Samoɛle Mɔɔ Tɔ Zo Nwiɔ 18:1-33

  • Abesalɛm anwo zo konimlilɛ nee ye ewule (1-18)

  • Bɛha Abesalɛm ewule ne bɛhile Devidi (19-33)

18  Akee Devidi dianle menli mɔɔ nee ye lua la na ɔmaanle mgbanyima nleanle menli apenle apenle nee menli ɛya ɛya nwo zo.+  Na Devidi hyɛle menli ne anu ekpunli nsa na ɔvale ko ɔwulale Dwowabe+ asa anu, ɔvale ko ɔwulale Zɛluaya+ ara Abehyae+ mɔɔ le Dwowabe adiema la asa anu na ɔvale ko ɔwulale Gatenli Yetaye+ asa anu. Akee belemgbunli ne zele menli ne kɛ: “Medame noko me nee bɛ bahɔ.”  Noko bɛhanle kɛ: “Mmakɔ bie,+ ɔluakɛ saa yɛnriandi a, bɛnrɛdwenle yɛ nwo;* yɛɛ saa yɛ nuhua foa ko wu a, bɛnrɛdwenle yɛ nwo, ɔboalekɛ ɛsonle bolɛ kɛ yɛ nuhua 10,000 la.+ Ɔti ɔle kpalɛ kɛ ɛbava moalɛ wɔavi sua ne azo wɔarɛlɛ yɛ.”  Belemgbunli ne zele bɛ kɛ: “Debie biala mɔɔ bɛnea a ɔle kpalɛ la, mebayɛ.” Ɔti belemgbunli ne gyinlanle suakpole ne anlenkɛ kpole ne anwo, na menli ne hɔle ye ɛya ɛya nee apenle apenle.  Akee belemgbunli ne vale edwɛkɛ ɛhye dole Dwowabe nee Abehyae yɛɛ Yetaye anyunlu kɛ: “Bɛ nee kpavolɛ Abesalɛm ɛli ye kɛnlɛma ɛmaa me.”+ Mɔɔ belemgbunli ne hanle Abesalɛm anwo edwɛkɛ hilele mgbanyima ne mɔ amuala la, menli ne kɔsɔɔti dele.  Menli ne hɔle kpɔkɛ ne anu kɛ bɛkayia Yizilayɛma, na konle ne zile wɔ Yifelaem kpɔkɛ ne anu.+  Devidi+ azonvolɛ ne mɔ lile Yizilayɛma+ anwo zo konim wɔ ɛkɛ, na bɛhunle menli dɔɔnwo kenle zɔhane—menli 20,000.  Konle ne dɛlɛle hɔle maanzinli ne anu amuala. Menli dɔɔnwo noko wule kpɔkɛ ne anu dɛlale menli mɔɔ dɔle dadeɛ nloa kenle zɔhane la.  Akee Abesalɛm nwunle kɛ Devidi azonvolɛ ne mɔ ɛlɛba arayia ye. Ɛnee Abesalɛm de ɛkpɔnwɔndua* zo, na ɛkpɔnwɔndua ne hɔvale baka kpole bie mɔɔ lɛ ngane buzuu la abo, na ɔ ti hɔtosale baka kpole ne ngane ne anu, yemɔti ɔzinzele anwomanyunlu* na ɛkpɔnwɔndua ne mɔɔ ɔde zo la pɛle nu hɔle. 10  Awie nwunle ye na ɔhɔhanle ɔhilele Dwowabe+ kɛ: “Nea! Menwu Abesalɛm kɛ ɔhenda baka kpole bie azo.” 11  Dwowabe buale nrenyia ne mɔɔ nwunle ye la kɛ: “Saa ɛnwunle ye a, ɛnee duzu ati a wɔambɔ ye wɔangu ye ɛkɛ ne ala ɛ? Anrɛɛ mebava anyelielɛ meamaa wɔ dwɛtɛ fufule bulu nee bɛlɛte.” 12  Noko nrenyia ne zele Dwowabe kɛ: “Saa bɛmaa me dwɛtɛ fufule 1,000 bɔbɔ a, menrɛhola menrɛva me sa menrɛha belemgbunli ne ara ne, ɔluakɛ yɛdele kɛ belemgbunli ne hanle ɔ nwo edwɛkɛ hilele ɛdawɔ nee Abehyae yɛɛ Yetaye kɛ, ‘Bɛ nuhua ko biala ɛnlea kpavolɛ Abesalɛm boɛ.’