Edwɛkɛsisilɛ Mɔɔ Tɔ Zo Nwiɔ 29:1-36

  • Hɛzikaya, Dwuda belemgbunli (1, 2)

  • Hɛzikaya vale nzenzaleɛ rale (3-11)

  • Bɛdele ɛzonlenlɛsua ne anwo (12-19)

  • Bɛyɛle ɛzonlenlɛsua ne anu gyima bieko (20-36)

29  Hɛzikaya+ rayɛle belemgbunli la ɛnee yeli ɛvolɛ 25, na ɔlile tumi ɛvolɛ 29 wɔ Gyɛlusalɛm. Ye mame a le Abaegya, Zɛkalaya ara raalɛ ne.+  Ɔhɔle zo ɔyɛle mɔɔ le kpalɛ wɔ Gyihova anye zo,+ kɛ mɔɔ ye nenyia Devidi yɛle ala la.+  Wɔ ye tumililɛ ɛvolɛ mɔɔ limoa la siane mɔɔ limoa la anu, ɔbukebukele Gyihova sua ne nlenkɛ ne mɔ na ɔyɛle bɛ boɛ.+  Akee ɔmaanle ɛsɔfo ne mɔ nee Livaema ne rayiale ɛleka wienyi ne mɔɔ wɔ aduduleɛ la.  Ɔzele bɛ kɛ: “Bɛmɛ Livaema, bɛdie me. Akee bɛmaa bɛ nwo ɛde+ na bɛde Gyihova, bɛ nenyia mɔ Nyamenle ne sua ne anwo, na bɛyeye ninyɛne mɔɔ anwo ɛnde la bɛvi ɛleka nwuanzanwuanza ne.+  Ɔluakɛ yɛ papa mɔ anli nɔhalɛ yɛɛ bɛyɛle mɔɔ le ɛtane wɔ Gyihova yɛ Nyamenle ne anye zo la.+ Bɛkpole ye na bɛyele bɛ nye bɛvile Gyihova ɛdanlɛsua ne anwo na bɛhakyile bɛ nzi bɛzile ye.+  Eza bɛtotole abenlana ne nlenkɛ ne mɔ+ anu na bɛnluonluanle ahɛnlaneɛ ne mɔ.+ Bɛgyakyile ayilevuanlɛ+ mɔɔ bɛyela nee ɛyelalɛ afɔle mɔɔ bɛbɔ+ ye wɔ nwuanzanwuanza ɛleka ne bɛmaa Yizilayɛ Nyamenle ne la.  Ɛhye ati, Gyihova vale Dwuda nee Gyɛlusalɛm anwo ɛya kpole,+ na yemaa bɛhakyi debie ɛzulolɛ bie nee debie mɔɔ yɛ azibɛnwo yɛɛ debie mɔɔ bɛbɔ nwolɛ nvonloma,* kɛ mɔɔ bɛdabɛ bɛkola bɛnwu ye bɛ nye zo la.+  Ɛhye ati a bɛvale konle dadeɛ bɛhuhunle yɛ nenyia mɔ,+ na bɛvale yɛ mra mrenyia, yɛ mra mraalɛ yɛɛ yɛ ye mɔ bɛhɔle akɛlɛzonlenlɛ nu a.+ 10  Kɛkala mekulo ye wɔ me ahonle nu kɛ me nee Gyihova, Yizilayɛ Nyamenle ne bayɛ ngyekyeleɛ,+ amaa ye ɛya wuluwulu ne avi yɛ nwo zo. 11  Me mra, tɛ mekɛ mɔɔ ɔwɔ kɛ bɛbu bɛ nye bɛgua ninyɛne zo* la ɛne, ɔluakɛ Gyihova ɛye bɛ kɛ bɛgyinla ɔ nyunlu bɛzonle kɛ ye azonvolɛ,+ na bɛbɔ ye afɔle ne mɔ bɛmaa ye esike ne ɛhɔ ye ɛkɛ.”+ 12  Ɛhye ati Livaema ne dwazole: Ameesae ara Meehate nee Azalaya ara Dwowɛle mɔɔ bɛle Kohatema+ la; Mɛlɛlaema+ anu, Abedae ara Kehye nee Gyɛhalɛle ara Azalaya; Gɛhyɔnoma+ anu, Zema ara Dwowaa nee Dwowaa ara Yidɛn; 13  Ɛlezeefan amra ne mɔ anu, Hyemelae nee Gyɛyuwɛle; Esafe+ amra ne mɔ anu, Zɛkalaya nee Matanaya; 14  Himan+ amra ne mɔ anu, Gyɛhayɛle nee Hyemɛyae; Gyɛdutɛn+ amra ne mɔ anu, Hyɛmaya nee Ɛzeɛle. 15  Akee bɛboɔboale bɛ mediema ne mɔ anloa na bɛdele bɛ nwo na bɛrale, kɛ mɔɔ belemgbunli ne luale Gyihova edwɛkɛ zo hanle la, kɛ bɛbade Gyihova sua ne anwo.