Mɔɔ Tɔ Zo Nwiɔ Kɔmaa Kɔlentema 5:1-21

  • Anwuma sua ne ɛhedalɛ (1-10)

  • Mgbɔdalɛ ɛzonlenlɛ gyima (11-21)

    • Abɔdeɛ fofolɛ (17)

    • Kelaese agyakɛnugyinlavolɛma (20)

5  Na yɛze kɛ saa bɛgolo* yɛ azɛlɛ ye azo sua ye, ɛdanlɛsua ɛhye, bɛgua aze a,+ yɛbanyia sua mɔɔ vi Nyamenle ɛkɛ, sua mɔɔ tɛ ɛsalɛ a bɛvale bɛzile,+ na ɔwɔ ɛkɛ ne dahuu la wɔ anwuma.  Saa yɛwɔ sua* ɛhye anu a, yɛsu yɛ kunlu, na yɛ nye la ye ɛsesebɛ kɛ yɛ sa baha sua ne mɔɔ wɔ anwuma* la, ɔbaheda yɛ nwo zo kɛ ɛdanlɛ la,+  amaa saa yɛfa yɛkeda a, bɛanwu yɛ kɛ yɛnlɛ yɛ nwo zɔ.  Nɔhalɛ nu, mekɛ mɔɔ yɛde ɛdanlɛsua ɛhye anu la yɛsu yɛ kunlu wɔ anwongyelelɛ kpole nu, ɔluakɛ yɛngulo kɛ yɛye ɛhye yɛgua, noko yɛkulo kɛ yɛfa ko ne noko yɛkeda,+ amaa ngoane ame mɔɔ ɔwu la.+  Na mɔɔ zieziele yɛ maanle deɛ ɛhye la a le Nyamenle+ mɔɔ ɛva sunsum ne ɛmaa yɛ kɛ ninyɛne mɔɔ bara la anwo sɛkɛlɛneɛ la.*+  Ɔti yɛlɛ akɛnrasesebɛ dahuu, na yɛze kɛ mekɛ mɔɔ yɛ sua wɔ sonlabaka ne anu la, ɛnee yɛnle Awulae anwo ɛkɛ,+  ɔluakɛ yɛlua diedi nu, na tɛ mɔɔ ɛnyelɛ nwu ye la anu.  Noko yɛlɛ akɛnrasesebɛ na yɛ nye die nwo kɛ yɛkɛvi sonlabaka ne anu na yɛ nee Awulae kɛhɔdɛnla.+  Yemɔti saa yɛwɔ ɔ nwo ɛkɛ ne o, anzɛɛ yɛnle ɔ nwo ɛkɛ ne o, yɛbɔ mɔdenle kɛ yɛbazɔ ɔ nye. 10  Ɔluakɛ ɔwɔ kɛ yɛ muala yɛfinde* Kelaese ndɛnebualɛ ebia ne anyunlu, amaa awie biala anyia mɔɔ ɔluale ye sonlabaka ne azo ɔyɛle la anwo ahatualɛ, saa ɔyɛle kpalɛ anzɛɛ ɛtane* a.+ 11  Ɛhye ati, kɛmɔ yɛze kɛzi Awulae ɛzulolɛ de la ati, yɛkɔ zo yɛ nee menli tendɛ yɛmaa bɛte ɔ bo, na Nyamenle ze yɛ kpalɛ. Noko akee, melɛ anyelazo kɛ bɛ adwenle ne mɔ noko ɛboa bɛ yemaa bɛnwu kɛzi yɛde la kpalɛ. 12  Tɛ kɛ asɛɛ yɛkanvo yɛ nwo yɛahile bɛ bieko ɔ, emomu yɛlɛmaa bɛ debie mɔɔ bɛbagyinla zo bɛava yɛ bɛadu bɛ nwo la, amaa bɛahola bɛabua bɛdabɛ mɔɔ bɛfa ninyɛne mɔɔ ɛnyelɛ nwu bɛ bɛtu bɛ nwo+ na bɛnva ninyɛne mɔɔ wɔ ahonle nu bɛndu bɛ nwo la. 13  Ɔluakɛ saa yɛzɛ a,+ yɛzɛ yɛmaa Nyamenle; na saa yɛ adwenle nu la ɛkɛ a, ɔla ɛkɛ ɔmaa bɛmɛ. 14  Na Kelaese ɛlɔlɛ ne ka yɛ, ɔluakɛ ɛhye a yɛlie yɛdo nu a, kɛ sonla ko wule maanle menli kɔsɔɔti;+ yemɔti, ɛnee bɛ muala bɛwu. 15  Na ɔwule ɔmaanle menli kɔsɔɔti amaa bɛdabɛ mɔɔ bɛde aze la andɛnla aze ammaa bɛ nwo bieko,+ emomu bɛadɛnla aze bɛamaa mɔɔ wule maanle bɛ na bɛdwazole ye la. 16  Ɛhye ati, ɔvi ɛnɛ mɔɔ kɔ la, yɛnze awie biala wɔ nwonane nu.+ Nɔhalɛ nu, saa ɛnee yɛze Kelaese wɔ nwonane nu bɔbɔ a, yɛnze ye zɔ bieko.+ 17  Ɔti saa awie nee Kelaese le ko a, ɔle abɔdeɛ fofolɛ;+ ninyɛne dɛba ne ɛpɛ nu; nea! ninyɛne fofolɛ ɛra. 18  Noko ninyɛne muala vi Nyamenle mɔɔ yelua Kelaese anwo zo yeziezie yɛ nee ye avinli la ɛkɛ,+ na yemaa yɛ mgbɔdalɛ ɛzonlenlɛ gyima,+ 19  yemɔ a le kɛ Nyamenle ɛlɛdua Kelaese anwo zo aziezie ɔ nee ewiade bie avinli,+ ɔnrɛbu bɛ ɛtane nwo mgbonda ɔnrɛtia bɛ,+ na yeva mgbɔdalɛ edwɛkɛ ne yewula yɛ sa nu.+ 20  Ɛhye ati, yɛle agyakɛnugyinlavolɛma,+ yɛgyi Kelaese agyakɛ anu+ kɛ asɛɛ Nyamenle ɛlɛdua yɛ nwo zo azɛlɛ menli la. Yɛgyinla Kelaese agyakɛ anu yɛsɛlɛ kɛ: “Bɛmaa bɛziezie bɛ nee Nyamenle avinli.” 21  Mɔɔ anyɛ ɛtane la ɔmaanle ɔbɔle ɛtane nwo afɔle ɔmaanle yɛ,+ amaa yɛalua ɔ nwo zo yɛayɛ tenlenema wɔ Nyamenle anyunlu.+

Ɔbodwɛkɛ

Anzɛɛ “bɛbubu.”
Anzɛɛ “tɛnlabelɛ.”
Anzɛɛ “yɛ tɛnlabelɛ ne mɔɔ wɔ anwuma.”
Anzɛɛ “yeva yedo ɔ bo (ezukoa); yeva yezi mɔɔ bara la azo (yeva yeli agyinlanu).”
Anzɛɛ “bɛda yɛ ali wɔ.”
Anzɛɛ “amumuyɛ.”