Edwɛkɛsisilɛ Mɔɔ Tɔ Zo Nwiɔ 9:1-31

  • Hyiba ɔbahyema ne rale Sɔlɔmɔn anwo ɛkɛ (1-12)

  • Sɔlɔmɔn anwonyia (13-28)

  • Sɔlɔmɔn ewule (29-31)

9  Na Hyiba ɔbahyema ne+ dele Sɔlɔmɔn anwo edwɛkɛ, ɔti ɔrale Gyɛlusalɛm kɛ ɔfa kpuya mɔɔ kye adwenle kpalɛ la* yeazɔ Sɔlɔmɔn yeanlea. Ɔvale menli dɔɔnwo ɔlile ɔ nzi, ɔvale afunlumu mɔɔ zozo balesam nwole nee nvutuke dɔɔnwo kpalɛ+ yɛɛ awolɛ mɔɔ sonle bolɛ la ɔrale. Ɔrale Sɔlɔmɔn ɛkɛ na ɔhanle debie biala mɔɔ la ye ahonle nwo la anwo edwɛkɛ ɔhilele ye.+  Akee Sɔlɔmɔn buale ye kpuya ne mɔ amuala. Debie biala anyɛ se somaa ammaa* Sɔlɔmɔn kɛ ɔbahilehile nu yeahile ye.  Mɔɔ Hyiba ɔbahyema ne nwunle Sɔlɔmɔn nrɛlɛbɛ ne,+ sua ne mɔɔ yezi,+  ye ɛkponle zo aleɛ,+ kɛzi ye sonvolɛma tɛnla aze wɔ ɛkponle ne anwo, menli mɔɔ siezie ye aleɛ nee bɛ adɛladeɛ, ye nzasuvolɛma nee bɛ adɛladeɛ nee ɛyelalɛ afɔle mɔɔ ɔbɔ ye wɔ Gyihova sua nu dahuu la,+ ɔyɛle ye azibɛnwo na ɔ nloa hale nwolɛ.*  Ɔti ɔzele belemgbunli ne kɛ: “Ninyɛne mɔɔ wɔyɛ* nee wɔ nrɛlɛbɛ ne anwo edwɛkɛ mɔɔ mendele ye wɔ me maanle nu la le nɔhalɛ.  Noko meanlie mɔɔ mendele la meanli kɔkpula kɛ medame mumua ne meva me nye meranwu ye la.+ Na nea! Mɔɔ bɛhanle bɛhilele me la ɛndwu wɔ nrɛlɛbɛ kpole ne foa ko bɔbɔ.+ Ɛle sonlakpole ɛtɛla mɔɔ mendele la bɔbɔ.+  Anyelielɛ a le wɔ menli ne, yɛɛ anyelielɛ a le wɔ sonvolɛma mɔɔ gyinla ɛ nyunlu dahuu tie wɔ nrɛlɛbɛ ne la!  Ayɛlɛyelɛ ɛha Gyihova wɔ Nyamenle ne, mɔɔ anye ɛlie ɛ nwo na yeva wɔ yedɛnla ye belemgbunli ebia ne azo kɛ ɛyɛ Gyihova wɔ Nyamenle ne belemgbunli la. Kɛmɔ wɔ Nyamenle ne kulo Yizilayɛma,+ na ɔkpondɛ kɛ bɛtɛnla ɛkɛ ne dahuu la ati a, yezie wɔ belemgbunli kɛ ɛbua ndɛne pɛlepɛle na ɛli tenleneyɛlɛ nzi a.”  Akee ɔmaanle belemgbunli ne nvutuke talɛnte* 120,+ yɛɛ balesam nwole dɔɔnwo kpalɛ nee awolɛ mɔɔ sonle bolɛ. Balesam nwole mɔɔ Hyiba ɔbahyema ne vale maanle Belemgbunli Sɔlɔmɔn la, bɛanva bieko zɛhae bɛamba ɛlɛ.+ 10  Haelam sonvolɛma nee Sɔlɔmɔn sonvolɛma mɔɔ vale nvutuke vile Ofɛ+ rale la eza vale alegum mbaka nee awolɛ mɔɔ sonle bolɛ la rale.+ 11  Belemgbunli ne vale alegum mbaka ne mɔ yɛle Gyihova sua ne+ nee belemgbunli sua ne* kpolike ne mɔ,+ yɛɛ ɔvale bie ɔyɛle haape nee getaa* ɔmaanle edwɛndovoma ne mɔ.+ Ɛnee bɛtɛnwunle debie zɛhae bie ɛlɛ wɔ Dwuda azɛlɛ zo. 12  Belemgbunli Sɔlɔmɔn noko vale debie biala mɔɔ Hyiba ɔbahyema ne hulole na ɔbizale la ɔmaanle ye, ɔbo mɔɔ ɔvale ɔrɛlɛle belemgbunli ne la azo.* Akee ɔvile ɛkɛ na ɔ nee ye sonvolɛma ne mɔ ziale hɔle ye maanle nu.+ 13  Na nvutuke mɔɔ Sɔlɔmɔn nyianle ye wɔ ɛvolɛ ko anu la ɛlomboɛ le nvutuke talɛnte 666,+ 14  eza adenduvoma mɔɔ di gua nee gualilɛma nee Arelabe arelemgbunli kɔsɔɔti yɛɛ amɛnladoma mɔɔ wɔ azɛlɛ ne azo la noko vale nvutuke nee dwɛtɛ fufule rɛlɛle Sɔlɔmɔn.