Edwɛkɛsisilɛ Mɔɔ Tɔ Zo Nwiɔ 6:1-42

  • Sɔlɔmɔn dendɛle hilele menli ne (1-11)

  • Sɔlɔmɔn yɛle asɔne vale yilale zolɛ (12-42)

6  Mekɛ zɔhane Sɔlɔmɔn hanle kɛ: “Gyihova se ɔbadɛnla awozinli kabii nu.+  Kɛkala mezi sua kpole ɛhye memaa wɔ, sua mɔɔ ɛbadɛnla nu dahuu la.”+  Akee belemgbunli ne hakyile ɔ nye kɛ ɔyila Yizilayɛma amuala, wɔ mekɛ mɔɔ Yizilayɛma amuala gyigyi ɛkɛ ne la.+  Ɔhanle kɛ: “Ayɛlɛyelɛ ɛha Gyihova, Yizilayɛ Nyamenle ne, mɔɔ vale ɔ nloa bɔle me papa Devidi ɛwɔkɛ na ɔdaye yeva ɔ sa yeyɛ yemaa yera nu la kɛ,  ‘Ɔvi kenle mɔɔ menyele me menli ne menvile Yigyibiti azɛlɛ zo la, metɛyele suakpole bie wɔ Yizilayɛ mbusua kɔsɔɔti anu kɛ bɛzi sua wɔ ɛkɛ ne bɛmaa me duma ɛdɛnla ɛkɛ,+ yɛɛ metɛyele awie kɛ ɔyɛ me menli Yizilayɛma adekilevolɛ.  Noko mekpa Gyɛlusalɛm+ kɛ bɛli me duma ne eni wɔ ɛkɛ, yɛɛ mekpa Devidi kɛ ɔnlea me menli Yizilayɛma anwo zo.’+  Na ɛnee ɔwɔ me papa Devidi ahonle nu kɛ ɔsi sua yeamaa Gyihova, Yizilayɛ Nyamenle ne duma.+  Noko Gyihova zele me papa Devidi kɛ, ‘Ɛnee ɔwɔ wɔ ahonle nu kɛ ɛsi sua wɔamaa me duma, na ɔle kpalɛ kɛ ɛnyianle ɛhulolɛ ɛhye wɔ wɔ ahonle nu la.  Noko tɛ ɛdawɔ a ɛbazi sua ne a, na ɛ ra mɔɔ ɛbawo ye* la a bazi sua ne amaa me duma a.’+ 10  Gyihova ɛli ɛwɔkɛ mɔɔ ɔbɔle la azo, ɔluakɛ meli me papa Devidi agya na medɛnla Yizilayɛ belemgbunli ebia ne azo,+ kɛ mɔɔ Gyihova bɔle nwolɛ ɛwɔkɛ la.+ Eza mezi sua memaa Gyihova, Yizilayɛ Nyamenle ne duma, 11  na ɛkɛ ne a meva Ɛlɛka ne mɔɔ ngyekyeleɛ ne+ mɔɔ Gyihova nee ye menli Yizilayɛma yɛle gua nuhua la mezie a.” 12  Akee ɔdwazole ɔgyinlanle Gyihova afɔlemokyea ne anyunlu wɔ Yizilayɛma kɔsɔɔti anyunlu, na ɔdɛlɛle ɔ sa nu.+ 13  (Ɔluakɛ ɛnee Sɔlɔmɔn ɛyɛ kɔbele bama bie, na ɔvale ɔziele avinli wɔ alienwo ɛkɛ.+ Ye tendenle le kubit* nnu, ye tɛtɛlɛ le kubit nnu yɛɛ ye anwumahɔlɛ le kubit nsa; na ɔgyinlanle zolɛ.) Na ɔhotole Yizilayɛ asafo ne amuala anyunlu na ɔdɛlɛle ɔ sa nu wɔ anwomanyunlu,+ 14  na ɔhanle kɛ: “O Gyihova, Yizilayɛ Nyamenle, Nyamenle biala ɛnle kɛ ɛdawɔ wɔ anwuma anzɛɛ azɛlɛ ye azo, ɛdi wɔ ngyekyeleɛ zo na ɛda ɛlɔlɛ kpundii ali ɛkile wɔ azonvolɛ mɔɔ fa bɛ ahonle muala sonle wɔ la.