+ 16  Akee ɛsɔfo ne mɔ hɔle Gyihova sua ne anu kɛ bɛkade nwolɛ, na bɛyele ninyɛne mɔɔ anwo ɛnde mɔɔ bɛnwunle bɛ wɔ Gyihova ɛzonlenlɛsua ne anu la bɛvindele na bɛvale bɛhɔle Gyihova sua ne alienwo+ ɛkɛ. Na Livaema ne noko vale vindele na bɛzoale bɛhɔguale Kedelɔn Bɔnza ne anu.+ 17  Ɛhye ati bɛbɔle ɔ bo kɛ bɛte ɛzonlenlɛsua ne anwo wɔ siane mɔɔ limoa la kenle mɔɔ limoa la anu, na wɔ siane ne kenle mɔɔ tɔ zolɛ mɔtwɛ la azo, bɛdwule Gyihova abenlana ne anu.+ Bɛvale kenle mɔtwɛ bɛdele Gyihova sua ne anwo, na bɛwiele wɔ siane mɔɔ limoa la kenle mɔɔ tɔ zolɛ 16 la anu. 18  Ɛhye anzi, bɛhɔle Belemgbunli Hɛzikaya ɛkɛ na bɛzele ye kɛ: “Yɛde Gyihova sua ne amuala, ɛyelalɛ afɔlebɔlɛ afɔlemokyea ne+ nee ye ahyɛnze ne mɔ+ amuala yɛɛ ɛkponle ne mɔɔ bɛfa paano ne mɔɔ bɛgua ye ekpunli ekpunli* bɛgua zolɛ+ nee nwolɛ ahyɛnze ne mɔ amuala anwo. 19  Na ahyɛnze ne mɔ mɔɔ Belemgbunli Ehaze yele bɛ ziele ahane wɔ mekɛ mɔɔ yeanli nɔhalɛ la,+ yɛziezie bɛ yɛɛ yɛde nwolɛ,+ na bɛwɔ Gyihova afɔlemokyea ne anyunlu.” 20  Na Belemgbunli Hɛzikaya dwazole ndɛ nwonlomɔ ne na ɔboɔboale mgbanyima mɔɔ wɔ suakpole ne azo la anloa, na bɛhɔle Gyihova sua nu ɛkɛ. 21  Bɛvale nlankɛ nyinli nsuu, mboane nyinli nsuu, mboane mralɛ nyinli nsuu yɛɛ mbɔnkye nyinli nsuu bɛrale kɛ bɛfa bɛabɔ ɛtane afɔle bɛamaa belemgbunlililɛ ne, ɛzonlenlɛsua ne yɛɛ Dwudama.+ Ɔti ɔhanle ɔhilele ɛsɔfo ne mɔ, Aalɔn abozoamra ne kɛ bɛva bɛbɔ afɔle wɔ Gyihova afɔlemokyea ne azo. 22  Akee bɛhunle nlankɛ ne mɔ,+ na ɛsɔfo ne mɔ vale mogya ne na bɛkpondenle ye wɔ afɔlemokyea ne anwo;+ ɛhye anzi bɛhunle mboane nyinli ne mɔ na bɛkpondenle bɛ mogya ne wɔ afɔlemokyea ne anwo, eza bɛhunle mboane mralɛ nyinli ne mɔ na bɛkpondenle bɛ mogya ne wɔ afɔlemokyea ne anwo. 23  Akee bɛvale mbɔnkye nyinli ne mɔ mɔɔ bɛfa bɛabɔ ɛtane afɔle ne la bɛrale belemgbunli ne nee asafo ne anyunlu na bɛvale bɛ sa bɛguale bɛ nwo zo. 24  Ɛsɔfo ne mɔ hunle bɛ na bɛvale bɛ mogya ne bɛbɔle ɛtane afɔle wɔ afɔlemokyea ne azo bɛyɛle mgbɔdalɛ bɛmaanle Yizilayɛma amuala, ɔluakɛ belemgbunli ne hanle kɛ ɔwɔ kɛ bɛbɔ ɛyelalɛ afɔle ne nee ɛtane afɔle ne bɛmaa Yizilayɛma amuala. 25  Noko ɔmaanle Livaema ne vale mbulalɛ mɔɔ dielie, getaa* yɛɛ haape+ gyinlegyinlanle Gyihova sua nu ɛkɛ ne kɛ mɔɔ Devidi+ nee Gaade,+ belemgbunli ne ɛnyelɛzodeɛnwunlɛnli ne yɛɛ ngapezonli Neetan+ hanle la, ɔluakɛ Gyihova luale ye ngapezoma anwo zo a hanle edwɛkɛ ne a. 26  Ɔti ɛnee Livaema ne dedɛ Devidi edwɛnebɔlɛ ninyɛne ne mɔ gyigyi ɛkɛ, yɛɛ ɛsɔfo ne mɔ noko dedɛ aweɛne ndendenle ne.