Edwɛkɛsisilɛ Mɔɔ Tɔ Zo Nwiɔ 33:1-25

  • Manasɛ, Dwuda belemgbunli (1-9)

  • Manasɛ nlunle ɔ nwo vile ye ɛtane nwo (10-17)

  • Manasɛ ewule ne (18-20)

  • Emɔn, Dwuda belemgbunli (21-25)

33  Manasɛ+ lile ɛvolɛ 12 la yɛɛ ɔrayɛle belemgbunli a, na ɔlile tumi ɛvolɛ 55 wɔ Gyɛlusalɛm.+  Ɔyɛle ɛtane wɔ Gyihova anye zo, ɔlile bɛkyi nyɛleɛ ne mɔ mɔɔ maanle maanle ne mɔ yɛle mɔɔ Gyihova voanle bɛ vile Yizilayɛma anye zo la anzi.+  Ɔsisile ɛzonlenlɛ ɛleka ne mɔ* mɔɔ ye papa Hɛzikaya bubule bɛ guale aze la bieko, ɔsisile afɔlemokyea ɔmaanle Beeyale ne mɔ,+ na ɔyɛle ɛzonlenlɛ mbaka,* na ɔbɔle ɔ ti aze ɔmaanle anwuma ɛlɔne ne mɔ kɔsɔɔti na ɔzonlenle bɛ.+  Eza ɔsisile afɔlemokyea wɔ Gyihova sua nu ɛkɛ,+ ɛleka mɔɔ Gyihova hanle nwolɛ edwɛkɛ kɛ: “Gyɛlusalɛm a me duma badɛnla ye dahuu” la.+  Na ɔsisile afɔlemokyea wɔ Gyihova sua ne alienwo nwiɔ ɛkɛ ɔmaanle anwuma ɛlɔne ne mɔ amuala.+  Na ɔmaanle ɔdaye mumua ne ɔ mra vale senle nu+ wɔ Henɛm Ara Ne Bɔnza ne anu;+ ɔyele ngonyia,+ ɔbizale debie, ɔhɔle silikyevoma ɛkɛ, na ɔkpale menli mɔɔ tendɛ sunsum ɛtane nloa zo nee menli mɔɔ ka kenle bie edwɛkɛ la.+ Ɔyɛle ɛtane kpole wɔ Gyihova anye zo ɔvale ɔhanle ye ɛya.  Ɔvale ananze ne mɔɔ ɔzele la ɔhɔziele nɔhalɛ Nyamenle ne sua ne anu,+ ɛleka mɔɔ Nyamenle hanle nwolɛ edwɛkɛ hilele Devidi nee ɔ ra Sɔlɔmɔn kɛ: “Sua ɛhye nee Gyɛlusalɛm, mɔɔ meye mevi Yizilayɛ mbusua ne mɔ amuala anu la azo a, mebava me duma ne meado ye dahuu a.+  Na saa Yizilayɛma di mɔɔ meha mehile bɛ la amuala, Mɛla ne amuala, ngyehyɛleɛ nee ndɛnebualɛ ne mɔ mɔɔ bɛluale Mosisi anwo zo bɛvale bɛmaanle bɛ la azo pɛpɛɛpɛ a, menrɛye bɛ gyakɛ menrɛvi azɛlɛ ne mɔɔ menvale memaanle bɛ nenyia mɔ la azo bieko ɛlɛ.”  Manasɛ hɔle zo maanle Dwudama nee menli mɔɔ de Gyɛlusalɛm la vonle adenle, na ɔmaanle bɛyɛle mɔɔ ɛnle kpalɛ fee la bɛdɛlale maanle maanle mɔɔ Gyihova zɛkyele bɛ wɔ Yizilayɛma anyunlu la.+ 10  Gyihova hɔle zo dendɛle hilele Manasɛ nee ye menli ne, noko bɛandie.+ 11  Ɔti Gyihova maanle Aselea belemgbunli ne ɛlɔne mgbanyima rale bɛ nwo zo, na bɛbobɔle Manasɛ koba* na bɛvale kɔbele kyeenyi nwiɔ bɛguale ye na bɛvale ye bɛhɔle Babelɔn. 12  Wɔ ye amaneɛnwunlɛ ne anu, ɔzɛlɛle Gyihova ye Nyamenle ne kɛ ɔmaa ɔnyia ɔ nyunlu ɛlolɛ na ɔhɔle zo ɔbɛlɛle ɔ nwo aze kpalɛ wɔ ye nenyia mɔ Nyamenle ne anyunlu. 13  Ɔhɔle zo ɔzɛlɛle Nyamenle, na Nyamenle dele ye modolɛ ne, na Ɔdiele ye modolɛ nzɛlɛlɛ ne, na Ɔmaanle ɔziale ɔrale Gyɛlusalɛm ɔralile ye belemgbunli ne bieko.