+ 15  Wɔli ɛwɔkɛ mɔɔ ɛbɔle me papa Devidi,+ wɔ sonvolɛ ne la azo. Ɛvale ɛ nloa ɛbɔle ɛwɔkɛ ne, na ɛnɛ kenle ye ɛdawɔ mumua ne ɛ sa ɛmaa yera nu.+ 16  Ɔti, O Gyihova, Yizilayɛ Nyamenle, di ɛwɔkɛ mɔɔ ɛbɔle me papa Devidi, wɔ sonvolɛ ne la azo wɔ mekɛ mɔɔ ɛhanle kɛ: ‘Saa ɛ mra ne mɔ bɛanlea bɛ ndenle nu boɛ na bɛali me mɛla ne azo,+ kɛ mɔɔ wɔyɛ me ɛhulolɛdeɛ la a, anrɛɛ ɛ bo zo amra ɛnrɛvi Yizilayɛ belemgbunli ebia ne azo wɔ me nyunlu ɛlɛ.’+ 17  Zɔhane ati O Gyihova, Yizilayɛ Nyamenle, maa ɛwɔkɛ mɔɔ ɛbɔle wɔ sonvolɛ Devidi la ɛyɛ zɔ. 18  “Noko asoo amgba Nyamenle nee alesama badɛnla azɛlɛ ye azo?+ Nea! Anwuma, ɛhɛe, anwuma anwuma nehane bɔbɔ le ekyi kɛ ɛkɛzo lɔ;+ na akee sua ekyi ɛhye mɔɔ mezi la!+ 19  Akee tie wɔ sonvolɛ asɔneyɛlɛ nee ye modolɛ, O Gyihova me Nyamenle, na tie wɔ sonvolɛ ɛzunlɛ nee asɔneyɛlɛ mɔɔ ɔlɛfa yeado ɛ nyunlu la. 20  Buke ɛ nye nea sua ɛhye alehyenlɛ nee aledwolɛ, ɛleka mɔɔ ɛhanle kɛ ɛbamaa wɔ duma ala zolɛ la,+ na tie wɔ sonvolɛ asɔneyɛlɛ mɔɔ ɔkɛhakyi ɔ nye wɔ ɛke ɔkɛyɛ la. 21  Na tie wɔ sonvolɛ modolɛ nee nzɛlɛlɛ mɔɔ wɔ menli Yizilayɛma kɛhakyi bɛ nye wɔ ɛke kɛyɛ la,+ na tie yɛ wɔ anwuma,+ wɔ tɛnlabelɛ lɔ; ɛhɛe, tie na fa kyɛ yɛ.+ 22  “Saa awie yɛ ɔ gɔnwo ɛtane na ɔmaa ɔka ndane* na ndane* ne kye ye, na ɔba wɔ afɔlemokyea ne anyunlu wɔ sua ɛhye anu wɔ mekɛ mɔɔ ndane* ne ɛhye ye la a,+ 23  tie ye wɔ anwuma lɔ na yɛ nwolɛ debie na bua wɔ sonvolɛma ne ndɛne, tua ɛtanevolɛ ne kakɛ na maa mɔɔ ɔyɛle la ɛragua ɔ ti zo+ na bua tenlenenli ne kɛ ɔnze nwolɛ bie* na fa mɔɔ fɛta ye tenleneyɛlɛ ne la maa ye.+ 24  “Na saa wɔ menli Yizilayɛma kɔ zo yɛ ɛtane tia wɔ na bɛ kpɔvolɛ di bɛ nwo zo konim,+ na bɛsia bɛba wɔ ɛkɛ na bɛwula wɔ duma anyunlunyia+ na bɛyɛ asɔne+ na bɛbodo wɔ wɔ sua ɛhye anu a,+ 25  tie bɛ wɔ anwuma lɔ+ na fa wɔ menli Yizilayɛma ɛtane kyɛ bɛ na fa bɛ sia bɛla azɛlɛ ne mɔɔ ɛvale ɛmaanle bɛ nee bɛ nenyia mɔ la azo.