Mɔɔ Tɔ Zo Nwiɔ Kɔmaa Kɔlentema 11:1-33

  • Pɔɔlo nee ɛzoanvolɛma kpalɛ ne (1-15)

  • Ngyegyelɛ mɔɔ Pɔɔlo yiale kɛ ɛzoanvolɛ la (16-33)

11  Me kunlu a anrɛɛ bɛnyia me nwo abotane, saa bɔbɔ mezɔho sonla mɔɔ ɛnlɛ ndelebɛbo la a. Noko nɔhalɛ nu, bɛlɛnyia me nwo abotane!  Na metwe bɛ nwo nungule kɛ Nyamenle la, ɔluakɛ mebɔ ɛwɔkɛ kɛ megya bɛ meamaa nrenyia ko na meava bɛ meamaa Kelaese kɛ bɛlɛra mɔɔ ɛnze nrenyia na ɔ nwo te la.+  Noko mesulo kɛ wɔ adenle bie azo, kɛ mɔɔ ɛwɔlɛ ne luale nrɛlɛbɛ adenle zo bɛlɛbɛlale Yive la,+ bɛbazɛkye bɛ adwenle wɔ nɔhalɛlilɛ nee anwodelɛ* mɔɔ fɛta Kelaese la anwo.+  Na kɛ mɔɔ ɔde la, saa awie baka Gyisɛse fofolɛ bie anwo edwɛkɛ wɔ mɔɔ yɛhanle ɔ nwo edwɛkɛ la anzi, anzɛɛ bɛnyia sunsum fofolɛ bie wɔ mɔɔ bɛnyianle ye la anzi, anzɛɛ edwɛkpa fofolɛ wɔ mɔɔ bɛnyianle la anzi a,+ bɛdie ye bɛto nu ndɛndɛ.  Na meze kɛ bɛ ɛzoanvolɛma kpalɛ ne mɔ ɛndɛla me wɔ debie biala anu.+  Noko saa me nloa yɛɛ ɛtɛtele bɔbɔ a,+ tɛ Nyamenle anwo ndelebɛbo nu ɔ; nɔhalɛ nu, yɛlale ɛhye ali wienyi yɛhilele bɛ wɔ adenle biala nee debie biala anu.  Anzɛɛ kɛmɔ membɛlɛle me nwo aze amaa bɛamaa bɛ zo la ati menyɛle ɛtane ɔ, anzɛɛ kɛmɔ menvale anyelielɛ menganle Nyamenle anwo edwɛkpa ne mengilele bɛ na meanlie bɛ ɛhwee la ati ɔ?+  Noko menliele moalɛ* menvile asafo gyɛne ɛkɛ na ɔle kɛ asɛɛ menwuale bɛ la, amaa meazonle bɛmɛ.+  Mekɛ mɔɔ mewɔ bɛ nwo lɔ na mengyianle la, meanyɛ adesoa meammaa awie biala, ɔluakɛ mediema mɔɔ vi Masidonea rale la rɛlɛle me ninyɛne mɔɔ mengyianle nwolɛ la bɛmaanle ɔbole zo.+ Ɛhɛe, wɔ adenle biala anu meanyɛ adesoa meammaa bɛ na mebahɔ zo meayɛ ye zɔ.+ 10  Mekɛ ala mɔɔ Kelaese anwo nɔhalɛ ne wɔ me nu la, menrɛgyakyi me nwo ɛdulɛ+ wɔ Akaya maanzinli ne mɔ anu ɛlɛ. 11  Duzu ati ɔ? Menlɛ bɛ nwo ɛlɔlɛ ɔ? Nyamenle ze kɛ melɛ bɛ nwo ɛlɔlɛ. 12  Noko mɔɔ melɛyɛ la, mebahɔ zo meayɛ,+ amaa bɛdabɛ mɔɔ bɛkpondɛ debie bɛagyinla zo bɛadu bɛ nwo kɛ bɛ nee yɛ sɛ* la annyia debie angyinla zo. 13  Ɔluakɛ menli ɛhye mɔ le ɛzoanvolɛma alane, gyimayɛvoma adalɛ, bɛyɛ bɛ nwo kɛ bɛle Kelaese ɛzoanvolɛma.+ 14  Na ɔnyɛ nwanwane ɔluakɛ Seetan bɔbɔ kɔ zo yɛ ɔ nwo kɛ wienyi nu anwumabɔvolɛ.+ 15  Ɔti saa ye azonvolɛ noko kɔ zo yɛ bɛ nwo kɛ tenlene azonvolɛ a, ɔnyɛ ɛzulolɛ biala. Noko ɔbawie bɛ kɛ mɔɔ bɛ gyima ne mɔ de la.+ 16  Mesi zolɛ bieko: Mmamaa awie biala dwenle kɛ mende edwɛkɛ bo. Noko saa bɛbu me zɔhane bɔbɔ a, bɛlie me kɛ awie mɔɔ ɛnde edwɛkɛ bo, amaa medame noko meadu me nwo ekyii. 