Edwɛkɛsisilɛ Mɔɔ Tɔ Zo Nwiɔ 7:1-22

  • Gyihova anyunlunyia ne yile ɛzonlenlɛsua ne anu tɛkɛɛ (1-3)

  • Azoyilalɛ ne anwo ɛvoyia (4-10)

  • Gyihova yele ɔ nwo hilele Sɔlɔmɔn (11-22)

7  Na mɔɔ Sɔlɔmɔn wiele asɔne ne yɛ ala la,+ senle vi anwuma+ rayelale ɛyelalɛ afɔlebɔdeɛ ne nee afɔlebɔdeɛ ne mɔ, na Gyihova anyunlunyia ne yile sua ne anu.+  Ɛsɔfo ne mɔ angola angɔ Gyihova sua ne anu ɔluakɛ ɛnee Gyihova anyunlunyia ne ɛyi Gyihova sua ne anu.+  Mɔɔ senle ne vi anwuma rale na Gyihova anyunlunyia ne razinzele sua ne azo la, Yizilayɛma amuala nwunle ye, na bɛbɔle bɛ ti aze bɛbutubutule bɛ nyunlu aze wɔ alienwo ɛkɛ ne mɔɔ ɛnee bɛdo ɛkɛ ne la na bɛhotole bɛyɛle Gyihova mo, “ɔluakɛ ɔle kpalɛ; ye ɛlɔlɛ kpundii ne wɔ ɛkɛ ne dahuu.”  Akee belemgbunli ne nee menli ne amuala bɔle afɔle wɔ Gyihova anyunlu.+  Belemgbunli Sɔlɔmɔn vale nlankɛ 22,000 nee mboane 120,000 bɔle afɔle. Ɔti belemgbunli ne nee menli ne amuala yilale nɔhalɛ Nyamenle ne sua ne azo.+  Ɛnee ɛsɔfo ne mɔ gyigyi ɛleka mɔɔ bɛyɛ bɛ gyima ne la, kɛ mɔɔ Livaema mɔɔ dedɛ edwɛnebɔlɛ ninyɛne mɔɔ bɛfa bɛbɔ edwɛne bɛmaa Gyihova la yɛle la.+ (Belemgbunli Devidi yɛle edwɛnebɔlɛ ninyɛne ɛhye mɔ kɛ bɛva bɛyɛ Gyihova mo—“ɔluakɛ ye ɛlɔlɛ kpundii ne wɔ ɛkɛ ne dahuu”—wɔ mekɛ mɔɔ Devidi nee bɛ* ɛlɛye ayɛlɛ la.) Na ɛsɔfo ne mɔ bɔle aweɛne ndendenle ne mɔ kpole+ wɔ bɛ nyunlu ɛkɛ, na ɛnee Yizilayɛma amuala gyi nzisi.  Akee Sɔlɔmɔn dele alienwo avinli ɛkɛ ne mɔɔ wɔ Gyihova sua ne anyunlu la anwo, ɔluakɛ ɛnee ɔwɔ kɛ ɔbɔ ɛyelalɛ afɔle+ nee anzodwolɛ ɛnlome afɔle wɔ ɛkɛ, ɔluakɛ Sɔlɔmɔn angola ambɔ ɛyelalɛ afɔle, ma afɔle+ yɛɛ ɛnlome afɔle ne mɔ+ wɔ kɔbele afɔlemokyea ne mɔɔ ɔyɛle la azo.+  Mekɛ zɔhane Sɔlɔmɔn nee Yizilayɛma kɔsɔɔti lile ɛvoyia ne kenle nsuu,+ menli dɔɔnwo kpalɛ mɔɔ vi Libo-heemate* too kɔdwu Yigyibiti Azudenle* ne anloa la rale.+  Noko wɔ kenle mɔtwɛ ne azo,* bɛyɛle nyianu titili bie,+ ɔluakɛ bɛvale kenle nsuu bɛyilale afɔlemokyea ne azo yɛɛ bɛlile ɛvoyia ne noko kenle nsuu. 10  Akee wɔ kenle mɔɔ tɔ zolɛ 23 wɔ siane nsuu ne anu la, ɔmaanle menli ne vale anyelielɛ hɔle bɛ azua nu+ na bɛlile fɛlɛko wɔ bɛ ahonle nu ɔlua kpalɛ mɔɔ Gyihova ɛyɛ ɛmaa Devidi nee Sɔlɔmɔn yɛɛ ye menli Yizilayɛma la ati.