+ 26  “Saa bɛto anwuma anu na ezule andɔ+ ɔluakɛ bɛkɔ zo bɛyɛ ɛtane bɛtia wɔ,+ na bɛkakyi bɛ nye wɔ ɛke bɛyɛ asɔne na bɛwula wɔ duma anyunlunyia na bɛtwe bɛ nwo bɛfi bɛ ɛtane ne anwo ɔluakɛ ɛbɛlɛle bɛ aze* la ati a,+ 27  ɛnee tie bɛ wɔ anwuma lɔ na fa wɔ sonvolɛma, wɔ menli Yizilayɛma ɛtane kyɛ bɛ, ɔluakɛ ɛbahile bɛ adenle kpalɛ mɔɔ ɔwɔ kɛ bɛdua nu la;+ na maa ezule ɛdɔ ɛgua+ azɛlɛ ne mɔɔ ɛvale ɛmaanle wɔ menli ne kɛ agyapadeɛ la azo. 28  “Saa ɛhɔne ba azɛlɛ ne azo,+ anzɛɛ ewulenzane,+ anwoma wuluwulu, ewule mɔɔ sɛkye aleɛ,+ abɛbɛ dɔɔnwo anzɛɛ abɛbɛ mɔɔ sɛkye ninyɛne*+ anzɛɛ bɛ kpɔvolɛma ko fa bɛ azuamgbole mɔɔ wɔ bɛ azɛlɛ ne azo la bie*+ anzɛɛ ngyegyelɛ anzɛɛ ewule gyɛne biala ba a,+ 29  asɔneyɛlɛ+ anzɛɛ nzɛlɛlɛ biala+ mɔɔ awie anzɛɛ wɔ menli Yizilayɛma kɔsɔɔti kɛyɛ la (ɔluakɛ awie biala ze ye ngyegyelɛ nee ye nyanelilɛ)+ saa bɛtɛlɛ bɛ sa nu bɛkile sua ɛhye a,+ 30  tie bɛ wɔ anwuma nehane, wɔ tɛnlabelɛ lɔ,+ na fa kyɛ;+ na fa mɔɔ fɛta awie biala ndenle la maa ye, ɔluakɛ ɛdawɔ a ɛze ye ahonle nu a (ɛ ngomekye a ɛze sonla ahonle nu a),+ 31  amaa bɛazulo wɔ na bɛalua wɔ ndenle ne mɔ anu wɔ mekɛ kɔsɔɔti mɔɔ bɛde azɛlɛ ne mɔɔ ɛvale ɛmaanle yɛ nenyia mɔ la azo la. 32  “Ɛyɛvolɛ noko mɔɔ ɛmboka wɔ menli Yizilayɛma anwo na wɔ duma kpole ne*+ nee ɛ sa mɔɔ anu yɛ se yɛɛ ɛ sa mɔɔ tumi wɔ nu la ati, ɔvi moamoa ɔkɛra na ɔkɛhakyi ɔ nye wɔ sua ɛhye anwo ɔkɛyɛ asɔne la,+ 33  tie ye wɔ anwuma nehane, wɔ tɛnlabelɛ lɔ, na yɛ mɔɔ ɛyɛvolɛ ne kɛbiza wɔ la amuala maa ye, amaa menli mɔɔ wɔ azɛlɛ ne azo la amuala anwu wɔ duma+ na bɛazulo wɔ, kɛ mɔɔ wɔ menli Yizilayɛma sulo wɔ la, na bɛanwu kɛ wɔ duma la sua ɛhye mɔɔ mezi la azo. 34  “Saa wɔ menli kɔ kɛ bɛ nee bɛ agbɔvolɛ kaho wɔ adenle mɔɔ ɛkɛzoa bɛ la azo+ na bɛkakyi bɛ nye wɔ suakpole ɛhye mɔɔ wɔye wɔzie ɛkɛ ne nee sua ne mɔɔ mezi memaa wɔ duma+ la anwo na bɛfa asɔneyɛlɛ bɛto ɛ nyunlu a,+ 35  tie asɔne ne nee nzɛlɛlɛ ne mɔɔ bɛyɛ kɛ ɛmaa bɛnyia ɛ nyunlu ɛlolɛ la wɔ anwuma nehane na di bɛ edwɛkɛ maa bɛ.