+ Akee Manasɛ nwunle kɛ Gyihova a le nɔhalɛ Nyamenle ne a.+ 14  Ɛhye anzi ɔliele bane wɔ Devidi Suakpole+ ne anzi wɔ Gaehɔn+ adɔleɛ wɔ bɔnza ne anu too ɔhɔdwule Fɛlɛ Anlenkɛ Kpole ne+ anwo, na ɔvale ɔbɛngale nwolɛ ɔhɔdwule Ofɛle,+ na ɔmaanle ɔhɔle anwuma kpalɛ. Eza ɔkpale ɛlɔne mgbanyima wɔ Dwuda azuamgbole mɔɔ bɛlie nwolɛ bane la amuala azo. 15  Akee ɔyeyele adalɛ nyamenle ne mɔ nee ananze ne mɔ mɔɔ ɔzele la ɔvile Gyihova sua nu ɛkɛ+ ne yɛɛ afɔlemokyea ne mɔ mɔɔ ɔyɛle bɛ wɔ Gyihova sua ne boka ne azo+ nee Gyɛlusalɛm amuala la, na ɔmaanle bɛvuandinle bɛ bɛguale suakpole ne anzi lɔ. 16  Eza ɔyɛle Gyihova afɔlemokyea ne boɛ+ na ɔbɔle ɔ bo ɔbɔle anzodwolɛ afɔle+ nee moyɛlɛ afɔle+ wɔ zo, na ɔzele Dwudama kɛ bɛzonle Gyihova, Yizilayɛ Nyamenle ne. 17  Noko ɔnva nwo kɛ ɛnee menli ne bɔ afɔle maa Gyihova, bɛ Nyamenle ne angomekye la, ɛnee bɛtɛbɔ ye wɔ ɛzonlenlɛ ɛleka ne mɔ.* 18  Na Manasɛ anwo tetedwɛkɛ mɔɔ ɛha la, asɔne mɔɔ ɔyɛle ɔhilele ye Nyamenle ne, nee ɛnyelɛzodeɛnwunlɛma mɔɔ luale Gyihova, Yizilayɛ Nyamenle ne duma nu dendɛle hilele ye la, bɛhɛlɛ bɛ wɔ Yizilayɛ arelemgbunli ne mɔ tetedwɛkɛ ne anu. 19  Eza ye asɔneyɛlɛ+ nee kɛzi bɛbuale ye nzɛlɛlɛ, ye ɛtane ne mɔ amuala nee nɔhalɛ mɔɔ yeanli,+ ɛleka mɔɔ ɔsisile ɛzonlenlɛ ɛleka ne mɔ na ɔvale ɛzonlenlɛ mbaka* ne mɔ+ nee ananze mɔɔ bɛgua la ɔzieziele kolaa na yeabɛlɛ ɔ nwo aze la, bɛhɛlɛ bɛ wɔ ɛnyelɛzodeɛnwunlɛma ne edwɛkɛ ne anu. 20  Akee bɛmaanle Manasɛ nee ye nenyia mɔ hɔlale na ɔliele ɔ menle, na bɛziele ye wɔ ye sua nu ɛkɛ; na ɔ ra Emɔn ralile ye agya lile belemgbunli.+ 21  Emɔn+ lile ɛvolɛ 22 la yɛɛ ɔrayɛle belemgbunli a, na ɔlile tumi ɛvolɛ nwiɔ wɔ Gyɛlusalɛm.+ 22  Na ɔhɔle zo ɔyɛle ɛtane wɔ Gyihova anye zo, kɛ mɔɔ ye papa Manasɛ yɛle ala la;+ na Emɔn bɔle afɔle maanle ananze mɔɔ bɛgua mɔɔ ye papa Manasɛ yɛle la amuala,+ na ɔhɔle zo ɔzonlenle bɛ. 23  Noko yeambɛlɛ ɔ nwo aze wɔ Gyihova anyunlu+ kɛ mɔɔ ye papa Manasɛ bɛlɛle ɔ nwo aze la;+ emomu, Emɔn maanle ye fɔlɛlilɛ ne yɛle kpole kpalɛ. 24  Awieleɛ bɔkɔɔ ne, ye sonvolɛma ne vale ɔ nwo adwenle ɛtane+ na bɛhunle ye wɔ ɔdaye mumua ne ye sua nu. 25  Noko menli mɔɔ wɔ azɛlɛ ne azo la hunle bɛdabɛ mɔɔ bɛvale Belemgbunli Emɔn+ anwo adwenle ɛtane ne la amuala, na bɛyɛle ɔ ra Dwosaya+ belemgbunli bɛziele ɔ gyakɛ anu.

Ɔbodwɛkɛ

Hibulu aneɛ nu, “ɛleka mɔɔ wɔ anwuma.”
Anzɛɛ ɔkola ɔkile, “bɛhyele ye wɔ kuma bie anu.”
Hibulu aneɛ nu, “ɛleka mɔɔ wɔ anwuma la.”