aranemgbole ne mɔ anu bɛara.
47 Gyihova de aze! Ayɛlɛyelɛ ɛha me Bodane ne!+
Maa bɛkpogya me ngoanelielɛ bodane Nyamenle ne zo.+
48 Nɔhalɛ Nyamenle ne di nzenralɛ maa me;+Ɔmaa menli ne fea me bo;+
49 Ɔdie me ɔfi me kpɔvolɛma asa anu.
Ɛkpogya me zo+ ɛmaa metɛla menli mɔɔ ba me nwo zo la;Ɛdie me ɛfi sonla mɔɔ yɛ amumuyɛ la asa anu.+
50 O Gyihova, ɛhye ati mebayɛ wɔ mo wɔ maanle maanle ne mɔ anu,+Na meado* ayɛlɛyelɛ edwɛne meamaa wɔ duma ne+ kɛ:
51 Ɔyɛ ngoanelielɛ gyima mgbole* ɔmaa ye belemgbunli ne;+Ɔda ɛlɔlɛ kpundii ali ɔkile ahenle mɔɔ yekpokpa ye la,Devidi nee ɔ bo zo amra dahuu.”+
Ɔbodwɛkɛ
^ Anzɛɛ “me dievolɛ mɔɔ lɛ tumi.” Nea Edwɛkɛbohilelɛ, Mɛne.
^ Anzɛɛ “me arane ɛsesebɛ.”
^ Anzɛɛ “Sheol,” ɛhye kile, alesama nla. Nea Edwɛkɛbohilelɛ.
^ Anzɛɛ “ɔde anwoma.”
^ Anzɛɛ “ɛleka mɔɔ le kpole la.”
^ Anzɛɛ “Me sa di benle.”
^ Anzɛɛ ɔkola ɔkile, “ɛyɛ ɛ nwo kɛ ɛnze nrɛlɛbɛ.”
^ Anzɛɛ “Ɛbava me kpɔvolɛma anzi wɔamaa me.”
^ Hibulu aneɛ nu, “Mebamaa menli mɔɔ kpɔ me la ayɛ koonwu.”
^ Hibulu aneɛ nu, “Mɔɔ bɛbade wɔ bɛ nzo nu la, bamaa bɛadie me.”
^ Anzɛɛ “Na meabɔ.”
^ Anzɛɛ “Ɔdi konim mgbole.”
