Edwɛkɛsisilɛ Mɔɔ Tɔ Zo Nwiɔ 30:1-27

  • Hɛzikaya lile Akpabɛnwo ne (1-27)

30  Hɛzikaya zoanle menli wɔ Yizilayɛ+ nee Dwuda amuala, na ɔhɛlɛle kɛlata bɔbɔ ɔhɔmaanle Yifelaemma nee Manasɛma+ kɛ bɛrɛla Gyihova sua ne mɔɔ wɔ Gyɛlusalɛm la anu bɛrali Gyihova, Yizilayɛ Nyamenle ne Akpabɛnwo ne.+  Noko belemgbunli ne, ye mgbanyima ne mɔ yɛɛ asafo ne amuala mɔɔ wɔ Gyɛlusalɛm la bɔle kpɔkɛ kɛ bɛbali Akpabɛnwo ne wɔ siane mɔɔ tɔ zolɛ nwiɔ la anu,+  ɔluakɛ bɛangola bɛanli ye wɔ mekɛ mɔɔ ɔwɔ kɛ bɛfa bɛdi la,+ ɔboalekɛ ɛnee ɛsɔfoma dɔɔnwo ɛtɛtele bɛ nwo+ yɛɛ menli ne noko anyia nu wɔ Gyɛlusalɛm.  Belemgbunli ne nee asafo ne amuala anye liele ngyehyɛleɛ ɛhye anwo.  Ɔti bɛbɔle kpɔkɛ kɛ bɛbɔ ye nolo wɔ Yizilayɛ amuala, ɔvi Biyɛ-hyiba kɔdwu Dan,+ kɛ menli ne ɛrɛla na bɛrali Akpabɛnwo ne bɛmaa Gyihova, Yizilayɛ Nyamenle ne wɔ Gyɛlusalɛm, ɔluakɛ kɛ ekpunli la ɛnee bɛtɛdile ye kɛ mɔɔ bɛhɛlɛ bɛdo ɛkɛ ne la ɛlɛ.+  Akee soanvolɛma* ne vale belemgbunli ne nee mgbanyima ne mɔ ngɛlata ne hɔle Yizilayɛ nee Dwuda amuala, kɛ mɔɔ belemgbunli ne hanle la, kɛ: “Yizilayɛma, bɛzia bɛrɛla Gyihova, Ebileham, Ayezeke yɛɛ Yizilayɛ Nyamenle ne ɛkɛ, amaa ɔdaye noko yeazia yeara bɛdabɛ mɔɔ bɛha mɔɔ bɛvile Aselea arelemgbunli ne mɔ asa la anwo ɛkɛ.+  Bɛmmayɛ kɛ bɛ nenyia mɔ nee bɛ mediema ne mɔ mɔɔ anli nɔhalɛ ammaa Gyihova, bɛ nenyia mɔ Nyamenle ne, na yemaa bɛhakyi debie ɛzulolɛ bie, kɛ mɔɔ bɛnwu ye ala la.+  Kɛkala bɛmmakpunli bɛ ahonle kɛ bɛ nenyia mɔ la.+ Bɛbɛlɛ bɛ nwo aze bɛmaa Gyihova na bɛrɛla ye ɛzonlenlɛsua+ ne mɔɔ yede nwolɛ dahuu la anu na bɛzonle Gyihova bɛ Nyamenle ne, amaa ye ɛya wuluwulu ne avi bɛ nwo zo.+  Ɔluakɛ saa bɛsia bɛba Gyihova ɛkɛ a, menli mɔɔ hyele bɛ mediema nee bɛ mra hɔle akɛlɛzonlenlɛ nu la baze bɛ anwunvɔne+ na bɛamaa bɛ adenle bɛamaa bɛazia bɛara azɛlɛ ɛhye azo,+ ɔluakɛ Gyihova bɛ Nyamenle ne akunlu yelɛyela ye* yɛɛ ɔse anwunvɔne,+ na saa bɛsia bɛba ye ɛkɛ a ɔnrɛye ɔ nye ɔnrɛdo ahane.”*+ 10  Ɔti soanvolɛma* ne hɔle Yifelaem nee Manasɛ+ suakpole biala azo, na bɛhɔle Zɛbulɛn bɔbɔ, noko menli ne zelele bɛ na bɛgolole bɛ nwo.+ 11  Noko menli ne bie mɔ mɔɔ bɛvi Ahya, Manasɛ yɛɛ Zɛbulɛn la bɛlɛle bɛ nwo aze na bɛrale Gyɛlusalɛm.+ 12  Eza nɔhalɛ Nyamenle ne asa rale Dwuda anwo zo kɛ ɔka bɛ yeabɔ nu* yeamaa bɛali Gyihova edwɛkɛ mɔɔ belemgbunli ne nee mgbanyima ne mɔ ɛha ɛhile bɛ la azo. 13  Menli dɔɔnwo kpalɛ boɔboale bɛ nloa wɔ Gyɛlusalɛm kɛ bɛdi Paano Mɔɔ Mgbɔvonle Ɛnle Nu Ɛvoyia ne+ wɔ siane ne mɔɔ tɔ zolɛ nwiɔ la anu;+ ɛnee ɔle asafo kpole kpalɛ. 