+ 13  Saa meandie yɛɛ mengunle ye a,* anrɛɛ kɛ ɔde ye biala la belemgbunli ne bade yɛɛ anrɛɛ ɛnrɛbɔ me nwo bane.” 14  Na Dwowabe hanle kɛ: “Menrɛzɛkye mekɛ bieko wɔ ɛ nwo!” Ɔti ɔvale mbaka nsa mɔɔ bɛzinzi ɔ nloa la* ɔlɛle ɔ sa nu na ɔvale ɔhɔwowɔle Abesalɛm akɛnra zo* wɔ mekɛ mɔɔ ɔ nye gyi zo na ɔhenda baka kpole ne azo la. 15  Akee azonvolɛ bulu mɔɔ soa Dwowabe konle ninyɛne ne la rabobɔle Abesalɛm too ɔwule.+ 16  Akee Dwowabe bɔle aweɛne ne, na menli ne gyakyile Yizilayɛma ɛvoanlɛ; Dwowabe maanle bɛgyakyile konle ne. 17  Bɛyele Abesalɛm na bɛvuandinle ye bɛdole kuma kpole bie anu wɔ kpɔkɛ ne anu na bɛhuohuanle awolɛ edukue kpole bie wɔ ɔ nwo zo.+ Na Yizilayɛma kɔsɔɔti nriandile hɔle bɛ azua nu. 18  Mekɛ mɔɔ Abesalɛm de aze la, ɔyɛle pila bie na ɔkpɔnlanle ye wɔ Belemgbunli Bɔnza ne anu+ ɔmaanle ɔ nwo, ɔluakɛ ɔhanle kɛ: “Menlɛ ralɛ nrenyia mɔɔ bamaa bɛahakye me duma a.”+ Yemɔti ɔvale pila ne ɔdonle ɔ nwo, na bɛvɛlɛle ye Abesalɛm Ngakyedeɛ too yeradwu ɛnɛ. 19  Zeedɔko ara Ahaemaze+ hanle kɛ: “Mesɛlɛ wɔ, maa menriandi mengɔmbɔ belemgbunli ne amaneɛ, ɔluakɛ Gyihova ɛli pɛlepɛle ɛmaa ye na yelie ye yevi ye kpɔvolɛma asa anu.”+ 20  Noko Dwowabe zele ye kɛ: “Tɛ ɛdawɔ a ɛkabɔ amaneɛ ɛnɛ a. Ɛbahola wɔabɔ amaneɛ ne kenle fofolɛ, noko ɛnɛ, tɛ ɛdawɔ a ɛkabɔ amaneɛ ne a, ɔluakɛ belemgbunli mumua ne ara ɛwu.”+ 21  Akee Dwowabe zele Kuhyenli+ bie kɛ: “Kɔha mɔɔ wɔnwu ye la kile belemgbunli ne.” Na Kuhyenli ne bɔle ɔ ti aze maanle Dwowabe na ɔnriandile ɔhɔle. 22  Zeedɔko ara Ahaemaze zele Dwowabe bieko kɛ: “Maa mɔɔ kɛzi biala la ɛzi, mesɛlɛ wɔ maa medame noko menriandi menli Kuhyenli ne anzi.” Noko Dwowabe hanle kɛ: “Me ra, duzu ati a ɛnriandi wɔahɔ wɔ mekɛ mɔɔ amaneɛ biala ɛnle ɛkɛ mɔɔ ɛkabɔ la ɛ?” 23  Ɔhanle ye bieko kɛ: “Maa mɔɔ kɛzi la ɛzi, maa mengɔ.” Ɔti Dwowabe zele ye kɛ: “Nriandi kɔ!” Na Ahaemaze luale adenle ne mɔɔ kɔ Dwɔdan maangyeba ne anu* la azo nriandile na ɔhɔzenle Kuhyenli ne anwo. 24  Ɛnee Devidi de suakpole ne nlenkɛ mgbole nwiɔ ne avinli,+ na sinzavolɛ+ ne hɔle anlenkɛ kpole ne mɔɔ wɔ bane ne anwo la ati zo. Ɔmaanle ɔ nye zo na ɔnwunle kɛ awie bie angome ɛlɛnriandi ara. 