+ 36  “Saa bɛyɛ ɛtane bɛtia wɔ (ɔluakɛ awie biala ɛnle ɛkɛ mɔɔ ɔnyɛ ɛtane a),+ na ɛfa bɛ nwo ɛya na ɛkpo bɛ ɛwula bɛ agbɔvolɛ asa anu, menli mɔɔ ɛhye bɛ la fa bɛ kɔyɛ ngɛkɛlɛ wɔ azɛlɛ mɔɔ wɔ moamoa anzɛɛ ɔbikye bɛ la azo,+ 37  na bɛ nye ba bɛ nwo zo* wɔ azɛlɛ ne mɔɔ bɛhyele bɛ bɛhɔle zolɛ la azo, na bɛsia bɛba wɔ ɛkɛ na bɛbodo wɔ wɔ azɛlɛ ne mɔɔ bɛhyele bɛ bɛhɔle zolɛ la azo, na bɛka kɛ, ‘Yɛyɛ ɛtane yɛɛ yɛvo; yɛbɔ amumuyɛ ɛbɛla,’+ 38  na bɛfa bɛ ahonle muala+ nee bɛ ɛkɛla muala bɛsia bɛba wɔ ɛkɛ wɔ bɛ akɛlɛzonlenlɛ nu azɛlɛ ne azo,+ wɔ ɛleka mɔɔ bɛvale bɛ bɛhɔle akɛlɛzonlenlɛ nu la, na bɛkakyi bɛ nye wɔ bɛ azɛlɛ ne mɔɔ ɛvale ɛmaanle bɛ nenyia mɔ nee suakpole ne mɔɔ wɔkpa la azo+ yɛɛ sua ne mɔɔ mezi memaa wɔ duma la anwo bɛfa bɛ asɔneyɛlɛ bɛto ɛ nyunlu a, 39  tie bɛ asɔneyɛlɛ ne nee bɛ modolɛ ne wɔ anwuma nehane, wɔ tɛnlabelɛ lɔ, na di bɛ edwɛkɛ maa bɛ+ na fa wɔ menli ne mɔɔ ɛyɛ ɛtane ɛtia wɔ la ɛtane kyɛ bɛ. 40  “Ɔti O me Nyamenle, mesɛlɛ wɔ, buke ɛ nye nea na yɛ ɛnzolɛ tie asɔne mɔɔ yɛyɛ ye wɔ ɛke* la.+ 41  Ɔti, O Gyihova Nyamenle, fo kɔ wɔ ɛnwomenlelielɛ ɛleka ne,+ ɛdawɔ nee wɔ anwosesebɛ Ɛlɛka ne. O Gyihova Nyamenle, maa wɔ ɛsɔfoma ne ɛheda ngoanelielɛ, na wɔ nɔhavoma ɛli fɛlɛko wɔ wɔ kpalɛyɛlɛ ne anu.+ 42  O Gyihova Nyamenle, mmakpo* ahenle mɔɔ wɔkpokpa ye la.+ Kakye ɛlɔlɛ kpundii mɔɔ ɛlale ye ali ɛhilele wɔ sonvolɛ Devidi la.”+

Ɔbodwɛkɛ

Hibulu aneɛ nu, “ɛ ra nrenyia, ɛdawɔ ɛ kunlu ralɛ.”
Kubit ko le sm 44.5 (enkyi 17.5). Nea Mok. B14.
Anzɛɛ “na ɔ gɔnwo ne wa ye amonle.” Ɛhye kile, ndane mɔɔ bɛka ye adalɛ nu anzɛɛ bɛto a ɔkakyi amowa la.
Hibulu aneɛ nu, “amowa.”
Hibulu aneɛ nu, “amowa.”
Hibulu aneɛ nu, “kɛ ɔle tenlene.”
Anzɛɛ “ɛhilele bɛ nyane.”
Anzɛɛ “abɛbɛ.”
Hibulu aneɛ nu, “ye nlenkɛ mgbole ne mɔ azɛlɛ ne.”
Anzɛɛ “duma mɔɔ wɔlie.”
Anzɛɛ “bɛ nye zo tete bɛ.”
Anzɛɛ “ɛleka ɛhye anwo.”
Hibulu aneɛ nu, “mmakakyi ɛ nzi ɛsi.”