Edwɛkɛsisilɛ Mɔɔ Tɔ Zo Nwiɔ 5:1-14

  • Bɛzieziele bɛ nwo bɛmaanle ɛzonlenlɛsua ne azo ɛyilalɛ (1-14)

    • Bɛvale Ɛlɛka ne bɛrale ɛzonlenlɛsua ne anu (2-10)

5  Ɔti Sɔlɔmɔn wiele gyima mɔɔ ɔwɔ kɛ ɔyɛ ye wɔ Gyihova sua ne anwo la amuala yɛ.+ Akee Sɔlɔmɔn vale ninyɛne mɔɔ ye papa Devidi yɛle bɛ nwuanzanwuanza la rale,+ na ɔvale dwɛtɛ fufule, nvutuke yɛɛ ninyɛne ne mɔ amuala ɔguale nɔhalɛ Nyamenle ne sua ne anu ninyɛnezielɛ ɛleka ne mɔ anu.+  Mekɛ zɔhane Sɔlɔmɔn boɔboale Yizilayɛ mgbanyinli, mbusua mgbanyinli kɔsɔɔti, Yizilayɛ mbusua mgbanyinli mɔɔ gyigyi bɛ papa mɔ mbusua ti la anloa. Bɛrale Gyɛlusalɛm kɛ bɛkava Gyihova ngyekyeleɛ ɛlɛka ne bɛavi Devidi Suakpole ne+ mɔɔ le Zayɔn la azo bɛara.+  Yizilayɛma kɔsɔɔti boɔboale bɛ nloa wɔ belemgbunli ne anyunlu wɔ ɛvoyia* ne mɔɔ bɛdi ye siane nsuu ne la anu.+  Ɔti Yizilayɛ mgbanyima kɔsɔɔti rale, na Livaema ne maanle Ɛlɛka ne zo.+  Bɛvale Ɛlɛka ne, nyianu ɛdanlɛsua ne+ nee ninyɛne nwuanzanwuanza ne mɔ kɔsɔɔti mɔɔ wɔ ɛdanlɛsua ne anu la bɛrale. Ɛsɔfoma ne nee Livaema* ne mɔ vale ɔ muala rale.  Ɛnee Belemgbunli Sɔlɔmɔn nee Yizilayɛma kɔsɔɔti mɔɔ bɛvɛlɛle bɛ kɛ bɛrayia ye la wɔ Ɛlɛka ne anyunlu. Bɛhunle nlankɛ nee mboane dɔɔnwo bɛbɔle afɔle+ mɔɔ bɛangola bɛ tia anzɛɛ bɛannwu bɛ dodo a.  Akee ɛsɔfoma ne vale Gyihova ngyekyeleɛ ɛlɛka ne ziele ɔ bo zo ne wɔ sua ne akunlu lɔ, Nwuanzanwuanza Nu Nwuanzaanwu Ɛleka ne, wɔ kyɛlɔbe ne mɔ andɛba abo.+  Ɛnee kyɛlɔbe ne mɔ ɛdɛlɛdɛlɛ bɛ ndɛba ne mɔ anu wɔ ɛleka mɔɔ Ɛlɛka ne gyi la, ɔti kyɛlɔbe ne mɔ hedale Ɛlɛka ne nee nwolɛ mbaka ne mɔ azo.+  Ɛnee mbaka ne mɔ wowale, ɔti bɛnwu mbaka ne mɔ ati wɔ Nwuanzanwuanza Ɛleka ne mɔɔ wɔ suakunlu ne anyunlu la, noko bɛnnwu bɛ wɔ alienwo. Na bɛtɛbɔ ɛkɛ ne badwu ɛnɛ. 10  Ɛnee debie biala ɛnle Ɛlɛka ne anu kɛ awolɛ ndɛbandɛba nwiɔ ne mɔɔ Mosisi vale guale nu wɔ Hɔlɛbe,+ mekɛ mɔɔ Gyihova nee Yizilayɛma yɛle ngyekyeleɛ+ wɔ mekɛ mɔɔ bɛvi Yigyibiti bɛlɛba la ala.+ 11  Mekɛ mɔɔ ɛsɔfo ne mɔ vi ɛleka nwuanzanwuanza ne vindele la (ɔluakɛ ɛnee ɛsɔfoma mɔɔ wɔ ɛkɛ ne la amuala ɛmaa bɛ nwo ɛde,+ ɔnva nwo ekpunli mɔɔ bɛwɔ nu la),+ 12  ɛnee Livae edwɛndolɛma ne mɔ amuala+ mɔɔ boka Esafe,+ Himan,+ Gyɛdutɛn+ nee bɛ mra yɛɛ bɛ mediema ne mɔ anwo la, wulowula adɛladeɛ ngɛnlɛma, bɛdedɛ mbulalɛ mɔɔ dielie, getaa* yɛɛ haape; ɛnee bɛgyigyi afɔlemokyea ne aduduleɛ, na ɛsɔfoma 120 mɔɔ bɛlɛbɔ aweɛne ndendenle la boka bɛ nwo.+ 13  Ɔti mekɛ mɔɔ menli mɔɔ bɔ aweɛne ndendenle nee edwɛndolɛma ne ɛlɛbɔ nu aye Gyihova ayɛlɛ na bɛayɛ ye mo, na aweɛne ndendenle ne, mbulalɛ mɔɔ dielie nee edwɛnebɔlɛ ninyɛne gyɛne dede ne ɛlɛfo ahɔ anwuma wɔ mekɛ mɔɔ bɛlɛye Gyihova ayɛlɛ “ɔluakɛ ɔle kpalɛ; ye ɛlɔlɛ kpundii ne wɔ ɛkɛ ne dahuu” la,+ akee amungu rayile sua ne,+ Gyihova sua ne anu. 14  Amungu ne ati, ɛsɔfo ne mɔ angola angyinla ɛkɛ ne anzonle, ɔluakɛ Gyihova anyunlunyia ne yile nɔhalɛ Nyamenle ne sua ne tɛkɛɛ.+

Ɔbodwɛkɛ

Ɛhye kile, Kpɔda Bo Ɛdɛnlanlɛ Ɛvoyia.
Anzɛɛ “Livae ɛsɔfoma ne.”
Tete ɛdeɛ ne le ngakyile fi ɛnɛ mekɛ ye getaa nwo.