17  Na mɔɔ melɛka ye kɛkala la, menga ye kɛ mɔɔ Awulae kɛha la, emomu kɛ awie mɔɔ ɛnde edwɛkɛ bo na ɔfa anwodozo ɔtu ɔ nwo la. 18  Kɛmɔ menli dɔɔnwo ɛlɛfa ewiade ye anu ninyɛne adu bɛ nwo la ati, medame noko mebadu me nwo. 19  Kɛmɔ “bɛte edwɛkɛ bo” somasoma la ati, bɛfa anyelielɛ bɛdie bɛdabɛ mɔɔ bɛnde edwɛkɛ bo la. 20  Nɔhalɛ nu, bɛdie awie biala mɔɔ ɔfa bɛ ɔyɛ ngɛkɛlɛ, awie biala mɔɔ sisi bɛ, awie biala mɔɔ sa bɛ die mɔɔ bɛlɛ, awie biala mɔɔ memaa ɔ nwo zo kile bɛ, nee awie biala mɔɔ kpakyekpakye bɛ nye zo la bɛto nu. 21  Ɔyɛ yɛ nyiane kɛ yɛlɛka ɛhye, kɛ asɛɛ yɛyɛle ye bɛtɛɛyɛlɛ nu la. Noko saa bie mɔ fa akɛnrazilɛ yɛ debie a—melɛtendɛ kɛ awie mɔɔ ɛnlɛ ndelebɛbo la—medame noko mefa akɛnrazilɛ meyɛ bie. 22  Bɛle Hibuluma ɔ? Medame noko zɔhane ala.+ Bɛle Yizilayɛma ɔ? Medame noko zɔhane ala. Bɛle Ebileham abozoamra ɔ? Medame noko zɔhane ala.+ 23  Bɛle Kelaese azonvolɛ ɔ? Meye ɔ nloa kɛ awie mɔɔ ɛzɛ la, mele ye kpalɛ metɛla bɛ: Meyɛ gyima dɔɔnwo,+ bɛdo me efiade fane dɔɔnwo,+ bɛbo me fane kɛyɛ nyɛ, yɛɛ ɔhale me nee ewule fane dɔɔnwo.+ 24  Dwuuma ɛbila me mbaka 39 fane nnu,+ 25  bɛbila me empele fane nsa,+ bɛzi me awolɛ ko,+ mebutu nyevile nu fane nsa,+ meli alehyenlɛ nee aledwolɛ wɔ nyevile kunlu; 26  adendulɛ dɔɔnwo anu, azule nye esiane nu, nwule avinli esiane nu, me maanlema avinli esiane nu,+ maanle maanle ne anu esiane nu,+ suakpole zo esiane nu,+ fienemgbole nu esiane nu, nyevile nye esiane nu, mediema alane avinli esiane nu, 27  gyima ɛsesebɛ nee ɛvɛlɛ nu, nɔɔzo nafelɛ ɛsololɛ nu,+ ɛhɔne nee nzuhɔne nu,+ yɛbua yɛla fane dɔɔnwo,+ ɛyɛlɛ ɛhu me yɛɛ melɛ me nwo zɔ ɛlɛ. 28  Ninyɛne ɛhye mɔ kɔsɔɔti anzi, debie bie wɔ ɛkɛ mɔɔ ɔgyegye me alehyenlɛ biala a:* asafo ne mɔ amuala anwo adwenleadwenle.+ 29  Nwane a le bɛtɛɛ mɔɔ medame noko meanyɛ bɛtɛɛ a? Nwane a bɛmaa yekpo aze mɔɔ meanva ɛya a? 30  Saa ɔwɔ kɛ metu me nwo a mebadu me nwo wɔ ninyɛne mɔɔ kile kɛ mele bɛtɛɛ la anwo. 31  Awulae Gyisɛse ɔ Ze nee ye Nyamenle ne, Ahenle mɔɔ ɔwɔ kɛ bɛye ye ayɛlɛ dahuu la, ze kɛ tɛ adalɛ a melɛbɔ a. 32  Mekɛ mɔɔ mewɔ Damasekɛse la, Belemgbunli Alɛtase amɛnlado ne vale sinzavolɛma gyinlegyinlanle suakpole ne nlenkɛ mgbole ne mɔ anloa kɛ bɛhye me, 33  noko bɛvale me bɛziele kɛndɛne nu bɛdwulale me aze wɔ suakpole ne bane ne nvɛnzɛlɛ bie anu,+ na ɔ sa anga me.

Ɔbodwɛkɛ

Anzɛɛ “nwuanzanwuanzayɛlɛ.”
Giliki aneɛ nu, “ninyɛne.”
Anzɛɛ “yɛ gyima ko.”
Anzɛɛ “mɔɔ megyi ɔ nloa alehyenlɛ biala a.”