Edwɛkɛsisilɛ Mɔɔ Tɔ Zo Nwiɔ 8:1-18
8 Wɔ ɛvolɛ 20 ne mɔɔ nuhua a Sɔlɔmɔn zile Gyihova sua ne nee ɔdaye mumua ne ye sua ne wiele la anu,+
2 Sɔlɔmɔn kyekyele azuamgbole ne mɔ mɔɔ Haelam+ vale maanle ye la bieko, na Sɔlɔmɔn maanle Yizilayɛma* dɛnlanle ɛkɛ.
3 Eza Sɔlɔmɔn hɔle Heemate-zoba na ɔhonle ɔvale.
4 Akee ɔkyekyele* Tademɔ wɔ fienemgbole ne anu nee azuamgbole mɔɔ bɛfa ninyɛne bɛsie ɛkɛ+ mɔɔ ɔkyekyele bɛ wɔ Heemate+ la amuala.
5 Eza ɔkyekyele Sɔlɔ Bɛte-hɔlɔn+ nee Nyiakɛ Bɛte-hɔlɔn,+ azuamgbole mɔɔ bɛlie nwolɛ bane, bɛlɛ nlenkɛ mgbole mɔɔ mbulalɛ gua bɛ nzi,
6 nee Beeyalate+ yɛɛ azuamgbole kɔsɔɔti mɔɔ Sɔlɔmɔn sie ye ninyɛne wɔ zo, ehwili azuamgbole,+ mgbɔnwɔkavoma azuamgbole nee debie biala mɔɔ Sɔlɔmɔn hulole kɛ ɔsi ye wɔ Gyɛlusalɛm, Lɛbanɔn nee azɛlɛ mɔɔ wɔ ye belemgbunlililɛ ne anu la amuala azo la.
7 Menli kɔsɔɔti mɔɔ hale mɔɔ bɛvi Hɛtema, Amɔlema, Pilɛzema, Havaema yɛɛ Gyibɛsema+ anu mɔɔ bɛmboka Yizilayɛma anwo la,+
8 bɛ bo zo amra mɔɔ hale azɛlɛ ne azo—menli mɔɔ Yizilayɛma angu bɛ la+—Sɔlɔmɔn maanle bɛyɛle akɛlɛ gyima too badwu ɛnɛ.+
9 Noko Sɔlɔmɔn ammaa Yizilayɛnli biala anyɛ ye gyima ne bie kɛ akɛlɛ,+ ɔluakɛ ɛnee bɛle ye kovolɛma, sogya mgbanyima yɛɛ mgbanyima mɔɔ nea ye ehwilikavoma nee mgbɔnwɔkavoma anwo zo la.+
10 Ɛnee Belemgbunli Sɔlɔmɔn lɛ amɛnlado mgbanyima 250 mɔɔ nea menli ne anwo zo a.+
11 Eza Sɔlɔmɔn yele Falo ara raalɛ ne+ vile Devidi Suakpole ne azo rale sua mɔɔ yezi yemaa ye la anu,+ ɔluakɛ ɔhanle kɛ: “Ɔle me ye ɛdeɛ, noko ɔnle kɛ ɔtɛnla Belemgbunli Devidi sua nu ɛkɛ, ɔluakɛ ɛleka biala mɔɔ Gyihova Ɛlɛka ne ɛhɔ ye ɛlɛ la le nwuanzanwuanza.”+
12 Akee Sɔlɔmɔn bɔle ɛyelalɛ afɔle+ maanle Gyihova wɔ Gyihova afɔlemokyea ne+ mɔɔ yezi ye wɔ abenlana ne anyunlu la azo.+
13 Kɛ mɔɔ ɔwɔ kɛ bɛyɛ ye dahuu la, ɔbɔle afɔle ne kɛ mɔɔ Mosisi hilele kɛ bɛbɔ ye wɔ Ɛnwomenlelielɛ kenle,+ siane fofolɛ+ yɛɛ ɛvoyialilɛ ne mɔ anu fane nsa ɛvolɛ biala la+—Paano Mɔɔ Mgbɔvonle Ɛnle Nu Ɛvoyia ne,+ Dapɛne Dapɛne Ɛvoyia ne+ yɛɛ Kpɔda Bo Ɛdɛnlanlɛ* Ɛvoyia ne.+
14 Eza ɔyele ɛsɔfo ekpunli ekpunli ne mɔ+ ɔmaanle bɛyɛle bɛ gyima ne kɛ mɔɔ ye papa Devidi hyehyɛle la, na ɔmaanle Livaema ne gyinlanle bɛ bo zo ne yele Nyamenle ayɛlɛ+ na bɛzonlenle wɔ ɛsɔfo ne mɔ anyunlu kɛ mɔɔ ɔwɔ kɛ bɛyɛ ye kenle ko biala la, na ɔhyɛle nlenkɛ mgbole sinzavolɛma ne anu ekpunli ekpunli ɔmaanle nlenkɛ mgbole ngakyile ne mɔ,+ ɔluakɛ kɛ Devidi, nɔhalɛ Nyamenle ne sonla ne hanle kɛ bɛyɛ ye la ɛne.
15 Na bɛlile mɛla ne mɔɔ belemgbunli ne vale maanle ɛsɔfoma ne nee Livaema ne mɔɔ fale edwɛkɛ biala anzɛɛ ninyɛnezielɛ ɛleka ne mɔ anwo la azo.
16 Ɔti bɛyɛle Sɔlɔmɔn gyima ne anwo ngyehyɛleɛ kpalɛ, ɔvi kenle mɔɔ bɛwulale Gyihova sua ne adiabo+ kɔkpula kɛ bɛwiele la. Ɔti bɛwiele Gyihova sua ne.+
17 Mekɛ zɔhane a Sɔlɔmɔn hɔle Yizeɔn-gibɛ+ na ɔhɔle Yilɔto+ mɔɔ wɔ ɛnweazo wɔ Yidɔm azɛlɛ zo la a.+
18 Haelam+ maanle ɔdaye mumua ne ye sonvolɛma vale meli nee menli mɔɔ ze nyevile zo gyima kpalɛ la hɔmaanle ye. Bɛ nee Sɔlɔmɔn sonvolɛma ne hɔle Ofɛ+ na bɛhɔvale nvutuke talɛnte* 450+ bɛvile ɛkɛ ne bɛrɛlɛle Belemgbunli Sɔlɔmɔn.+
Ɔbodwɛkɛ
^ Hibulu aneɛ nu, “Yizilayɛ amra mrenyia.”
^ Anzɛɛ “ɔkyekyele ye bieko.”
^ Anzɛɛ “Kpɔda Mɔɔ Ɔngyɛ Na Bɛadudu.”
