Edwɛkɛsisilɛ Mɔɔ Tɔ Zo Nwiɔ 35:1-27

  • Dwosaya yɛle ngyehyɛleɛ maanle bɛlile Akpabɛnwo kpole kpalɛ (1-19)

  • Falo Niko hunle Dwosaya (20-27)

35  Dwosaya lile Akpabɛnwo+ ne maanle Gyihova wɔ Gyɛlusalɛm, na bɛhunle Akpabɛnwo afɔlebɔdeɛ ne+ wɔ siane ne mɔɔ limoa la kenle mɔɔ tɔ zolɛ 14 la azo.+  Ɔvale ɛsɔfo ne mɔ gyima ɔmaanle bɛ na ɔmaanle bɛ anwosesebɛ kɛ bɛyɛ bɛ ɛzonlenlɛ gyima ne mɔɔ bɛyɛ ye wɔ Gyihova sua ne anu la.+  Akee ɔzele Livaema mɔɔ kilehile Yizilayɛma amuala,+ mɔɔ bɛle nwuanzanwuanzama bɛmaa Gyihova la kɛ: “Bɛva Ɛlɛka nwuanzanwuanza ne bɛzie sua ne mɔɔ Devidi ara Sɔlɔmɔn, Yizilayɛ belemgbunli ne zile la anu;+ ɔngyia kɛ bɛkɛzoa ye bɛ kɔme zo bieko. Kɛkala bɛzonle Gyihova bɛ Nyamenle ne nee ye menli Yizilayɛma.+  Na bɛboɔboa bɛ nloa* ekpunli ekpunli kɛ mɔɔ bɛ papa mɔ mbusua ne de la, bɛyɛ ye kɛ mɔɔ Yizilayɛ Belemgbunli Devidi nee ɔ ra Sɔlɔmɔn hɛlɛle dole ɛkɛ ne la.+  Bɛhɔ ɛleka nwuanzanwuanza ne, akee bɛgyinlegyinla ye kɛ mɔɔ bɛ ekpunli ekpunli ne mɔ de la, amaa bɛahola bɛazonle menli ne na bɛayɛ gyima mɔɔ bɛva bɛmaa Livaema mɔɔ wɔ bɛ papa mɔ mbusua ne mɔ anu la.  Bɛhu Akpabɛnwo afɔlebɔdeɛ ne+ na bɛde bɛ nwo na bɛziezie bɛ nwo bɛmaa bɛ mediema ne mɔ bɛmaa bɛli Gyihova edwɛkɛ ne mɔɔ ɔluale Mosisi anwo zo ɔhanle la azo.”  Dwosaya vale mboane mralɛ nyinli nee mbɔnkye mralɛ nyinli dɔɔnwo maanle menli ne kɛ bɛva bɛbɔ Akpabɛnwo afɔle bɛmaa bɛdabɛ mɔɔ bɛwɔ ɛkɛ ne la amuala, ɔ muala dodo le 30,000 yɛɛ nlankɛ 3,000. Ninyɛne ɛhye mɔ amuala vi belemgbunli mumua ne agyapadeɛ nu.+  Ye mgbanyima ne mɔ noko yele ndoboa, bɛvile bɛ ɛhulolɛ nu bɛvale afɔlebɔdeɛ bɛmaanle menli ne, ɛsɔfoma ne yɛɛ Livaema ne. Helekaya,+ Zɛkalaya yɛɛ Gyɛhayɛle, mɔɔ bɛle adekilevolɛma wɔ nɔhalɛ Nyamenle ne sua nu ɛkɛ la vale Akpabɛnwo afɔlebɔdeɛ 2,600 nee nlankɛ 300 maanle ɛsɔfo ne mɔ.  