Mɔɔ Tɔ Zo Nwiɔ Kɔmaa Kɔlentema 10:1-18
10 Medame Pɔɔlo, akee mefa Kelaese bɛtɛɛyɛlɛ nee atiakunlukɛnlɛma meazɛlɛ bɛ,+ medame mɔɔ bɛse mewɔ bɛ nwo lɔ a menle awie+ noko menle bɛ nwo lɔ a melɛ bɛ nwo akɛnrazilɛ la.+
2 Mesɛlɛ kɛ saa meba bɛ nwo lɔ a, menrɛva akɛnrazilɛ me nee bɛ ɛnrɛli ye ɛsesebɛ kɛ mɔɔ mekpondɛ kɛ meyɛ metia bɛdabɛ mɔɔ bɛse yɛfa ewiade adwenle a yɛbɔ yɛ ɛbɛla la.
3 Na yɛlua nwonane nu ɛdeɛ, noko yɛngɔ konle wɔ nwonane nu.
4 Ɔluakɛ yɛ akodeɛ ne mɔ ɛnle nwonane nu ɛdeɛ,+ noko Nyamenle maa bɛyɛ se+ na yɛfa yɛtudu ninyɛne mɔɔ ɛsosɔ ndinli kpalɛ la.
5 Na yɛlɛtudu nzuzulɛ nee debie biala mɔɔ kpogya mɔɔ bɛmaa ye zo bɛtia Nyamenle anwo ndelebɛbo la,+ yɛɛ yɛlɛdi nzuzulɛ biala azo konim yɛamaa yeadie Kelaese;
6 na yɛziezie yɛ nwo kɛ bɛ tieyɛ ne di munli ala a, yɛbahwe awie biala mɔɔ yɛ anzosesebɛ la anzo.+
7 Bɛnea ninyɛne ɛnyelɛzo bɛbua ndɛne. Saa awie lɛ anwodozo wɔ ye nu kɛ ɔle Kelaese ɛdeɛ a, bɛmaa ɔzuzu nɔhalɛ edwɛkɛ ɛhye anwo bieko: Kɛ mɔɔ ɔle Kelaese ɛdeɛ la, zɔhane ala a yɛdayɛ noko yɛle a.
8 Na saa mefa tumi ne mɔɔ Awulae ɛva ɛmaa yɛ kɛ yɛva yɛmaa bɛ anwosesebɛ na yɛmmafa yɛsɛkye bɛ la metu me nwo memaa ɔbo zo ekyii bɔbɔ a,+ ɔnrɛyɛ me nyiane.
9 Na mengulo kɛ ɔyɛ kɛ asɛɛ mefa me ngɛlata ne mɔ meanwunlonwunla bɛ.
10 Ɔluakɛ bɛka kɛ: “Ye ngɛlata ne mɔ anloa yɛ se yɛɛ tumi wɔ nu, noko saa ɔwɔ ɛke a, ɔle bɛtɛɛ yɛɛ ye edwɛkɛ ɛngyinla kpɔkɛ zo.”
11 Bɛmaa sonla zɔhane ɛnwu ye kɛ mɔɔ yɛnle bɛ nwo lɔ a yɛka ye wɔ yɛ ngɛlata ne mɔ anu la, yemɔ a yɛwɔ ɛkɛ a yɛbayɛ a.+
12 Yɛnzi yɛ kɛnra yɛmbu yɛ nwo bie anzɛɛ yɛnva yɛ nwo yɛntoto menli mɔɔ bɛkanvo bɛ nwo la anwo.+ Noko saa bɛfa bɛ nwo bɛtoto awie mɔ anwo, na bɛnea awie mɔ bɛfa bɛ bɛtoto bɛ nwo a, ɔkile kɛ bɛnlɛ ndelebɛbo.+
13 Noko, yɛnrɛva ninyɛne mɔɔ yɛanyɛ la yɛnrɛdu yɛ nloa anu, gyima mɔɔ Nyamenle ɛva* ɛmaa yɛ kɛ yɛyɛ na yedwu bɛ nwo nehane la a yɛfa yɛtu yɛ nloa anu a.+
14 Nɔhalɛ nu, yɛanyɛ debie mɔɔ Nyamenle anva anwula yɛ sa nu la wɔ mekɛ mɔɔ yɛrale bɛ nwo lɔ la, ɔluakɛ yɛdayɛ a yɛlimoale yɛbɔle Kelaese anwo edwɛkpa ne nolo yɛhilele bɛ a.+
15 Kyɛkyɛ, yɛnva gyima mɔɔ awie ɛyɛ ye wɔ ɛleka mɔɔ bɛanva bɛammaa yɛ la yɛndu yɛ nloa anu, noko yɛ nye la kɛ bɛ diedi ɛlɛyɛ kpole la, gyima mɔɔ yɛyɛle la bayɛ kpole wɔ yɛ azɛlɛsinli ne anu. Na akee yɛ gyima ne ayɛ kpole kpalɛ,
16 amaa yɛabɔ edwɛkpa ne nolo yɛahile maanle maanle fofolɛ, na yɛanva gyima mɔɔ awie ɛyɛ ye dɛba wɔ ye azɛlɛsinli nu la yɛandu yɛ nloa anu.
17 “Mɔɔ ɔtu ɔ nwo la, maa ɔdu ɔ nwo wɔ Gyihova* anu.”+
18 Ɔluakɛ tɛ mɔɔ kanvo ɔ nwo la a sɔ ɛnyelɛ a,+ emomu mɔɔ Gyihova* kanvo ye la ɔ.+