+ 11  Ɔti Sɔlɔmɔn wiele Gyihova sua ne nee belemgbunli sua ne si;+ na Sɔlɔmɔn wiele debie biala mɔɔ rale ye ahonle nu kɛ ɔyɛ ye wɔ Gyihova sua ne nee ɔdaye mumua ne ye sua ne anwo la bɔkɔɔ.+ 12  Akee Gyihova yele ɔ nwo hilele Sɔlɔmɔn+ wɔ nɔe ne na ɔzele ye kɛ: “Mede wɔ asɔneyɛlɛ ne, na meye ɛleka ɛhye memaa me nwo kɛ sua mɔɔ bɛbabɔ afɔle wɔ nu.+ 13  Saa meto anwuma anu na ezule andɔ, anzɛɛ memaa abɛbɛ badi azɛlɛ ne azo nzoleɛ, anzɛɛ memaa ewulenzane tɔ me menli ne avinli, 14  saa me menli ne mɔɔ me duma la bɛ nwo zo la+ bɛlɛ bɛ nwo aze+ na bɛyɛ asɔne bɛkpondɛ me nyunlu ɛlolɛ na bɛtwe bɛ nwo bɛfi bɛ ndenle ɛtane ne mɔ anwo a,+ yemɔ mebadie bɛ wɔ anwuma nehane na meava bɛ ɛtane meahyɛ bɛ na meayɛ bɛ azɛlɛ ne boɛ.*+ 15  Na mebabuke me nye na meayɛ ɛnzolɛ meadie asɔne mɔɔ bɛyɛ ye wɔ ɛke la.+ 16  Na kɛkala meye sua ɛhye yɛɛ meyɛ ye nwuanzanwuanza amaa me duma ne adɛnla ɛkɛ ne dahuu,+ na me nye bahɔ nwolɛ na yeala me ahonle nwo dahuu.+ 17  “Na wɔmɔ, saa ɛ nee me dua kɛ mɔɔ wɔ papa Devidi yɛle la na ɛyɛ debie biala mɔɔ meha mehile wɔ la, na ɛdi me adehilelɛ nee me ndɛnebualɛ zo a,+ 18  mebamaa wɔ belemgbunlililɛ ebia ne agyinla dahuu,+ kɛ mɔɔ me nee wɔ papa Devidi+ yɛle ngyekyeleɛ na menganle kɛ, ‘Ɛ bo zo amra ɛnrɛvi Yizilayɛ belemgbunli ebia ne azo ɛlɛ’ la.+ 19  Noko saa ɛtwe ɛ nwo na ɛkpo me ngyehyɛleɛ nee me mɛla ne mɔ mɔɔ meva memaa wɔ la na ɛkɔsonle nyamenle gyɛne na ɛbɔ ɛ ti aze ɛmaa bɛ a,+ 20  mebadu Yizilayɛma abo meavi azɛlɛ ne mɔɔ meva memaa bɛ la azo,+ na meaye sua ɛhye mɔɔ mede nwolɛ memaa me duma ne la meavi me nye zo, na mebamaa yeayɛ ɛzelekɛ debie* na bɛagolo bɛ nwo wɔ menli ne amuala anu.+ 21  Na sua ɛhye bayɛ ewula edukue. Awie biala mɔɔ ɛlɛpɛ nu la banlea ye azibɛnwo nu+ na yeaha kɛ, ‘Duzu ati a Gyihova ɛyɛ azɛlɛ ɛhye nee sua ɛhye zɛhae ɛ?+ 22  Akee bɛbaha kɛ, ‘Kɛmɔ bɛkpole Gyihova,+ bɛ nenyia mɔ Nyamenle ne mɔɔ yele bɛ vile Yigyibiti azɛlɛ zo la,+ na bɛhɔlile nyamenle gyɛne nzi na bɛbɔle bɛ ti aze bɛmaanle bɛ na bɛzonlenle bɛ la ati ɔ.+ Ɛhye ati a yemaa munzule ɛhye kɔsɔɔti ɛra bɛ nwo zo a.’”+

Ɔbodwɛkɛ

Ɔbayɛ kɛ Livaema anwo edwɛkɛ a ɔlɛka a.
Anzɛɛ “Heemate adenle zo.”
Anzɛɛ “Bɔnza.” Nea Edwɛkɛbohilelɛ.
Bɛlile ɛvoyia ne bɛwiele la na ye alehyenlɛ nu, anzɛɛ kenle 15 ne azo.
Hibulu aneɛ nu, “ayile.”
Hibulu aneɛ nu, “ɛrɛlɛ.”