Samoɛle Mɔɔ Tɔ Zo Nwiɔ 1:1-27

  • Devidi dele Sɔɔlo ewule ne (1-16)

  • Devidi yele Sɔɔlo nee Dwɔnatan anwo awolɛ (17-27)

1  Mekɛ mɔɔ Sɔɔlo wule mɔɔ ɛnee Devidi ɛhɔli Amalɛkema anwo zo konim* ɛzia ɛra la, Devidi dɛnlanle Zekelage+ kenle nwiɔ.  Kenle nsa ne azo, nrenyia bie mɔɔ ɛsuosua ye adɛladeɛ nu na yeva ndɛtɛlɛ yegua ɔ ti zo la vi Sɔɔlo azokoɛleɛ lɔ rale. Mɔɔ ɔdwule Devidi anwo ɛkɛ la, ɔdule ɔdɔle na ɔbutule ɔ nyunlu aze.  Devidi bizale ye kɛ: “Ɛvi nienwu a wɔra a?” Ɔbuale kɛ: “Mevi Yizilayɛ azokoɛleɛ ne a menriandi mera a.”  Devidi bizale ye kɛ: “Kɛ ninyɛne hɔle ye ɛ? Mesɛlɛ wɔ ka kile me.” Na ɔzele ye kɛ: “Menli ne ɛnriandi ɛvi konle ne anloa yɛɛ bɛ nuhua dɔɔnwo ɛwu. Sɔɔlo nee ɔ ra Dwɔnatan bɔbɔ ɛwu.”+  Akee Devidi bizale kpavolɛ ne mɔɔ rabɔle ye amaneɛ la kɛ: “Kɛzi ɛnwunle kɛ Sɔɔlo nee ɔ ra Dwɔnatan ɛwu ɛ?”  Kpavolɛ ne buale kɛ: “Mengɔnvindele Gelebowa Boka ne azo,+ na menwunle Sɔɔlo kɛ ɔhisa ye atwɛ ne na menli mɔɔ ka ehwili nee mgbɔnwɔ la asɛɛ ɛdwu ɔ nwo ɛkɛ.+  Mɔɔ ɔhakyile ɔ nye na ɔnwunle me la, ɔvɛlɛle me, na menganle kɛ, ‘Medame ɛne!’  Ɔbizale me kɛ, ‘Ɛdawɔ nwane ɔ?’ Membuale kɛ, ‘Mele Amalɛkenli.’+  Akee ɔhanle kɛ, ‘Mesɛlɛ wɔ bikye me nwo ɛke na ku me, ɔluakɛ melɛnwu amaneɛ kpole noko metɛte ngoane nu.’ 10  Ɔti membikyele ye na mengunle ye,+ ɔluakɛ ɛnee meze kɛ kɛzi yeboda kpole la, ɔnrɛde kpɔkɛ. Akee menyele ɔ ti abotile* ne nee ɔ sa akɔme nu ngɛba ne kɛ mefa mearɛlɛ me menle wɔ ɛke.” 11  Na Devidi zɔle ye adɛladeɛ ne mɔ anu na ɔsuosuanle nu, na menli kɔsɔɔti mɔɔ nee ye lua la noko yɛle ye zɔhane ala. 12  Na bɛyele awolɛ na bɛzunle na bɛhyele ɛhɔne+ too nɔsolɛ nu bɛmaanle Sɔɔlo, ɔ ra Dwɔnatan, Gyihova menli ne yɛɛ Yizilayɛma kɔsɔɔti+ ɔluakɛ bɛdɔ dadeɛ nloa. 13  Devidi bizale kpavolɛ ne mɔɔ rabɔle ye amaneɛ la kɛ: “Ɛvi ni?” Ɔbuale kɛ: “Mele Amalɛkenli ɛyɛvolɛ bie mɔɔ de Yizilayɛ la ara.” 14  Akee Devidi zele ye kɛ: “Duzu ati a wɔanzulo kɛ ɛkɛva ɛ sa ɛkɛha awie mɔɔ Gyihova ɛkpokpa ye la ɛ?”