+ 15  Belemgbunli Sɔlɔmɔn yɛle nvutuke mɔɔ bɛfonla nu la enyinlike mgbole 200+ (bɛvale nvutuke hyikɛle* 600 mɔɔ bɛfonla nu la a bɛyɛle enyinlike ko biala a)+ 16  yɛɛ nvutuke mɔɔ bɛfonla nu la enyinlike ngyikyi* 300 (bɛvale nvutuke mena* nsa a bɛyɛle enyinlike ekyi ko biala a). Akee belemgbunli ne vale guale Lɛbanɔn Ɛhoayelɛ Sua ne anu.+ 17  Eza belemgbunli ne vale ɛzɛlɛ* yɛle belemgbunli ebia kpole bie na ɔholole nvutuke tagyee ɔguale nwolɛ.+ 18  Ɛnee bɛyɛ kpolike agyakɛ nsia mɔɔ bɛfo zo bɛkɔ belemgbunli ebia ne anwo, yɛɛ bɛ gyakɛ abo nvutuke ebia beta belemgbunli ebia ne, na ebia ne lɛ ɔ sa nwiɔ mɔɔ bɛfa bɛ sa bɛgua zo a, yɛɛ awenade nwiɔ+ gyigyi ɔ sa nwiɔ ne mɔ anwo. 19  Awenade 12+ gyigyi kpolike ne mɔɔ agyakɛ le nsia la azo, ko gyi kpolike agyakɛ nsia ne bɛne zo yɛɛ ko gyi fema zo. Belemgbunlililɛ gyɛne biala ɛtɛyɛle debie zɛhae bie ɛlɛ. 20  Belemgbunli Sɔlɔmɔn kanrɛlɛ mɔɔ ɔno nuhua la amuala le nvutuke, yɛɛ ninyɛne kɔsɔɔti mɔɔ wɔ Lɛbanɔn Ɛhoayelɛ Sua ne anu la bɛvale nvutuke tagyee a bɛyɛle a. Debie biala ɛnle ɛkɛ mɔɔ bɛvale dwɛtɛ fufule bɛyɛle a, ɔluakɛ wɔ Sɔlɔmɔn mekɛ zo ɛnee bɛbu dwɛtɛ fufule kɛ ɔnle ɛhwee.+ 21  Ɔluakɛ ɛnee Haelam sonvolɛma ne+ fa belemgbunli ne meli ne mɔ kɔ Tahyehye.+ Ɛvolɛ nsa biala, Tahyehye meli ne mɔ fa nvutuke nee dwɛtɛ fufule, ɛzɛlɛ,*+ akatia* yɛɛ kokokyinlaka ba. 22  Ɔti Belemgbunli Sɔlɔmɔn nwunle nrɛlɛbɛ kpole na ɔnyianle anwonyia dɔɔnwo ɔdɛlale arelemgbunli gyɛne kɔsɔɔti mɔɔ wɔ azɛlɛ ye azo la.+ 23  Na arelemgbunli mɔɔ wɔ azɛlɛ ne azo la kɔsɔɔti rale Sɔlɔmɔn anyunlu kɛ bɛbadie nrɛlɛbɛ ne mɔɔ nɔhalɛ Nyamenle ne ɛva ɛwula ye ahonle nu la bie.+ 24  Bɛ nuhua ko biala vale ahyɛlɛdeɛ—ninyɛne mɔɔ bɛva dwɛtɛ fufule nee nvutuke bɛyɛ, adɛladeɛ,+ konle tɛladeɛ, balesam nwole, mgbɔnwɔ yɛɛ mgbɔnwɔndua* rale—na ɛhye hɔle zo ɛvolɛ biala. 25  Na ɛnee Sɔlɔmɔn lɛ tunli 4,000 maa ye mgbɔnwɔ nee ye ehwili ne mɔ yɛɛ mgbɔnwɔ* 12,000,+ na ɔvale bɛ ɔziele ehwili azuamgbole ne mɔ azo nee ɛleka mɔɔ bikye belemgbunli ne la wɔ Gyɛlusalɛm.+ 26  Na ɔlile arelemgbunli kɔsɔɔti anwo zo tumi, ɔvi Azule* ne anloa mɔɔ kɔ Filisitiama azɛlɛ ne azo too kɔdwu Yigyibiti ɛweɛne zo la.+ 27  Belemgbunli ne maanle dwɛtɛ fufule bule Gyɛlusalɛm kɛ awolɛ la, yɛɛ sida mbaka bule kɛ sikamɔ mbaka mɔɔ wɔ Hyifɛla la.+ 28  Na bɛvale mgbɔnwɔ bɛvile Yigyibiti+ nee azɛlɛ mɔɔ ɛha la kɔsɔɔti azo bɛrɛlɛle Sɔlɔmɔn. 29  Sɔlɔmɔn anwo tetedwɛkɛ mɔɔ ɛha la,+ ɔvi mɔlebɛbo kɔdwu awieleɛ, asoo bɛtɛkɛlɛle bɛ wɔ ngapezonli Neetan edwɛkɛ ne,+ Hyaelonli Ahaegya ngapezo ne,+ ɛnyelɛzodeɛnwunlɛnli Yedo ɛnyelɛzodeɛnwunlɛ kɛlɛtokɛ ne+ mɔɔ fale Nibate ara Gyɛlɔbowam+ anwo la anu? 30  Sɔlɔmɔn lile Yizilayɛma kɔsɔɔti anwo zo belemgbunli ɛvolɛ 40 wɔ Gyɛlusalɛm. 31  Akee Sɔlɔmɔn nee ye nenyia mɔ hɔlale. Yemɔti bɛziele ye wɔ ye papa Devidi Suakpole ne azo;+ na ɔ ra Rilihɔbowam ralile ye agya yɛle belemgbunli.+