14  Bɛdwazole na bɛyeyele afɔlemokyea ne mɔ mɔɔ wɔ Gyɛlusalɛm la,+ eza bɛyeyele ayilevuanlɛ afɔlemokyea ne+ mɔ amuala na bɛvuandinle bɛ bɛguale Kedelɔn Bɔnza ne anu. 15  Akee bɛhunle Akpabɛnwo afɔlebɔdeɛ ne wɔ siane ne mɔɔ tɔ zolɛ nwiɔ la kenle 14 ne azo. Nyiane hunle ɛsɔfo ne mɔ nee Livaema ne, ɔti bɛdele bɛ nwo na bɛvale ɛyelalɛ afɔlebɔdeɛ bɛrale Gyihova sua nu ɛkɛ. 16  Bɛgyinlegyinlanle bɛ bo zo ne mɔ, kɛ mɔɔ nɔhalɛ Nyamenle ne sonla Mosisi Mɛla ne kile la; akee ɛsɔfo ne mɔ kpondenle mogya ne+ mɔɔ bɛliele bɛvile Livaema ne ɛkɛ la. 17  Ɛnee menli dɔɔnwo wɔ asafo ne anu mɔɔ bɛtɛtele bɛ nwo a, na Livaema ne nleanle hunle Akpabɛnwo afɔlebɔdeɛ ne mɔ maanle menli mɔɔ anwo ɛnde la amuala+ kɛ bɛfa bɛade bɛ nwo bɛamaa Gyihova. 18  Ɔluakɛ ɛnee menli dɔɔnwo kpalɛ, titili menli mɔɔ vi Yifelaem, Manasɛ,+ Yesakaa nee Zɛbulɛn la ɛtɛtele bɛ nwo, noko bɛlile Akpabɛnwo ne bie, na ɛnee ɔ nee mɔɔ bɛhɛlɛ la ɛnyia. Noko Hɛzikaya yɛle asɔne maanle bɛ kɛ: “Gyihova mɔɔ le kpalɛ la+ ɛva ɛhyɛ 19  awie biala mɔɔ ɛziezie ye ahonle kɛ ɔkpondɛ nɔhalɛ Nyamenle ne,+ Gyihova, bɛ nenyia mɔ Nyamenle ne abo zo, ɔnva nwo kɛ ɔtɛtele ɔ nwo kɛ mɔɔ nwuanzanwuanzayɛlɛ nwo mɛla ne kile la.”+ 20  Na Gyihova diele Hɛzikaya na ɔvale ɔhyɛle menli ne.* 21  Ɔti Yizilayɛma mɔɔ wɔ Gyɛlusalɛm la vale anyelielɛ lile Paano Mɔɔ Mgbɔvonle Ɛnle Nu La Ɛvoyia ne too kenle nsuu,+ na Livaema ne nee ɛsɔfoma ne bɔle bɛ edwɛne ninyɛne ne mɔ kpole maanle Gyihova na bɛyele Gyihova ayɛlɛ alehyenlɛ biala.+ 22  Eza Hɛzikaya dendɛle hilele Livaema mɔɔ yɛle bɛ ninyɛne nrɛlɛbɛ nu wɔ Gyihova ɛzonlenlɛ nu la na ɔmaanle bɛ anwosesebɛ.* Na bɛlile aleɛ wɔ ɛvoyialilɛ ne anu too kenle nsuu,+ bɛbɔle anzodwolɛ afɔle+ na bɛyɛle Gyihova, bɛ nenyia mɔ Nyamenle ne mo. 23  Akee asafo ne amuala bɔle kpɔkɛ kɛ bɛdi ye kenle nsuu bieko, yemɔti bɛvale anyelielɛ bɛlile ye kenle nsuu bieko.+ 24  Na Dwuda Belemgbunli Hɛzikaya vale nlankɛ 1,000 nee mboane 7,000 boale menli ne, yɛɛ mgbanyima ne mɔ vale nlankɛ 1,000 nee mboane 10,000 boale menli ne;+ na ɛsɔfoma dɔɔnwo kpalɛ dele bɛ nwo.+ 25  Na Dwuda asafo ne amuala, ɛsɔfo ne mɔ, Livaema ne, menli mɔɔ vi Yizilayɛ rale la amuala+ yɛɛ nyɛvolɛ mɔɔ de bɛ avinli+ mɔɔ bɛvi Yizilayɛ azɛlɛ zo nee bɛdabɛ mɔɔ bɛde Dwuda la hɔle zo lile fɛlɛko. 26  Na anyelielɛ kpole kpalɛ rale Gyɛlusalɛm, ɔluakɛ ɔvi Yizilayɛ Belemgbunli Devidi ara Sɔlɔmɔn mekɛ zo, debie zɛhae bie ɛtɛsile wɔ Gyɛlusalɛm ɛlɛ.+ 27  Awieleɛ bɔkɔɔ ne, Livae ɛsɔfoma ne dwazole na bɛyilale menli ne;+ na Nyamenle dele bɛ ne, na bɛ asɔneyɛlɛ ne dwule ye tɛnlabelɛ nwuanzanwuanza ne, anwuma lɔ.

Ɔbodwɛkɛ

Hibulu aneɛ nu, “ɛnriandilɛma.”
Anzɛɛ “le dovolɛ.”
Anzɛɛ “ɛbɔ nu.”
Hibulu aneɛ nu, “ɛnriandilɛma.”
Hibulu aneɛ nu, “kɛ ɔmaa bɛ ahonle ko.”
Hibulu aneɛ nu, “na ɔyɛle menli ne ayile.”
Hibulu aneɛ nu, “ɔdendɛle ɔhilele bɛ ahonle.”