+ 15  Na Devidi vɛlɛle mgbavolɛ ne mɔ ko na ɔhanle kɛ: “Kɔbɔ ye ku ye.” Yemɔti ɔbɔle ye, na ɔwule.+ 16  Devidi zele ye kɛ: “Wɔ mogya ɛgua ɛ ti zo, ɔluakɛ ɛdawɔ mumua ne ɛ nloa a ɛli daselɛ ɛtia wɔ kɛ, ‘Medame a mengunle sonla mɔɔ Gyihova ɛkpokpa ye la a.’”+ 17  Akee Devidi dole awolɛyelɛ edwɛne* ɛhye maanle Sɔɔlo nee ɔ ra Dwɔnatan+ 18  na ɔhanle kɛ bɛhile Dwudama edwɛne ɛhye mɔɔ bɛfɛlɛ ye “Ɛda Nwo Edwɛne Ne” mɔɔ bɛhɛlɛ ye wɔ Gyeehya buluku ne anu la:+ 19  “O Yizilayɛ, anwofɛlɛkoma ɛwu ɛgua wɔ awoka ne mɔ azo.+ Nea kɛzi katakyiema ɛho ɛdɔ a! 20  Bɛmmaka nwolɛ edwɛkɛ wɔ Gate;+Bɛmmabɔ ye nolo wɔ Ahyekɛlɔn gua ne mɔ azo,Anrɛɛ Filisitia mraalɛ kɛli fɛlɛko,Anrɛɛ menli mɔɔ bɛtɛpɛle bɛ mrenyiazo la amra mraalɛ anye kɛlie. 21  Bɛmɛ Gelebowa awoka,+Ɛbɔlɛ anzɛɛ ezule mmatɔ bɛ nwo zo,Yɛɛ ndoboa nwuanzanwuanza mmafi bɛ azɛlɛ zo ba,+Ɔluakɛ ɛkɛ ne a bɛguale katakyiema enyinlike nwo evinli a,Bɛnva nwole bɛmkpokpa Sɔɔlo enyinlike nwo bieko. 22  Dwɔnatan ɛda ne ɛngyakyi+ kɛ ɔkɛha menli mogya ɔkɛguaNa ɔkɛpepɛ katakyiema ɛnlome nu,Yɛɛ Sɔɔlo konle dadeɛ ne ɛnzia ɔ nzi ɛmba mgbane.+ 23  Sɔɔlo nee Dwɔnatan,+ ɛnee menli kulo bɛ yɛɛ bɛ nye die bɛ nwo wɔ bɛ ngoane mekɛ nu,Yɛɛ ewule nu bɔbɔ, bɛ avinli antete.+ Bɛ nwo yɛ ndɛ tɛla kɔleɛ,+Bɛ nwo yɛ se tɛla awenade.+ 24  O Yizilayɛ mraalɛ, bɛzu Sɔɔlo,Yemɔ a ɔhedale bɛ ndanlɛ kɔkɔlɛ nee ninyɛne ngɛnlɛma a,Yemɔ a ɔvale nvutuke agudeɛ ɔguale bɛ adɛladeɛ zo a. 25  Nea kɛzi katakyiema ɛwu konle nu ɛ! Dwɔnatan ɛwu ɛla wɔ awoka ne mɔ azo!+ 26  Me diema Dwɔnatan, melɛdi ɛ nwo nyane kpole;Ɛsonle bolɛ ɛmaa me kpole.+ Ɛnee ɛlɔlɛ mɔɔ ɛlɛ ɛmaa me la yɛ nwanwane tɛla mraalɛ ɛlɔlɛ.+ 27  Nea kɛzi katakyiema ɛho ɛdɔNa konle ninyɛne ne mɔ ɛzɛkye a!”

Ɔbodwɛkɛ

Anzɛɛ “ɛhɔhu Amalɛkema.”
Anzɛɛ “belemgbunli kyɛlɛ.”
Anzɛɛ “nyanelilɛ edwɛne.”