+ 27  Akee Hɛzikaya hanle kɛ bɛbɔ ɛyelalɛ afɔle ne wɔ afɔlemokyea ne azo.+ Mɔɔ bɛbɔle ɔ bo kɛ bɛbɔ ɛyelalɛ afɔle ne la, Gyihova edwɛne ne nee aweɛne ndendenle ne mɔ ɛbɔlɛ noko bɔle ɔ bo, bɛbɔle bɛ kɛ mɔɔ bɛbɔ Yizilayɛ Belemgbunli Devidi edwɛnebɔlɛ ninyɛne ne mɔ la. 28  Na mɔɔ ɛnee bɛlɛto edwɛne ne na bɛlɛbɔ aweɛne ndendenle ne mɔ la, asafo ne amuala butule bɛ nyunlu aze—ɛhye hɔle zolɛ too bɛbɔle ɛyelalɛ afɔle ne bɛwiele. 29  Na mɔɔ bɛbɔle afɔle ne bɛwiele ala la, belemgbunli ne nee menli mɔɔ boka ɔ nwo la amuala hotole na bɛbutubutule bɛ nyunlu aze. 30  Akee Belemgbunli Hɛzikaya nee mgbanyima ne mɔ zele Livaema ne kɛ bɛva Devidi+ nee ɛnyelɛzodeɛnwunlɛnli Esafe+ edwɛkɛ ne mɔ bɛye Gyihova ayɛlɛ. Ɔti bɛvale anyelielɛ kpole bɛyele ayɛlɛ, bɛhotole na bɛbutubutule bɛ nyunlu aze. 31  Akee Hɛzikaya hanle kɛ: “Kɛkala mɔɔ bɛye bɛ bɛzie ahane* bɛmaa Gyihova la, bɛrɛla na bɛva afɔlebɔdeɛ nee moyɛlɛ afɔlebɔdeɛ bɛrɛla Gyihova sua nu.” Ɔti asafo ne bɔle ɔ bo kɛ bɛfa afɔlebɔdeɛ nee moyɛlɛ afɔlebɔdeɛ bɛara, na awie biala mɔɔ ye ahonle hanle ye la vale ɛyelalɛ afɔlebɔdeɛ rale.+ 32  Ɛyelalɛ afɔlebɔdeɛ dodo mɔɔ asafo ne vale rale la le nlankɛ 70, mboane nyinli 100, mboane mralɛ nyinli 200—bɛvale ɛhye mɔ amuala bɛrale kɛ bɛfa bɛabɔ ɛyelalɛ afɔle bɛamaa Gyihova+ 33  yɛɛ afɔlebɔdeɛ nwuanzanwuanza ne le nlankɛ 600 nee mboane 3,000. 34  Noko kɛmɔ ɛsɔfoma mɔɔ bɛayeye ɛyelalɛ afɔlebɔdeɛ ne mɔ amuala anwo nwoma ne anwo anzo la ati, bɛ mediema Livaema ne boale bɛ+ too bɛwiele gyima ne, na ɛnee akee ɛsɔfo ne mɔ bahola ade bɛ nwo,+ ɔluakɛ ɛnee Livaema ne adwenle wɔ bɛ nwo mɔɔ bɛmaa yeade la azo* tɛla ɛsɔfo ne mɔ. 35  Ɛnee ɛyelalɛ afɔlebɔdeɛ+ nee ɛnlome mɔɔ bɛbava bɛabɔ anzodwolɛ afɔle+ la yɛɛ nza mɔɔ bɛbava bɛabɔ ɛyelalɛ afɔle+ la dɔɔnwo noko wɔ ɛkɛ. Ɛhye ati, bɛbɔle Gyihova sua ne anu ɛzonlenlɛ gyima ne abo* bieko. 36  Ɔti Hɛzikaya nee menli ne amuala anye liele wɔ mɔɔ nɔhalɛ Nyamenle ne ɛyɛ ɛmaa menli ne la anwo,+ ɔluakɛ ɛhye mɔ amuala zile arɛlevilɛ nu.

Ɔbodwɛkɛ

Anzɛɛ “agolobɛnwo debie.”
Anzɛɛ “bɛdie bɛ menle.”
Ɛhye kile, paano ne mɔɔ bɛfa bɛkile.
Tete ɛdeɛ ne le ngakyile fi ɛnɛ mekɛ ye getaa nwo.
Hibulu aneɛ nu, “Kɛkala bɛmaa tumi ɛyi bɛ sa.”
Hibulu aneɛ nu, “ahonle nu te.”
Anzɛɛ “bɛzieziele ye.”