Ɔbodwɛkɛ

Anzɛɛ “ɔfa agyebɛ.”
Hibulu aneɛ nu, “anvea.”
Hibulu aneɛ nu, “sunsum bieko anga ye nu.”
Anzɛɛ “Wɔ edwɛkɛ.”
Talɛnte ko le kg 34.2. Nea Mok. B14.
Anzɛɛ “belemgbunli sua nu.”
Tete ɛdeɛ ne le ngakyile fi ɛnɛ mekɛ ye getaa nwo.
Anzɛɛ ɔkola ɔkile, “ɔbokale ahyɛlɛdeɛ mɔɔ ɔbayɛ kɛ mɔɔ ɔvale ɔrale la anwo.”
Hyikɛle ko le g 11.4. Nea Mok. B14.
Enyinlike ngyikyi mɔɔ ɛdatovoma ta dɛ ye bɛ sa nu.
Wɔ Hibulu Ngɛlɛlera ne anu mena ko le g 570. Nea Mok. B14.
Anzɛɛ “ɛzonle mɛne.”
Anzɛɛ “ɛzonle mɛne.”
Anzɛɛ “motimo.”
Asoaso nyinli nee ɛkpɔnwɔ belɛ a wole ye a.
Anzɛɛ “mgbɔnwɔkavoma.”
Ɛhye kile, Yufileti.