Konanaya nee ɔ mediema Hyɛmaya nee Nɛtanɛle yɛɛ Hahyabaya, Gyiyayɛle nee Dwozabade mɔɔ bɛle Livaema ne mgbanyima la vale Akpabɛnwo afɔlebɔdeɛ 5,000 nee nlankɛ 500 maanle Livaema ne. 10  Bɛzieziele bɛ nwo bɛmaanle ɛvoyialilɛ ne, na ɛsɔfoma ne hɔgyinlanle bɛ bo zo ne yɛɛ Livaema ne gyinlegyinlanle ye ekpunli ekpunli,+ kɛ mɔɔ belemgbunli ne hanle la. 11  Bɛhunle Akpabɛnwo afɔlebɔdeɛ ne+ mɔ, na ɛsɔfoma ne kpondenle mogya ne mɔɔ bɛliele bɛvile bɛ ɛkɛ ne la,+ na Livaema ne yeyele nane ne mɔ anwo nwoma.+ 12  Akee bɛzieziele ɛyelalɛ afɔlebɔdeɛ ne mɔ kɛ bɛfa bɛamaa menli mɔɔ ɛha mɔɔ bɛhyehyɛ bɛ ekpunli ekpunli kɛ mɔɔ bɛ papa mɔ mbusua ne de la, amaa bɛava bɛabɔ afɔle bɛamaa Gyihova kɛ mɔɔ bɛhɛlɛ ye wɔ Mosisi buluku ne anu la; na zɔhane ala a bɛyɛle nlankɛ ne mɔ a. 13  Bɛdonle* Akpabɛnwo afɔlebɔdeɛ ne wɔ senle zo kɛ mɔɔ bɛyɛ ye dɛba la;+ na bɛvale mbuakɛ, danesɛne mgbole yɛɛ ahyɛnze bɛdonle afɔlebɔdeɛ nwuanzanwuanza ne, na mɔɔ bɛwiele la bɛvale bɛrɛlɛle menli mɔɔ ɛha la ndɛndɛ. 14  Akee bɛdonle* bie bɛmaanle bɛ nwo nee ɛsɔfoma ne, ɔluakɛ ɛsɔfo ne mɔ, Aalɔn abozoamra ne bɔle ɛyelalɛ afɔle na bɛyelale ɛnlome too aleɛ dwole, yemɔti Livaema ne donle bie maanle bɛ nwo nee ɛsɔfo ne mɔ, Aalɔn abozoamra ne. 15  Na edwɛndolɛma ne, Esafe+ amra ne mɔ gyinlegyinlanle bɛ bo zo ne kɛ mɔɔ Devidi,+ Esafe,+ Himan yɛɛ belemgbunli ne ɛnyelɛzodeɛnwunlɛnli Gyɛdutɛn+ hanle la; na nlenkɛ mgbole sinzavolɛma ne zinzale nlenkɛ mgbole ngakyile ne mɔ.+ Ɛnee ɔngyia kɛ bɛgyakyi bɛ gyima ne, ɔluakɛ bɛ mediema Livaema ne donle bie maanle bɛ. 16  Kenle zɔhane, bɛwiele debie biala mɔɔ Gyihova hanle kɛ bɛyɛ na bɛali Akpabɛnwo ne+ na bɛabɔ ɛyelalɛ afɔle ne mɔ wɔ Gyihova afɔlemokyea ne azo kɛ mɔɔ Belemgbunli Dwosaya hanle la.+ 17  Yizilayɛma mɔɔ ɛnee wɔ ɛkɛ ne la lile Akpabɛnwo ne wɔ mekɛ zɔhane na bɛlile Paano Mɔɔ Mgbɔvonle Ɛnle Nu Ɛvoyia ne too kenle nsuu.