Mɔɔ Tɔ Zo Nwiɔ Kɔmaa Kɔlentema 7:1-16
7 Alɔvolɛ, kɛmɔ bɛbɔ yɛ ɛwɔkɛ ɛhye mɔ la ati,+ bɛmaa yɛwowo yɛ nwo wɔ nwonane nu nee sunsum nu evinli biala anwo,+ amaa yɛ nwo ade kpalɛ wɔ Nyamenle ɛzulolɛ nu.
2 Bɛbuke bɛ ahonle nu bɛmaa yɛ.+ Yɛtɛyɛle awie biala ɛtane, yɛtɛsɛkyele awie biala, yɛtɛkpondɛle awie biala anwo zo nvasoɛ.+
3 Menga ɛhye kɛ mefa meabua bɛ fɔlɛ. Ɔluakɛ melimoa meha kɛ bɛla yɛ ahonle nwo kɛ yɛ nee bɛ bawu na yɛ nee bɛ adɛnla ngoane nu.
4 Mekola metendɛ mekile bɛ mɔɔ menzulo fee a. Mefa bɛ metu me nwo kpalɛ. Arɛlekyekyelɛ ɛyi me tɛkɛɛ; medi fɛlɛko kpole wɔ yɛ anwongyelelɛ kɔsɔɔti anu.+
5 Nɔhalɛ nu, mɔɔ yɛrale Masidonea la,+ yɛ sonlabaka* ne mɔ anwo andɔ bɛ, emomu yɛyiale ngyegyelɛ wɔ adenle biala anu—ɛnee konle wɔ gua zo yɛɛ ɛzulolɛ wɔ yɛ avinli.
6 Noko Nyamenle mɔɔ kyekye bɛdabɛ mɔɔ bɛ rɛle ɛbɔ la arɛle la,+ luale Taetɛse ɛralɛ ne azo kyekyele yɛ rɛle;
7 na tɛ ye ɛralɛ ne angome, emomu arɛlekyekyelɛ ne mɔɔ bɛdabɛ ti ɔnyianle, wɔ mekɛ mɔɔ ɔrahanle kɛzi bɛ nwo ɛlɛdɔ me la ɔhilele yɛ, nyane kpole mɔɔ bɛlɛdi, nee kɛzi bɛdwenle* me nwo kpalɛ la noko; yemɔti ɔmaanle menlile fɛlɛko kpole.
8 Na saa me kɛlata ne maanle bɛlile nyane bɔbɔ a,+ mennu* me nwo wɔ nwolɛ. Saa alimoa ne menunle me nwo wɔ nwolɛ bɔbɔ a (menwunle kɛ kɛlata ne maanle bɛlile nyane mekɛ ekyi bie ala),
9 kɛkala medi fɛlɛko, tɛ kɛ bɛlile nyane la ati ɔ, emomu kɛmɔ bɛlile nyane na bɛnlunle bɛ nwo la ati ɔ. Ɔluakɛ bɛlile nyane wɔ adenle mɔɔ sɔ Nyamenle anye la azo, amaa yɛdayɛ ti, edwɛkɛ ɛtane biala ando bɛ.
10 Ɔluakɛ nyanelilɛ mɔɔ sɔ Nyamenle anye la maa bɛnu bɛ nwo na ɔkɔwie ngoanelielɛ nu, na bɛnnu bɛ nwo wɔ nwolɛ;*+ noko ewiade ye nyanelilɛ maa ewule.
11 Bɛnlea kɛzi nyane mɔɔ bɛlile wɔ adenle mɔɔ sɔ Nyamenle anye azo la maanle bɛbɔle mɔdenle la. Bɛhilele kɛ bɛnli ɛzonle, bɛvale ɛya, ɛzulolɛ hanle bɛ, bɛ nwo lɔle me, bɛbɔle mɔdenle, bɛlile nvonleɛ ne anwo gyima!+ Adenle biala anu, bɛhilele kɛ bɛ nwo te wɔ edwɛkɛ ɛhye anu.
12 Mengɛlɛle bɛ, noko tɛ ahenle mɔɔ yɛle ɛtane ne anzɛɛ ahenle mɔɔ bɛvonle ye la ati ɔ,+ emomu amaa bɛ mɔdenle mɔɔ bɛbɔ ye wɔ yɛ nwo la ala ali wɔ bɛ avinli wɔ Nyamenle anyunlu.
13 Ɛhye ati a yɛ rɛle ɛkyekye la.
Noko tɛ yɛ rɛle mɔɔ ɛkyekye la angome, emomu yɛdi fɛlɛko kpole wɔ Taetɛse anyelielɛ ne anwo ɔluakɛ bɛ kɔsɔɔti bɛmaanle ɔlile fɛlɛko wɔ ye ahonle* nu.
14 Na saa menvale bɛ mendule me nwo mengilele ye a, bɛangua me nyunlu aze; emomu kɛ mɔɔ debie biala anu yɛka nɔhalɛ ne yɛkile bɛ la, zɔhane ala a yɛ nwo mɔɔ yɛdule yɛhilele Taetɛse la noko ɛyɛ nɔhalɛ a.
15 Bieko, saa ɔkakye tieyɛ mɔɔ bɛ muala bɛyɛle, nee kɛzi bɛvale ɛzulolɛ yɛɛ anwowosolɛ bɛliele ye la a, bɛ nwo ɛlɔlɛ mɔɔ ɔlɛ la yɛ kpole.+
16 Me nye die kɛ wɔ debie biala anu melɛ anwodozo wɔ bɛ nu* la.
Ɔbodwɛkɛ
^ Giliki aneɛ nu, “yɛ nwonane.”
^ Giliki aneɛ nu, “kɛzi bɛbɔ mɔdenle bɛdwenle.”
^ Anzɛɛ “menvu.”
^ Anzɛɛ “bɛnvu bɛ nwo.”
^ Giliki aneɛ nu, “sunsum.”
^ Anzɛɛ ɔkola ɔkile, “bɛdabɛ ti menyia akɛnrasesebɛ.”