25  Ɔti sinzavolɛ ne deanle nu hanle hilele belemgbunli ne. Na belemgbunli ne hanle kɛ: “Saa ɔ ngomekye a, ɛnee ɔ nee amaneɛ lua.” Mɔɔ ɔlɛbikye ɛkɛ ne kpalɛ la, 26  sinzavolɛ ne nwunle kɛ awie bieko ɛlɛnriandi ara. Akee sinzavolɛ ne vɛlɛle ahenle mɔɔ sinza anlenkɛ kpole ne la kɛ: “Nea! Awie bieko angome ɛlɛnriandi ara!” Belemgbunli ne hanle kɛ: “Ɔdaye noko ɔ nee amaneɛ lua.” 27  Sinzavolɛ ne hanle kɛ: “Menwu kɛ ahenle mɔɔ limoa la nriandi kɛ Zeedɔko ara Ahaemaze+ la.” Ɔti belemgbunli ne hanle kɛ: “Ɔle sonlakpalɛ, na ɔlɛfa amaneɛ kpalɛ yeara.” 28  Akee Ahaemaze deanle nu zele belemgbunli ne kɛ: “Debie biala le kpalɛ!” Ɔbɔle ɔ ti aze ɔmaanle belemgbunli ne na ɔbutule ɔ nyunlu aze. Akee ɔhanle kɛ: “Ayɛlɛyelɛ ɛha Gyihova wɔ Nyamenle ne mɔɔ ɛye menli mɔɔ dele me menle belemgbunli anwo atua* la ɛwula ɔ sa nu la!”+ 29  Noko belemgbunli ne bizale kɛ: “Kɛzi debie biala hɔle ye maanle kpavolɛ Abesalɛm ɛ?” Na Ahaemaze hanle kɛ: “Mɔɔ Dwowabe zoanle belemgbunli sonvolɛ ne nee medame la, menwunle begyebegye ne mɔɔ ɛlɛkɔ zo la, noko ɛnee menze deɛ holɛ ko ne.”+ 30  Yemɔti belemgbunli ne hanle kɛ: “Gyinla ahane ɛke.” Yemɔti ɔhɔgyinlanle ahane ɛkɛ. 31  Akee Kuhyenli ne rale,+ na ɔhanle kɛ: “Maa me menle belemgbunli ɛdie nrɛlaleɛ ɛhye: Ɛnɛ, Gyihova ɛli pɛlepɛle ɛmaa wɔ na yelie wɔ yevi menli kɔsɔɔti mɔɔ dele ɛ nwo atua la asa anu.”+ 32  Noko belemgbunli ne bizale Kuhyenli ne kɛ: “Kɛzi debie biala hɔle ye maanle kpavolɛ Abesalɛm ɛ?” Na Kuhyenli ne hanle kɛ: “Maa me menle belemgbunli agbɔvolɛ nee menli kɔsɔɔti mɔɔ dele ɛ nwo atua kɛ bɛyɛ wɔ ɛtane la ɛyɛ kɛ kpavolɛ ne la!”+ 33  Ɛhye gyegyele belemgbunli ne, na ɔhɔle ekpumgbunli ne mɔɔ wɔ anlenkɛ kpole ne ati zo la anu na ɔzunle, mɔɔ ɔlɛkɔ la ɛnee ɔlɛka kɛ: “Me ra Abesalɛm, me ra ye, me ra Abesalɛm! Ɛnee ɛmmaa menwu mengyakyi wɔ, me ra Abesalɛm, me ra ye o!”+

Ɔbodwɛkɛ

Hibulu aneɛ nu, “bɛnrɛva bɛ ahonle bɛnrɛhɔ zo.”
Asoaso nyinli nee ɛkpɔnwɔ belɛ a wole ye a.
Hibulu aneɛ nu, “ɔzinzele anwuma nee aze avinli.”
Anzɛɛ “Saa meanli nɔhalɛ na menyɛle debie mentiale ye ɛkɛla a.”
Anzɛɛ ɔkola ɔkile, “ɛda mbaka; atwɛ.” Hibulu aneɛ nu, “mbaka.”
Hibulu aneɛ nu, “ahonle nu.”
Hibulu aneɛ nu, “mɔɔ kɔ maangyeba ne anu.”
Hibulu aneɛ nu, “maanle bɛ sa zo tiale me menle belemgbunli ne.”