+ 18  Ɛnee bɛtɛdile Akpabɛnwo zɛhae bie ɛlɛ wɔ Yizilayɛ ɔvi ngapezonli Samoɛle mekɛ zo; yɛɛ Yizilayɛ arelemgbunli mɔɔ ɛha la anu biala anli Akpabɛnwo mɔɔ le kɛ mɔɔ Dwosaya,+ ɛsɔfoma ne, Livaema, Dwudama nee Yizilayɛma mɔɔ bɛwɔ ɛkɛ ne la amuala, nee menli mɔɔ de Gyɛlusalɛm la lile la. 19  Dwosaya tumililɛ ɛvolɛ 18 ne azo a bɛlile Akpabɛnwo ɛhye a. 20  Ɛhye mɔ amuala anzi, mɔɔ ɛnee Dwosaya ɛyɛ ɛzonlenlɛsua* ne boɛ ɛwie la, Yigyibiti Belemgbunli Niko+ rale kɛ ɔkaho wɔ Kaakɛmehye mɔɔ wɔ Yufileti ne anloa la. Na Dwosaya vindele hɔle kɛ ɔ nee ye kaho.+ 21  Ɔti ɔzoanle ɛbɔfoɔma wɔ ɔ nwo ɛkɛ ne kɛ: “O Dwuda belemgbunli, duzu a me nee wɔ lɛ ye yɛ a? Ɛnɛ ɛdeɛ, tɛ ɛ nwo zo a melɛba a, sua gyɛne a me nee ye kaho a, na Nyamenle se menyɛ ye ndɛndɛ. Na wɔmɔ, mmasi Nyamenle mɔɔ nee me lua la adenle, anrɛɛ ɔbazɛkye wɔ.” 22  Noko Dwosaya andwe ɔ nwo anvi ɔ nwo, emomu ɔhakyile ɔ nwo sonla gyɛne+ kɛ ɔ nee ye kaho na yeandie Niko edwɛkɛ ne mɔɔ vi Nyamenle anloa anu la. Ɔti ɔrale kɛ ɔ nee ye baho wɔ Mɛgido Azɛlɛ Sɛsɛ ne azo.+ 23  Na ɛdatovoma dole ɛda wɔle Belemgbunli Dwosaya, na belemgbunli ne zele ye sonvolɛma kɛ: “Bɛye me bɛvi ɛke, ɔluakɛ meboda kpole.” 24  Ɔti ye sonvolɛma yele ye vile ehwili ne anu na bɛvale ye bɛdole ye konle ehwili mɔɔ tɔ zolɛ nwiɔ la anu na bɛvale ye bɛrale Gyɛlusalɛm. Yemɔti ɔwule na bɛziele ye wɔ ye nenyia mɔ nla ne anu,+ na Dwudama nee Gyɛlusalɛmma amuala zunle Dwosaya. 25  Na Gyɛlɛmaya+ zunle Dwosaya, na mrenyia nee mraalɛ edwɛndolɛma+ ne amuala ɛhɔ zo ɛdo Dwosaya anwo edwɛne wɔ bɛ awolɛyelɛ* edwɛne nu too yeradwu ɛnɛ; na bɛbɔle kpɔkɛ kɛ ɔwɔ kɛ bɛto ye wɔ Yizilayɛ, na bɛhɛlɛle ye wɔ awolɛyelɛ edwɛne ne mɔ anu. 26  Na Dwosaya anwo tetedwɛkɛ mɔɔ ɛha nee ye ɛlɔlɛ kpundii nyɛleɛ ne mɔ mɔɔ ɔlale bɛ ali na ɔlile mɔɔ bɛhɛlɛ ye wɔ Gyihova Mɛla ne anu azo 27  nee mɔɔ ɔyɛle la, ɔvi mɔlebɛbo kɔdwu awieleɛ, bɛhɛlɛ bɛ wɔ Yizilayɛ nee Dwuda Arelemgbunli Buluku ne anu.+

Ɔbodwɛkɛ

Anzɛɛ “Na bɛziezie bɛ nwo.”
Anzɛɛ ɔkola ɔkile, “Bɛdondonle.”
Anzɛɛ “bɛzieziele.”
Hibulu aneɛ nu, “sua.”
Anzɛɛ “nyanelilɛ.”